CNI News
၂၀၂၃ ခုနှစ်၊ ဖေဖော်ဝါရီ ၂၇
နှစ်စဉ် ရေရှားပါးမှုနှင့် ကြုံတွေ့နေရသည့် ရန်ကုန်တိုင်းဒေသကြီး၊ ဒလမြို့အတွင်းရှိ ရပ်ကွက်တချို့တွင် သောက် ရေ၊ သုံးရေအဖြစ် သုံးစွဲနေသည့် ရေကန်တချို့မှာ ခမ်းခြောက်မှု ဖြစ်နေပြီဖြစ်ကြောင်း ဒေသခံများထံမှ သိရသည်။
သုံးရေအဖြစ် အသုံးပြုနေကြသည့် ရေကန်သည် ၃ ပုံ ၁ ပုံခန့်သာ ကျန်ရှိနေပြီး လက်ရှိတွင် အလှူရှင်များ လာရောက်လှုဒါန်းမှု မရှိသေးသည့်အတွက် သောက်ရေသန့်များကို ဝယ်ယူနေရသည်ဟု ဒေသခံတစ်ဦးဖြစ်သူ ကိုသားကြီးက CNI သတင်းဌာနသို့ ပြောသည်။
၎င်းက “တချို့ကျတော့လည်း ခမ်းခါနီးနေပြီး။ ၃ ပုံ ၂ ပုံလောက် ကုန်သွားပြီ။ ၁ ပုံလောက်ပဲ ကျန်တဲ့ဟာတွေ ရှိ တာပေါ့လေ။ သောက်ရေကတော့ တချို့နေရာတွေတော့ အခက်အခဲတော့ ရှိနေလောက်ပြီ။ အလှူရှင် မရှိဘူးဆို တော့လည်း ဒီလိုပဲ ရေသန့် ဝယ်သောက်လိုက်ကြတာပဲလေ သောက်ရေကတော့။ အလှူရင်လာတော့လည်း ဝယ်သောက်စရာ မလိုတော့ဘူးပေါ့ အဆင်ပြေကြတာပေါ့။ တချို့ကန်တွေက သောက်လို့ရတဲ့ ကန်လေးတွေ ရှိတယ်လေ။ သုံးရေကန်ရှိသလို သောက်ရေကန်လည်း ရှိတယ်။ တချို့ကျတော့လည်း သောက်ရေကန်သွားပြီး သောက်တဲ့သူရှိတယ်။ မဝယ်နိုင်တဲ့ သူတွေကျတော့ ကိုယ့်ဟာကိုယ် ရေစည်တွန်းတာတို့၊ ပုခုံးနဲ့ ထမ်းတာတို့ လုပ်ရတာပေါ့။ ခါတိုင်းနှစ်တွေတော့ လာကြတယ် ဒီနှစ်တော့ မတွေ့သေးဘူးဗျ။ ကျနော်တို့ သွားလာနေတာ မတွေ့သေးဘူး အလှူရှင်လာတို့၊ ပြုတာတို့တော့” ဟု ပြောသည်။
ဒလဘက် ရေပေးနိုင်ရေး သွယ်တန်းနေကြစဉ်
လက်ရှိတွင် ဒလမြို့အတွင်းရှိ ရပ်ကွက် ၆ ခု၌ ရေစတင်၍ ရှားပါးနေပြီး ရေလှူဒါန်းမှုနှင့် ဖြန့်ဝေရေး အစီအစဉ် အကူအညီများ ရရှိရန်အတွက် မြို့နယ်အုပ်ချုပ်ရေးမှူးနှင့် စည်ပင်သာယာရေးအဖွဲ့ထံသို့ တင်ပြထားပြီဖြစ် ကြောင်း ဒေသခံများက ပြောသည်။
အလှူရှင်များ လာရောက်ပြီး ရေလှူဒါန်းသော်လည်း တချို့သော ရပ်ကွက်အတွင်းရှိ ဒေသခံများသည် ထိုရေကို သိုလှောင်ထားရန် အသုံးအဆောင်ပစ္စည်းများ မရှိသည့် အခက်အခဲများ ကြုံတွေ့နေရကြောင်း သိရသည်။
ထို့နောက် ရေကို တစ်ပတ်စာအတွက် လာရောက် လှူဒါန်းသော်လည်း ၃ ရက်စာခန့်သာ သိုလှောင်ထားနိုင်သည့် အခြေအနေများဖြင့် ကြုံတွေ့နေရကြောင်း ဒေသခံများက ပြောသည်။
လက်ရှိတွင် တချို့သော ရပ်ကွက်များ၌ ကန်ရေများသည် ခမ်းခြောက်နေပြီ ဖြစ်သည့်အတွက် ရေခပ်ချိန်ကို အချိန်သတ်မှတ်၍ တစ်နေ့လျှင် ၂ ချိန် သတ်မှတ်ထားကြောင်း ရာဇာသင်္ကြန်ရပ်ကွက် အုပ်ချုပ်ရေးမှူး ဦးအေးဝင်း က CNI သတင်းဌာနသို့ ပြောသည်။
ဒလမြို့နယ် ရေရှားပါးမှုကိုကြုံနေရစဉ်
၎င်းက “လာမလှူ သေးပါဘူးခင်ဗျ။ ကျနော်တို့ ကန်တွေမှာ အနည်းငယ် ရှိနေသေးတဲ့ အတွက်မို့လို့။ ရေကိစ္စ သိပ်ပြီး အခက်အခဲ မရှိသေးတဲ့ အတွက်ကြောင့်မို့လို့ မလာကြသေးဘူး။ ၃ လပိုင်းလောက်ဆို နည်းနည်း လာကြ မယ်နဲ့ တူပါတယ်။ တကယ်တော့ ကန်တွေကို ကျနော်တို့က ရေကန့် သတ်ချက်လေးနဲ့ နည်းနည်း ထိန်းထားတာ ပေါ့နော်။ ကျနော်တို့က ရေကန်ကို ကျနော်တို့က မနက် ၁ နာရီ၊ ည ၁ နာရီ အဲဒါမျိုးကို တစ်နေ့ ၂ နာရီ ပေးတယ်။ မနက် ၁ နာရီက မနက် ၇ နာရီကနေ ၈ နာရီပေါ့။ ညနေ ၄ နာရီကနေ ၅ နာရီပေါ့။ သောက်ရေကတော့ နည်းနည်း ခက်ခဲတာပေါ့။ ကျနော်တို့ ကန်တွေက သောက်ရေအတွက်က နည်းနည်း ခက်တယ်လေ။ ကျနော်တို့ ကန်က အခု လက်ရှိ ကန်တစ်ကန်ပဲ ရှိတာပဲ။ ကျနော်တို့က ရပ်ကွက်က ကန်က နည်းနည်း နည်းတယ် လူဦးရေထက်စာရင်။ အဲတော့ သင်္ကြန်ကန်မှာ သွားသွား ခပ်ရတယ်။ သောက်ရေကတော့ နည်းနည်း ခက်ခဲတာပေါ့။ နှစ်စဉ်နှစ်တိုင်းပါပဲ သောက်ရေကတော့” ဟု ပြောသည်။
ဒလမြို့နယ်အတွင်း ဖြစ်ပေါ်နေသည့် ရေအခက်အခဲကို ဖြေရှင်းနိုင်ရန်အတွက် အဝီစိတွင်းရေများ တူးဖော်ထား သော်လည်း ထွက်ရှိလာသည့် ရေသည် သံချေးရောင် ဖြစ်ပေါ်နေခြင်းနှင့် အငန်ဓာတ် ပါဝင်နေခြင်းကြောင့် ချက်ပြုတ်ရန် အဆင်မပြေသလို သောက်သုံးရန်လည်း အဆင်မပြေကြောင်း၊ ဆေးကြောသန့်စင်ရန် အတွက်သာ သုံးစွဲ၍ရကြောင်း ဒေသခံများက ပြောသည်။
လက်ရှိတွင် တွံတေးမြို့နယ်မှ ရေကို စည်ပင်မှတဆင့် သွယ်တန်းပေးထား၍ အသုံးပြုနေရသော်လည်း ယင်းရေ သည် သောက်ရေအဖြစ် အသုံးပြု၍ မရကြောင်း၊ ထို့အပြင် ငွေကြေး မတတ်နိုင်သည့် မိသားစုများလည်း အသုံးပြု နိုင်ခြင်း မရှိသေးကြောင်း သိရသည်။
