CNI Sport News
၂၀၂၂ ခုနှစ်၊ စက်တင်ဘာ ၂၇
မာလီအသင်းဟာ အမျိုးသမီးကမ္ဘာ့ဖလားပြိုင်ပွဲကနေ ထွက်ခွာခဲ့ရပြီးနောက် ၎င်းတို့ ကစားသမား ၂ ဦးအချင်းချင်း ခိုက်ရန် ဖြစ်ပွားနေတဲ့ ဗွီဒီယိုဖိုင်ကို နိုင်ငံတကာဘတ်စကတ်ဘောအဖွဲ့ချုပ် (FIBA) က စုံစမ်းစစ်ဆေးမှုတွေ စတင်လုပ်ဆောင်နေပြီ ဖြစ်ပါတယ်။
မာလီအသင်းက ဆားဘီးယားအသင်းကို ၆၈ မှတ် - ၈၁ မှတ်နဲ့ အရေးနိမ့်ခဲ့တဲ့ ပွဲစဉ်အပြီးမှာ ဒီအဖြစ် အပျက် ဖြစ်ပျက်ခဲ့တာပါ။မာလီအသင်းဟာ ဒီပွဲအပါအဝင် အုပ်စုတွင်း ပွဲစဉ် ၄ ပွဲကစားထားခဲ့တာမှာ ၄ ပွဲစလုံး အရေးနိမ့်ခဲ့တာ ဖြစ်ပါတယ်။ဆားဘီးယားအသင်းက ဆာဆာကာဒိုက အင်တာဗျူးဖြေချိန်မှာ မာလီကစားသမား ၂ ဦးဖြစ်တဲ့ ကိုရိုမာနဲ့ အယ်လစ်ဇဘတ်တို့ဟာ ခိုက်ရန်ဖြစ်ပွားခဲ့ကြတာပါ။
မာလီအသင်းဖော်တွေက သူတို့ ၂ ဦးကို ဝိုင်းဝန်းထိန်းချုပ်ခြင်း မပြုလုပ်ခင် ကိုရိုမာက အယ်လစ်ဇဘတ် ကို လက်သီးနဲ့ ထိုးခဲ့တာကိုလည်း တွေ့မြင်ခဲ့ရတာဖြစ်ပါတယ်။ “ဆားဘီးယားနဲ့ မာလီတို့ပွဲအပြီးမှာ မာလီကစားသမားတွေ ခိုက်ရန်ဖြစ်ပွားတာနဲ့ပတ်သက်ပြီး စုံစမ်းစစ်ဆေးမှုတွေကို စတင်လုပ်ဆောင် နေပြီ ဖြစ်ပါတယ်။စုံစမ်းစစ်ဆေးမှုပြီးတာနဲ့ စည်းကမ်းပိုင်းဆိုင်ရာ အစီအမံတွေကို ဆုံးဖြတ်သွားမယ်” လို့ နိုင်ငံတကာ ဘတ်စကတ်ဘောအဖွဲ့ချုပ်က ကြေညာချက်ထုတ်ပြန်ခဲ့တာပါ။
မာလီကစားသမားနှစ်ဦး ခိုက်ရန်ဖြစ်ပွားခဲ့စဉ်(ဓါတ်ပုံ-1News)
မာလီဟာ ဒီပြိုင်ပွဲရဲ့ အုပ်စု B မှာ ၄ ပွဲကစားထားအပြီး ရမှတ် ၄ မှတ်နဲ့ အုပ်စုတွင်း နောက်ဆုံးနေရာမှာ ရပ်တည်နေကာ နောက်ဆုံးပွဲစဉ်အဖြစ် ကနေဒါအသင်းနဲ့ ယှဉ်ပြိုင်ရမှာ ဖြစ်ပါတယ်။မာလီအသင်းဟာ အာဖရိကချန်ပီယံ နိုင်ဂျီးရီးယားအသင်း နုတ်ထွက်ခဲ့တာကြောင့် ဒီပြိုင်ပွဲမှာ ပါဝင်ယှဉ်ပြိုင်ခွင့်ရခဲ့တာ ဖြစ်ပြီး နိုင်ဂျီးရီးယားအသင်းဟာ နိုင်ငံအတွင်း အားကစားစီမံခန့်ခွဲမှုဆိုင်ရာ အခက်အခဲတွေကြောင့် နုတ်ထွက်ခဲ့တာလည်း ဖြစ်ပါတယ်။
ပွာတိုရီကိုအသင်းဟာ စက်တင်ဘာ ၂၇ ရက်က ကစားခဲ့တဲ့ပွဲစဉ်မှာ တောင်ကိုရီးယားအသင်းကို ၉၂ မှတ် - ၇၃ မှတ်နဲ့ အနိုင်ရပြီး ရှုံးထွက်အဆင့်ကို တက်ရောက်ခွင့်ရရှိတဲ့ နောက်ဆုံးအသင်း ဖြစ်လာခဲ့တာပါ။ ဒီပြိုင်ပွဲရဲ့ ရှုံးထွက်အဆင့်ကို အုပ်စု A က အမေရိကန်၊ တရုတ်၊ ဘယ်လ်ဂျီယံနဲ့ ပွာတိုရီကို၊ အုပ်စု B က ကနေဒါ၊ ပြင်သစ်၊ သြစတြေးလျနဲ့ ဆားဘီးယားတို့ တက်နိုင်ခဲ့တာ ဖြစ်ပါတယ်။
အမျိုးသမီးကမ္ဘာ့ဖလား ဘတ်စကတ်ဘောပြိုင်ပွဲရဲ့ ကွာတားဖိုင်နယ်အဆင့်ကို စက်တင်ဘာ ၂၉ ရက်၊ ဆီမီးဖိုင်နယ်ပွဲစဉ်ကို ၃၀ ရက်နဲ့ ဗိုလ်လုပွဲကို အောက်တိုဘာ ၁ ရက်နေ့တွေမှာ ကျင်းပသွားမှာ ဖြစ်ပါတယ်။
Source:ChannelNewsAsia
