ကဘူးလ်၊ဩဂုတ် ၃၀

အာဖဂန်နစ္စတန်နိုင်ငံ၊ ကဘူးလ်လေဆိပ်တွင် ဩဂုတ် ၃၀ ရက် ယနေ့နံနက်အစောပိုင်းက အမေရိကန်ဒုံးကျည် ကာကွယ်ရေးစနစ်ဖြင့် ဒုံးကျည် ၅ စင်းအထိ ကြားဖြတ်တားဆီးနိုင်ခဲ့ကြောင်း အမေရိကန် စစ်ဘက်အရာရှိ တစ်ဦး၏ပြောကြားချက်ကို ကိုးကားလျက် ရိုက်တာသတင်းတစ်ပုဒ်တွင် တွေ့ရသည်။
လတ်တလောအနေအထားတွင် အမေရိကန်သည် အာဖဂန်နစ္စတန်မှ ၎င်း၏တပ်များ ဆုတ်ခွာမှုအပြီးသတ်ရန်နှင့် နှစ်အကြာဆုံးစစ်ပွဲတစ်ပွဲ အဆုံးသတ်နိုင်ဖို့ အဆောတလျင်လုပ်ဆောင်နေသည်။

အစ္စလာမ္မစ်နိုင်ငံတော်(IS) အသေခံဗုံးခွဲတိုက်ခိုက်မှုတစ်ခု ဩဂုတ် ၂၆ ရက်က ဖြစ်ပွားခဲ့ပြီး ကဘူးလ်လေဆိပ် အပြင်ဘက်တွင် အမေရိကန်တပ်ဖွဲ့ဝင် ၁၃ ဦးနှင့် အာဖဂန်အရပ်သားအများအပြား သေဆုံးခဲ့ပြီးနောက် အမေရိကန်စေလွှတ်တာဝန်ပေးထားသော စစ်မစ်ရှင်မှာ ပိုမိုအန္တရာယ်များလာခဲ့သည်။

ယခုနောက်ဆုံး ဒုံးကျည်ပစ်လွှတ်တိုက်ခိုက်မှုကြောင့် အမေရိကန်ဘက်မှ ထိခိုက်သေဆုံးမှုကို တရားဝင် မထုတ်ပြန်ဘဲ အချက်အလက်အပြောင်းအလဲရှိနိုင်ကြောင်း အမည်မဖော်လိုသူ အမေရိကန်စစ်ဘက်အရာရှိ တစ်ဦးက ရိုက်တာသို့ ကနဦးပြောကြားထားသည်။

အဆိုပါဒုံးကျည်တိုက်ခိုက်မှုသည် ယာဉ်တစ်စင်း၏နောက်ကျောဘက်မှ ပစ်လွှတ်ခြင်းဖြစ်ကြောင်း အာဖဂန် မီဒီယာသတင်းများတွင် ဖော်ပြထားသည်။ ပါ့ချ်ဝပ် (Pajhwok) သတင်းအေဂျင်စီ၏အဆိုအရ အာဖဂန်မြို့တော်ရှိ အခြားနေရာများသို့လည်း အလားတူဒုံးကျည်များ ပစ်လွှတ်ခဲ့ကြောင်း သိရသည်။

တာလီဘန်များနှင့် ဝါရှင်တန်တို့အကြား သဘောတူထားသည့် သတ်မှတ်ရက်မတိုင်မီ အမေရိကန်နှင့် ၎င်း၏ မဟာမိတ်တပ်များသည် အာဖဂန်မြေပေါ်ရှိ အမေရိကန်နိုင်ငံသားများနှင့် ဘေးအန္တရာယ်ကျရောက်နိုင်သော အာဖဂန်လူမျိုးများကို ကယ်ထုတ်ရေးကို အချိန်နှင့်တပြေးညီ ကြိုးစားနေဆဲဖြစ်သည်။ တာလီဘန်နှင့် ဝါရှင်တန်တို့ သဘောတူထားသော နောက်ဆုံးသတ်မှတ်ရက်မှာ ဩဂုတ် ၃၁ ရက်အထိ ဖြစ်သည်။

အမေရိကန်ဦးဆောင်သော မဟာမိတ်တပ်များသည် ကဘူးလ်မြို့အား တာလီဘန်များလက်အောက်မကျမီ တစ်ရက်အလိုတွင် စတင်ခဲ့သော စစ်ဆင်ရေးအရ နိုင်ငံခြားသားများနှင့် ထိရှလွယ်သောအာဖဂန်လူမျိုးများ စုစုပေါင်း ၁၁၄,၄၀၀ တို့ကို ဘေးလွတ်ရာ ရွှေ့ပေးခဲ့သည်။ သို့သော် စိတ်ပျက်အားငယ်နေသော အာဖဂန် လူမျိုးများကတော့ သောင်းနှင့်ချီ၍ ကျန်ရစ်နေဆဲဖြစ်သည်။

“ ကျမတို့ အသက်အန္တရာယ် ရှိလာနိုင်တာမို့ တတ်နိုင်သမျှ နည်းအမျိုးမျိုးနဲ့ ကြိုးစားခဲ့ပါတယ်။ သူတို့ (အမေရိကန် (ဒါမှမဟုတ်) အင်အားနိုင်ငံကြီးတစ်နိုင်ငံ) တွေက ကျမတို့ကို ကယ်တင်ဖို့ နည်းလမ်းတစ်ခုခုတော့ ပြရမယ်ရှင့်။ ကျမတို့ အာဖဂန်ကနေ ထွက်သွားသင့်တယ်။ သူတို့က ကျမတို့အတွက် လုံခြုံတဲ့နေရာတစ်ခု ပေးသင့်တယ်” ဟု ကဘူးလ်လေဆိပ်အပြင်ဘက်တွင် အမျိုးသမီးတစ်ဦးက ရိုက်တာသို့ ပြောသည်။

ဘေးလွတ်ရာသို့ အရွှေ့အပြောင်း ဆက်လုပ်ပေးနေကြောင်း၊ အစွန်းရောက်များ၏ အန္တရာယ်ကျရောက်နိုင်သူများ ကို ဦးစားပေးရွှေ့ပေးနေဆဲဖြစ်ကြောင်း အမေရိကန်စစ်ဘက်အရာရှိနှစ်ဦးက ဩဂုတ် ၃၀ ရက်တွင် ရိုက်တာသို့ ပြောကြားခဲ့သည်။ အခြားမဟာမိတ်နိုင်ငံများကလည်း ထိုသို့ အန္တရာယ်ကျရောက်နိုင်ခြေများသူအချို့ကို နောက်ဆုံးအချိန်ပေး၍ ရွှေ့ပြောင်းနေကြကြောင်း ၎င်းတို့က ဆက်လက်ပြောကြားသည်။

ဩဂုတ် ၂၆ ရက်က ကဘူးလ်လေဆိပ်တွင် သေဆုံးခဲ့သည့် အမေရိကန်တပ်ဖွဲ့ဝင်များကို ဂုဏ်ပြုရန် ဩဂုတ် ၂၉ ရက်၌ အခမ်းအနားတစ်ခုသို့ အမေရိကန်သမ္မတ ဂျိုးဘိုင်ဒန် တက်ရောက်ခဲ့သည်။ အလံလွှမ်းထားသည့် ရုပ် အလောင်းများထည့်ထားသော ခေါင်းတလားများ စစ်လေယာဉ်ပေါ်မှ ထွက်ပေါ်လာချိန်တွင် သမ္မတ ဘိုင်ဒန်က မျက်စိမှိတ်လိုက်ပြီး သူ့ဦးခေါင်းကို ငဲ့စောင်းပြသခဲ့ကြောင်း ရိုက်တာက သတင်းဆက်လက်ဖော်ပြသည်။

ဘိုင်ဒန်က အစ္စလာမ္မစ်နိုင်ငံတော် (IS) တိုက်ခိုက်မှုကို လက်စားချေမည်ဟု အဆိုပါအခမ်းအနားတွင် ကတိ ပြုခဲ့သည်။ ကဘူးလ်လေဆိပ်၌ သေဆုံးခဲ့သည့် အမေရိကန်တပ်ဖွဲ့ဝင်များအားလုံးသည် အသက် ၃၁ နှစ်ပင်မရှိသေးဘဲ ၅ ဦးမှာ အသက် ၂၀ သာရှိသေးသဖြင့် အမေရိကန်တို့၏အာဖဂန်စစ်ပွဲသက်တမ်းနှင့် အတူတူပင် ဖြစ်သည်။