CNI News

၂၀၂၃ ခုနှစ်၊ ဖေဖော်ဝါရီ ၁၇

ထိုင်းနိုင်ငံတွင် ၂၀၂၃ ခုနှစ်၊ ဖေဖော်ဝါရီလ ၁၃ ရက်နေ့တွင် အလုပ်လုပ်ကိုင်ခွင့် (Work Permit) သက်တမ်းကုန် သည့် မြန်မာရွှေ့ပြောင်း လုပ်သားများအား ၂၀၂၃ ခုနှစ်၊ မေလ ၁၅ ရက်နေ့အထိ ထိုင်းအစိုးရအဖွဲ့မှ ဆက်လက် နေထိုင်ခွင့် ပြုလိုက်သည်။

ထို့အပြင် Work Permit အသစ် ရရှိရန် လိုအပ်သော စာရွက်စာတမ်းများနှင့်အတူ ၂၀၂၃ ခုနှစ်၊ မေလ ၁၅ ရက်နေ့ အထိ လျှောက်ထားနိုင်သည်ဟုလည်း ထိုင်းနိုင်ငံအစိုးရအဖွဲ့မှ အတည်ပြုခဲ့ခြင်း ဖြစ်သည်။

FED မှ အလုပ်သမားတာဝန်ခံ ဦးမင်းဦးက “အလုပ်သမားတွေ အတွက်တော့ ဒါ နည်းနည်းတော့ အချိန်ရသွားတာ ပေါ့နော်။ ဒါပေမယ့် အဓိက အရေးကြီးတာက ဒီ ၁၃ ရက်နေ့ အတောအတွင်းမှာ အလုပ်ရှင်တွေ ကနေပြီးတော့ အွန်လိုင်းကနေတဆင့် ဒီအလုပ်သမားတွေက သက်တမ်း တိုးပါတယ်ဆိုတဲ့ ဟာပေါ့။ ဥပမာ အွန်လိုင်းကနေ အခု သူတို့ လုပ်ပေးထားတဲ့ စနစ်ရှိတယ်။ အဲဒါကနေ စာရင်းသွင်းရင်သွင်း၊ မသွင်းဘူးဆိုရင် ကိုယ်ကိုယ်တိုင် သွားပြီး တော့ အလုပ်သမားနဲ့ အလုပ်အကိုင် ရှာဖွေရေးရုံးမှာ စာရင်းသွားသွင်းရမယ်။ သွားသွင်းထားရမယ်။ အဲဒါဆိုရင် နောက်ပိုင်းမှာမှ Work Permit ဆိုင်ရာ၊ ကိုယ်ရေး အချက်အလက် စစ်ဆေးတာတို့၊ visa လုပ်တာတို့ အဲဒါတွေ နောက်ပိုင်း ၁၅ ရက်နေ့ ၅ လပိုင်းအတွင်း လုပ်လို့ရတယ်ဆိုတဲ့သဘော။ အလုပ်သမားတွေ အတွက်ကတော့ အချိန် ဒီလိုမျိုး ရတဲ့အခါကျတော့ ပြောရမယ်ဆိုရင် နည်းနည်းတော့ ကောင်းတာပေါ့။ အခုလို လုပ်ထားတဲ့ဟာ ကကြတော့ တကယ်လို့ အလုပ်ရှင်တွေက မသွင်းထားဘူး။ တချို့အေးဂျင့်တွေ ပွဲစားတွေက မသွင်းထားဘူးဆိုရင် အဲဒီ အလုပ်သမားတွေပဲ စာရင်းထဲမှာ မပါတဲ့ အလုပ်သမားတွေပဲ ပြဿနာတက်မှာ။ ကောင်းတာကတော့ ကောင်းတယ်။ ရာနှုန်းပြည့်တော့ မဟုတ်ဘူး” ဟု CNI သတင်းဌာနသို့ ပြောသည်။

မြန်မာအလုပ်သမားများ Work Permit လျှောက်နေကြစဉ်

ဘန်ကောက်ရှိ မြန်မာသံရုံးမှ တာဝန်ရှိသူများနှင့် ထိုင်းနိုင်ငံအစိုးရအဖွဲ့မှ တာဝန်ရှိသူများသည် မြန်မာရွှေ့ပြောင်း လုပ်သားများ၏ နေထိုင်ခွင့်နှင့် အလုပ်လုပ်ကိုင်ခွင့် ကိစ္စရပ်များကို ဆွေးနွေးခဲ့ကြပြီးနောက် ယခုကဲ့သို့ ထိုင်းအစိုးရ အဖွဲ့မှ အတည်ပြုခဲ့ခြင်းဖြစ်ကြောင်း သံရုံးက အသိပေး ကြေညာထားသည်။

ထို့ကြောင့် မြန်မာရွှေ့ပြောင်း လုပ်သားများ အားလုံးအနေဖြင့် ကျန်အထောက်အထားများထက် Work Permit အား ဦးစားပေး သက်တမ်းတိုးရန် လိုကြောင်း၊ သက်တမ်းတိုးထားရန် အရေးကြီးကြောင်း Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။

မြန်မာနဲ့ထိုင်း အစိုးရအဖွဲ့ ဆွေးနွေးနေကြစဉ်

၎င်းက “Work Permit ကို သက်တမ်းတိုးလိုက်ပြီးမှ ပန်းရောင်ကတ် ပုံစံမျိုးတွေ၊ CI ပုံစံမျိုးတွေက ထွက်လာမှာ ဆိုတဲ့ အတွက်ကြောင့် အလုပ်သမားတွေအနေနဲ့ Work Permit ကိုပဲ အဓိက ဦးစားပေးပြီးမှ သက်တမ်းတိုးဖို့ လိုတယ်။ CI စာအုပ် ကိုင်ထားတဲ့ လူတွေပဲ ဖြစ်ဖြစ်၊ ပန်းရောင်ကတ်ကိုင်တဲ့ အုပ်စုတွေပဲဖြစ်ဖြစ်၊ အွန်လိုင်းကနေ ပြီးတော့ ပန်းရောင်ကတ် လျှောက်ထားတဲ့ အုပ်စုတွေပဲဖြစ်ဖြစ်၊ CI စာအုပ် မလုပ်ရသေးတဲ့ လူတွေပဲဖြစ်ဖြစ်၊ ဘာပဲ ဖြစ်ဖြစ် ဒီပုဂ္ဂိုလ်တွေက အကုန်လုံးက Work Permit သက်တမ်း တိုးကို တိုးရတယ်။ Work Permit သက်တမ်း တိုးပြီးခါနီးမှ သူတို့လုပ်ဆောင်ရမယ့် လုပ်ငန်းစဉ်တွေရဲ့ process တွေကို ဆက်သွားရမှာ ဖြစ်တယ်။ ဘယ် လုပ်ငန်းစဉ်ပဲ လုပ်လုပ် အဓိကကတော့ အလုပ်သမားတွေကတော့ ထိုင်းနိုင်ငံအစိုးရ အနေနဲ့ သက်တမ်း တိုးခြင်း၊ မတိုးခြင်းက တစ်ပိုင်းပေါ့။ ဒါပေမယ့် ထိုင်းနိုင်ငံမှာ ရောက်နေတဲ့ ရွှေ့ပြောင်းလုပ်သား မြန်မာတွေကတော့ ဘယ် process ပဲ သွားသွား နောက်က လိုက်လုပ်ရတဲ့ အခါကျတော့ လွယ်ကူတဲ့ လုပ်ငန်းစဉ်တော့ မဟုတ်ဘူးပေါ့။ ခက်ခဲတဲ့ လုပ်ငန်းစဉ်ဖြစ်တယ်။ အဲဒီ ခက်ခဲတဲ့ လုပ်ငန်းစဉ်မှာလည်း ပွဲစားကိုတဆင့် အားကိုး ရပြီးတော့ မြန်မာ နိုင်ငံ အစိုးရရော၊ ထိုင်းနိုင်ငံအစိုးရ ကိုယ်တိုင်က ဒီပွဲစားတွေကို အဓိကဦးစားပေး လုပ်ငန်းစဉ် ထဲမှာ ထည့်ထားတဲ့ အခါကျတော့ အများစုကတော့ ကုန်ကျစရိတ်တွေနဲ့ အကြွေးစရိတ်တွေနဲ့ သံသရာက လည်နေတာပဲလေ” ဟု ပြောသည်။

မြန်မာရွှေ့ပြောင်းအလုပ်သမားများကိုတွေ့ရစဉ်

ယခုကဲ့သို့ သက်တမ်း ကုန်သူများအား ဆက်လက် နေထိုင်ခွင့်ပြုပြီး သက်တမ်းတိုးခြင်း ဆောင်ရွက်ခိုင်းမှုအပေါ် ထိုင်းရှိ မြန်မာရွှေ့ပြောင်း အလုပ်သမားအရေး ဆောင်ရွက်သူများက ကြိုဆိုကြသော်လည်း သက်တမ်းတိုး ပြုလုပ် သည့် ကုန်ကျစရိတ်မှာ ယခင်ကထက် တရွေ့ရွေ့ဖြင့် များပြားလာနေကြောင်း ၎င်းတို့က ထောက်ပြ ကြသည်။

ထို့အပြင် Work Permit အသစ်ရရှိရန် ၂၀၂၃ ခုနှစ်၊ မေလ ၁၅ ရက်နေ့အထိ လျှောက်ထားရမည် ဖြစ်သည့် အတွက် ပွဲစားများ၏ ပေါက်ဈေးမှာလည်း ယခုထက်ပိုမို တောင်းခံကြနိုင်ဖွယ် ရှိကြောင်းလည်း ထိုင်းရှိ မြန်မာ ရွှေ့ပြောင်း အလုပ်သမားအရေး ဆောင်ရွက်သူများက ပြောသည်။

လက်ရှိတွင် အထောက်အထားများ သက်တမ်းတိုးပြုလုပ်ရာ၌ အလုပ်သမား တစ်ယောက်အတွက် ထိုင်းအစိုးရမှ သတ်မှတ်ထားသည့် ပျမ်းမျှ ကုန်ကျစရိတ်မှာ ဘတ်ငွေ ၅၀၀၀ မှ ၆၀၀၀ ကြားတွင်သာ ရှိသော်လည်း မြန်မာ ရွှေ့ပြောင်း လုပ်သားအများစုသည် ပွဲစားများမှတဆင့် ပြုလုပ်ကြရသည့်အတွက် အစိုးရသတ်မှတ် စရိတ်ထက် နှစ်ဆခန့် ပိုမို ပေးရကြောင်းလည်း သိရသည်။