CNI Sport News
၂၀၂၅ ခုနှစ်၊ ဇန်နဝါရီ ၂၇
ယူနိုက်တက်အသင်း နည်းပြအာမိုရင်က တိုက်စစ်မှူး ရက်ရှ်ဖို့ဒ်ထက် အသက် ၆၃ နှစ်အရွယ်ရှိ ဂိုးနည်းပြ ဗိုင်တယ်လ်ကို ရွေးချယ်ရတာ ပိုပြီးကောင်းတယ်လို့ ဖူလ်ဟမ်အသင်းကို အနိုင်ရခဲ့တဲ့ပွဲအပြီးမှာ ရက်ရှ်ဖို့ဒ်ကို ချန်လှပ်ခဲ့တာနဲ့ ပတ်သက်ပြီး ပြောခဲ့ပါတယ်။
အာမိုရင်က “ရက်ရှ်ဖို့ဒ်ကို ချန်လှပ်ခဲ့တာက အမြဲတမ်း အတူတူပါပဲ။ အကြောင်းပြချက်ကတော့ လေ့ကျင့်မှု လုပ်ဆောင်တဲ့ အရာပါ။ အဲဒါကြောင့် အခြေအနေတွေ မပြောင်းရင် ကျနော် မပြောင်းလဲပါဘူး။ ဒါဟာ ကစားသမားတိုင်းအတွက် တူညီတဲ့ အခြေအနေတစ်ခုပါပဲ။ အမြင့်ဆုံးအရာတွေ လုပ်မယ်၊ မှန်ကန်တဲ့ အရာတွေ လုပ်မယ်ဆိုရင် ကျနော်တို့ ကစားသမားတိုင်းကို အသုံးပြုနိုင်ပါတယ်။ နေ့တိုင်း အမြင့်ဆုံးအရာတွေကို မပေးနိုင်တဲ့ ကစားသမားထက် ဗိုင်တယ်လ်ကိုပဲ လူစာရင်းထဲထည့်လာမှာပါ။ အဲဒါကြောင့် ဒါကို ကျနော်မပြောင်းလဲဘူး”လို့ ပြောခဲ့တာပါ။
ရက်ရှ်ဖို့ဒ်ဟာ ယူနိုက်တက်အသင်းက ဖူလ်ဟမ်အသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ လူစာရင်းထဲ မပါဝင်ခဲ့ပြီးနောက် အသင်းနောက်ဆုံး ကစားခဲ့တဲ့ ၁၁ ပွဲစလုံး ပါဝင်ခွင့်မရခဲ့တာ ဖြစ်ပါတယ်။
ရက်ရှ်ဖို့ဒ်ဟာ ဒီဇင်ဘာ ၁၅ ရက်က မန်စီးတီးအသင်းနဲ့ မန်ချက်စတာဒါဘီပွဲစဉ်မှာ လူစာရင်းကနေ ချန်လှပ်ခံရပြီး နောက် စိန်ခေါ်မှုအသစ်ကို ရှာဖွေဖို့ အဆင်သင့် ဖြစ်နေပြီလို့ ပြောခဲ့တာပါ။
ဒါပေမယ့် ရက်ရှ်ဖို့ဒ်ဟာ ဇန်နဝါရီအပြောင်းအရွှေ့အတွင်းမှာ လက်ရှိအချိန်အထိ အသင်းသစ် မရရှိသေးတာ ဖြစ်ပါတယ်။
ရက်ရှ်ဖို့ဒ်ကို တွေ့ရစဉ်
ရက်ရှ်ဖို့ဒ်ဟာ ယူနိုက်တက်အသင်းအတွက် ပြန်လည်ကစားပေးဖို့ ဆန္ဒရှိနေပေမယ့် နည်းပြအာမိုရင်က သူ့ရဲ့စိတ်နေ သဘောထားကို မပြောင်းလဲဘူးဆိုရင် အသင်းထံခေါ်ယူမှာ မဟုတ်ဘူးလို့ ပြောခဲ့တာပါ။
အင်္ဂလန်ကစားသမားဟာ ယူနိုက်တက်အသင်းအတွက် ပါဝင်ကစားခွင့် မရခဲ့ပေမယ့် ဖူလ်ဟမ်အသင်းနဲ့ပွဲမှာ နိုင်ပွဲရယူနိုင်ခဲ့တဲ့ သူ့ရဲ့အသင်းဖော်တွေကို ဆိုရှယ်မီဒီယာကနေ ဂုဏ်ပြုခဲ့ပါတယ်။
ယူနိုက်တက်အသင်း နည်းပြအာမိုရင်က ဖူလ်ဟမ်အသင်းနဲ့ပွဲဟာ သူတို့ရဲ့ အကောင်းဆုံးပွဲ မဟုတ်ခဲ့ပေမယ့် အနိုင်ရဖို့နဲ့ ၃ မှတ်ရယူနိုင်ခဲ့တဲ့ ခံစားချက်က အလွန်အရေးပါခဲ့တယ်လို့ ပြောခဲ့တာပါ။
ဒါအပြင် အသက် ၄၀ နှစ် ပြည့်ခဲ့တဲ့ပြီဖြစ်တဲ့ ပေါ်တူဂီလူမျိုးနည်းပြ အာမိုရင်က ယူနိုက်တက်အသင်းကို ကိုင်တွယ်အပြီးမှာ သူအသက် ပိုကြီးလာတယ်လို့ ခံစားရကြောင်းလည်း ပြောခဲ့ပါတယ်။
ယူနိုက်တက်အသင်းဟာ ဖူလ်ဟမ်အသင်းကို အနိုင်ရရှိခဲ့တာကြောင့် ပရီးမီးယားလိဂ်ပွဲစဉ် ၂၃ ပွဲ ကစားအပြီးမှာ ရမှတ် ၂၉ မှတ်နဲ့ အမှတ်ပေးဇယားအဆင့် ၁၂ နေရာမှာ ရပ်တည်နေတာပါ။
ယူနိုက်တက်အသင်းဟာ ကြားရက်ထဲမှာ ယူရိုပါလိဂ်အုပ်စုအဆင့် နောက်ဆုံးပွဲစဉ်အဖြစ် FCSB အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
