CNI News

၂၀၂၃ ခုနှစ်၊ ဧပြီ ၂၅

ထိုင်းနိုင်ငံရှိ မြန်မာရွှေ့ပြောင်း အလုပ်သမားများအတွက် လိုအပ်သည့် ကူညီပံ့ပိုးမှုများ ဆောင်ရွက်ပေးရန် နစက ၏ နိုင်ငံခြားရေးဝန်ကြီး ဦးသန်းဆွေနှင့် ထိုင်းနိုင်ငံ၏ ဒု-ဝန်ကြီးချုပ်နှင့် နိုင်ငံခြားရေးဝန်ကြီး H.E.Mr. Don Pramudwinai တို့ ဆွေးနွေး ခဲ့ကြသည်။

ထိုသို့ လိုအပ်သည့် ကူညီပံ့ပိုးမှုများအား အမှန်တကယ် လုပ်ဆောင်ပေးမည်ဆိုပါက ထိုင်းရောက် မြန်မာ ရွှေ့ပြောင်း လုပ်သားများအတွက် အထောက်အထား စာရွက်စာတမ်း ပြုလုပ်ခြင်းများအား ဖြေလျှော့ပေးသင့် ကြောင်း မြန်မာရွှေ့ပြောင်း အလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

ထိုင်းရောက် မြန်မာ ရွှေ့ပြောင်း အလုပ်သမားများကိုတွေ့ရစဉ်

“အဓိကကတော့ အထောက်အထားပဲပေါ့။ ကိုယ့်နိုင်ငံသူ နိုင်ငံသားတွေအပေါ်မှာ တာဝန်ရှိတဲ့သူတွေက တကယ် စေတနာရှိတယ်ဆိုရင် ကျနော် မောင်ဖြူ၊ မောင်မည်းပေါ့ ကိုသားကြီးဖြစ်ကြောင်းဆိုတဲ့ CI စာအုပ် အစိမ်းရောင် စာအုပ်ကို ပြန်လည်ရုပ်သိမ်းစေချင်တယ်။ ဘာကြောင့်လဲဆိုတော့ ဒီဟာကို ရုပ်သိမ်းပြီးတော့မှ ဒီဟာထုတ်ပေး နေတဲ့အစား ဒီစက်ယန္တရားတွေအပေါ်မှာ ဒီပတ်စပို့အကြီးနဲ့ ပတ်သက်တဲ့ အထောက်အထားတွေကို ထပ်တိုး ပြီးတော့ ပြောင်းလဲပြီး ထုတ်ပေးနိုင်မယ်ဆိုရင် ထိုင်းရောက်နေတဲ့ မြန်မာရွှေ့ပြောင်း အလုပ်သမားတွေအတွက် အင်မတန် အကျိုးရှိမယ့် ကိစ္စတစ်ခုဖြစ်တယ်။ တဆက်တည်းမှာပဲ ကုန်ကျစရိတ်တွေပေါ့ CI စာအုပ် ဆိုတဲ့ စာအုပ် တစ်အုပ်လုပ်ရင်လည်း ပတ်စပို့ တစ်အုပ်ထပ်မက ကုန်ကျစရိတ်တွေ ပိုမို ကုန်ကျနေတာ ဖြစ်တဲ့အတွက် နိုင်ငံကူး လက်မှတ် ပတ်စပို့ဖြစ်ခဲ့ရင် ပိုပြီးတော့ မကောင်းဘူးလားပေါ့” ဟု ၎င်းက ပြောသည်။

ထိုင်းအစိုးရ၏ စီမံကိန်းဖြင့် ကူညီထောက်ပံ့ခြင်းများတွင် မြန်မာရွှေ့ပြောင်း လုပ်သားများ အနေဖြင့် မရရှိခဲ့ ကြောင်း မြန်မာရွှေ့ပြောင်း အလုပ်သမားအရေး ကူညီဆောင်ရွက်ပေးနေသူများထံက သိရသည်။

မြန်မာရွှေ့ပြောင်း လုပ်သားများသည် ကိုဗစ်ကာလများတွင်လည်း အခက်အခဲ အကျပ်အတည်းများ ကြုံတွေ့ခဲ့ရ ကြောင်း၊ ထိုသို့ ဒုက္ခရောက်နေချိန်တွင် အစိုးရမဟုတ်သည့် အဖွဲ့အစည်းများထံမှသာ အကူအညီများ ရရှိခဲ့ကြ ကြောင်း Arakan Worker's Organization (AWO) မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။

ထိုင်းနိုင်ငံ၏ ဒု-ဝန်ကြီးချုပ်နှင့် နိုင်ငံခြားရေးဝန်ကြီး H.E.Mr. Don Pramudwinai နဲ့ နစက ကိုယ်စားလှယ် အဖွဲ့တွေ့ဆုံစဉ်

၎င်းက “COVID-19 မှာဆိုရင် လူမှုဖူလုံရေး ဥပဒေအရ ထိုင်းနိုင်ငံသားဆိုရင် တစ်ယောက်ကို ဘတ်ငွေ ၅ ထောင် တို့ တစ်ကြိမ်၊ နှစ်ကြိမ်၊ သုံးကြိမ်အထိ ပေးခဲ့တယ်။ ဒါပေမယ့် ကျနော်တို့ ရွှေ့ပြောင်း အလုပ်သမားတွေကလည်း ဒီ လူမှုဖူလုံရေးအထဲမှာ ဝင်ရတာပဲ။ ဒါပေမယ့် ကျနော်တို့ အလုပ်သမားတွေ တစ်ခုမှ မရခဲ့ဘူး။ တကယ်လို့များ ကူညီပေးမယ်ဆိုရင်တော့ အစိုးရအနေနဲ့ အလုပ်သမားတွေရဲ့ Visa ၊ ပတ်စပို့ စာအုပ် သက်တမ်းတိုးတာတွေမှာ နှစ်တွေ တိုးပေးတာမျိုးတို့၊ ကုန်ကျစရိတ်တွေကို လျှော့ချပေးတာမျိုးတို့ ဒီလောက်တွေကို ကူညီနိုင်မယ်ဆိုရင်ကို ကျနော်တို့က ကြိုဆိုပါတယ်။ လူမှုဖူလုံရေးနဲ့ ပတ်သက်တဲ့ဟာပဲ ဖြစ်ဖြစ်၊ ကျန်းမာရေးနဲ့ပတ်သက်တဲ့ အကြောင်း အရာပဲဖြစ်ဖြစ် ဒီဟာတွေကို ကျနော်တို့ ရွှေ့ပြောင်း အလုပ်သမားတွေကို ခွဲခြားဆက်ဆံမှု မလုပ်ပဲနဲ့ ပေးဖို့၊ ရွှေ့ပြောင်း အလုပ်သမားတွေကို လွတ်လပ်စွာ ခရီးသွားခွင့်ပေးဖို့ ထိုင်းအစိုးရအနေနဲ့ ဒီလောက်လောက် ပေးနိုင် ရင် ပိုကောင်းတာပေါ့”ဟု ပြောသည်။

လက်ရှိတွင် ထိုင်းနိုင်ငံ၌ မြန်မာနိုင်ငံသားများအား နိုင်ငံကူးလက်မှတ် ထုတ်ပေးရာ၌ ဘန်ကောက်မြို့နှင့် ချင်းမိုင် မြို့မှာသာ ထုတ်ပေးနေခြင်း ဖြစ်သည့်အတွက် နှောင့်နှေးကြန့်ကြာမှုများ ရှိနေကြောင်း သိရသည်။

ထို့ကြောင့် နိုင်ငံကူး လက်မှတ် စာအုပ်နှင့်ပတ်သက်၍ စက်ရုံ၊ အလုပ်ရုံကြီးများတွင် လုပ်ကိုင်သူ မဟုတ်သည့် မြန်မာရွှေ့ပြောင်း လုပ်သားကိုပါ လွယ်ကူစွာ လျှောက်ထားနိုင်ရန်၊ နိုင်ငံကူး လက်မှတ်အား အချိန်တိုအတွင်း လွယ်လင့်တကူ ထုတ်ပေးနိုင်ရန် ကူညီဆောင်ရွက်ပေးဖို့ လိုအပ်ကြောင်းလည်း မြန်မာရွှေ့ပြောင်း အလုပ်သမား အရေး ကူညီဆောင်ရွက်ပေးနေသူများက ပြောသည်။