CNI International News

နယူးဒေလီ၊ နိုဝင်ဘာ ၁၉

ထောင်နှင့်ချီသောလယ်သမားများ နှစ်ရှည်လများဆန္ဒပြခဲ့ကြသော အငြင်းပွားဖွယ် မြေယာနှင့် စိုက်ပျိုးရေး ဥပဒေများကို ရုပ်သိမ်းမည်ဖြစ်ကြောင်း အိန္ဒိယဝန်ကြီးချုပ်က နိုဝင်ဘာ ၁၉ ရက် (ယနေ့) မှာ ကြေညာခဲ့ရာ အဆိုပါခြေလှမ်းသည် အုပ်ချုပ်ရေးအတွက် အရေးပါသည့် နိုင်ငံရေးစိန်ခေါ်မှုတစ်ရပ်ဖြစ်လာခဲ့ကြောင်း အေပီ သတင်းဌာနက ရေးသားဖော်ပြသည်။

ယင်းသို့ ဆုံးဖြတ်လိုက်ခြင်းသည် ဝန်ကြီးချုပ် နရိန္ဒြာမိုဒီ၏ ဘနာတီယဇနတာ(BJP) ပါတီအတွက် ကြီးမားသည့် ထိုးနှက်ချက်ဖြစ်သည်။ ယခုဝန်ကြီးချုပ်၏ကြေညာချက်ကို အိန္ဒိယလွှတ်တော်အတွင်း သဘောထားတင်းမာသော အမတ်အများစုက လိုလားကြမည်ဖြစ်သော်လည်း လုံလောက်သည့်ဆွေးနွေးတိုင်ပင်မှုမရှိဘဲ ဥပဒေများကို ဖောက် ဖျက်နေသည်ဟု အတိုက်အခံခေါင်းဆောင်များနှင့် ဖွဲ့စည်းပုံအခြေခံဥပဒေဆိုင်ရာကျွမ်းကျင်သူများက စွပ်စွဲလေ့ ရှိကြသည်။

အက်တာပရာဒက်ရှ်နှင့် ပန်ဂျပ်ပြည်နယ်တို့တွင် အဓိကရွေးကောက်ပွဲများမတိုင်မီ ထွက်ပေါ်လာသော ယခု ဆုံးဖြတ်ချက်သည် ဂုရုပါရက်ဘ် (Guru Purab) ပွဲတော်နေ့၌ ဆန္ဒပြသူအများစုကို စုစည်းလှုပ်ရှားခဲ့သူ ဆစ်ခ်စ် (Sikhs)က ၎င်းတို့တည်ထောင်သူ ဂုရုနာနက်(Guru Nanak)၏ မွေးနေ့ဆင်နွှဲမှုနှင့်လည်း တိုက်ဆိုင်နေသည်။

၎င်းအစိုးရလက်ထက် အထင်ရှားဆုံးနှင့် အငြင်းပွားစရာဆုံးဖြတ်ချက်အချို့ကို အများသိစေရန်အတွက် ရွေးချယ် နေကျကြားခံတစ်ခုအဖြစ် ရုပ်သံလိုင်းမှ တိုက်ရိုက်ထုတ်လွှင့်သောမိန့်ခွန်းထဲတွင် မိုဒီက ယခုကြေညာချက်ကို ထုတ်ပြန်ခဲ့ခြင်းဖြစ်သည်။

လွှတ်တော်အစည်းအဝေးကျင်းပချိန် လာမည့်ဒီဇင်ဘာလတွင် စတင်မည့် ဖွဲ့စည်းပုံအခြေခံဥပဒေ ပြင်ဆင်ရေး လုပ်ငန်းစဉ်များ ဆောင်ရွက်ကြရန်အလို့ငှာ လမ်းများပေါ်၌ လယ်ယာကိစ္စဆန္ဒပြနေသူများ အိမ်ပြန်ကြရန် မိုဒီက တိုက်တွန်းခဲ့သည်။

“နိုင်ငံတော်အတွက် တောင်းပန်ရင်းနဲ့ ကျနော်တို့ရဲ့လယ်သမားညီအစ်ကိုတချို့ကို အမှန်တရားကို မရှင်းပြ နိုင်ခဲ့ပေမယ့် ကျနော်တို့ရဲ့ကြိုးစားအားထုတ်မှုမှာ တစုံတရာလွဲချော်မှုရှိခဲ့တယ်ဆိုတာ ရိုးသားဖြူစင်တဲ့စိတ်နဲ့ ကျနော်ပြောချင်ပါတယ်” ဟု မိုဒီက ၎င်းမိန့်ခွန်းတွင် ထည့်သွင်းပြောကြားခဲ့သည်။

ထို့နောက် ၎င်းက “ကျနော်တို့ အသစ်တဖန် စတင်ကြပါစို့” ဟု အားပေးသွားခဲ့သည်။

အဆိုပါ အငြင်းပွားစရာ မြေယာဥပဒေများကို ယမန်နှစ် စက်တင်ဘာလတွင် အတည်ပြုခဲ့ပြီးနောက် အတိုက် အခံအုပ်စုများထံမှ ထပ်တလဲလဲ တောင်းဆိုမှုများ ရှိခဲ့သော်လည်း မိုဒီ၏ BJP ပါတီက ငြင်းဆိုခဲ့ပြီး လွှတ်တော် တွင်း အချေအတင်ဆွေးနွေးမှု (debate) ကို သက်တမ်းတိုးရန်သာ တုံ့ပြန်ခဲ့သည်။

ပြီးခဲ့သည့်တစ်နှစ်က ပြဋ္ဌာန်းခဲ့သော ဥပဒေများသည် အိန္ဒိယ၏စိုက်ပျိုးရေးကဏ္ဍခေတ်မီစေရန်နှင့် ပုဂ္ဂလိက ရင်းနှီးမြှုပ်နှံမှုများမှတစ်ဆင့် ထုတ်လုပ်မှုမြှင့်တင်ရန် လိုအပ်သောပြုပြင်ပြောင်းလဲမှုများဖြစ်ကြောင်း အစိုးရက ၎င်းတို့လုပ်ရပ်အပေါ် ခုခံကာကွယ်ခဲ့သည်။

သို့သော် လယ်သမားများက ၎င်းတို့အတွက် အာမခံထားသောဈေးနှုန်းများကို အဆုံးသတ်ပြီး သီးနှံများကို သက်သာသောနှုန်းထားဖြင့် စီးပွားရေးကော်ပိုရေးရှင်းများထံသို့ အတင်း အကြပ်ရောင်းစေခြင်းဖြင့် ဥပဒေသစ်က ၎င်းတို့ဝင်ငွေများကို ထိခိုက်စေမည်ဟု ထောက်ပြသည့်အပေါ် တခဲနက်ကန့်ကွက်ခဲ့ကြသည်။

ယနေ့ခေတ် အိန္ဒိယလယ်သမားအများစု အသေးစားလုပ်ငန်းများ လုပ်ကိုင်ကြပြီး ၎င်းတို့ဝင်ငွေအတွက် ဥပဒေဖြင့် ခြိမ်းခြောက်မှုရှိလာခြင်းအပေါ် အထူးစိုးရွံ့ကြသည်။ ၎င်းတို့အနက် သုံးပုံတစ်ပုံကျော်သည် ၁ ဟက်တာ (၂ ဧက နှင့်တဝက်)ထက်နည်းသော မြေယာများကိုသာ ပိုင်ဆိုင်ကြရှာသည်။

ဥပဒေသစ်ပါ အပိုဒ်များသည် လယ်သမားများကို တရားရုံး၌ စာချုပ်စာတမ်းပါ အငြင်းပွားမှုများကို ဖြေရှင်းနိုင်စေ ရန် တားဆီးထားပြီး အစိုးရက ခန့်အပ်ထားသော ဗျူရိုကရက်ဝန်ထမ်းများမှအပ ၎င်းတို့အနေဖြင့် လွတ်လပ်စွာ ပြန်လည်ဖြေရှင်းရန် နည်းလမ်းဖော်ပြထားခြင်း မရှိပေ။

ပြင်းထန်သော ဆောင်းရာသီနှင့် ယခုနှစ်အစောပိုင်းက အိန္ဒိယကို ချေမွခဲ့သော ကိုရိုနာဗိုင်းရပ်စ် ကူးစက်မှု အပါအဝင် တစ်နှစ်နီးပါးကြာ သပိတ်စခန်းဖွင့် နေထိုင်ခဲ့ကြသော နယူးဒေလီမြို့ ဆင်ခြေဖုံး၌ လယ်သမား ငတ်ပြတ်နေသဖြင့် ၂၀၂၀ ပြည့်နှစ်၊ နိုဝင်ဘာလတွင် ဆန္ဒပြမှုများ ပိုမိုပြင်းထန်ခဲ့ကြောင်း အေပီသတင်းဌာနက ရေးသားဖော်ပြထားသည်။ 

Source: AP