CNI Sport News
၂၀၂၄ ခုနှစ်၊ ဩဂုတ် ၃
အာဆင်နယ်အသင်းနည်းပြ အာတီတာက ဖူလ်ဟမ်အသင်းထံ ပြောင်းရွှေ့သွားခဲ့တဲ့ အကယ်ဒမီထွက် စမစ်ရိုး အသင်းက ထွက်ခွာတာကို မြင်တွေ့ရတာ ဝမ်းနည်းမိတယ်လို့ ပြောခဲ့ပါတယ်။
အာတီတာက “ကျနော်တို့ဆီကနေ စမစ်ရိုးထွက်ခွာသွားတာကို မြင်တွေ့ရတာ ဝမ်းနည်းမိပါတယ်။ ဒါပေမယ့် သူဟာ ပွဲတွေကိုစတင်ပြီး ပုံမှန် ကစားခွင့်လိုအပ်တဲ့အတွက် အခွင့်အရေးသစ်ကို ရယူနိုင်ခဲ့လို့ သူ့အတွက် စိတ်လှုပ်ရှားမိပါတယ်။ သူ့ကို အာဆင်နယ်မှာရှိတဲ့လူတိုင်းက ချစ်ကြပြီး သူဟာ ကျနော်တို့ကို ကျေးဇူးတင်မှုတွေ၊လေးစားမှုတွေနဲ့ အကောင်းဆုံး ဆုတောင်းတွေထားခဲ့ပါတယ်”လို့ ပြောခဲ့တာပါ။
အသက် ၂၄ နှစ်အရွယ်ရှိ စမစ်ရိုးဟာ ဖူလ်ဟမ်အသင်းကို ကနဦးပြောင်းရွှေ့ကြေး ပေါင် ၂၇ သန်းနဲ့ ၅ နှစ်စာချုပ်ချုပ်ဆိုကာ ပြောင်းရွှေ့ခဲ့တာဖြစ်ပါတယ်။
အသက် ၁၀ နှစ်အရွယ်ကတည်းက အာဆင်နယ်အသင်းကို ရောက်ရှိလာခဲ့တဲ့ စမစ်ရိုးဟာ ၁၄ နှစ်အကြာမှာ ငယ်ဘဝကလပ်က ထွက်ခွာခဲ့တာပါ။
စမစ်ရိုးဟာ အာဆင်နယ်အသင်းအတွက် ၁၁၅ ပွဲကစားခဲ့ပြီး ၁၈ ဂိုးသွင်းယူကာ ကွန်မြူနတီဒိုင်း ၂ ကြိမ်ရယူနိုင်ခဲ့ပါတယ်။
စမတ်ရိုးကိုတွေ့ရစဉ်
စမစ်ရိုးဟာ ခြေစွမ်းပိုင်းကောင်းမွန်ပြီး အလားအလာရှိတဲ့သူ ဖြစ်ပေမယ့် ဒဏ်ရာတွေကြောင့် အာဆင်နယ်အသင်းမှာ ပုံမှန်ပွဲထွက်ခွင့်ဆုံးရှုံးခဲ့ရတာပါ။
စမစ်ရိုးက ဖူလ်ဟမ်အသင်းရဲ့ ပရောဂျက်တွေအပေါ် စိတ်လှုပ်ရှားမိပြီး သူ့ရဲ့ကစားသမားဘဝအတွက် ပြီးပြည့်စုံတဲ့ ခြေလှမ်းဖြစ်တယ်ဆိုတာ သေချာတယ်လို့ အပြောင်းအရွှေ့အပြီးမှာ ပြောခဲ့ပါတယ်။
စမစ်ရိုးဟာ အင်္ဂလန်အသင်းကြီးအတွက် ၃ ပွဲပါဝင်ကစားထားပြီး လူငယ်အသင်းအဆင့်မှာ ၂၀၁၇ ယူ-၁၇ ကမ္ဘာ့ဖလား၊၂၀၂၃ ဥရောပယူ-၂၁ ဆုဖလားတို့ကို ရယူထားနိုင်ခဲ့ပါတယ်။
စမစ်ရိုးအနေနဲ့ ဖူလ်ဟမ်အသင်းမှာ သူ့ရဲ့အကောင်းဆုံး ပုံစံတွေကို ပြန်လည်ရယူနိုင်မလားဆိုတာ စောင့်ကြည့်ရမှာ ဖြစ်ပါတယ်။
Source:Metro
