ရွေးကောက်ပွဲ ဖျက်မှာက နစက အကြိုက်ဖြစ်စေသည်ဟု ပြော
CNI News
၂၀၂၃ ခုနှစ်၊ မေလ ၈
ရွေးကောက်ပွဲကို မပျက်ပျက်အောင် ဖျက်မည်ဆိုခြင်းက နစကအကြိုက် ဖြစ်စေကြောင်း လီဆူအမျိုးသား ဖွံ့ဖြိုး တိုးတက်ရေးပါတီဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။
ထို့အတူ ရွေးကောက်ပွဲ မကျင်းပဖြစ်ပါက နှစ် ၂၀၊ ၃၀ စသဖြင့် နစကမှ အုပ်ချုပ်သွားမှာဖြစ်ကြောင်း၊ လက်ရှိ အခြေအနေမှာ မိမိတို့အနေဖြင့် ဘာမှ ပြောပိုင်ခွင့်မရှိကြောင်း ၎င်းက ပြောသည်။
ဦးလီပေါ်ရဲ့က “ရွေးကောက်ပွဲတစ်ခုတော့ လုပ်သင့်တယ်၊ လုပ်ပြီးမှ လွှတ်တော်ပေါ်လာရမယ်၊ အစိုးရကိုတော့ ကျနော်တို့ မပြောပါဘူး။ အစိုးရကတော့ ဘယ်အစိုးရပဲ တက်တက်ပါ၊ လွှတ်တော်ရှိရင် လွှတ်တော်ကနေ အစိုးရကို ထိန်းကျောင်းနိုင်တဲ့ အခြေအနေ အလားအလာ အများကြီးရှိတဲ့အတွက် အခုရွေးကောက်ပွဲ မလုပ်ဘဲနဲ့ နစက ဒီလိုပဲ အုပ်ချုပ်သွားတာ ထက်စာရင် ကျနော်တို့ အမြင်ကတော့ ရွေးကောက်ပွဲ လုပ်ပြီးမှ ဘယ်အစိုးရပဲ တက်တက် လွှတ်တော်တစ်ရပ်နဲ့ နိုင်ငံတော်ကို ရှေ့လျှောက်သွားမယ်ဆိုရင်တော့ တိုင်းပြည်အတွက် အလားအလာ ကောင်းတယ်လို့ ကျနော်တို့က မြင်တယ်၊ ဒါမှမဟုတ် ရွေးကောက်ပွဲကို မလုပ်နဲ့ ရွေးကောက်ပွဲကိုဖျက်မယ်၊ ရွေးကောက်ပွဲကို ဟိုလုပ်မယ်၊ ဒီလုပ်မယ်ဆိုတာကတော့ တကယ် နစကအကြိုက် ဖြစ်သွားမှာပေါ့၊ ဟုတ်တယ်မလား၊ နှစ် ၂၀၊ ၃၀ အုပ်ချုပ်သွားရင်လည်း သူတို့ သဘောဖြစ်သွားမှာပေါ့၊ အဲဒီတော့ အခုလက်ရှိမှာ ကျနော်တို့မှာ ဘာမှ ပြောပိုင်ခွင့်၊ ဆိုပိုင်ခွင့်မရှိဘူး။ တိုင်းပြည်တိုးတက်ဖို့ ဖွံ့ဖြိုးရေးလုပ်ငန်းတွေ တင်ပြပိုင်ခွင့်က ပြည်သူလူထုမှာ မရှိဘူး။ အခုလက်ရှိမှာ အဲဒီတော့ ကျနော်တို့ ပြည်သူလူထုမှာရှိတဲ့ အခြေအနေကို ကျနော်တို့က လိုချင်တာ ဒါက ရှင်းရှင်းပြောရရင် ဘယ်ပါတီအနိုင်ရမှ ဟိုပါတီအနိုင်ရမှ ကျနော်တို့က အစိုးရဆင်းမှ ကျနော်တို့ ဒါကို မမျှော်ကိုး ဘူး။ ကျနော်တို့ မျှော်ကိုးတာက လွှတ်တော်ရှိမယ် လွှတ်တော်ကနေ တိုင်းပြည်အတွက် မတရားတဲ့ အမိန့်အာဏာတွေ လွှတ်တော်ကနေ ထိန်းကျောင်းမယ် ဥပဒေတွေ၊ မတရားတဲ့ ဥပဒေတွေ ပြည်သူလူထုအတွက် ရှိနေတဲ့ ဥပဒေ ကို လွှတ်တော်ကနေ ပြုပြင်မယ် ကျနော်တို့ကတော့ အဲဒါပဲ လိုချင်တာ” ဟု CNI သတင်းဌာနသို့ ပြောသည်။
ပြည်သူတစ်ဦး ရွေးကောက်ပွဲ မဲထည့်နေစဉ်
အမျိုးသားညီညွတ်ရေးအစိုးရ(NUG)က နစက ကျင်းပမည့် ရွေးကောက်ပွဲကို မပျက်ပျက်အောင် ဖျက်မည်ဟု ယာယီသမ္မတ ဒူးဝါလရှီလက ပြောကြားထားသည်။
ထို့နောက် NUG ၏ လက်အောက်ခံ ပြည်သူ့ကာကွယ်ရေးတပ်ဖွဲ့(PDF)နှင့် မဟာမိတ်အဖွဲ့များဖြစ်သည့် ဒေသခံကာကွယ်ရေးတပ်ဖွဲ့(LDF)များက နစက၏ ရွေးကောက်ပွဲအတွက် လူဦးရေ သန်းခေါင်စာရင်း လိုက်ကောက်သည့် လ.ဝ.က ဝန်ထမ်းများကို တိုက်ခိုက်ခြင်းနှင့် ရုံးများ မီးရှို့ဖျက်ဆီးခြင်းများ ပြုလုပ်ခဲ့သည်။
နစက ကျင်းပမည့် ရွေးကောက်ပွဲမှာ ပြည်သူများ စိတ်ဆန္ဒရှိရှိနှင့် ပါဝင်ဆောင်ရွက်နိုင်သည့် အခင်းအကျင်းဖြစ်ရန် အရေးကြီးကြောင်း ရခိုင်အမျိုးသားပါတီ (ANP) မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။
ဦးသာထွန်းလှက “အခု မြန်မာနိုင်ငံမှာ ပြည်သူတွေက စိုးရိမ်စိတ်နဲ့ နေထိုင်ရတဲ့ အခြေအနေမျိုးပဲ ရှိတယ်၊ ပြီးရင် ပြည်သူတွေ အသက်မွေးဝမ်းကျောင်းအတွက် ရှာဖွေလုပ်ကိုင် စားသောက်နေရတဲ့ အပိုင်းမှာလည်း ကိုယ့်ရပ်ကိုယ့်ရွာ ကိုယ့်အလုပ်အကိုင်တွေကို စွန့်ခွာပြီး ထွက်ပြေးနေရတဲ့ သတင်းမျိုးလည်း နေ့စဉ်ရက်ဆက် ကြားသိနေရတယ်၊ အဲဒါကြောင့် ရွေးကောက်ပွဲဆိုတာက ပြည်သူတွေ ကြည်ကြည်လင်လင်နဲ့ စိတ်ဆန္ဒရှိရှိနဲ့ ပါဝင်ဆောင်ရွက်နိုင်တဲ့ အခင်းအကျင်းဖြစ်ဖို့ အရေးကြီးတယ်လို့ မြင်တယ်၊ အဲဒါကြောင့် အဓိက အရေးကြီးတာက မြန်မာနိုင်ငံမှာ နိုင်ငံရေးပြဿနာ ရှိနေတယ်ဆိုတာကို ပကတိအခြေအနေ အရှိတရားကို လက်ခံပြီး အဲဒီနိုင်ငံရေး ပြဿနာတွေကို ဖြေရှင်းဆောင်ရွက်တဲ့ နေရာမှာ တွေ့ဆုံဆွေးနွေး အဖြေရှာတဲ့ နိုင်ငံရေး လုပ်ငန်းစဉ်မျိုး ဖြစ်အောင် အရင်ဆုံး လုပ်ကိုင်ဆောင်ရွက်ဖို့အတွက် အဓိကလိုအပ်တယ်လို့ ကျနော် အဲဒီလိုပဲ ပြောလိုတယ်” ဟု ပြောသည်။
ရွေးကောက်ပွဲနိုင်လို့ NLD ကို ထောက်ခံနေသူတစ်ဦး
၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ် (NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆို ကာ ဖြုတ်ချ၍ နိုင်ငံတော်ကို အရေးပေါ် ကြေညာထားသည်။
ထို့နောက် လက်နက်ကိုင် နွေဦးတော်လှန်ရေးကို အမျိုးသားညီညွတ်ရေးအစိုးရ(NUG)နှင့် ပြည်သူ့ကာကွယ်ရေး တပ်ဖွဲ့(PDF)တို့က ဖော်ဆောင်ကာ တပ်မတော် ဖြုတ်ချရေး ဆောင်ရွက်လျက်ရှိသလို နစက ကျင်းပမည့် ရွေး ကောက်ပွဲကိုလည်း သပိတ်မှောက်ရန် တိုက်တွန်းလျက်ရှိသည်။
သို့သော် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ရွေးကောက်ပွဲ ပြန်လည် ကျင်းပပေး မည်ဖြစ်ကြောင်း၊ အနိုင်ရရှိသည့် ပါတီကို နိုင်ငံတော်အာဏာ လွှဲပြောင်းပေးမည်ဖြစ်ကြောင်း ပြောကြားထားသည်။
လက်ရှိတွင်လည်း နိုင်ငံရေးပါတီများကို ပြန်လည် မှတ်ပုံတင်နိုင်ရေး ဥပဒေ၊ နည်းဥပဒေများ ထုတ်ပြန်ခဲ့ပြီးနောက် နိုင်ငံရေးပါတီ မှတ်ပုံတင်နိုင်ရေး လုပ်ငန်းစဉ်များကို လုပ်ဆောင်လျက် ရှိနေသည်။
