CNI Sport News
၂၀၂၄ ခုနှစ်၊ ဒီဇင်ဘာ ၆
ဂျာမနီဘောလုံးအဖွဲ့ချုပ်(DFB)ဟာ ဘိုင်ယန်မြူးနစ်အသင်း ခေါင်းဆောင်ဖြစ်တဲ့ ဝါရင့်ဂိုးသမား နူအာကို လေဗာကူဆင်အသင်းနဲ့ပွဲစဉ်မှာ ပြသခံခဲ့ရတဲ့ အနီကတ်ကြောင့် ဂျာမန်ဖလား ၂ ပွဲပယ် ပြစ်ဒဏ် ချမှတ်ခဲ့ပါတယ်။
အသက် ၃၈ နှစ်အရွယ်ရှိ နူအာဟာ ဂျာမန်ဖလားပွဲစဉ်မှာ လေဗာကူဆင်အသင်း ကစားသမား ဖရင်ပေါင်ကို ဂိုးစည်း အပြင်ဘက်မှာ ပြစ်ဒဏ်ကျူးလွန်ခဲ့တာကြောင့် ကွင်းလယ်ဒိုင်လူကြီးရဲ့ တိုက်ရိုက်အနီကတ်ပြ ထုတ်ပယ် ခြင်းကို ခံခဲ့ရတာပါ။
နူအာအတွက်တော့ သူ့ရဲ့နှစ်ပေါင်း ၂၀ နီးပါး ကစားသမားဘဝမှာ ပထမဆုံးအကြိမ် အနီကတ်ပြသခြင်းကို ခံခဲ့ရတာ ဖြစ်ပါတယ်။
ဘိုင်ယန်မြူးနစ်အသင်းဟာ နူအာရဲ့ အနီကတ်နဲ့အတူ လေဗာကူဆင်အသင်းကို ၁ ဂိုး-ဂိုးမရှိနဲ့ အရေးနိမ့်ပြီး ဂျာမန်ဖလားပြိုင်ပွဲကနေ ထွက်ခွာခဲ့ရတာပါ။
နူအာကို တွေ့ရစဉ်
နူအာဟာ ၂ ပွဲပယ်ကို ပြည်တွင်းဖလား ပြိုင်ပွဲမှာသာ ကျခံရမှာဖြစ်ပြီး ဘိုင်ယန်မြူးနစ်အသင်းဟာ ဂျာမန်ဖလား ပြိုင်ပွဲကနေ ထွက်ခဲ့ရတဲ့အတွက် လာမယ့်ရာသီမှသာ ပွဲပယ်ပြစ်ဒဏ် ကျခံရဖို့ ရှိနေတာဖြစ်ပါတယ်။
ဒါပေမယ့် နူအာနဲ့ ဘိုင်ယန်မြူးနစ်အသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးတော့မှာပါ။
ဘိုင်ယန်မြူးနစ်အသင်းဟာ စာချုပ်သက်တမ်းမတိုးဖို့ ဆုံးဖြတ်ခဲ့လို့ နူအာ အနားယူခဲ့ရင် ဒါမှမဟုတ် သူဟာ ဂျာမန် ဘောလုံးကနေ ထွက်ခွာခဲ့ရင်တော့ ပွဲပယ်ပြစ်ဒဏ် ကျခံရမှာ မဟုတ်ပါဘူး။
ဘိုင်ယန်မြူးနစ်အသင်းဟာ ဒီဇင်ဘာ ၇ ရက်မှာ ဘွန်ဒက်လီဂါ ပွဲစဉ်အဖြစ် ဟိုင်ဒမ်ဟိုင်းအသင်းနဲ့ ယှဉ်ပြိုင်ရမှာ ဖြစ်ပြီး နူအာဟာ ဘိုင်ယန်မြူးနစ်အသင်းရဲ့ ပွဲထွက်လူစာရင်းထဲ ပါဝင်လာမှာဖြစ်ပါတယ်။
Source: CNA
