CNI International News
ခိုတောင်၊ဇန်နဝါရီ ၂၄
သေမင်းကျွန်းဟု နာမည်ဆိုးဖြင့် ကျော်ကြားသော ထိုင်းနိုင်ငံခိုတောင်ကျွန်းတွင် ဗြိတိန်လူမျိုး ရေငုပ်နည်းပြ တစ်ဦးကို ပဟေဠိဆန်သော အခြေအနေများဖြင့် သေဆုံးလျက်တွေ့ခဲ့ရသည်ဟု The Sun သတင်းတွင် ဖော်ပြသည်။
နေးလ်ဂစ်ဘလင် (Neil Giblin) ဟု ခေါ်သော အသက် ၄၈ နှစ်အရွယ် အမျိုးသားတစ်ဦး၏ ရုပ်အလောင်းကို ၎င်း ငှားရမ်းထားရာ ဘန်ဂလိုတစ်ခုတွင် ဗုဒ္ဓဟူးနေ့၌ တွေ့ခဲ့ရသည်။
၎င်း၏ သင်တန်းသူနှစ်ဦးမှ ၎င်းပေါ်မလာသဖြင့် အကြောင်းကြားရာမှ ထိုသို့ တွေ့ခဲ့ရခြင်း ဖြစ်သည်။
နေးလ်သည် သဘာဝအတိုင်း သေဆုံးခြင်း ဖြစ်ကြောင်း၊ ၎င်းတွင် ရုန်းကန်ထားသည့်ပုံစံမျိုး မတွေ့ခဲ့ရကြောင်း ရဲတပ်ဖွဲ့က ပြောသော်လည်း ထိုင်းရဲများသည် နိုင်ငံခြားသားများ၏ သေဆုံးမှုကို လျစ်လျူရှုမှုဖြင့် နာမည်ဆိုး ရရှိထားသည်။
ခိုတောင်ကျွန်း ခေါ် သေမင်းကျွန်းကိုတွေ့ရစဉ် (GETTY IMAGES)
ကျန်းမာသန်စွမ်းသော နေးလ်သည် ဘာမင်ဂမ်ဇာတိဖြစ်ကာ ၎င်းသည် ပြီးခဲ့သည့် နှစ်များအတွင်း ထိုကျွန်းတွင် သေဆုံးခဲ့သော ငါးဦးမြောက် နည်းပြလည်း ဖြစ်သည်။ မရှင်းပြနိုင်ခဲ့သော နိုင်ငံခြားသား ခရီးသွားများ မကြာခဏ သေဆုံးမှု၊ အသတ်ခံရမှုတို့အတွက် ထိုကျွန်းသည် နာမည်ဆိုးကို ရရှိခဲ့သည်။
နေးလ်၏ ရုပ်အလောင်းကို အတွင်းခံ အဝတ်အစားများဖြင့် ဆိုဖာပေါ်တွင် တွေ့ခဲ့ရကြောင်း၊ စောင်ခြုံထား ကြောင်းနှင့် ထိုဖြစ်ရပ်ကို စစ်ဆေးခဲ့သည့် ဆေးဘက်ဆိုင်ရာ ဝန်ထမ်းများက သံသယဖြစ်ဖွယ် တစ်စုံတစ်ရာ မတွေ့ရဟုပြောကြောင်း ၎င်း၏ မိတ်ဆွေတစ်ဦးက ပြောသည်။
ကျွန်းရှိရဲတပ်ဖွဲ့ဝင်များသည် ထိုသေဆုံးမှုကို ရင်ခွဲစစ်ဆေးခြင်းပင် လုပ်ဆောင်ခဲ့ခြင်း မရှိဟု ထင်ကြောင်းလည်း ၎င်းက ဆက်လက် ပြောကြားသည်။
ထိုင်းမီဒီယာများတွင် နေးလ် သေဆုံးမှုနှင့်ပတ်သက်သည့် သတင်းကို ဖော်ပြခဲ့ခြင်း မရှိဟု Thaiger သတင်းတွင် ရေးသားထားသည်။
ရင်သပ်ရှုမောဖွယ် ကောင်းအောင် လှပသော ခိုတောင်ကျွန်းတွင် နိုင်ငံခြားသား ခရီးသွားများ ပျောက်ဆုံး၊ သေဆုံး ခဲ့မှုများကြောင့် ယင်းကို သေမင်းကျွန်းဟု ခေါ်ဝေါ်ခဲ့ကြသည်။ အထင်ရှားဆုံးမှာ ဗြိတိန်ခရီးသွား နှစ်ဦးဖြစ်သည့် ဟန်နာ ဝစ်သာရိုက် (Hannah Witheridge) နှင့် ဒေးဗစ်မီလာ (David Miller) တို့ သေဆုံးမှု ဖြစ်သည်။
Hannah Witheridge နဲ့ David Miller တို့ကိုတွေ့ရစဉ် (GETTY IMAGES)
၂၀၁၄ ခုနှစ်၊ စက်တင်ဘာလတွင် ဖြစ်ပွားခဲ့သော ထိုဖြစ်ရပ်၌ ဝစ်သာရိုက်သည် အဓမ္မကျင့်ခံခဲ့ရပြီး မီလာသည် ရေနစ်ခံခဲ့ရသည်။
ထိုဖြစ်ရပ်အတွက် DNA သက်သေများကို အခြေခံကာ တရားမဝင် မြန်မာရွှေ့ပြောင်း လုပ်သားနှစ်ဦးဖြစ်သူ ဇော်လင်းနှင့် ဝင်းဇော်ထွန်းတို့ကို သေဒဏ်အပြစ်ပေးခဲ့သည်။
သို့သော် ၂၀၂၀ ခုနှစ် ဘုရင် ဗဂျီရာလောင်ကွန်း၏ တော်ဝင်ဒီဂရီဖြင့် တစ်သက်တစ်ကျွန်း ပြစ်ဒဏ်သို့ ပြောင်းလဲ သတ်မှတ်ခဲ့သည်။ သေမင်းကျွန်းဟူသော အသုံးအနှုန်းကို Samui Times သတင်းက စတင် သတ်မှတ် ခေါ်ဝေါ်ခဲ့ ခြင်းဖြစ်ကာ ထိုအတွက် ကျွန်းတာဝန်ရှိသူများက တရားစွဲမှု လုပ်ဆောင်ခဲ့သည်။
ထိုကျွန်းတွင် ဖြစ်ပွားခဲ့သော ပဟေဠိဆန်ဆန်ု နိုင်ငံခြားသားများ သေဆုံးမှုများမှ နှစ်ခုကိုသာ ရဲတပ်ဖွဲ့ဝင်များက လူသတ်မှုအဖြစ် တရားဝင် သတ်မှတ်ခဲ့သည်ဟု သိရသည်။
Source: The Sun
