CNI International News
နယူးယောက်၊ အောက်တိုဘာ ၇
အာမဂေဒုန် (Armageddon) နျူကလီးယားအရေးသည် ၁၉၆၂ ခုနှစ်၊ ကျူးဘားဒုံးကျည် အကျပ်အတည်း နောက်ပိုင်း အန္တရာယ်အကြီးမားဆုံး ဖြစ်ကြောင်း အမေရိကန်သမ္မတ ဂျိုးဘိုင်ဒန်က အောက်တိုဘာ ၆ ရက်တွင် သတိပေးခဲ့သည်ဟု အေပီသတင်းဌာနက ရေးသားဖော်ပြသည်။
၈ လကျော်ကြာ ယူကရိန်းကျူးကျော်မှုတွင် ဆိုးရွားစွာ ဆုတ်ယုတ်မှုများနှင့် ကြုံတွေ့ခဲ့ရပြီးနောက်ပိုင်း နည်းဗျူဟာမြောက် နျူကလီးယားလက်နက်များ ထုတ်သုံးရန် အလားအလာကို ရုရှားအစိုးရတာဝန်ရှိသူများက ပြောဆိုလာကြပြီဖြစ်၍ ဘိုင်ဒန်က အထက်ပါတိုင်း သတိပေးခဲ့ခြင်းဖြစ်သည်။
ဒီမိုကရက်တစ်ပါတီဝင် ဆီးနိတ်အမတ်များ လှုပ်ရှားမှုကော်မတီအတွက် ရန်ပုံငွေပွဲတစ်ခု၌ မိန့်ခွန်းပြောကြားရာ၌ ဘိုင်ဒန်က ရုရှားသမ္မတ ဗလာဒီမာပူတင်နှင့်ပတ်သက်၍ “ကျနော် ဒီလူ့အကြောင်း ကောင်းကောင်းသိတယ်” ဟု ထည့်သွင်း ပြောကြားခဲ့သည်။
ပူတင်ကိုတွေ့ရစဉ် (AP)
နည်းဗျူဟာမြောက် နျူကလီးယားလက်နက်များ (သို့မဟုတ်) ဇီဝ (သို့မဟုတ်) ဓာတုလက်နက်များ ပူတင် သုံးစွဲနိုင်ခြေကို ပြောဆိုကြသည့်အခါ နောက်ပြောင်ပြောဆိုခြင်းမျိုး မပြုကြဖို့ ဘိုင်ဒန်က သတိပေးခဲ့သည်။
ဘိုင်ဒန်က “(သမ္မတဟောင်း)ကနေဒီနဲ့ ကျူးဘားဒုံးကျည် အကျပ်အတည်းတုန်းက အာမဂေဒုန်ရဲ့ အလားအလာ ကို ကျနော်တို့(အမေရိကန်တွေ) မရင်ဆိုင်ခဲ့ရဘူးဗျ” ဟု ဆက်လက် ပြောကြားခဲ့သည်။
ပူတင်၏ နျူကလီးယား ခြိမ်းခြောက်မှုသည် အစစ်အမှန်ဖြစ်ကြောင်း၊ ၎င်း၏စစ်တပ်သည် ထိုကိစ္စနှင့်ပတ်သက်၍ သိသာစွာလုပ်ဆောင်မှု နည်းပါးသည်ဟု ပြောနိုင်ကြောင်း ဘိုင်ဒန်က မှတ်ချက်ချသည်။
ရုရှားသည် ယူကရိန်းတွင် လူအစုလိုက်အပြုံလိုက် သေစေနိုင်သည့် အဖျက်စွမ်းအားမြင့် လက်နက်များ သုံးစွဲလာ နိုင်သည်ဟု အမေရိကန်အစိုးရဘက်က လတန်အကြာအောင် သတိပေးခဲ့သည်။ ယင်းသတိပေးချက်များအနက် ဘိုင်ဒန်၏ မှတ်ချက်သည် အထင်ရှားဆုံးဖြစ်သည်။
ဘိုင်ဒန် ရဟတ်ယာဉ်ပေါ်က ဆင်းလာစဉ် (AP)
ဘိုင်ဒန်၏ အကဲဖြတ်ချက်မှာ ရုရှား၏စစ်ရေး ရည်မှန်းချက် အသစ်များအပေါ် အဓိကရည်ညွှန်းခြင်း ရှိ/မရှိ လတ်တလော ရှင်းရှင်းလင်းလင်း မသိရသေးပေ။
ယခုသီတင်းပတ်အတွင်း ရုရှားနျူကလီးယား တပ်ဖွဲ့များ၏ အပြောင်းအလဲ မတွေ့ရသဖြင့် မိမိတို့လည်း နိုးကြားမှု ရှိရန် မလိုအပ်သေးကြောင်း အမေရိကန်တာဝန်ရှိသူများက ပြောကြားခဲ့သည်။
“ကျနော်တို့ရဲ့ ကိုယ်ပိုင်နျူကလီးယားဗျူဟာကို ပြောင်းလဲဖို့ အကြောင်းပြချက် မတွေ့ခဲ့ရသလို ရုရှားကလည်း နျူလက်နက်သုံးဖို့ ပြင်ဆင်နေတယ်ဆိုတဲ့ အရိပ်အယောင်လည်း မရှိပါဘူး” ဟု အိမ်ဖြူတော် ပြောခွင့်ရသူ ကာရင်း ဂျင်ပီယာက အောက်တိုဘာ ၄ ရက်တွင် ပြောကြားခဲ့သည်။
၁၉၆၂ ခုနှစ်၊ ကျူးဘားကျွန်းပေါ်သို့ ဆိုဗီယက်ပြည်ထောင်စု(ရုရှား)၏ လျှို့ဝှက်နျူကလီးယား လက်နက်များ ဖြန့်ကြက်လာမှုကို အမေရိကန်သိရှိပြီးနောက် ၁၃ ရက်ကြာ အကျပ်အတည်း ဖြစ်ပေါ်ခဲ့ဖူးသည်။ ထိုအချိန်က အမေရိကန်သမ္မတမှာ ဂျွန်အက်ဖ်ကနေဒီ ဖြစ်သည်။
Source: AP
