CNI News
၂၀၂၆ ခုနှစ်၊ ဇန်နဝါရီ ၆
ရှမ်းပြည်နယ်မြောက်ပိုင်း၊ မူဆယ်မြို့တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ(USDP)ကို ကြိုတင် မဲများဖြင့် ရှုံးနိမ့်သွားသည့် ရလဒ်အပေါ် ကန့်ကွက်ရန် စဉ်းစားနေကြောင်း ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ) မှဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။
၂၀၂၅ ခုနှစ်၊ ဒီဇင်ဘာ ၂၈ ရက်က ကျင်းပခဲ့သည့် ရွေးကောက်ပွဲ အပိုင်း(၁)တွင် မူဆယ်မြို့၌ မဲရုံ ၁၈ ရုံ ရှိပြီး ကျားဖြူပါတီသည် ၁၇ ရုံမှာ အနိုင်ရရှိနေသည့်တိုင် ကျန် ၁ ရုံ၌ ကြိုတင်မဲများ ရောက်လာကာ ရှုံးနိမ့်သွားခဲ့ရကြောင်း၊ ထိုရလဒ်သည် အမှန်တရား မဟုတ်ကြောင်း ၎င်းက ပြောသည်။
စိုင်းအိုက်ပေါင်းက “တကယ့်တကယ် ဟိုဟာပဲ ကျနော်တို့ မူဆယ်မှာလေ မဲရုံက ၁၈ ရုံရှိတယ်၊ ၁၈ ရုံမှာ ကျနော်တို့ ကျားဖြူက ၁၇ ရုံနိုင်ပြီဗျာ။ နောက်ဆုံးတစ်ရုံမှာကြမှ တစ်ခါတည်း ကြိုတင်မဲတွေနဲ့ လာထည့် လိုက်တော့ ကျနော်တို့ ပြန်ရှုံးသွားတယ်။ ဒါမဖြစ်သင့်ဘူး။ ဒါအမှန်တရား မဟုတ်ဘူး။ တကယ်တကယ် အမှန်တရား မရဘူးပြောလို့ ရတယ်ပေါ့။ ကျနော်တို့ စဉ်းစားနေတယ်။ အဲဒါကို ကန့်ကွက်မလားလို့ စဉ်း စားနေတယ်။ ကျနော်တို့ နိုင်ရမယ်လေ။ မဲရုံ ၁၈ ရုံရှိတဲ့အထဲမှာ ၁၇ ရုံနိုင်ပြီးပြီလေ။ နောက်ဆုံး ၁၈ ရုံ ကြမှ ကြိုတင်မဲတွေနဲ့ လာပြီး လုပ်နေတဲ့ဟာက ဒါက မမှန်ကန်ဘူးလေ။ ဘယ်သူတွေ လာပေးလဲတော့ မသိဘူး။ ကြိုတင်မဲတွေ လုပ်လိုက်တော့ အဲဒါ မဟုတ်သေးဘူးလေ။ မမှန်ဘူးလေ။ ကျနော်တို့က ကြိုး စားပြီး ပြိုင်တယ်ဆိုတာ တပ်ချုပ်ကြီးက လွတ်လပ်ပြီး တရားမျှတတဲ့ ရွေးကောက်ပွဲ ဖြစ်ရမယ်ဆိုလို့ အဲဒီတော့ ကျနော်တို့က ယုံကြည်ပြီးတော့ ဝင်ပြိုင်တာလေ” ဟု ပြောသည်။
မူဆယ်မြို့မှာ မဲထည့်နေကြစဉ်
ပါတီစုံဒီမိုကရေစီ အထွေထွေရွေးကောက်ပွဲ အပိုင်း(၁)ကို ၂၀၂၅ ခုနှစ်၊ ဒီဇင်ဘာ ၂၈ ရက်တွင် ကျင်းပခဲ့ ပြီးနောက် ပါတီအများစုသည် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီအား ကြိုတင်မဲများဖြင့် ရှုံးနိမ့် ခဲ့ကြသည်။
ကြိုတင်မဲနှင့်ပတ်သက်၍ ပွင့်လင်းမြင်သာမှု အားနည်းသည်ဟုဆိုကာ ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ)၊ ပြည်သူ့ပါတီ (PP)၊ မြန်မာနိုင်ငံ တောင်သူလယ်သမား ဖွံ့ဖြိုး တိုးတက်ရေးပါတီတို့မှ ဗိုလ်ချုပ်မှူးကြီး မင်းအောင်လှိုင်ထံ စာပေးပို့ အကြောင်းကြားထားသည်။
လက်ရှိ ရွေးကောက်ပွဲ အပိုင်း(၁)တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) သည် တစ်နိုင်ငံလုံး အတိုင်းအတာအရ ၈၀ ရာခိုင်နှုန်းခန့် အနိုင်ရရှိထားပြီး တိုင်းရင်းသားစည်းလုံးညီညွတ်ရေး ပါတီ (တစည)သည် ဒုတိယအများဆုံးနှင့် တိုင်းရင်းသားပါတီများက တတိယအများဆုံး အနိုင်ရရှိထား ခြင်းဖြစ်သည်။
ထို အပိုင်း(၁) မဲရလဒ် အခင်းအကျင်းအရ လာမည့် အပိုင်း (၂) နှင့် အပိုင်း (၃) တို့တွင်လည်း USDP ပါတီ ဆက်လက် အားကောင်းနိုင်ကာ လွှတ်တော်ထဲတွင်လည်း ၎င်းတို့သည်သာ နေရာအများစု ရရှိနိုင်သည် ဟု နိုင်ငံရေးပါတီများက သုံးသပ်ကြသည်။
နိုင်ငံရေးပါတီ ခေါင်းဆောင်များကို တွေ့ရစဉ်
ထို့ကြောင့် လွှတ်တော်ထဲတွင် ပါတီအရောင်အသွေး စုံလင်မည် ဖြစ်သော်လည်း အရေအတွက်မှာ မများ နိုင်ကြောင်း ရှမ်းနှင့်တိုင်းရင်းသားများ ဒီမိုကရက်တစ်ပါတီ (ကျားဖြူပါတီ) မှဥက္ကဋ္ဌ စိုင်းအိုက်ပေါင်းက CNI သတင်းဌာနသို့ ပြောသည်။
၎င်းက “ပါတီတွေ စုံတော့စုံမှာပေါ့။ ဒါပေမယ့် အရေအတွက်က မများဘူးပေါ့။ အခုဆိုရင် တို့ပါတီက တော့ ပြည်သူ့လွှတ်တော်မှာ ၂ ယောက် နိုင်ထားတယ်လေ။ အမှန်တို့က ရည်မှန်းထားတာ ဒီထက်မက အများကြီး နိုင်ရမယ်လေကွာ။ တကယ့် ပွင့်လင်းမြင်သာပြီးတော့ တရားမျှတတယ်ဆိုရင် ကျနော်တို့က ဒီထက်နိုင်ရမယ်လေ။ ကျိုင်းတုံမှာလည်း ကျနော်တို့နိုင်ရမှာ၊ တာချီလိတ်လည်း နိုင်ရမှာ၊ မူဆယ်လည်း နိုင်ရမှာဗျာ၊ လားရှိုးလည်း နိုင်ရမှာ။ အဲဒီလိုကြီးတွေ ဖြစ်နေတော့ ကျနော်တို့ သိပ်တောင် မပြောချင် တော့ဘူးဗျ” ဟု ပြောသည်။
ကျန်ရှိသည့် ရွေးကောက်ပွဲ အပိုင်း (၂) ကို ၂၀၂၆ ခုနှစ်၊ ဇန်နဝါရီ ၁၁ ရက်နေ့တွင် မြို့နယ် ၁၀၀ မှာ လည်း ကောင်း၊ အပိုင်း (၃) ကို ဇန်နဝါရီလ ၂၅ ရက်နေ့တွင် ၆၃ မြို့နယ်၌ လည်းကောင်း ဆက်လက် ကျင်းပ သွားမည်ဖြစ်သည်။
တရားမျှတမှု၊ မြင့်မားသော ဆန္ဒမဲခွဲဝေမှုနှင့် ပေါင်းစပ်တည်ငြိမ်မှုကောင်းသော အစိုးရအဖွဲ့များ ဖွဲ့စည်း ဆောင်ရွက်သွားမည်ဟု ဗိုလ်ချုပ်မှူးကြီး မင်းအောင်လှိုင်က ၂၀၂၆ ခုနှစ်၊ ဇန်နဝါရီ ၄ ရက်နေ့တွင် ကျရောက်ခဲ့သည့် (၇၈) နှစ်မြောက် လွတ်လပ်ရေးနေ့ အခမ်းအနားသို့ ပေးပို့သည့် သဝဏ်လွှာတွင် ပြောကြားထားသည်။
