CNI Sport News
၂၀၂၃ ခုနှစ်၊ ဖေဖော်ဝါရီ ၂၈
အယ်လ်နာဆာအသင်း တိုက်စစ်မှူး ရော်နယ်ဒိုဟာ ဖီဖာ အကောင်းဆုံး ဆုပေးပွဲမှာ နိုင်ငံလက်ရွေးစင် အသင်း ခေါင်းဆောင်တွေ မဲပေးရမှာ ဖြစ်ပေမယ့် မဲပေးခဲ့ခြင်း မရှိခဲ့ဘူးလို့ သိရပါတယ်။
အသက် ၃၈ နှစ်အရွယ်ရှိ ရော်နယ်ဒိုဟာ ပေါ်တူဂီ လက်ရွေးစင် အသင်းခေါင်းဆောင်အဖြစ် တာဝန်ယူမှာ မဟုတ်တော့ဘူးလို့ ကြေညာထားတာ မရှိပေမယ့် ဒီဆုပေးပွဲမှာ အံ့အားသင့်ဖွယ် မဲမပေးခဲ့တာပါ။
ရော်နယ်ဒို နေရာမှာ ပီပီက ပေါ်တူဂီအသင်း ခေါင်းဆောင်အဖြစ်နဲ့ ဆုပေးပွဲမှာ မဲပေးမှုတွေ ပြုလုပ်သွားခဲ့တာ ဖြစ်ပါတယ်။ အသက် ၄၀ အရွယ်ရှိ ပီပီဟာ ဆုရခဲ့တဲ့ မက်ဆီကို မဲမပေးခဲ့ဘဲ ဘတ်ပီ၊ မိုဒရစ်နဲ့ ဘန်ဇီမာတို့ကိုသာ မဲပေးခဲ့တာပါ။
ရော်နယ်ဒိုကို ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲရဲ့ ၁၆ သင်းအဆင့်နဲ့ ကွာတားဖိုင်နယ်ပွဲတွေမှာ ပွဲထွက် လူစာရင်း ကနေ ချန်လှပ်ခဲ့တဲ့ နည်းပြ ဖာနန်ဒိုဆန်းတို့စ်ဟာ ပေါ်တူဂီနည်းပြ ရာထူးကနေ ထွက်ခွာခဲ့ပြီး သူ့နေရာမှာ ဘယ်လ်ဂျီယံနည်းပြဟောင်း မာတီးနတ်ဇ်က ကိုင်တွယ်သွားမှာ ဖြစ်ပါတယ်။
ပီပီကို တွေ့ရစဉ်
မာတီးနတ်ဇ်ကတော့ ရော်နယ်ဒိုဟာ သူ့ရဲ့အစီအစဉ်မှာ ပါဝင်တယ်လို့ ပြောထားပါတယ်။
မာတီးနတ်ဇ်က “ရော်နယ်ဒိုနဲ့ အတူတူထိုင်ပြီး အကောင်းဆုံးအသင်းကို ဖန်တီးနိုင်ဖို့ ကျနော်မျှော်လင့်ပါတယ်။ နိုင်ငံအသင်းအတွက် စွမ်းဆောင်ပေးခဲ့တဲ့ ကစားသမားတွေ အားလုံးသိအောင် ကြိုးစားဖို့ ဘောလုံးလုပ်ငန်းစဉ် တွေကို စတင်တော့မှာပါ။ ကျနော်တို့ဟာ ကစားသမားတွေ အားလုံးကို အခွင့်အရေးပေးပြီး နိုင်ငံအသင်းမှာ ရှိပြီး သား သူတွေကိုလည်း လေးစားပါတယ်။ ရော်နယ်ဒိုလည်း သူတို့ထဲက တစ်ဦးပါပဲ”လို့ ပြောခဲ့ပါတယ်။
လာမယ့် ယူရို ၂၀၂၄ ခြေစစ်ပွဲတွေကို မတ်လထဲမှာ ကျင်းပတော့မှာ ဖြစ်တာကြောင့် ရော်နယ်ဒို အနေနဲ့ ပေါ်တူဂီ အသင်းမှာ ပါဝင်နိုင်ဦးမလားဆိုတာ ပွဲတွေအတွက် လူစာရင်း ထုတ်ပြန်မှသာ သိရမှာပါ။
ပေါ်တူဂီအသင်းဟာ ဒီခြေစစ်ပွဲမှာ ဘော့စနီးယား၊ အိုက်စလန်၊ လူဇင်ဘတ်၊ ဆလိုဗားကီးယား၊ လက်ချင်စတိန်း တို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။
Source: The Sun
