CNI Sport News
၂၀၂၄ ခုနှစ်၊ ဇန်နဝါရီ ၂၃
အိုင်ဗရီကို့စ်အသင်းဟာ ကျင်းပနေတဲ့ အာဖရိကဖလားပြိုင်ပွဲ အုပ်စုနောက်ဆုံးပွဲစဉ်မှာ အီကွေတိုရီရယ်လ်ဂီနီ အသင်းကို အရေးနိမ့်ခဲ့တာကြောင့် ပြိုင်ပွဲက ထွက်ခွာရဖို့ နီးစပ်ခဲ့တာ ဖြစ်ပါတယ်။
အိမ်ရှင်အိုင်ဗရီကို့စ်အသင်းဟာ ဒီပွဲမှာ အီကွေတိုရီရယ်လ်ဂီနီ အသင်းကို ၄ ဂိုး- ဂိုးမရှိနဲ့ ဂိုးပြတ်အရေးနိမ့်ခဲ့တာပါ။
အိုင်ဗရီကို့စ်အသင်းဟာ ဒီရှုံးပွဲကြောင့် အုပ်စုပွဲစဉ် ၃ ပွဲ ကစားအပြီးမှာ ၁ ပွဲနိုင် ၂ ပွဲရှုံး ရမှတ် ၃ မှတ်နဲ့ တတိယ နေရာမှာ ရပ်တည်နေတာ ဖြစ်ပါတယ်။
အာဖရိကဖလားပြိုင်ပွဲမှာ အကောင်းဆုံး တတိယအသင်း ၄ သင်းဟာ နောက်တစ်ဆင့်ကို တက်ရောက်နိုင်တာ ကြောင့် အိုင်ဗရီကို့စ်အသင်းဟာ နောက်တစ်ဆင့်တက်ဖို့ မျှော်လင့်ချက်ရှိနေပေမယ့် အခြားအသင်းတွေရဲ့ ရလဒ် ကို စောင့်ဆိုင်းရမှာပါ။
အီကွေတိုရီရယ်လ်ဂီနီအသင်းကို ဂိုးပြတ် အရေးနိမ့်ခဲ့တာကြောင့် အိုင်ဗရီကို့စ်အသင်း ပရိသတ်တွေဟာ သူတို့ရဲ့ ကစားသမားတွေကို အလွန်ဒေါသထွက်နေပြီး ပွဲကြည့်စင်ပေါ်ကနေ အော်ဟစ်မှုတွေ ပြုလုပ်ခဲ့ကြပါတယ်။
အိုင်ဗရီကို့စ်အသင်းသားတွေကို တွေ့ရစဉ်
အိုင်ဗရီကို့စ် ကစားသမားတွေဟာ လုံခြုံရေး အကူအညီတွေနဲ့ ကွင်းထဲက ထွက်ခွာခဲ့ရသလို လုံခြုံရေးစိုးရိမ်မှုတွေ ကြောင့် အသင်း ၂ သင်းစလုံးကို အားကစားကွင်း အတွင်းကနေ ထွက်ခွာခြင်းမပြုဖို့ တားမြစ်ခဲ့တယ်လို့ Canal+ Africa က ဖော်ပြထားပါတယ်။
အိုင်ဗရီကို့စ်အသင်းနည်းပြ ဂက်ဆက်က ပွဲအပြီးမှာ ကစားသမားအချို့ဟာ အဝတ်လဲခန်းထဲမှာ ငိုကြွေးနေခဲ့ကြ တယ်လို့ ပြောခဲ့ပါတယ်။
ဂက်ဆက်က “ဒါဟာ အိပ်မက်ဆိုးပါပဲ။ ဒီပွဲကို ကျနော်တို့ ကောင်းမွန်စွာ ပြင်ဆင်ခဲ့ပြီး အခွင့်အရေးတွေလည်း ရရှိခဲ့ပါတယ်။ အီကွေတိုရီရယ်လ်ဂီနီက ကျနော်တို့ကို လက်တွေ့ဆန်တဲ့ သင်ခန်းစာတစ်ခုကို ပေးခဲ့ပါတယ်။ နောက်တစ်ဆင့် တက်နိုင်မယ်လို့ ယုံကြည်လားဆိုရင်တော့ ကျနော်တို့ဟာ ၃ ပွဲ ကစားအပြီးမှာ ၁ ပွဲအနိုင်ရခဲ့ပါ တယ်။ ကျနော်တို့အနောက်မှာ အသင်းတွေရှိပါတယ်။ ဒါပေမယ့် အခြားအသင်းတွေရဲ့ ရလဒ်ကိုစောင့်ရတာ ကတော့ ကောင်းမွန်တဲ့ လက္ခဏာမဟုတ်ဘူး”လို့ ပြောခဲ့ပါတယ်။
လက်ရှိအချိန်မှာ အာဖရိကဖလားပြိုင်ပွဲရဲ့ နောက်တစ်ဆင့်ကို အုပ်စု A က အီကွေတိုရီရယ်လ်ဂီနီနဲ့ နိုင်ဂျီးရီးယား၊ အုပ်စု B က ကိတ်ဗာဒီနဲ့ အီဂျစ်၊ အုပ်စု C က ဆီနီဂေါနဲ့ ဂီနီ၊ အုပ်စု D က အန်ဂိုလာနဲ့ ဘာကီနာဖာဆို၊ အုပ်စု E က မာလီနဲ့ အုပ်စု F က မော်ရိုကိုတို့ တက်ရောက်နိုင်ခဲ့ပြီ ဖြစ်ပါတယ်။
Source: BBC
