CNI Sport News
၂၀၂၄ ခုနှစ်၊ မတ်လ ၁၄
PSV အသင်းကို အနိုင်ရခဲ့တဲ့ ချန်ပီယံလိဂ် ၁၆ သင်းအဆင့် ဒုတိယအကျော့ပွဲစဉ်မှာ ဒေါ့မွန်အသင်းအတွက် ခြေစွမ်းပြသပြီး ဂိုးသွင်းနိုင်ခဲ့တဲ့ ဆန်ချိုက သူ့ကိုယုံကြည်တဲ့အသင်းကို ကျေးဇူးတင်တယ်လို့ ပြောခဲ့ပါတယ်။
ဆန်ချိုက “ကျနော်တို့ဟာ ပွဲအစကနေ နောက်ဆုံးမိနစ်အထိ အကောင်းဆုံးကစားနိုင်ခဲ့ပြီး နိုင်ပွဲရယူနိုင်ခဲ့လို့ ဝမ်းသာပါတယ်။ အသင်းအတွက် ဂိုးသွင်းနိုင်ခဲ့တာကြောင့် ပျော်ရွှင်ပါတယ်။ ကျနော့်မှာ ဒေါ့မွန်အတွက် အထူး နေရာ အမြဲတမ်းရှိပါတယ်။ ဒီနေရာက ကျနော့်ရဲ့ နာမည်ဖြစ်လာအောင်လုပ်ပေးခဲ့တဲ့ နေရာပါ။ ဒါကြောင့် ကျနော့်ကို ယုံကြည်ခဲ့တဲ့ သူတို့ကို ကျေးဇူးတင်ရမှာဖြစ်သလို အသင်းဖော်တွေကိုလည်း ကျေးဇူးတင်ရမှာပါ” လို့ ပြောခဲ့တာပါ။
ဒေါ့မွန်အသင်းက PSV အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ပွဲမှာ ဂိုးတွေကို ဆန်ချိုနဲ့ မာကိုရူးစ်တို့က သွင်းယူ ခဲ့တာဖြစ်ပါတယ်။
ဒေါ့မွန်နဲ PSV အသင်းတို့ရဲ့ ပထမအကျော့က ၁ ဂိုးစီသရေကျခဲ့တာကြောင့် နှစ်ကျော့ပေါင်း ရလဒ် ၃ ဂိုး-၁ ဂိုးနဲ့ ဒေါ့မွန်အသင်းအနိုင်ရပြီး ချန်ပီယံလိဂ်ကွာတားဖိုင်နယ်ကို ၃ နှစ်အကြာမှ ပထမဆုံးအကြိမ် ပြန်တက်နိုင်ခဲ့တာပါ။
ဒီပွဲမှာ ဒေါ့မွန်အသင်းအတွက် ဂိုးသွင်းယူနိုင်ခဲ့တဲ့ ဆန်ချိုဟာ အကောင်းဆုံး ကစားသမား ဆုကို ရရှိခဲ့ပါတယ်။
ယူနိုက်တက်အသင်းမှာ အဆင်မပြေဖြစ်ခဲ့တာကြောင့် ပြီးခဲ့တဲ့ ဇန်နဝါရီက ဒေါ့မွန်အသင်းထံ အငှားနဲ့ ပြန်ရောက် လာခဲ့တဲ့ ဆန်ချိုအတွက် ရက်ပေါင်း ၈၄၀ အကြာမှ ပထမဆုံးချန်ပီယံလိဂ်သွင်းဂိုးကို ရယူနိုင်ခဲ့တာဖြစ်ပါတယ်။
ဆန်ချိုဟာ လက်ရှိအချိန်မှာ ဒေါ့မွန်အသင်းအတွက် ၁၀ ပွဲပါဝင်ကစားထားအပြီးမှာ ၂ ဂိုးသွင်းယူကာ ၂ ဂိုး ဖန်တီး ထားတာပါ။ ဆန်ချိုဟာ ဒေါ့မွန်အသင်းနဲ့ အငှားစာချုပ်ကုန်မယ့် ဒီရာသီအကုန်မှာ ယူနိုက်တက်အသင်းထံ ပြန်ရမှာဖြစ်ပေမယ့် မပြန်ချင်တော့ဘဲ အပြီးသတ်ထွက်ခွာချင်နေတယ်လို့ သိရပါတယ်။
ဂျာမန်ဘွန်ဒစ်လီဂါပြိုင်ပွဲမှာ အဆင့် ၄ နေရာရပ်တည်နေတဲ့ ဒေါ့မွန်အသင်းဟာ ဒီတစ်ပတ်လိဂ်ပွဲစဉ်အဖြစ် ဖရန့်ဖတ်အသင်းနဲ့ ယှဉ်ပြိုင်ရမှာဖြစ်ပါတယ်။
Source:Eurosport
