CNI News
၂၀၂၆ ခုနှစ်၊ ဇန်နဝါရီ ၂၆
စွမ်းရည်စွမ်းအားရှိသည့် တပ်မတော် တစ်ရပ်ကို တည်ဆောက်သွားမည်ဆိုပါက မိမိတို့ နိုင်ငံအပေါ် မည်သူကမျှ မလေးမစား ပြုလုပ်နိုင်မည်မဟုတ်ကြောင်း နိုင်ငံလုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ ဗိုလ်ချုပ်မှူး ကြီး မင်းအောင်လှိုင်က ပြောသည်။
၂၀၂၆ ခုနှစ်၊ ဇန်နဝါရီ ၂၅ ရက်တွင် အလယ်ပိုင်းတိုင်းစစ်ဌာနချုပ်၊ မန္တလေးတပ်နယ်ရှိ အရာရှိ၊ စစ်သည်၊ မိသားစုများ အား တွေ့ဆုံစဉ် ၎င်းက ပြောကြားခဲ့သည်။
ဗိုလ်ချုပ်မှူးကြီးမင်းအောင်လှိုင်က “ စွမ်းရည်စွမ်းအားရှိသည့် တပ်မတော်တစ်ရပ်ကို တည်ဆောက်သွားမည်ဆိုပါ က မိမိတို့ နိုင်ငံအပေါ် မည်သူကမျှ မလေးမစား ပြုလုပ်နိုင်မည် မဟုတ်ကြောင်း၊ ထို့်ကြောင့် စွမ်းရည်စွမ်းအားရှိ သည့် တပ်မတော် တစ်ရပ်ကို အမြဲတမ်း ဆက်လက် ကြိုးပမ်း တည်ဆောက်သွားကြရမည်”ဟု ပြောသည်။
စွမ်းရည်စွမ်းအားရှိသည့် တပ်မတော်ဖြစ်စေရေးအတွက် တပ်မတော်အနေဖြင့် ခေတ်အလိုက် နေ့စဉ်နှင့်အမျှ ပြောင်းလဲတိုးတက်လာနေသည့် နည်းပညာများနှင့်အညီ စစ်အသုံးအဆောင်ပစ္စည်းများ တပ်ဆင်ပေးခြင်းများကို စဉ်ဆက်မပြတ် ဆောင်ရွက်ပေးလျက်ရှိကြောင်း ၎င်းက ပြောသည်။
ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်
ထို့နောက် စွမ်းအားရှိသည့် တပ်မတော်ဖြစ်စေရေးအတွက် ရှိသင့်ရှိထိုက်သည်များကို ဖြည့်တင်းပေးနေရမည် ဖြစ်သကဲ့သို့ စွမ်းရည်ရှိသည့် တပ်မတော်ဖြစ်စေရေးအတွက်လည်း စစ်သည် တစ်ဦးချင်းစီအလိုက်၊ တပ်ဖွဲ့ တစ်ဖွဲ့ချင်းစီ အလိုက်မှစ၍ ကျန်းမာကြံ့ခိုင်မှုရှိစေရေး၊ တိုက်ရည်ခိုက်ရည်နှင့် ရဲစွမ်းသတ္တိရှိစေရေး၊ စစ်နည်းဗျူဟာ နှင့် စစ်လက်နက်ပစ္စည်းများအပေါ် ကျွမ်းကျင်မှုရှိစေရေး အမြဲမပြတ် လေ့ကျင့်ဆောင်ရွက်ပေးနေရမည်ဖြစ် ကြောင်း၊ နေ့စဉ်နှင့်အမျှ ပြောင်းလဲတိုးတက်နေသည့် စစ်အတတ်ပညာနှင့် စစ်နည်းဗျူဟာများကိုလည်း ခေတ် နှင့်အညီ အသုံးချနိုင်ရေး ဆောင်ရွက်ကြရန်လိုကြောင်း ဗိုလ်ချုပ်မှူးကြီးမင်းအောင်လှိုင်က ပြောသည်။
လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများဖြစ်ပွားနေသည်။
အဆိုပါ တိုက်ပွဲများအတွင်း မြန်မာ့တပ်မတော်သည် မြို့ပြများကို လက်လွတ်ခဲ့ရသလို တိုင်းစစ်ဌာနချုပ်တချို့ကို လည်း လက်လွတ်ထားရသည်။
တခြားတစ်ဖက်မှာလည်း လက်နက်ကိုင် အင်အားစုများက ပြည်ထောင်စုလမ်းမကြီးနှင့် အဝေးပြေးလမ်းမကြီး များပေါ်သို့ တက်ရောက်ကာ စစ်ဆေးရေးများ ပြုလုပ်ခြင်းများလည်း ရှိနေသည်။
ထိုအခြေအနေများနှင့် ပတ်သက်ပြီး မြန်မာ့တပ်မတော်က တရားဥပဒေစိုးမိုးရေး၊ နယ်မြေ တည်ငြိမ်ရေး၊ နယ်မြေ စိုးမိုးရေး လုပ်ငန်းများကို အကောင်အထည်ဖော် ဆောင်ရွက်မှုများ ပြုလုပ်လျက်ရှိသည်။
