CNI Sport News
၂၀၂၅ ခုနှစ်၊ မတ်လ ၁၈
ယူနိုက်တက်အသင်းဟာ လာမယ့်နွေရာသီမှာ တိုက်စစ်ပိုင်းကို အားဖြည့်ဖို့အတွက် တိုက်စစ်မှူး ၄ ဦးကို အသင်း ခေါ်ယူမယ့် ကစားသမားစာရင်းထဲ ထည့်သွင်းခဲ့ပါတယ်။
ယူနိုက်တက်အသင်းဟာ စိတ်ပျက်ဖွယ်ရလဒ်တွေနဲ့ ဒီရာသီကို ဖြတ်သန်းနေရပြီးနောက် အသင်းကို ပြန်လည် ပြုပြင်တည်ဆောက်ဖို့ လုပ်ဆောင်နေတာပါ။
မန်ချက်စတာကလပ်ဟာ ပရီးမီးယားလိဂ်ပြိုင်ပွဲမှာ အမှတ်ပေးဇယားအဆင့် ၁၃ နေရာ ရပ်တည်နေပြီး ဒီရာသီ အသင်းရဲ့ တစ်ခုတည်းသော ဆုဖလား မျှော်လင့်ချက်ဖြစ်တဲ့ ယူရိုပါလိဂ်ပြိုင်ပွဲမှာတော့ ကွာတားဖိုင်နယ်ကို ရောက်ရှိနေတာဖြစ်ပါတယ်။
ယူနိုက်တက်အသင်းဟာ နောက်ဆုံးကစားခဲ့တဲ့ လက်စတာအသင်းနဲ့ပွဲစဉ်မှာ ဂိုးပြတ်နိုင်ပွဲရရှိခဲ့ပြီး ၂၁ ပွဲဆက်တိုက် ဂိုးပေါက် ပျောက်ဆုံးနေတဲ့ တိုက်စစ်မှူးဟော့ဂျ်လန်းရဲ့ သွင်းဂိုးကို ပြန်လည်မြင်တွေ့ခဲ့ရတာပါ။
Sky Sports က ယူနိုက်တက်အသင်းဟာ နည်းပြအာမိုရင်နဲ့ လက်တွဲလုပ်ခဲ့ဖူးတဲ့ တိုက်စစ်မှူးတစ်ဦး အပါအဝင် တိုက်စစ်မှူး ၄ ဦးကို နွေရာသီမှာ ခေါ်ယူမယ့် ကစားသမားစာရင်းထဲ ထည့်သွင်းထားတယ်လို့ ဖော်ပြခဲ့ပါတယ်။
ယူနိုက်တက်အသင်းကို တွေ့ရစဉ်
ယူနိုက်တက်အသင်းခေါ်ယူမယ့် ကစားသမားစာရင်းထဲ ပါဝင်နေတဲ့ တိုက်စစ်မှူး ၄ ဦးကတော့ စပို့တင်းလစ္စဘွန်း အသင်းက ယိုကီရက်စ်၊ ဖရန့်ဖတ်အသင်းက အီကီတီကီ၊ လိုက်ပ်ဇစ်အသင်းက ဆက်စ်ကိုနဲ့ ဂါလာတာစာရေး အသင်းမှာ အငှားကစားနေတဲ့ အိုဆင်ဟမ်တို့ ဖြစ်ပါတယ်။
ဒီတိုက်စစ်မှူးတွေဟာ ဒီရာသီ သူတို့ရဲ့အသင်းတွေမှာ သွင်းဂိုးတွေသွင်းယူပြီး ခြေစွမ်းပြသနေတာပါ။
ယူနိုက်တက်အသင်းရဲ့ တိုက်စစ်မှူးတွေဖြစ်တဲ့ ဟော့ဂျ်လန်းဟာ ဒီရာသီမှာအသင်းအတွက် ၈ ဂိုးနဲ့ ဇက်ခ်ဇီက ၆ ဂိုးသာ သွင်းယူထားနိုင်ပါတယ်။
ဒီရာသီမှာ ယူနိုက်တက်အသင်းအတွက် ဂိုးအများဆုံး သွင်းယူထားတဲ့သူက အသင်းခေါင်းဆောင် ဘရူနို ဖာနန်ဒက်စ် ဖြစ်ပြီး ပြိုင်ပွဲစုံ ၁၆ ဂိုးသွင်းယူထားတာပါ။
အဲဒါကြောင့် ယူနိုက်တက်အသင်းဟာ နွေရာသီမှာ တိုက်စစ်မှူးသစ် တစ်ဦးခေါ်ယူနိုင်ဖို့ ပြင်ဆင်နေပေမယ့် အသင်းရဲ့ ဘဏ္ဍာရေး အခက်အခဲတွေကြောင့် ကစားသမားအချို့ကို ရောင်းချမှုတွေ အရင်ပြုလုပ်ရဖို့ ရှိနေတာ ဖြစ်ပါတယ်။
Source: Dailymail
