CNI Sport News
၂၀၂၄ ခုနှစ်၊ မတ်လ ၁၄
ဝေးလ်စ်အသင်းနည်းပြဟောင်း ရိုင်ယန်ဂစ်ဟာ ယူနိုက်တက်အသင်းဖော်ဟောင်း Class of 92 အစုအဖွဲ့နဲ့အတူ ပူးတွဲပိုင်ဆိုင်ထားတဲ့ ဆဲလ်ဖို့ဒ်စီးတီးအသင်းမှာ ဘောလုံးဒါရိုက်တာအဖြစ် လုပ်ကိုင်နေပါတယ်။
အသက် ၅၀ နှစ်အရွယ်ရှိ ရိုင်ယန်ဂစ်ဟာ ဂယ်ရီနဗီးလ်၊ ဖီးလ်နဗီးလ်၊ ပေါလ်စခိုးလ်၊ ဒေးဗစ်ဘက်ခမ်း၊ နစ်ကီဘတ် တို့နဲ့အတူ လိဂ်တူးကလပ် ဆဲလ်ဖို့ဒ်စီးတီးအသင်းရဲ့ ရှယ်ယာ ၁၀ ရာခိုင်နှုန်းကို ပိုင်ဆိုင်ထားတာပါ။
ရိုင်ယန်ဂစ်ဟာ ၂၀၂၂ ခုနှစ်၊ ဇွန်လက ဝေးလ်စ်အသင်း နည်းပြရာထူးကနေ နုတ်ထွက်ပြီးကတည်းက ဆဲလ်ဖို့ဒ်စီးတီးအသင်းမှာ ဘောလုံးဒါရိုက်တာအဖြစ် လုပ်ကိုင်တာက သူ့ရဲ့ ပထမဆုံး အလုပ်ဖြစ်ခဲ့ပါတယ်။
ရိုင်ယန်ဂစ်ဟာ ရည်းစားဟောင်းနဲ့ သူမရဲ့ ညီမဖြစ်သူကို အိမ်တွင်း အကြမ်းဖက်မှု ပြုလုပ်ခဲ့တယ်ဆိုပြီး စွပ်စွဲခံခဲ့ ရပေမယ့် ၂၀၂၃ ခုနှစ်၊ ဇွန်လမှာ အမှုရုပ်သိမ်းခံခဲ့ရလို့ အရေးယူမှုကနေ လွတ်မြောက်ခဲ့တာပါ။
ရိုင်ယန်ဂစ်ကို တွေ့ရစဉ်
ရိုင်ယန်ဂစ်ဟာ နည်းပြလောကထဲကို ပြန်လည်ဝင်ရောက်ချင်တယ်လို့ ပြောထားပေမယ့် သူပူးတွဲပိုင်ဆိုင်တဲ့ အသင်းမှာ ဘောလုံးဒါရိုက်တာအဖြစ် စတင်လုပ်ကိုင်နေတာ ဖြစ်ပါတယ်။
ရိုင်ယန်ဂစ်ရဲ့ အသင်းဖော်ဟောင်း နစ်ကီဘတ်ကတော့ ဆဲလ်ဖို့ဒ်စီးတီးအသင်းရဲ့ အမှုဆောင်အရာရှိချုပ်အဖြစ် အောက်တိုဘာလ ကတည်းက တာဝန်ယူထားတာပါ။
ဆဲလ်ဖို့ဒ်စီးတီးအသင်းဟာ ကလပ်ရဲ့ ဘောလုံးဒါရိုက်တာအဖြစ် ရိုင်ယန်ဂစ် လုပ်ကိုင်နေတာကို တရားဝင် အတည်မပြုထားပေမယ့် ပြီးခဲ့တဲ့လက လက်ထောက်နည်းပြအဖြစ် အဲလက်စ်ဘရုစ် ရောက်ရှိလာခဲ့တာကို အတည်ပြု ထုတ်ပြန်ခဲ့တာမှာ ရိုင်ယန်ဂစ်ရဲ့ အခန်းကဏ္ဍကို ဖော်ပြခဲ့တာဖြစ်ပါတယ်။
ဆဲလ်ဖို့ဒ်စီးတီးအသင်းဟာ လိဂ်တူးပြိုင်ပွဲရဲ့ အမှတ်ပေးဇယားအဆင့် ၂၀ နေရာမှာ ရပ်တည်နေပြီး တန်းဆင်းဇုန် ထဲက အသင်းနဲ့ ၈ မှတ်ကွာဟနေတာပါ။
ရိုင်ယန်ဂစ်နဲ့ Class of 92 အစုအဖွဲ့တို့ဟာ မတ်လ ၂၇ ရက်မှာ ဆဲလ်ဖို့ဒ်စီးတီးအသင်းကို ပိုင်ဆိုင်တာ ၁၀ နှစ်ပြည့် မယ်လို့ သိရပါတယ်။
