CNI Sport News
၂၀၂၅ ခုနှစ်၊ ဇန်နဝါရီ ၁၇
ယူနိုက်တက်အသင်းက ဆောက်သမ်တန်အသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အသင်း အတွက် နောက်ကျ ဟက်ထရစ် သွင်းခဲ့တဲ့ အာမတ်ကို နည်းပြအာမိုရင်က ကျေးဇူးတင်ခဲ့ပြီး သူ့ကြောင့် ဆာဂျင် ရက်ကလစ်ဖ်နဲ့ စကားပြောခဲ့တာမှာ ချောမွေ့ခဲ့တယ်လို့ ပြောခဲ့ပါတယ်။
အာမိုရင်က “ကျနော် ဆာဂျင်ရက်ကလစ်ဖ်နဲ့ ၅ မိနစ်ကြာရှိခဲ့ပြီး ကွဲပြားခြားနားတဲ့ အကြောင်းအရာတွေကို ပြောခဲ့ ပါတယ်။ ဒါက ကောင်းမွန်တဲ့ပွဲ မဟုတ်ခဲ့ပေမယ့် ရလဒ်က စကားပြောဆိုမှုကို အထောက်အကူ ဖြစ်ခဲ့ပါတယ်။ ဒီပွဲအနိုင်ရဖို့က ကျနော်တို့အတွက် အလွန်အရေးကြီးပါတယ်။ ပရိသတ်တွေက ပိုကောင်းတဲ့ ဘောလုံးပွဲကို ကြည့်ချင်တယ်ဆိုတာ သိပေမယ့် ပွဲတွေကို အနိုင်ရဖို့လိုပါတယ်။ အသင်းက နိုင်ပွဲရဖို့ ထိုက်တန်တဲ့အတွက် ကျနော်အလွန်ပျော်ပါတယ်”လို့ ပြောခဲ့တာပါ။
ယူနိုက်တက်အသင်းဟာ ဒီပွဲမှာ အမှတ်ပေးဇယားအဆင့် ၂၀ နေရာမှာ ရပ်တည်နေတဲ့ ဆောက်သမ်တန်အသင်းကို မိနစ် ၈၀ အထိ ၁ ဂိုး-ဂိုးမရှိနဲ့ အရေးနိမ့်နေခဲ့တာ ဖြစ်ပါတယ်။
ဒါပေမယ့် အာမတ်ဟာ ၁၂ မိနစ်အတွင်း ဟက်ထရစ် ဂိုးသွင်းပေးပြီး ယူနိုက်တက်အသင်းကို နိုင်ပွဲရရှိအောင် စွမ်းဆောင်ပေးနိုင်ခဲ့တာပါ။
အာမတ်ကို တွေ့ရစဉ်
ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်မှာ နိုင်ပွဲပျောက်ဆုံး နေတာကိုလည်း အဆုံးသတ် နိုင်ခဲ့ပါတယ်။
ပြီးခဲ့တဲ့ရက်ပိုင်းကမှ ယူနိုက်တက်အသင်းနဲ့ ၅ နှစ် စာချုပ်သစ်ချုပ်ခဲ့တဲ့ အာမတ်ဟာ ဒီရာသီမှာ အသင်းအတွက် ခြေစွမ်းပြသနေပြီး သူ့ရဲ့စီနီယာ ကစားသမားဘဝ ပထမဆုံး ဟက်ထရစ်ကို ရယူနိုင်ခဲ့တာပါ။
ယူနိုက်တက်အသင်း နည်းပြ အာမိုရင်က အာမတ်ကို ချီးကျူးခဲ့ပြီး လာမယ့်ပွဲမှာလည်း သူ့ကိုလိုအပ်တယ်လို့ ပြောခဲ့ပါတယ်။
အာမိုရင်က “အာမတ်ဟာ အလွန်ကောင်းမွန်တဲ့ အလုပ်ကို လုပ်ခဲ့ပြီး ယူနိုက်တက်အသင်းအတွက် ဟက်ထရစ် သွင်းယူနိုင်ခဲ့တာက လူငယ်ကစားသမားအတွက် အလွန်ကောင်းမွန်တဲ့ အခိုက်အတန့်ပါ။ သူဟာ ကျနော်တို့ကို ကူညီခဲ့ပြီး အလွန်ကောင်းမွန်တဲ့ ရာသီတစ်ခုကို လုပ်ဆောင်နေပါတယ်။ သူ့ကို ကျနော်ဂုဏ်ယူပါတယ်”လို့ ပြောခဲ့တာပါ။
အသက် ၂၂ နှစ်အရွယ်ရှိ အာမတ်ဟာ ဒီရာသီမှာ ယူနိုက်တက်အသင်းအတွက် ပွဲပေါင်း ၃၀ ပါဝင်ကစားထားပြီး ၉ ဂိုး သွင်းယူထားပါတယ်။
ဆောက်သမ်တန်အသင်းကို အနိုင်ရခဲ့တာကြောင့် အဆင့် ၁၂ နေရာအထိ တက်နိုင်ခဲ့တဲ့ ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပါတယ်။
Source: ESPN
