CNI Sport News
၂၀၂၂ ခုနှစ်၊ ဧပြီ ၂၅
ရီးရယ်လ် အသင်းဟာ ဘာစီလိုနာအသင်းက ဗယ်လ်လက်ကာနို အသင်းကို အရေးနိမ့်ခဲ့တာကြောင့် လက်ကျန် လာလီဂါ ပွဲစဉ်တွေမှာ ရမှတ်(၁)မှတ်ရတာနဲ့ အမှတ်ပေး ချန်ပီယံဆုကို ရယူနိုင်တော့မှာ ဖြစ်ပါတယ်။
ဘာစီလိုနာ အသင်းဟာ နူးကမ့်ပ်ကွင်းမှာ ကစားခဲ့တဲ့ ဒီပွဲမှာ ဗယ်လ်လက်ကာနို အသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တာပါ။ ဘာစီလိုနာ အသင်းဟာ ဒီပွဲ အပါအဝင် နူးကမ့်ပ်မှာ ကစားခဲ့တဲ့ နောက်ဆုံးပြိုင်ပွဲ (၃)ပွဲဆက် အရေးနိမ့်ခဲ့တာလည်း ဖြစ်ပါ တယ်။
စပိန်ကလပ်အတွက်တော့ တစ်ရာသီအတွင်း အခုလို ရှုံးပွဲကြုံတွေ့တာဟာ ပထမဆုံးအကြိမ် ဖြစ်ခဲ့တယ်လို့လည်း အချက် အလက်တွေအရ သိရပါတယ်။ ဘာစီလိုနာ အသင်းဟာ အရင်ကလည်း အိမ်ကွင်း(၃)ပွဲဆက် ရှုံးပွဲကြုံတွေ့ခဲ့ဖူးပေမယ့် အဲ့ဒီ တုန်းကတော့ (၁၉၉၇-၉၈) ရာသီအကုန်နဲ့ (၁၉၉၈-၉၉) ရာသီအစမှာ ကြုံတွေ့ခဲ့ရတာပါ။
ဘာစီလိုနာ အသင်းဟာ ဗယ်လ်လက်ကာနို အသင်းကို အရေးနိမ့်ခဲ့တဲ့အတွက် တတိယနေရာက ဆီဗီလာ အသင်းနဲ့ ရမှတ် တူညီသွားခဲ့ပြီး ထိပ်ဆုံးနေရာက ရီးရယ်လ် အသင်းနဲ့ ၁၅ မှတ် ကွာဟသွားတာ ဖြစ်ပါတယ်။ အဲ့ဒါကြောင့် ရီးရယ်လ် အသင်း ဟာ စနေနေ့မှာ ကစားမယ့် အက်စပန်ညို အသင်းနဲ့ လာလီဂါ ပွဲစဉ်မှာ အရေးမနိမ့်ခဲ့ဘူးဆိုရင် လာလီဂါချန်ပီယံဆုကို စံချိန် တင် (၃၅)ကြိမ် မြောက်အဖြစ် ရယူနိုင်တော့မှာပါ။
ဘာစီလိုနာဘက်ကို ဗယ်လ်လက်ကာနိုအသင်းက ဂိုးသွင်းပြီးအောင်ပွဲခံနေစဉ်(FotMob)
ဇာဗီကတော့ ဘာစီလိုနာ အသင်းဟာ ဒီပွဲမှာ အနည်းဆုံး ၁ မှတ်ရသင့်ပေမယ့် နှေးကွေးစွာ စတင်ခဲ့တာကြောင့် ရှုံးပွဲကြုံတွေ့ ခဲ့ရတယ်လို့ ပြောခဲ့ပါတယ်။
“ကျနော်တို့ ဒီရလဒ်ထက်ပိုပြီး ထိုက်တန်ပါတယ်။ ပထမပိုင်းမှာ ကျနော်တို့ ကိုယ်တိုင် မဟုတ်တာတော့ အမှန်ပါပဲ၊ ဒါပေမယ့် ဒုတိယပိုင်းမှာတော့ တိုးတက်လာခဲ့ပါတယ်။ ကျနော်တို့ဟာ ကာဒစ်ဇ် အသင်းနဲ့ ကစားခဲ့ရတဲ့ပွဲနဲ့ ပုံစံချင်းတူတာကို ကစားခဲ့ ရတာပါ။ တခြားအသင်းတွေက သူတို့ဘဝအတွက် ကစားနေကြတာဖြစ်ပြီး ကျနော်တို့ဟာ ပြိုင်ဘက်တွေရဲ့ ဆန္ဒနဲ့ ကိုက်ညီဖို့ လိုပါတယ်”လို့ ပြောခဲ့တာပါ။
ဘာစီလိုနာ အသင်းဟာ ဒီပွဲမှာ ဗယ်လ်လက်ကာနို အသင်းကို ဘောလုံးပိုင်ဆိုင်မှု ၇၀ ရာခိုင်နှုန်းကျော် ဂိုးပေါက် ကန်သွင်းမှုနဲ့ ဂိုးပေါက်တည့်မှု အများအပြား ပြုလုပ်နိုင်ခဲ့ပေမယ့် သွင်းဂိုး မရယူနိုင်ခဲ့တာပါ။ ပြိုင်ဘက် အသင်းကတော့ ဂိုးပေါက်တည့်မှု (၁)ကြိမ်တည်းနဲ့ ဂိုးအဖြစ် ပြောင်းလဲခဲ့ပြီး အနိုင် ၃ မှတ် ရယူသွားခဲ့တာ ဖြစ်ပါတယ်။
Source: BBC/Daily Mail
