CNI News
၂၀၂၃ ခုနှစ်၊ ဖေဖော်ဝါရီ ၂၂
ရခိုင်ပြည်နယ်အတွင်းရှိ ကျောက်တော်၊ မင်းပြား၊ ပေါက်တော၊ ပုဏ္ဏားကျွန်းနှင့် စစ်တွေမြို့နယ်များ၌ ယခုနှစ်တွင် နွေရာသီမတိုင်ခင် ကန်ရေများ ခမ်းခြောက်ပြီး ရေရှားပါးမှုများနှင့် ကြုံတွေ့နေရသည်ဟု ဒေသခံများထံမှ သိရသည်။
ယခုနှစ်တွင် မိုးရွာသွန်းမှု နည်းပါးခြင်းကြောင့် ကန်ရေများတွင် ရေများ စောလျင်စွာ ခမ်းခြောက်မှု ဖြစ်ပေါ်နေ ကြောင်း၊ တိုက်ပွဲရှောင် စခန်းများရှိ ကန်ရေများတွင်လည်း ရေခမ်းခြောက်မှုများနှင့် ကြုံတွေ့နေရကြောင်း၊ မြစ်ရေ မှတဆင့် ရေကန်အတွင်းသို့ ရေဖြည့်တင်းသော်လည်း တစ်လ၊ နှစ်လအတွင်း ခမ်းခြောက်မှု ဖြစ်ပေါ်လာမည် ဖြစ် ကြောင်း ကျောက်တော်မြို့နယ်အတွင်းရှိ ရထားဘူတာ တိုက်ပွဲရှောင်စခန်းမှ တိုက်ပွဲရှောင်တစ်ဦးက CNI သတင်း ဌာနသို့ ပြောသည်။
၎င်းက “ဒီနှစ်က စောပြီး ရေပြတ်လပ်မှု ရှိတယ်၊ ရေရှားတယ်လို့ ပြောလို့ရပါတယ်။ ဘာဖြစ်လို့လဲဆိုတော့ ၃ လ ပိုင်းကုန်၊ ၄ လပိုင်းလောက်မှ ရေတွေက ပြတ်လပ်တာကိုး။ ဒီနှစ်က မိုးက တအားကြီး ခေါင်နေတော့ ရေတွေက စောပြီး ပြတ်သွားတယ်။ ကျနော်တို့ စစ်ဘေးရှောင်နားမှာ နေတဲ့ ရေကန်က ၃ ကန်၊ ၄ ကန်လောက် ရှိတယ်။ ၃ ကန်၊ ၄ ကန်လောက်မှာ ရေပြတ်လပ်တာတွေကတော့ ၃ လပိုင်းကျော်၊ ၄ လပိုင်းနီးနီး၊ ၃ လပိုင်းကုန် အဲဒီလောက် မှ ရေပြတ်လပ်တာ။ အခုက မိုးတွေ တအားကြီး ခေါင်တယ်ဆိုတော့ အခု ၁၁ လ၊ ၁၂ လ၊ ၁၂ လပိုင်း၊ ၁ လပိုင်း လောက်ကနေပြီးတော့ ရေပြတ်လပ်သွားပြီ။ ပြတ်သွားတော့ ကျနော်တို့ကလည်း မသုံးရ မနေနိုင်ဆိုတော့ တွန်းလှည်းတွေနဲ့ ဘာတွေနဲ့ မြို့ထဲမှာရှိတဲ့ ရေကန်တွေကို သွားပြီးတော့ ဒုက္ခခံပြီးတော့ ကျနော်တို့ သုံးရတယ်။ ပြီးမှ ကျနော်တို့ INGO အဖွဲ့တွေဖြစ်တဲ့ CDN က သူတို့ ချိတ်ပေးတယ်။ ကျနော်တို့က ပိုက်ဆံတွေ ကောက်ခံပြီး တော့ မြစ်ရေတင်လိုက်တယ်။ အခုတော့ နည်းနည်းပါးပါးတော့ အဆင်ပြေသွားပါပြီ။ ဒါပေမယ့် ရေရှည်တော့ ခံမှာမဟုတ်ဘူး။ နောက် ၁ လ၊ ၁ လခွဲလောက်နေရင် ရေတော့ ပြန်ခမ်းသွားလောက်ပါပြီ” ဟု ပြောသည်။
ကျောက်တော်မြို့နယ် အ၀င်ကိုတွေ့ရစဉ်
သောက်သုံးရေ စော၍ ခမ်းခြောက်ရခြင်းသည် ငွေကြေးတတ်နိုင်သည့် သူများက ကန်ရေအတွင်း ရေပိုက်များ သွယ်တန်း၍ အသုံးပြုနေကြခြင်းနှင့် စည်ပင်မှ ဖြန့်ဝေသည့် ရေကို အားမကိုးဘဲ ဆည်ရေကိုသာ အားကိုးနေကြ သည့် အတွက်ကြောင့် ဖြစ်သည်ဟု ဒေသခံများက ပြောသည်။
သောက်သုံးရေ ရှားပါးမှုကို တိုက်ပွဲရှောင်စခန်း အများစုက ပို၍ ကြုံတွေ့နေရပြီး အခက်အခဲများ ဖြစ်ပေါ်နေသည် ဟု ကျောက်တော်မြို့နယ်မှ ဒေသခံ မဦးမိုးနွယ်က ပြောသည်။
၎င်းက “ညီမတို့ ကျောက်တော်မြို့ပေါ်မှာဆိုရင် ရေက ပေးဝေတာ မရှိတာ မဟုတ်ဘူး ရှိတယ်။ ဒါပေမယ့် အဲဒါက ပေးတဲ့ရေတွေက တချို့နေရာကျတော့ ကောင်းကောင်း မရောက်တာ ရှိတယ်။ ရောက်တဲ့ နေရာကနေပြီးတော့ စက်တွေနဲ့ ယူလိုက်တဲ့အခါမှာ တချို့နေရာတွေက နည်းသွားတာ ရှိတယ်။ ဒါပေမယ့် အဲဒါကို အားမကိုးဘဲနဲ့ ဆည် တွေကနေ ယူကြတာရှိတယ်။ အဲဒါကြောင့် သောက်ရေ ရှားပါးတာ။ အရင်နှစ်တွေထက် ခက်ခဲနိုင်တယ်။ ဘာဖြစ် လို့လဲဆိုတော့ ရေကန်တွေမှာက ပိုက်ဆံတတ်နိုင်တဲ့ သူတွေကျတော့ ပိုက်တွေ အများကြီး တပ်ထားတယ်။ သုံး ရေအတွက် ဆည်ကရေတင်။ ချောင်းရေက ရေကိုကျတော့ မသုံးဘူး သူတို့ကကျတော့။ အဲဒါဆိုရင် ရေက ပိုပြီး တော့ ခမ်းခြောက်မှု များတယ်။ ပြီးရင် စစ်ဘေးရှောင်စခန်းတွေကလေ သူတို့တွေကျတော့ ပိုပြီးတော့ အခက်အခဲ တွေ ကြုံရတယ်” ဟု CNI သတင်းဌာနသို့ ပြောသည်။
တချို့သော ကျေးရွာများတွင် သောက်သုံးရေများ ခမ်းခြောက်နေခြင်းကြောင့် ရွာနှင့် အလှမ်းဝေးသည့် နေရာများ သို့ သွားရောက်၍ ရေခပ်ကြရကြောင်း၊ နွေရာသီ မရောက်မီ သောက်ရေကန်များ ခမ်းခြောက်နေပြီ ဖြစ်သည့် အတွက် နွေရာသီတွင် သောက်သုံးရေ လုံးဝပြတ်လပ် သွားနိုင်ကြောင်း ဒေသခံများက ပြောသည်။
စစ်တွေမြို့နယ်တွင် ရေကန်များ ရေခမ်းခြောက်မှု ဖြစ်ပေါ်နေသော်လည်း အဝီစီများ တူးဖော်ထားသည့်အတွက် အခက်အခဲ အနည်းငယ်သာ ရှိကြောင်း၊ ကျောက်တော်၊ ပေါက်တော၊ ပုဏ္ဏားကျွန်းမြို့နယ်များတွင် အဝီစိ တူးဖော် သော်လည်း ရေများတွင် ဆားဓာတ် ပါဝင်သည့်ရေသာ ထွက်ရှိသောကြောင့် သုံးစွဲ၍ အဆင်မပြေကြောင်း သိရသည်။
