CNI News
၂၀၂၅ ခုနှစ်၊ နိုဝင်ဘာ ၁၃
ရှမ်းလက်နက်ကိုင် တပ်ဖွဲ့များအနေဖြင့် မြန်မာ့တပ်မတော်နှင့် စစ်ရေးအရ အပစ်အခတ်ရပ်စဲထားကြသကဲ့သို့ အချင်းချင်းကြားထဲ၌လည်း အပစ်ရပ်ကြရန် လိုအပ်ကြောင်း နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။
၎င်းက “ရှမ်းပြည်မှာလေ စစ်ကောင်စီ တစ်ခုတည်းနဲ့ အပစ်ရပ်လို့ မရဘူး။ ကျနော်တို့လည်း လက်တွေ့မြင်လာခဲ့ ရတယ်။ ဥပမာ ရှမ်းအကျိုးစီးပွားအတွက် လုပ်နေပါတယ်ဆိုတဲ့ RCSS နဲ့ SSPP တောင်မှ အချင်းချင်း ပစ်ခတ်မှု တွေ ဖြစ်ခဲ့တယ်၊ ထိတွေ့မှုတွေ ဖြစ်ခဲ့တယ်။ ဆိုတော့ တခြား လက်နက်ကိုင် တပ်ဖွဲ့တွေနဲ့လည်း အဲဒီလိုမျိုး မဖြစ် လာနိုင်ဘူးလို့ မပြောနိုင်ဘူး။ အဓိက,ကတော့ စစ်ကောင်စီနဲ့ အပစ်ရပ်နိုင်သလို ကိုယ့်ဒေသမှာရှိနေတဲ့ တစ်မြေ တည်းနေ တစ်ရေတည်း အတူတူရှိနေတဲ့ လူတွေအားလုံး အပစ်ရပ်နိုင်မှသာလျှင် တကယ့်ကို ငြိမ်းချမ်းမှာပေါ့ နော်။ အခုက အဲဒီလိုမျိုး မဟုတ်ဘူး။ စစ်ကောင်စီနဲ့တော့ ရပ်တယ်။ အချင်းချင်းကြတော့ ခြေချင်းထိုးနေတယ်။ ဒီဟာက ပြဿနာကတော့ အလားအလာ မကောင်းဘူးပေါ့နော်” ဟု ပြောသည်။
သျှမ်းပြည်ပြန်လည်ထူထောင်ရေးကောင်စီ (RCSS) သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူ စာချုပ် (NCA) ရေးထိုးထားသည့် အဖွဲ့ဖြစ်ပြီး ရှမ်းပြည်တိုးတက်ရေးပါတီ (SSPP) သည် အစိုးရနှင့် ပြည်နယ် အဆင့်- ပြည်ထောင်စုအဆင့် ပဏာမ အပစ်အခတ်ရပ်စဲရေးစာချုပ် (Bilateral) လက်မှတ်ရေးထိုးထားခြင်း ဖြစ်သည်။
SSPP တပ်ဖွဲ့ကို တွေ့ရစဉ်
ထို့ပြင် SSPP သည် “ဝ”လက်နက်ကိုင်အဖွဲ့ UWSA က ဦးဆောင်ဖွဲ့စည်းခဲ့သည့် ပြည်ထောင်စုနိုင်ငံရေး ဆွေးနွေး ညှိနှိုင်းရေးကော်မတီ(FPNCC)တွင် အဖွဲ့ဝင် မဟာမိတ်လက်နက်ကိုင်အဖြစ် ပါဝင်ထားသည်။
ရှမ်းလက်နက်ကိုင်များသည် ၂၀၂၁ ခုနှစ်နောက်ပိုင်း၌ မြန်မာ့တပ်မတော်နှင့် ပူးပေါင်း၍ တိုက်ပွဲဝင်နေခြင်း မရှိသကဲ့သို့ တော်လှန်ရေး အင်အားစုများနှင့် ပူးပေါင်း၍ လည်း မြန်မာ့တပ်မတော်ကို တော်လှန်နေခြင်းမျိုး မရှိကြောင်း စစ်ရေးနှင့်နိုင်ငံရေးအကဲခတ်များက ထောက်ပြကြ သည်။
ထို့ပြင် နွေဦးတော်လှန်ရေး အင်အားစုများနှင့် ပူးပေါင်း၍ မြို့သိမ်းတိုက်ပွဲများ ဖော်ဆောင်ခဲ့ကြသည့် ရှမ်းပြည် မြောက်ပိုင်းရှိ ကိုးကန့်တပ် (MNDAA) နှင့် တအာင်းလွတ်မြောက်ရေးတပ်မတော်(TNLA) တို့သည်လည်း မြန်မာ့ တပ်မတော်နှင့် အပစ်အခတ်ရပ်စဲရေး သဘောတူ လက်မှတ်ထိုးထားကြသည်။
ထို့ကြောင့် ရှမ်းပြည်နယ်အတွင်းရှိ တိုင်းရင်းသားလက်နက်ကိုင် အားလုံးနီးပါးသည် မြန်မာ့တပ်မတော်နှင့် အပစ်ရပ်ထားသည့်သဘော သက်ရောက်နေကြောင်း စစ်ရေးနှင့်နိုင်ငံရေးအကဲခတ်များက ယူဆကြသည်။
MNDAA တပ်ဖွဲ့ကို တွေ့ရစဉ်
ရှမ်းပြည်နယ်တွင် RCSS နှင့် SSPP ကြားလည်းကောင်း၊ TNLA နှင့် SSPP ကြားလည်းကောင်း၊ KIA နှင့် TNLA ကြားလည်းကောင်း စစ်ရေးအရ ပွတ်တိုက်မှုများ ဖြစ်ပေါ်နေသည်။
ရှမ်းပြည်နယ်ရှိ မတူကွဲပြားမှုများကို စုစည်းနိုင်မှသာ ပြည်ထောင်စုကို ဦးတည်မည့် စုစည်းမှုမျိုးကို တည်ဆောက် နိုင်မှာဖြစ်ကြောင်း နိုင်ငံရေးလေ့လာသုံးသပ်သူ စိုင်းမိဏ်းက CNI သတင်းဌာနသို့ ပြောသည်။
၎င်းက “အခုကလည်း သူတို့က ထိတွေ့မှုက ကိုယ့်စီမှာ ရှိနေပေမယ့် ဆိုရှယ်မီဒီယာမှာ အချင်းချင်း ပြောဆိုနေ တဲ့ဟာတွေက မနက်ဖြန် ဒါမှမဟုတ် နောက်လ ဒါမှမဟုတ် နောက်နှစ် ထိတွေ့မှုက ဦးတည်နေတာပဲ။ ဒီလူမှု ကွန်ရက်မှာ အချင်းချင်း ပြဿနာရှာနေတဲ့ ကိစ္စတွေပေါ့နော်။ အဲဒါတွေ တော်တော်လေး အရေးကြီးပါတယ်။ စစ်ကောင်စီနဲ့ အပစ်ရပ်သလို သူတို့အချင်းချင်းလည်း အပစ်ရပ်သင့်တယ်။ ဒါမှသာလျှင် စစ်မှန်တဲ့ ပြည်ထောင်စု ကြီးကို ဦးတည်နိုင်မှာပေါ့။ ရှမ်းပြည်ရဲ့ မတူကွဲပြားမှုကို စုစည်းနိုင်မှသာလျှင် ပြည်ထောင်စုကို ဦးတည်မယ့် စုစည်းမှုကို တည်ဆောက်နိုင်မှာပေါ့။ သို့မဟုတ် ဆိုရင်တော့ ဘယ်တော့မှ ငြိမ်းချမ်းမှာ မဟုတ်ဘူး။ လက်တွေ့ အားဖြင့် ဆိုရင်လည်း စုစည်းမှု ပြည်ထောင်စုဆိုတဲ့ဟာကလည်း နာမည်ပဲ ဖြစ်မှာပေါ့နော်။ တိုက်ပွဲက ပြန်ဖြစ်မှာ ပဲ၊ သွေးခွဲမှုက ပြန်ရှိနေမှာပဲ” ဟု ပြောသည်။
ရှမ်းပြည်နယ်တွင် တိုင်းရင်းသားလူမျိုးစုံ နေထိုင်ကြသည့်အပြင် လက်နက်ကိုင် အဖွဲ့များမှာလည်း အသီးသီး ရှိကြသဖြင့် ၂၀၂၁ ခုနှစ် နိုင်ငံရေး အပြောင်းအလဲ ဖြစ်ပြီးနောက်ပိုင်း လက်နက်ကိုင် ပဋိပက္ခများ ကျယ်ပြန့် ပြင်းထန်လာခြင်းနှင့်အတူ ရှမ်းပြည်၏ နိုင်ငံရေး အခြေအနေ ဘယ်လိုရှိလဲဆိုသည့်အပေါ် စစ်ရေးနှင့်နိုင်ငံရေး အကဲခတ်များကြား စောင့်ကြည့်လေ့လာနေကြသည်။
