CNI News
၂၀၂၅ခုနှစ်၊ ဒီဇင်ဘာ ၁
နိုင်ငံတော်အစိုးရမှ ဝန်းထမ်းများအား ရက်ရှည်အားလပ်ရက်များ သတ်မှတ်ပေးခြင်းသည် တိုင်းပြည်အတွက် GDP ကျဆင်းကြောင်း ခရီးသွားလုပ်ငန်းရှင်တချို့က ထောက်ပြကြသည်။
အစိုးရက ရက်ရှည် အားလပ်ရက်များ သတ်မှတ်ပေး၍ ဟိုတယ်နှင့် ခရီးသွား လုပ်ငန်းကို မြှင့်တင်ရန် ကြိုးစား လျက်ရှိသည်။
သို့သော် တခြားတစ်ဖက်မှာတော့ ရက်ရှည် ပိတ်ရက်များကြောင့် ဝန်ထမ်းများ လုပ်အားများကို လုပ်ငန်းရှင်များ ရရှိမှု နည်းသွားကာ ကုန်ထုတ်လုပ်ငန်းများကျဆင်း၍ တိုင်းပြည်၏ GDP ပါ ကျဆင်းသွားနိုင်သည်ဟု ခရီးသွား လုပ်ငန်းရှင်တစ်ဦးက CNI သတင်းဌာနသို့ပြောသည်။
၎င်းက “တိုင်းပြည်က ဆင်းရဲနေတဲ့ကြားမှာ GDP ပါ ကျတာပေါ့ဗျာ။ အလုပ် မလုပ်ကြတော့ဘူး။ လူတွေက ပိတ်ရက်တွေနဲ့ပဲ နှပ်နေကြတယ်ဆိုတော့ GDP ကတော့ တိုးတက်ဖွယ်ရာ သိပ်မရှိဘူးပေါ့နော် (Impact) ဖြစ်တာပေါ့။ သက်ရောက်မှုတွေတော့ အများကြီးရှိတာပေါ့”ဟု ပြောသည်။
တစ်ဖက်တွင်လည်း
နိုင်ငံတော်အစိုးရမှ ရက်ရှည်အားလပ်ရက်များ ဝန်ထမ်းများအတွက် သတ်မှတ်ပေးခြင်းသည် ဟိုတယ်နှင့်ခရီးသွား ကဏ္ဍ အပါအဝင် စီးပွားရေး ဖွံ့ဖြိုးတိုးတက်ရန်အတွက် တစ်ဖက်တစ်လမ်းမှ အထောက်အကူပြုသည်ဟု ဟိုတယ် လုပ်ငန်းရှင်များအသင်းမှ အထွေထွေအတွင်းရေးမှူး ဦးနေအောင်ကိုက CNI သတင်းဌာနသို့ ပြောသည်။
နေပြည်တော်က ဟိုတယ်တစ်ခုကိုတွေ့ရစဉ်
၎င်းက “ဒါလည်းပဲ ထိရောက်မှာပါ။ ဘာပဲဖြစ်နေပါစေ သူက ရုံးပိတ်ရက်ကို သတ်မှတ် ပေးလိုက်သည့်အတွက် ရက်ရှည် ရုံးပိတ်ရက် သတ်မှတ်ပေးတာဖြစ်တဲ့အတွက် ကျနော်တို့ ဘယ်လိုပဲဖြစ်နေပါစေ၊ ရုံးပိတ်ထားတာ ဖြစ်တဲ့ အတွက် နိုင်ငံတော်အစိုးရဝန်ထမ်းတွေအပြင် ကျနော်တို့ ရုံးလုပ်ငန်း၊ ကုမ္ပဏီလုပ်ငန်းမှာ လုပ်ကိုင်နေတဲ့ ဝန်ထမ်း တွေ နောက်တစ်ခါ လုပ်ငန်းရှင် မိသားစုတွေ အတွက်ပေါ့နော်၊ အားလပ်ရက် အချိန်တစ်ခု ထွက်လာတာဖြစ်တဲ့ အတွက် ကျနော်တို့ ဒီအပေါ်မှာလည်းပဲ ဒါခရီးသွားလာဖို့အတွက်က အခွင့်အလမ်း တစ်ခုပေါ့နော်။ ဒါကြောင့်မို့လို့ ဒီလိုမျိုး နိုင်ငံတော်က သတ်မှတ်လိုက်တဲ့ အတွက်လည်း ကျနော်တို့ ခရီးသွားကဏ္ဍကို ဟိုတယ်နှင့်ခရီးသွားကဏ္ဍ ကို စီးပွားရေး တိုးတက်ဖို့ အတွက်လည်းပဲ တစ်ဖက်တစ်လမ်းကနေ အများကြီး အထောက်အကူ ဖြစ်ပါတယ် အထောက်အပံ့လည်း ဖြစ်ပါတယ်”ဟု ပြောသည်။
ဟိုတယ်နှင့် ခရီးသွားလုပ်ငန်း ရပ်တည် လည်ပတ်သည့် အခါတွင် နယ်မြေတည်ငြိမ်အေးချမ်းမှု မရှိခြင်း၊ လုံခြုံ စိတ်ချမှု မရှိခြင်း၊ လမ်းပန်းဆက်သွယ်ရေး အဆင်မပြေခြင်း စသည့် စိန်ခေါ်မှုများကို ရင်ဆိုင်နေရသည်ဟု လုပ်ငန်းရှင်များက ထောက်ပြကြသည်။
လက်ရှိ အခြေအနေတွင် နိုင်ငံရေးပြောင်းလဲမှု ဖြစ်စဥ်များကြောင့် စီးပွားရေး လုပ်ငန်းများ လုပ်ရန်အတွက် ဖိအားများ များစွာရှိကြောင်း၊ ဟိုတယ်လုပ်ငန်းကဏ္ဍတွင် နိုင်ငံခြားသား ခရီးသွားများ ဝင်ရောက်မှုသည် နယ်မြေတည်ငြိမ်ရေးနှင့် နိုင်ငံရေး အခြေအနေပေါ် မူတည်နေသည်ဟု ဟိုတယ်နှင့်ခရီးသွားလုပ်ငန်းရှင်များက ထောက်ပြကြသည်။
