CNI Sport News
၂၀၂၃ ခုနှစ်၊ ဒီဇင်ဘာ ၁၅
အာဆင်နယ်အသင်းနည်းပြ အာတီတာဟာ နယူးကာဆယ်အသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ ဒိုင်လူကြီးတွေကို ပြောခဲ့တဲ့ မှတ်ချက်စကားကြောင့် FA ရဲ့ အရေးယူမှုကနေ လွတ်မြောက်ခဲ့ပါတယ်။
အာတီတာဟာ နယူးကာဆယ်အသင်းရဲ့ အနိုင်ဂိုးကို ခွင့်ပြုခဲ့တဲ့ VAR ရဲ့ ဆုံးဖြတ်ချက်ဟာ ရှက်ဖို့ကောင်းတယ်လို့ ပြောခဲ့တာကြောင့် FA ရဲ့ စွဲချက်တင်ခြင်းခံခဲ့ရတာပါ။ ဒါပေမယ့် လွတ်လပ်တဲ့ စည်းမျဉ်းကော်မရှင်က ဒီစွဲချက် အပေါ် သက်သေပြသနိုင်ခြင်းမရှိဘူးလို့ FA က ပြောခဲ့တာဖြစ်ပါတယ်။ အာတီတာက နယူးကာဆယ်အသင်းနဲ့ ပွဲအပြီးမှာ ပြောခဲ့တဲ့ မှတ်ချက်စကားဟာ အင်္ဂလိပ်စကားလုံးနဲ့ ဆင်တူတဲ့ စပိန်စကားလုံးဖြစ်ပြီး သူတို့အသင်း ကံဆိုးခဲ့တာလို့ ပြောခဲ့ကြောင်း FA ထံ ပြန်ပြီးတုန့်ပြန်ခဲ့တာပါ။
အဲဒါကြောင့်လည်း အာတီတာဟာ FA ရဲ့ အရေးယူမှုခံရခြင်း မရှိတော့တာဖြစ်ပါတယ်။ VAR ဟာ နယူးကာဆယ် အသင်းရရှိသွားတဲ့ ဂိုးမှာ ဘောလုံးစည်းကျော်မှုရှိ၊မရှိ၊ ပြစ်ဒဏ်ကျူးလွန်မှုရှိ၊မရှိနဲ့ လူကျွံဘောဖြစ်၊မဖြစ်ကို ပြန်လည်စစ်ဆေးခဲ့ပေမယ့် ကွင်းလယ်ဒိုင်လူကြီးက သွင်းဂိုးကို ခွင့်ပြုခဲ့တာပါ။ အဲဒါကြောင့် အာတီတာဟာ စိတ်ပျက်ပြီး ပွဲအပြီးမှာ ဝေဖန်မှုတွေပြုလုပ်ခဲ့တာဖြစ်ပါတယ်။ အာတီတာဟာ ပြီးခဲ့တဲ့ အက်စတွန်ဗီလာအသင်းကို အရေးနိမ့်ခဲ့တဲ့ပရီးမီးယားလိဂ်ပွဲမှာ ဒီရာသီ အဝါကတ် ၃ ကတ်ပြည့်သွားလို့ အာဆင်နယ်အသင်းကို ကွင်းဘေး စည်းကနေ ကြီးကြပ်ခွင့်မရခဲ့ပါဘူး။
အာဆင်နယ်အသင်းဟာ ဒီရာသီပရီးမီးယားလိဂ်ပြိုင်ပွဲမှာ ၁၆ ပွဲကစားထားပြီး ရမှတ် ၃၆ မှတ်နဲ့ အဆင့် ၂ နေရာမှာ ရပ်တည်နေပြီး ထိပ်ဆုံးနေရာက လီဗာပူးလ်အသင်းနဲ့ ၁ မှတ်သာကွာဟနေတာပါ။ ဒါ့အပြင် အာဆင်နယ်အသင်း ဟာ ချန်ပီယံလိဂ်ပြိုင်ပွဲမှာ အုပ်စုထိပ်ဆုံးနဲ့ ၁၆ သင်းအဆင့်တက်ရောက်ခဲ့ပြီး ဒီရာသီမှာ ရလဒ်ကောင်းတွေကို ပိုင်ဆိုင်နေတာဖြစ်ပါတယ်။ အာဆင်နယ်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာပါ။
ဘရိုက်တန်အသင်းဟာ ယူရိုပါလိဂ်ပြိုင်ပွဲမှာ အုပ်စုတွင်း ပထမနဲ့ ၁၆ သင်းအဆင့်တက်နိုင်ခဲ့ပြီး ပရီးမီးယားလိဂ်မှာ အဆင့် ၈ နေရာရပ်တည်နေတာဖြစ်ပါတယ်။
Source:ChannelNewsAsia
