CNI Sport News
၂၀၂၅ ခုနှစ်၊ ဇွန်လ ၂
ဘရာဇီးလ်ကြယ်ပွင့်နေမာဟာ ဆန်းတို့စ်အသင်းက ဘိုတာဖိုဂိုအသင်းကို ၁ ဂိုး-ဂိုးမရှိနဲ့ အရေးနိမ့်ခဲ့တဲ့ ဘရာဇီးလ် စီးရီးအေပွဲစဉ်မှာ ဘောလုံးကို လက်နဲ့ပုတ်ပြီး ဂိုးသွင်းဖို့ ကြိုးစားခဲ့တာကြောင့် နှစ်ဝါတစ်နီနဲ့ ထုတ်ပယ်ခြင်း ခံခဲ့ရပါတယ်။
ဒီပွဲစဉ်ရဲ့ ပထမပိုင်းပြီးခါနီးမှာ အဝါကတ် ပြသခံခဲ့ရတဲ့ နေမာဟာ ပွဲချိန် ၇၆ မိနစ်မှာ ဘောလုံးကို ဂိုးပေါက်ထဲ လက်နဲ့ပုတ်သွင်းပြီး ဂိုးရယူဖို့ ကြိုးစားခဲ့တာပါ။
အဲဒါကြောင့် ကွင်းလယ်ဒိုင်လူကြီးက သွင်းဂိုးကို ခွင့်မပြုဘဲ နေမာကို ဒုတိယမြောက် အဝါကတ်ပြသပြီး နှစ်ဝါ တစ်နီနဲ့ ထုတ်ပယ်ခဲ့တာ ဖြစ်ပါတယ်။
ဆန်းတို့စ်အသင်း ပရိသတ်တွေကတော့ ဒီဖြစ်ရပ်အပေါ် အလွန်စိတ်ပျက်နေကြတာပါ။
နေမာကို တွေ့ရစဉ်
ဒီပွဲစဉ်ရဲ့ ပွဲပြီးခါနီးမှာ ဘိုတာဖိုဂိုအသင်းက အနိုင်ဂိုးသွင်းယူခဲ့တဲ့အတွက် ဆန်းတို့စ်အသင်းဟာ အိမ်ကွင်းမှာ ရှုံးပွဲကြုံတွေ့ခဲ့တာ ဖြစ်ပါတယ်။
ဆန်းတို့စ်အသင်းဟာ ဒီရှုံးပွဲကြောင့် ဒီရာသီ ဘရာဇီးလ် စီးရီးအေ ပွဲစဉ် ၁၁ ပွဲ ကစားအပြီးမှာ ရမှတ် ၈ မှတ်နဲ့ အမှတ်ပေးဇယားအဆင့် ၁၈ နေရာမှာ ရပ်တည်နေတာပါ။
နေမာဟာ ဒဏ်ရာကြောင့် ဆန်းတို့စ်အသင်းရဲ့ ဘရာဇီးလ် စီးရီးအေပွဲစဉ် ၇ ပွဲကို လွဲချော်ထားပြီး ပါဝင်ကစား ထားတဲ့ ၄ ပွဲမှာလည်း ဂိုးသွင်း၊ ဂိုးဖန်တီးမှု ပြုလုပ်နိုင်ခြင်း မရှိသေးပါဘူး။
ဒါအပြင် နေမာဟာ ပွဲပယ်ကြောင့် ဆန်းတို့စ်အသင်းရဲ့လာမယ့် ဘရာဇီးလ်စီးရီးအေ ပွဲစဉ်ကိုလည်း လွဲချော်မှာပါ။
နေမာဟာ လက်ရှိအချိန်မှာ ဆန်းတို့စ်အသင်း အနာဂတ်နဲ့ပတ်သက်ပြီး မရေမရာ ဖြစ်နေကာ ဇွန်လ ၁၂ ရက် နောက်ပိုင်းမှသာ ဆုံးဖြတ်ချက် ချသွားမယ်လို့ ပြောထားပါတယ်။
နေမာနဲ့ ဆန်းတို့စ်အသင်းရဲ့ စာချုပ်ဟာ ဇွန်လကုန်ရင် ကုန်ဆုံးမှာပါ။ ဆန်းတို့စ်အသင်းကတော့ နေမာကို ၂၀၂၆ ကမ္ဘာ့ဖလားပြိုင်ပွဲအထိ အသင်းမှာ ဆက်ပြီးရှိချင်နေပါတယ်။
နေမာဟာ ဆန်းတို့စ်အသင်းအတွက် ပြိုင်ပွဲစုံ ၁၂ ပွဲ ပါဝင်ကစားထားပြီး ၃ ဂိုးသွင်းယူကာ ဂိုးဖန်တီးမှု ၃ ကြိမ် ပြုလုပ်ထားတာ ဖြစ်ပါတယ်။
Source: Goal
