CNI News
၂၀၂၄ ခုနှစ်၊ မတ် ၆
ထိုင်း-မြန်မာနယ်စပ် မဲဆောက်မြို့ရှိ အချို့စက်ရုံ၊ အလုပ်ရုံများတွင် တရားဝင် လုပ်သားများအား အကြောင်းမဲ့ အလုပ်ဖြုတ်ပြီး တရားမဝင် လုပ်သားများကို အလုပ်ခန့်အပ်နေကြောင်း ရွှေ့ပြောင်းအလုပ်သမားအရေး ကူညီ ဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
ယခုကဲ့သို့ လုပ်ဆောင်လာခြင်းသည် စက်ရုံ၊ အလုပ်ရုံမှ တာဝန်ရှိသူများ၏ အကျိုးစီးပွားအရဖြစ်ပြီး တရားမဝင် လုပ်သားများကို အလုပ်သမားလက်မှတ် လုပ်ပေးမည်ဟုဆိုကာ အလုပ်စဝင်သည့်အချိန်မှ လစဉ်ကြေးအဖြစ် ဖြတ်တောက်ကြောင်း ၎င်းက ပြောသည်။
ကိုသားကြီးက “တရားမဝင် မြန်မာရွှေ့ပြောင်းတွေ အလွှာပေါင်းစုံက ဝင်လာတာတွေရှိတော့ တချို့ အလုပ်ရှင် သူဋ္ဌေးတွေက မိမိတို့ ခန့်အပ်တာဝန်ပေးထားတဲ့ အလုပ်သမားအဟောင်းတွေကို အကြောင်းမဲ့ အလုပ်ဖြုတ် လိုက်တယ်။ မနေ့ တစ်နေ့ကဆိုရင်လည်း စက်ရုံတစ်ရုံ မှန်ဘောင်တွေလုပ်တာ အဲဒီစက်ရုံက လူပေါင်း ၇၀ ကျော် တစ်ချိန်တည်း အလုပ်ဖြုတ်ပစ်လိုက်တယ်။ လာတိုင်တဲ့လူတွေကလည်း တရားဝင် အထောက်အထားရှိတဲ့ လူတွေ ပဲ။ အဲဒီမှာ ဘာတွေ့ရလဲဆိုတော့ အလုံးအရင်းအလိုက် တရားမဝင် ဝင်လာတဲ့ အလုပ်သမားတွေကို စမတ်ကြေးလို့ ခေါ်တာပေါ့ အလုပ်လျှောက်ခ ဘတ် ၂၀၀၀၊ ၃၀၀၀ တောင်းပြီးတော့ အလုပ်ခန့်လိုက်တာတွေရှိတယ်။ ဒီလို ပြဿနာတွေက မဲဆောက်ထဲမှာ တော်တော်များများ ဖြစ်နေတာတွေကို တွေ့ရတယ်” ဟု ပြောသည်။
မြန်မာအလုပ်သမားများကို ထိုင်းက စစ်ဆေးနေစဉ်
ထိုသို့ အခြေအနေများ ဖြစ်ပေါ်လာခြင်းသည် မဲဆောက်တွင် မြန်မာအများဆုံး နေထိုင်ခြင်း၊ လာရောက် တိမ်းရှောင်သူ ပိုများလာခြင်းတို့ကြောင့်ဖြစ်ပြီး မဲဆောက်ရှိ ထိုင်းနိုင်ငံသားများက မြန်မာနိုင်ငံ၏ အုပ်ချုပ်ရေး အပေါ် ကောင်းစွာသိရှိထားကြသဖြင့် အသုံးချခြင်းဖြစ်ကြောင်းလည်း ရွှေ့ပြောင်း အလုပ်သမားအရေး ကူညီ ဆောင်ရွက်သူများက သုံးသပ်ကြသည်။
ထို့အပြင် လက်ရှိတွင် မြဝတီ-မဲဆောက် အမှတ် (၁) ချစ်ကြည်ရေးတံတားမှ နယ်စပ်ဖြတ်သန်းခွင့် လက်မှတ်ဖြင့် ဝင်ရောက်လာသည့် မြန်မာများအပေါ် ထိုင်းအာဏာပိုင်များမှ ဒဏ်ငွေဆိုသည့် ခေါင်းစဉ်အောက်၌ ဘတ်ငွေ ၁၅၀၀ မှ ၃၀၀၀ ခန့်အထိ လုပ်စားနေကြောင်းလည်း သိရသည်။
ထိုင်းရှိ နယ်စပ်ဒေသများတွင် အလုပ်အကိုင် ရှားပါးခြင်းမရှိသော်လည်း သတ်မှတ်ထားသည့် အခွင့်အရေးနှင့် လုပ်ခလစာနှုန်းထားများ မရရှိဘဲ အလုပ်လုပ်နေကြရသည်မှာ များပြားနေကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
အလုပ်ရုံတစ်ခုကို တွေ့ရစဉ်
၎င်းက “အလုပ်အကိုင်ကတော့ ရတဲ့အလုပ်ကို သတ်မှတ်ထားတဲ့ အခွင့်အရေး၊ သတ်မှတ်ထားတဲ့ နှုန်းထားတွေ အတိုင်း မရဘဲနဲ့ လုပ်ကိုင်နေကြရတာပေါ့။ တချို့ ဒါကလည်း ဒေသအပေါ် မူတည်တာပေါ့။ ဒေသမှာဆိုတာက အခုလိုရာသီ အလုပ်အကိုင်ပေါတဲ့ ထိုင်းခရီးသွားလုပ်ငန်းနဲ့ ဆက်စပ်တဲ့ ဒေသတွေမှာဆိုရင် သူတို့ကတော့ အလုပ် အကိုင်ပေါတာပေါ့။ ဒါပေမယ့် တခြားသော အလုပ်ရုံတွေ၊ ခြံတွေ ဒါမျိုးတွေမှာလည်း လုပ်နေကြတာတော့ သူ့ဟာ နဲ့သူ ဆက်စပ်ပြီး ရှိကြတာပဲ။ လုံးလုံးကြီး အလုပ်အကိုင်မရှိဘဲ နေတာထက်စာရင် အလုပ်ရှိတယ်။ သတ်မှတ်ထား တဲ့အလုပ် အခွင့်အရေးနဲ့ နှုန်းထားတွေ မရဘဲ လုပ်ကြရတဲ့ဟာတွေ အဲဒါတွေတော့ ပိုပြီးများတယ်” ဟု ပြောသည်။
ပြီးခဲ့သည့် တစ်ပတ်က ထိုင်းကာကွယ်ရေးနှင့် ပြည်ထဲရေးဝန်ကြီးဌာနတို့မှ နိုင်ငံ၏ လုံခြုံရေးနှင့်ပတ်သက်၍ ရပ်ကွက်၊ မြို့နယ်များ၌ စောင့်ကြည့်စစ်ဆေးခြင်းများအား နယ်စပ်ဒေသများတွင် ပိုမိုတင်းကြပ်လုပ်ဆောင်လာ ကြောင်း ဦးမင်းဦးက ဆက်ပြောသည်။
ယခင်က ဘုရားသုံးဆူနှင့် မြဝတီ-မဲဆောက်ဘက်တို့မှ အဓိက အများဆုံး တရားမဝင် ခိုးဝင်ကြခြင်း ဖြစ်သော် လည်း ယခုအခါ ကော့သောင်း-ရနောင်း နယ်စပ်ပေါက်များမှလည်း အများအပြား ခိုးဝင်လာကြကာ လက်ရှိတွင် မြန်မာနိုင်ငံသား အလုံးအရင်းဖြင့် တရားမဝင် ဝင်ရောက်လာကြသဖြင့် ဖမ်းဆီးခံနေရကြောင်းလည်း သိရသည်။
