CNI News
၂၀၂၅ ခုနှစ်၊ ဒီဇင်ဘာ ၂
ဝန်ထမ်းကောင်းမှ နိုင်ငံကောင်းမည်ဖြစ်၍ နိုင်ငံကို ချစ်မြတ်နိုးသည့် စိတ်ရှိသော ဝန်ထမ်းကောင်းများ ဖြစ်အောင် လေ့ကျင့်ဆောင်ရွက်ပေးကြရန်လိုကြောင်း နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
၂၀၂၅ ခုနှစ်၊ ဒီဇင်ဘာ ၁ ရက်က နိုင်ငံ့ဝန်ထမ်းတက္ကသိုလ်(အထက်မြန်မာပြည်)၊ ရဲအရာရှိ လေ့ကျင့်ရေးကျောင်း(ဇီး ပင်ကြီး)နှင့် ဗဟိုမီးသတ် သင်တန်းကျောင်း(ပြင်ဦးလွင်)တို့သို့ သွားရောက်၍ စစ်ဆေးစဉ် ၎င်းက ပြောကြားခဲ့ခြင်း ဖြစ်သည်။
ဗိုလ်ချုပ်မှူးကြီးမင်းအောင်လှိုင်က “ဝန်ထမ်းကောင်းမှ နိုင်ငံကောင်းမည်ဖြစ်ကြောင်း၊ အဓိကအားဖြင့် ဝန်ထမ်း များအား စိတ်ဓာတ်စည်းကမ်းကောင်းမွန်စေရေးနှင့် ပါတီနိုင်ငံရေးကင်းရှင်းသည့် ဝန်ထမ်းများ၊ နိုင်ငံကို ချစ်မြတ် နိုးသည့် စိတ်ရှိသည့် ဝန်ထမ်းကောင်းများဖြစ်အောင် လေ့ကျင့်ဆောင်ရွက်ပေးကြရန်လိုကြောင်း၊ သင်ကြားပေး သည့် ဘာသာရပ်များ ထိရောက် အကျိုးရှိစေရေး ဆောင်ရွက်ပေးရန်လိုကြောင်း၊ သင်ရိုးညွှန်းတမ်းများသည် မိမိ တို့ နိုင်ငံနှင့်ကိုက်ညီသည့် သင်ရိုးညွှန်းတမ်းများ ဖြစ်ရန်လိုသည်”ဟု ပြောသည်။
မြန်မာနိုင်ငံတွင် နိုင်ငံ့ဝန်ထမ်း အများစုသည် အဂတိလိုက်စားမှု အလွန်မြင့်မားကြောင်း၊ အစိုးရ ဝန်ထမ်းများသည် ၎င်းတို့နှင့် ဆက်စပ်ပြီး လုပ်ကိုင်ရသည့် လုပ်ငန်းတိုင်းတွင် အဂတိတရားရှိနေကြောင်း၊ လာဘ်ပေးလာဘ်ယူ မလုပ် ပါက လုပ်ငန်းများ ချောမွေ့မှု မရှိကြောင်း ပြည်သူလူထုများက ထောက်ပြကြသည်။
မြန်မာနိုင်ငံအတွင်းက နိုင်ငံကူးလက်မှတ် ထုတ်ပေးရေးရုံး(ပတ်စပို့ရုံး)၊ ကညနရုံး၊ လုံခြုံရေးဌာနများ၊ အထွေထွေ အုပ်ချုပ်ရေးဦးစီးဌာန၊ စည်ပင်သာယာရေးရုံးများ၊ တရားရုံးများ၊ ယာဉ်ထိန်းရဲများ စသည့် ဌာနဆိုင်ရာများသည် အဂတိလိုက်စားမှု အလွန်များပြားလျက်ရှိကြောင်း လုပ်ငန်းရှင်များနှင့် ပြည်သူလူထုများက ထောက်ပြကြသည်။
ထို့ကြောင့် နိုင်ငံတော် အကြီးအကဲများနှင့် ဌာနဆိုင် အကြီးအကဲများသည် အောက်ခြေဝန်ထမ်းများကို ထိထိ ရောက်ရောက် ထိန်းကျောင်းကြပ်မတ်ပေးရန်လည်း လုပ်ငန်းရှင်များနှင့် ပြည်သူလူထုများက တောင်းဆိုလျက်ရှိ ကြသည်။
