CNI News
၂၀၂၄ ခုနှစ်၊ ဖေဖော်ဝါရီ ၂၂
လက်ရှိ ပြည်တွင်း ပြောင်းဈေးနှုန်း ကျဆင်းနေမှုကြောင့် တောင်သူများသည် အကျိုးအမြတ်ရရှိမှု နည်းပါးနေ၍ လာမည့် ပြောင်းစိုက်ရာသီတွင် စိုက်ပျိုးမှုနှုန်း လျော့ကျနိုင်သည်ဟု ပြောင်းစိုက်တောင်သူများထံမှ သိရသည်။
ပြည်တွင်း ပြောင်းဈေးနှုန်းသည် ကမ္ဘာ့ပြောင်းဈေးနှုန်း အတက်အကျပေါ်တွင် မူတည်နေခြင်းကြောင့် လက်ရှိ၌ ကမ္ဘာ့ပြောင်းဈေးနှုန်း ကျဆင်းနေသည့်အတွက် ပြည်တွင်းပြောင်းဈေးနှုန်းသည် လိုက်ပါကျဆင်းနေခြင်း ဖြစ် သည်။
ရန်ကုန်ဆိပ်ကမ်းအရောက် ပြောင်းတစ်ပိဿာလျှင် ၁၁၀၀ ကျပ်သာ ဈေးနှုန်း ရရှိသည့်အတွက် တောင်သူများ ရရှိသည့် ဈေးနှုန်းသည် တစ်ပိဿာလျှင် ၉၀၀ ကျပ်မှ ၁၀၀၀ ကျပ်သာ ရှိသည်ဟု တောင်သူများက ပြောသည်။
တောင်သူများအနေဖြင့် ပြောင်းတစ်ပိဿာလျှင် ၁၂၀၀ ကျပ်ခန့် ရရှိမှသာ အဆင်ပြေခြင်းကြောင့် လက်ရှိဈေးနှုန်း အရ လာမည့် ပြောင်းစိုက်ရာသီတွင် ပြောင်းအစား တခြားသီးနှံများကို စိုက်ပျိုးလာနိုင်သည်။
ပြောင်းပွဲရုံကို တွေ့ရစဉ် (ဆင်ဟွာ)
ထို့ကြောင့် ပြောင်းစိုက်ပျိုးမှုနှုန်းသည် ၃ ပုံ ၁ ပုံခန့် လျော့ကျသွားနိုင်သည်ဟု ဧရာဝတီတိုင်းဒေသကြီးမှ ပြောင်းစိုက်တောင်သူ ကိုမင်းခိုင်က CNI သတင်းဌာနသို့ ပြောသည်။
၎င်းက “ဒီနှစ်အဖို့ရာမှာတော့ တောင်သူတွေက အကုန်လုံး ကြည့်တာပဲလေ။ ဒီနှစ်အဖို့ရာမှာတော့ ပြောင်းဈေးက မောင်း(ကောင်း)မလာရင် နောက်နှစ်တွေကိုတော့ ပြောင်းစိုက်တဲ့ဧကတွေက တအားကြီး လျော့ကျသွားမယ်လို့ တော့ မှန်းထားတယ်။ သိပ်မကိုက်တော့ဘူးလေ။ သွင်းအားစုနဲ့ ရတဲ့ဟာနဲ့ သိပ်မကိုက်တော့ တောင်သူတွေက တချို့ သီးနှံတွေကိုတော့ အနည်းနဲ့အများတော့ ပြောင်းသွားကြမှာပဲ။ တောင်သူတွေက ဒီမှာ သူတို့လက်ဝယ် နယ်ဈေးပေါ့လေ တောင်သူတွေက နယ်ဈေး သူတို့အနေအထားနဲ့ဆို ဘယ်လိုပဲဖြစ်ဖြစ် ၁၂၀၀ - ၁၂၅၀ အဲဒီလောက်ရမှ သူတို့ ဒီသီးနှံကို စိုက်ပျိုးနိုင်မယ့် အနေအထား ရှိတယ်။ တစ်တင်းနှုန်းဆိုရင်တော့ ၂ သောင်း၊ ၂ သောင်းခွဲပေါ့လေ။ တစ်ပိဿာနှုန်းတော့ ၁၂၅၀ ပေါ့ အဲဒီလောက်ရမှ သူတို့ စိုက်လို့ပျိုးလို့ ကိုက်မယ့် အနေအထား ရှိတယ်။ ကုန်ကျစရိတ်တွေကို ကျနော်တွက်ကြည့်တာလေ။ အခုက အဲဒီဈေးက ဟိုအပေါ်မှာတောင်မှပဲ အဲဒီဈေး မရှိဘူး ဖြစ်နေတာပေါ့။ ကျနော်တို့ မှန်းတာတော့ ဒါတော့ ဧရာဝတီတိုင်းမှာတော့ ကျနော် သူများတကာနယ်ကို တော့ မမှန်းဘူးပေါ့လေ။ ကျနော့်နယ်မှာတော့ ဒီလိုပုံစံအတိုင်း သွားမယ်ဆိုရင်တော့ ၃ ပုံ ပုံရင် ၁ ပုံလောက်က တော့ လျော့ကျသွားနိုင်တယ်” ဟု ပြောသည်။
ပြောင်းတစ်ဧက စိုက်ပျိုးစရိတ်သည် မြန်မာကျပ်ငွေ ၁၀ သိန်းကျော်ရှိပြီး လက်ရှိ တောင်သူများ ရရှိသည့် ဈေးနှုန်း များအရ ပြောင်းတစ်ဧကလျှင် ငွေကျပ် သိန်း ၂၀ ပင် မပြည့်ခြင်းကြောင့် ရင်းနှီးထားရသည့် အချိန်ကာလ၊ လုပ်ခ အင်အားများနှင့် ထပ်မံ ပြန်စိုက်ရန်အတွက် ကုန်ကျစရိတ်များပင် မကာမိကြောင်း တောင်သူများထံမှ သိရသည်။
ထို့အပြင် ရှမ်းပြည်နယ်မြောက်ပိုင်းရှိ ပြောင်းစိုက်တောင်သူများမှာလည်း ယခုနှစ်တွင် တိုက်ပွဲဖြစ်ပွားမှုများ ကြောင့် စိုက်ပျိုးထားသည့် ပြောင်းများ ရိတ်သိမ်းရာတွင် အခက်အခဲဖြစ်ပေါ်ခဲ့ပြီး လမ်းကြောင်းအခက်အခဲကြောင့် ဈေးနှုန်းအနည်းငယ်သာ ရရှိခဲ့သည်ဟု သိရသည်။
ပြောင်းပွဲရုံကို တွေ့ရစဉ် (ဆင်ဟွာ)
ထို့နောက် လက်ရှိ ပြောင်းဈေးနှုန်း ကျဆင်းနေမှုကြောင့် တောင်သူများ ဆုံးရှုံးနိုင်သည့်အတွက် လာမည့် ပြောင်းစိုက်ရာသီတွင် ရှမ်းပြည်နယ်မြောက်ပိုင်း၌ ပြောင်းစိုက်ပျိုးမှု ထက်ဝက်ခန့် လျော့ကျနိုင်သည်ဟု ရှမ်းပြည်နယ်မြောက်ပိုင်း ပြောင်းလုပ်ငန်းအသင်း အတွင်းရေးမှူး ဦးကျော်မိုးက CNI သတင်းဌာနသို့ ပြောသည်။
၎င်းက “ကျနော့် အမြင်ဆိုရင်တော့ ကျနော့်မှာသာ အဲဒီလို ဖြစ်ခဲ့ရင်တော့ ကျနော် မစိုက်တော့ဘူး။ စိုက်မှာ မဟုတ်ဘူး။ ဒါပေမယ့် တောင်သူတွေက အတွေးတွေ ဘယ်လိုရှိမှန်း မသိတာ။ ဒါပေမယ့် ရာခိုင်နှုန်းအရ ပြောမယ် ဆိုရင် ကျရင်တော့ ကျမှာပေါ့။ အနည်းဆုံးကတော့ ၄၀/၅၀ ရာခိုင်နှုန်းတော့ ကျမှာသေချာတယ်။ ဒါပေမယ့် တောင်သူတွေ ဒါမစိုက်ဘူးဆိုရင် သူတို့လည်း တခြားလုပ်စရာမှ မရှိတာ။ နောက်ဆုံးကျတော့လေ စိုက်တော့စိုက် မှာပေါ့နော်၊ ဒါပေမယ့် တအားနည်းမှာပေါ့။ ဒါပေမယ့် သေချာတာတော့ တစ်ဝက်ထက် မကျော်နိုင်ဘူး” ဟု ပြော သည်။
ဧရာဝတီတိုင်းဒေသကြီးတွင် ပြောင်းစိုက်ပျိုးမည့် ဧကများ၌ ဈေးနှုန်းကောင်းမွန်သည့် စားတော်ပဲ၊ ပဲတီစိမ်းများကို ပြောင်းလဲ စိုက်ပျိုးလာနိုင်သည်ဟု သိရသည်။
မြန်မာနိုင်ငံတွင် ပြောင်းကို ရှမ်းပြည်နယ်မြောက်ပိုင်းနှင့် တောင်ပိုင်း၊ ဧရာဝတီတိုင်းဒေသကြီးတို့တွင် အများဆုံး စိုက်ပျိုးကြပြီး ပဲခူးတိုင်းဒေသကြီး အနောက်ပိုင်း၊ နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး နှင့် ကချင်ပြည်နယ်တို့တွင် စိုက်ပျိုးမှု အနည်းငယ်ရှိသည်။
