CNI International News

ဘန်ကောက်၊ ဧပြီ ၅

ဧပြီ ၄ ရက်က ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ဆဋ္ဌမအကြိမ်မြောက် BIMSTEC ထိပ်သီးအစည်းအဝေးနှင့် ဆက်စပ် အစည်းအဝေးများကို ဘန်ကောက်မြို့ရှိ ရှန်ဂရီလာဟိုတယ်တွင် ပြုလုပ်ခဲ့သည်။

ထိုအစည်းအဝေးများတွင် ထိုင်းဝန်ကြီးချုပ် ပေတုန်တန်သည် ၂၀၃၀ ပြည့်နှစ်တွင် ချမ်းသာကြွယ်ဝမှု၊ ကြံ့ကြံ့ခံ နိုင်မှုနှင့် ပွင့်လင်းမှုရှိသည့် (PRO) BIMSTEC အဖြစ် ထူထောင်ရန် ရည်ရွယ်ချက်ဖြင့် “ဘန်ကောက် ဗွီးရှင်း ၂၀၃၀” (Bangkok Vision 2030) အမည်ရှိ အစီအစဉ်ကို တင်ပြခဲ့ကြောင်း The Nation မှ ဖော်ပြခဲ့သည်။

ကဏ္ဍစုံ နည်းပညာနှင့် စီးပွားရေးပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အဖွဲ့သည် တောင်အာရှနှင့် အရှေ့တောင်အာရှနိုင်ငံများ စုဖွဲ့ထားသည့် အဖွဲ့ဖြစ်သည်။

၁၉၉၇ ခုနှစ်ကတည်းက ထူထောင်ခဲ့သည့် ထိုအဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာ နှင့် ဘူတန်နိုင်ငံတို့ ပါဝင်ပြီး ကုန်သွယ်ရေး၊ ရင်းနှီးမြှုပ်နှံရေး၊ ချိတ်ဆက်ဆောင်ရွက်ရေး၊ လုံခြုံရေးနှင့် ယဉ်ကျေးမှု ဖလှယ်ရေးတို့ကို အာရုံစိုက်လုပ်ဆောင်ခဲ့သည်။။

ထိုင်းဝန်ကြီးချုပ် ပေတုန်တန်ကို တွေ့ရစဉ်

ဧပြီ ၄ ရက်က အစည်းအဝေး ဖွင့်ပွဲအပြီးတွင် ပေတုန်တန်က BIMSTEC အဖွဲ့ဝင် နိုင်ငံများအတွက် ချမ်းသာ ကြွယ်ဝမှု၊ ကြံ့ကြံ့ခံနိုင်မှုနှင့် ပွင့်လင်းမှုရှိသည့် အနာဂတ်ကို ထူထောင်ဖို့ လမ်းညွှန်ပေးရန် ရည်ရွယ်သော ပူးပေါင်း ဆောင်ရွက်ရေး မူဘောင်တစ်ခုဖြစ်သည့် Bangkok Vision 2030 ကို ချပြခဲ့ခြင်းဖြစ်သည်။

ထိုမူဘောင်၏ မျှော်မှန်းချက်သည် ကမ္ဘာလုံးဆိုင်ရာ စိန်ခေါ်မှုများကို ကိုင်တွယ်ဖြေရှင်းရန်၊ ဒေသတွင်း ချိတ်ဆက် မှုများကို အားကောင်းလာစေရန်နှင့် ဒေသတွင်း စွမ်းဆောင်ရည်ကို မြှင့်တင်ရန် ရည်ရွယ်ထားခြင်းဖြစ်သည်။

BIMSTEC ၏ စီးပွားရေး အလားအလာအရ ဒေသတွင်း နေထိုင်ကြသည့် လူဦးရေ စုစုပေါင်းသည် ကမ္ဘာ့လူဦးရေ၏ ၄ ပုံ ၁ ပုံနီးပါးဖြစ်ပြီး BIMSTEC အဖွဲ့ဝင်နိုင်ငံများအကြား ကုန်သွယ်မှု ပမာဏသည် ကမ္ဘာ့ကုန်သွယ်မှု၏ ၆ ရာခိုင်နှုန်းရှိကြောင်း ပြောကြားခဲ့သည်။

လွတ်လပ်စွာ ကုန်သွယ်မှု သဘောတူညီချက်  (BIMSTEC FTA) ကို စီးပွားရေးနှင့် ကုန်သွယ်မှု အလားအလာများ အတွက် အရှိန်မြှင့်လုပ်ဆောင်ရန် အဆိုပြုခဲ့သည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

လေထုညစ်ညမ်းမှု၊ ရာသီဥတု ဖောက်ပြန် ပြောင်းလဲမှုနှင့် ကပ်ရောဂါများကဲ့သို့ ကမ္ဘာလုံးဆိုင်ရာ စိန်ခေါ်မှုများကို ထောက်ရှုပြီး ဒေသတွင်း ပြည်သူ့ကျန်းမာရေး စနစ်များနှင့် ထောက်ပံ့ရေး ကွင်းဆက်များ၏ ခံနိုင်ရည်အား ပိုမို မြင့်မားစေရန် အရေးတကြီး လိုအပ်နေသည့် အချက်ကို ပေါ်လွင်စေခဲ့ကြောင်း ပေတုန်တန်က ပြောသည်။

မကြာသေးမီက လှုပ်ခတ်ခဲ့သည့် အင်အားပြင်း ငလျင်ကြောင့် BIMSTEC အဖွဲ့အတွင်း သဘာဝဘေးအန္တရာယ် စီမံခန့်ခွဲမှုတွင် ဒေသတွင်း ပူးပေါင်းဆောင်ရွက်မှု လိုအပ်ကြောင်း ၎င်းက အလေးထား ပြောဆိုခဲ့သည်။

ထို့ပြင် လူမှောင်ခိုကူးမှု၊ မူးယစ်ဆေးဝါး မှောင်ခိုကူးမှုနှင့် ဆိုက်ဘာရာဇဝတ်မှုကဲ့သို နိုင်ငံဖြတ်ကျော် ရာဇဝတ်မှု များကို ဖြေရှင်းရန် လိုအပ်ကြောင်း၊ BIMSTEC ၏ အနာဂတ်အတွက် များပြားသည့် နယ်ပယ်ကဏ္ဍများ အထူး သဖြင့် SME လုပ်ငန်းများ၏ အခန်းကဏ္ဍကို အလေးထား ပြောဆိုခဲ့ပြီး BIMSTEC စီးပွားရေးအကြံပေးကောင်စီ ထူထောင်ရန်လည်း ပေတုန်တန်က အဆိုပြုခဲ့သည်။

Source: The Nation