CNI News
၂၀၂၅ ခုနှစ်၊ ဧပြီ ၄
စစ်ရေးပဋိပက္ခများတွင် သုံးစွဲနေရသည့် ဘတ်ဂျက်များကြောင့် အရေးပေါ် အခြေအနေများတွင် ကူညီကယ်ဆယ် ရေးလုပ်ငန်းများလုပ်ဆောင်ရာ၌ ဘတ်ဂျက် အားနည်းမှုများရှိနေကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။
ထို့ပြင် တိုင်းပြည်တွင် အထွေထွေ ယိုယွင်းပျက်စီးမှုများ ရှိနေသည့်အပြင် အကျင့်ပျက်ခြစားမှုများ၊ ဝန်ထမ်း ယန္တရား အားနည်းမှုများ ရှိသောကြောင့် ကယ်ဆယ်ရေး အစီအမံများ လုပ်ရမည့်အချိန်တွင် အားနည်းချက်များ ရှိသွားကြောင်း ၎င်းက ပြောသည်။
ဦးကိုကိုကြီးက “ပြောရရင်တော့ သာမန်အခြေအနေ မဟုတ်တဲ့ အကြောင်းကိုပဲ စပြောရမယ်ထင်တယ်၊ အဲတော့ ဘာကြောင့်လဲဆိုတော့ ကျနော်တို့ နိုင်ငံက အရင်းအမြစ်တွေ တော်တော်များများက ပျက်စီးသွားတယ်၊ အဲတော့ ကိုဗစ်ကပ်ဘေး ကနေစပြီးတော့ ဖြစ်လာတာတွေကလည်း တစ်လှိုင်းပြီးတစ်လှိုင်းပေါ့၊ တစ်ခုပြီးတစ်ခု ဖြစ်လာ တယ်၊ နိုင်ငံရေး၊ စစ်ရေး ပဋိပက္ခရော အခုတစ်ခါ ပြီးခဲ့တဲ့ အတောအတွင်းက ကျနော်တို့ ရေဘေး၊ အဲဒီဟာပြီး တော့ အခုတစ်ခါ ငလျင်ဘေး ဖြစ်တဲ့အခါကျတော့ ဌာနဆိုင်ရာတွေမှာလည်း CDM ကိစ္စကြောင့်မို့လို့ ပညာရေး၊ ကျန်းမာရေး၊ အုပ်ချုပ်ရေးပိုင်းတွေမှာ တော်တော်ကို အားနည်းသွားတယ်ပေါ့နော်၊ ဒါကြောင့်မို့လို့ အခု အရေးပေါ် ကယ်ဆယ်ရေး အစီအမံတွေ လုပ်ရမယ့်အချိန်မှာ အားနည်းချက်တွေ ရှိတာတော့ အမှန်ပါပဲ၊ အထွေထွေ ယိုယွင်း ပျက်စီးမှုပဲ၊ အဲတော့ အကျင့်ပျက်ခြစားမှုတွေလည်း ရှိတာအမှန်ပဲ၊ နောက်တစ်ခါ ဝန်ထမ်းယန္တရားမှာလည်း အားနည်းချက်တွေပေါ့နော်၊ တစ်ရွာတစ်ပုဒ်ဆန်း ဖြစ်နေတာတွေလည်း အများကြီး ဖြစ်တယ်ပေါ့၊ နောက်တစ်ခု ကတော့ စစ်ရေးပဋိပက္ခမှာ သုံးစွဲနေရတဲ့ ဟာတွေကလည်း တကယ့်တကယ် အရေးပေါ် အခြေအနေတွေ သုံးစွဲတဲ့ အခါမှာ အားနည်းမှုတွေ ရှိတယ်လို့ မြင်ပါတယ်” ဟု ပြောသည်။
ငလျင်ဘေး ကူညီကယ်ဆယ်ရေး ဦးဇော်ဇော် အလှူငွေထည့်ဝင်နေစဉ်
မြန်မာနိုင်ငံတွင် ကြီးမားသည့် ငလျင်လှုပ်ခတ်မှုကြောင့် ထိခိုက်ခံစားခဲ့ရသော ပြည်သူလူထုများအား ကူညီကယ်ဆယ်ရေးအတွက် အလှူငွေပေးအပ်ပွဲ လုပ်ခဲ့ရာ စုစုပေါင်း ကျပ် ၁၁၆ ဒသမ ၈၄ ဘီလီယံ အလှူငွေ ကောက်ခံရရှိခဲ့ကြောင်း သိရသည်။
ငလျင်ဒဏ်ကြောင့် ပျက်စီးဆုံးရှုံးမှုများ ရှိခဲ့သည့် ဒေသများတွင် ပြန်လည်ထူထောင်ရေးလုပ်ငန်းများ လုပ်ဆောင် နိုင်ရန် ငွေကျပ် ဘီလီယံ ၅၀၀ အထိ အသုံးပြုသွားမည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။
ရွေးကောက်ပွဲ အမြန်ပြုလုပ်ရန် လိုကြောင်း၊ ထိုမှတဆင့် လွှတ်တော်ပေါ်လာမည် ဖြစ်သောကြောင့် တိုင်းပြည် ဘတ်ဂျက် စီးဆင်းမှုအား ပြည်သူများ ပြန်လည်သိရှိပါက ကောင်းမွန်သည့် ပြောင်းလဲမှုအား ရွေ့သွားနိုင်ကြောင်း အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။
၎င်းက “သမ္မတဦးသိန်းစိန် လက်ထက်တို့၊ ဒေါ်အောင်ဆန်းစုကြည် လက်ထက်တို့ ဒီလက်ထက် ၂ ခုမှာကတော့ ကျနော်တို့က ဘတ်ဂျက်တွေက လွှတ်တော်ကနေတဆင့် ဖြတ်တာဖြစ်တဲ့ အတွက်ကြောင့်မို့လို့ ပြည်သူတွေ အနေနဲ့ မြင်ရတယ်ပေါ့လေ၊ ဘတ်ဂျက်တွေက ဘယ်လိုသွားနေတယ်၊ ဘယ်နေရာကို ဘယ်လိုသုံးနေတယ်ဆိုတဲ့ ဟာကို ကောင်းကောင်းသိရတာပေါ့၊ အခုကျတော့ ဘတ်ဂျက်က ဘယ်လိုဖြတ်ပြီးတော့ ဘယ်နေရာကို ဘယ်လောက်သုံးမလဲဆိုတဲ့ဟာ မသိရဘူးပေါ့နော်၊ ဘတ်ဂျက်ကော်မတီကပဲ သူ့ဘာသူ လုပ်နေတဲ့သဘော ဖြစ်တာကိုး၊ ပြီးရင် နောက်တစ်ခါ ဒီလိုမျိုး အရေးပေါ် သဘာဝဘေးအန္တရာယ် အတွက်ကိုက သမ္မတရဲ့ အရေးပေါ် ရန်ပုံငွေဆိုပြီးတော့မှ ဘီလီယံ ၁၀၀ ကျပ်ကိုက အမြဲတမ်းဆောင်ထားတဲ့ ဟာရှိခဲ့တယ်၊ အခုကျတော့ အဲဟာရှိ လား၊ မရှိလားဆိုတာလည်း မသိတော့ဘူးပေါ့နော်၊ ထားတယ် မထားဘူးဆိုတာလည်း မသိရဘူး ဖြစ်နေတာကိုး၊ ဒီအတွက်ကြောင့်မို့လို့ အမြဲတမ်း ပြောနေတဲ့ကိစ္စက ရွေးကောက်ပွဲ မြန်မြန်လုပ်မှဖြစ်မယ်၊ အဲဒါဆိုရင် လွှတ်တော် တွေ ပေါ်လာမယ်၊ လွှတ်တော် ပေါ်လာခြင်းအားဖြင့် ကျနော်တို့ ဒါတွေအကုန်လုံး ပြည်သူတွေက ပြန်လည်သိခွင့် ရှိသွားရင် ဒါကောင်းမွန်တဲ့ ပြောင်းလဲမှုကို ရွေ့သွားနိုင်တယ်ဆိုတဲ့ဟာကို ကျနော်တို့က အမြဲတမ်းဒါကိုပဲ ပြောနေရ တာပေါ့နော်”ဟု ပြောသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နဲ့ ထိုင်းဝန်ကြီးချုပ် ပေတုန်တန် တွေ့ဆုံစဉ်
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ထိုင်းဝန်ကြီးချုပ် ပေတုန်တန်တို့ ၂၀၂၅ ခုနှစ်၊ ဧပြီ ၄ ရက် နံနက် ပိုင်းတွင် ထိုင်းနိုင်ငံ၊ ဘန်ကောက်မြို့တော်၌ သီးသန့်တွေ့ဆုံ ဆွေးနွေးခဲ့ကြသည်။
တွေ့ဆုံမှုဆွေးနွေးမှု အကြောင်းအရာ အသေးစိတ်အား မသိရသေးသော်လည်း နီးစပ်သူများကတော့ ရွေးကောက် ပွဲ ကျင်းပနိုင်ရေး အခြေအနေ၊ ငလျင်ဘေးသင့် ပြည်သူများ ပြန်လည်ထူထောင်ရေး လုပ်ငန်းများ အခြေအနေ၊ နှစ်နိုင်ငံ စီးပွားရေး အခြေအနေ၊ နှစ်နိုင်ငံ နယ်စပ်ဒေသ တည်ငြိမ်အေးချမ်းရေး အခြေအနေများကို ဆွေးနွေးခဲ့ ကြောင်း သိရသည်။
မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီး တစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သည်။
အဆိုပါ ငလျင်ကြောင့် စစ်ကိုင်းတိုင်း၊ မန္တလေးတိုင်းနှင့် နေပြည်တော်ကောင်စီနယ်များအတွင်း လူပေါင်း ၃၀၈၅ ဦးသေဆုံးပြီး ၄၇၁၅ ဦးထိခိုက်ဒဏ်ရာရရှိခဲ့ကာ ၃၄၁ ဦးပျောက်ဆုံးနေကြောင်း ဧပြီ ၃ ရက် နံနက် ၈ နာရီအထိ နောက်ဆုံးရစာရင်းကို နစက-က ထုတ်ပြန်ခဲ့သည်။
