CNI International News

မားမန့်ခ်၊ ဧပြီ ၂၈

ရုရှား၏ မြောက်ဝန်ရိုးတန်းမြို့ တစ်မြို့မှာ တွေ့ဆုံဆွေးနွေးမှု လုပ်ဆောင်ခဲ့ပြီးနောက် တရုတ်နှင့် ရုရှားတို့သည် ရေကြောင်းဥပဒေခိုင်မာစေရေး ပူးပေါင်းဆောင်ရွက်ရန် သဘောတူညီချက် တစ်ခုကို လက်မှတ်ရေးထိုးခဲ့သည်ဟု Bangkok Post သတင်း၌ ဖော်ပြထားသည်။

ဆွေးနွေးပွဲကို နေတိုးအဖွဲ့ဝင်သစ် ဖင်လန်နှင့် နယ်စပ်အနီး လုပ်ဆောင်ခဲ့ခြင်း ဖြစ်သည်။

တရုတ်ကမ်းခြေစောင့်တပ်နှင့် ရုရှား၏ ဖက်ဒရယ်လုံခြုံရေးအဖွဲ့ (FSB) တို့သည် နားလည်မှု စာချွန်လွှာ (MOU)ကို အင်္ဂါနေ့တွင် လက်မှတ်ရေးထိုးခဲ့သည်ဟု နိုင်ငံပိုင် သတင်း၌ ဖော်ပြသော်လည်း သဘောတူညီချက်၏ အသေးစိတ် အချက်အလက်များကိုမူ မဖော်ပြထားပေ။

သဘောတူညီချက်သည် အင်္ဂါနေ့တွင် ပြီးဆုံးခဲ့သော တရုတ်ကမ်းခြေစောင့်တပ်နှင့် FSB တို့ နှစ်ရက်ကြာ ဆွေးနွေး ပွဲ၏ ရလဒ်ဖြစ်သည်ဟု တရုတ်ုနိုင်ငံပိုင် CCTV သတင်းတွင် ဖော်ပြသည်။

လက်မှတ်ရေးထိုးမှုကို တရုတ်ကမ်းခြေစောင့်တပ်ဖွဲ့ ခေါင်းဆောင်နှင့် ရုရှား၏ FSB ဒါရိုက်တာတို့က တက်ရောက်ခဲ့သည်။

ရေတပ်ကိုတွေ့ရစဉ်

ရေကြောင်းဥပဒေ ခိုင်မာစေရေး ပူးပေါင်းဆောင်ရွက်မှုကို မြှင့်တင်ရန်၊ ရေကြောင်း အသိုက်အဝန်းအား တည်ထောင်ရေး ပူးတွဲဆောင်ရွက်ရန်နှင့် ခေတ်သစ်ကာလ တရုတ်နှင့်ရုရှားတို့အကြား မဟာဗျူဟာမြောက် မိတ်ဖက် ပူးပေါင်းဆောင်ရွက်မှုကို ဖော်ဆောင်ရေး ကြိုးစားမှုများကို လုပ်ဆောင်သွားကြရန် ပြောဆိုခဲ့သည်ဟု CCTV သတင်းတွင် ဖော်ပြသည်။

နှစ်နိုင်ငံအနေဖြင့် သမ္မတနှစ်ဦးအကြား တွေ့ဆုံဆွေးနွေးမှုများတွင် ရရှိထားသည့် ဘုံသဘောတူညီချက်များကို အကောင်အထည် ဖော်သွားမည်ဟုလည်း ပြောသည်။

နှစ်နိုင်ငံကြား ဆက်ဆံရေးတွင် အကန့်အသတ် မရှိဟု တရုတ်နှင့် ရုရှားသမ္မတများက ၂၀၂၂ ခုနှစ်တွင် လက်မှတ် ရေးထိုးခဲ့သည့် ပူးတွဲကြေညာချက် တစ်စောင်၌ ပြောဆိုခဲ့ဖူးသည်။

ထိုဆွေးနွေးပွဲသို့ တက်ရောက်သည့် တရုတ်ကိုယ်စားလှယ်အဖွဲ့သည် ရုရှားမြောက်ဝန်ရိုးတန်း ရေကြောင်း လေ့ကျင့်မှုများကိုပါ လေ့လာခဲ့သည်ဟု CCTV သတင်းတွင် ရေးသားထားသည်။

ဆွေးနွေးပွဲကို ရုရှား အနောက်မြောက်ပိုင်း မားမန့်ခ် (Murmansk) မြို့တွင် ကျင်းပခဲ့ခြင်းဖြစ်ကာ ယင်းသည် မြောက်ဝန်ရိုးတန်းဒေသ (Arctic Circle) တွင်းရှိကာ ဖင်လန်နယ်စပ်နှင့် နီးသည်။

ရှီကျင့်ဖျင်နဲ့ ပူတင်ကိုတွေ့ရစဉ်

ယခုလ အစောပိုင်း ဖင်လန် နေတိုးအဖွဲ့ဝင် အသစ် ဖြစ်လာခြင်း၊ ဆွီဒင်အနေဖြင့် နေတိုးသို့ ပူးပေါင်းရန် ကြိုးပမ်း နေခြင်းတို့ကြောင့် ထိုဒေသတွင် စစ်ရေးအရ အကြီးစား ပြင်ဆင်မှုများ ပေါ်ပေါက်လာခဲ့သည်။

ရုရှားသည် ယခုလ အစောပိုင်းတွင် အရေးပေါ်ဌာန၏ ကြီးကြပ်မှုဖြင့် မြောက်ဝန်ရိုးတန်း ကူညီကယ်ဆယ်ရေး လေ့ကျင့်မှုကို လုပ်ဆောင်ခဲ့ကာ ယင်းသို့ အမည်မဖော်ပြထားသော အာဖရိက၊ လက်တင်အမေရိကနှင့် အာရှ-ဥရောပတို့မှ နိုင်ငံ ၉ နိုင်ငံ ပါဝင်ကာ အနည်ဆုံး နိုင်ငံ ၁၃ နိုင်ငံက လေ့လာသူအဖြစ် ရှိခဲ့သည်။

ရုရှားရေတပ်သည်လည်း အကြီးစား စစ်ရေးလေ့ကျင့်မှုများကို လုပ်ဆောင်ခဲ့သည်။

နေတိုးအဖွဲ့ကို တန်ပြန်နိုင်ရေးအတွက် ရုရှားအစိုးရသည် အိန္ဒိယ၊ အီရန်နှင့် ဆော်ဒီတို့ အပါအဝင် နေတိုးအဖွဲ့ဝင် မဟုတ်သော နိုင်ငံများကို ရေလမ်းကြောင်းများ၊ သဘာဝဓာတ်ငွေ့ စီမံကိန်းများ၊ ဓာတ်အားပေး စက်ရုံများနှင့် တခြားသော စီမံကိန်းများတွင် ရင်းနှီးမြှုပ်နှံ စေခြင်းဖြင့် ဒေသတွင်း စီးပွားရေအရ ပါဝင်မှုကို မြှင့်တင်ရန်လည်း တိုက်တွန်း ဆောင်ရွက်လျက်ရှိသည်။

Source: Bangkok post