CNI Sport News
၂၀၂၄ ခုနှစ်၊ အောက်တိုဘာ ၂၈
ဘရာဇီးလ်စီးရီးအေပွဲစဉ်တစ်ပွဲမှာ ခရူဇီယိုအသင်းတိုက်စစ်မှူး ရာဖာဆေးလ်ဗားဟာ ပွဲစပြီး ၃ စက္ကန့်အကြာမှာ ပြိုင်ဘက်ကစားသမားကို တံတောင်နဲ့တိုက်ခဲ့တဲ့အတွက် တိုက်ရိုက်အနီကတ်ပြ ထုတ်ပယ်ခံခဲ့ရပါတယ်။
အသက် ၃၂ နှစ်အရွယ်ရှိ ရာဖာဆေးလ်ဗားဟာ ခရူဇီယိုအသင်းနဲ့ အသလက်တီကိုပါရာနန်စီအသင်းတို့ ကစားခဲ့တဲ့ ပွဲစဉ်မှာ ဒီအဖြစ်အပျက်ဖြစ်ခဲ့တာပါ။
စပေးဘောပေးတဲ့အချိန်မှာ ရာဖာဆေးလ်ဗားဟာ ဘောလုံးပိုင်ဆိုင်မှု ရရှိ ထားတဲ့ ရိုချာဆီကို ပြေးပြီး လည်ပင်းကို တံတောင်နဲ့ တိုက်ခဲ့တာဖြစ်ပါတယ်။
အဲဒါကြောင့် ကွင်းလယ် ဒိုင်လူကြီးဟာ ပွဲကိုရပ်တန့်ပြီး ရာဖာဆေးလ်ဗားဆီကိုသွားရောက်ကာ တိုက်ရိုက်အနီကတ် ပြသခဲ့တာပါ။
ဒီအနီကတ်ဟာ ဘောလုံးသမိုင်းမှာ အမြန်ဆုံးအနီကတ်တွေထဲက တစ်ခုအဖြစ်လည်း မှတ်တမ်းဝင်ခဲ့ပါတယ်။
ရာဖာဆေးလ်ဗားရဲ့ အနီကတ်ကြောင့် ခရူဇီယိုအသင်းဟာ အသလက်တီကိုပါရာနန်စီအသင်းကို ၃ ဂိုး-ဂိုးမရှိနဲ့ ဂိုးပြတ်အရေးနိမ့်သွားခဲ့ပါတယ်။
ခရူဇီယိုအသင်းဟာ ဒီပွဲအရေးနိမ့်ခဲ့တာကြောင့် ဘရာဇီးလ်စီးရီးအေ အမှတ်ပေး ဇယားအဆင့် ၈ နေရာမှာရပ်တည်နေပြီး ပါရာနန်စီအသင်းကတော့ နိုင်ပွဲရခဲ့တဲ့အတွက် တန်းဆင်းဇုန် အပြင်ဘက် ဖြစ်တဲ့ အဆင့် ၁၅ နေရာကို ရောက်ရှိသွားခဲ့တာပါ။
ရာဖာဆေးလ်ဗားဟာ သူ့ရဲ့ကစားသမားဘဝကို ဘရာဇီးလ်၊ဂျပန်၊တရုတ်၊တောင်ကိုရီးယားနဲ့ ဆွစ်ဇာလန်လိဂ် တွေမှာ ဖြတ်သန်းခဲ့ပြီး ဂျပန်ကလပ် အူရာဝါရက်အသင်းနဲ့ ၂၀၁၇ က အာရှချန်ပီယံလိဂ်ဖလား ရရှိခဲ့ပါတယ်။
ဒါ့အပြင် ရာဖာဆေးလ်ဗားဟာ တရုတ်ကလပ် ဝူဟန်အသင်းနဲ့ လိဂ်ဝမ်းဖလားကို ရယူနိုင်ခဲ့တာပါ။ ဘရာဇီးလ် နိုင်ငံသားဖြစ်တဲ့ ရာဖာဆေးလ်ဗားဟာ နိုင်ငံအသင်းမှာတော့ ပါဝင်ကစားခဲ့ဖူးခြင်းမရှိပါဘူး။
ခရူဇီယိုအသင်းဟာ ကြားရက်ထဲမှာ ကိုပါဆူဒါမာရီကာနာဖလား ဆီမီးဖိုင်နယ်ပွဲစဉ်ယှဉ်ပြိုင်ရမှာဖြစ်ပြီး ဒီပွဲပြီးရင် ဘရာဇီးလ်စီးရီးအေပွဲစဉ်အဖြစ် ဖလာမင်ဂိုအသင်းနဲ့ ယှဉ်ပြိုင်ရမှာဖြစ်ပါတယ်။
Source:The Sun
