CNI Sport News
၂၀၂၃ ခုနှစ်၊ ဖေဖော်ဝါရီ ၁၃
ဒဏ်ရာကြောင့် အနားယူနေရတဲ့ ဘတ်ပီဟာ ဘိုင်ယန်မြူးနစ်အသင်းနဲ့ ကစားမယ့် ချန်ပီယံလိဂ် ၁၆ သင်းအဆင့် ပထမအကျော့ ပွဲစဉ်အတွက် အသင်းလူစာရင်းမှာ ပြန်လည် ပါဝင်ဖို့ရှိတယ်လို့ ပြင်သစ်သတင်းတွေမှာ ဖော်ပြထား ပါတယ်။
ပြင်သစ်တိုက်စစ်မှူးဟာ မောင့်ပယ်လီယာအသင်းနဲ့ ကစားခဲ့တဲ့ လီဂူးဝမ်းပွဲစဉ်မှာ ပေါင်ဒဏ်ရာ ရရှိခဲ့တာကြောင့် ၃ ပတ်ကြာ အနားယူရမယ်လို့ ကလပ်အသင်းက မျှော်လင့်ခဲ့တာပါ။
ဒါပေမယ့် ဘတ်ပီဟာ တနင်္ဂနွေနေ့က ပြုလုပ်ခဲ့တဲ့ ပီအက်စ်ဂျီအသင်းရဲ့ လေ့ကျင့်ခန်း အစီအစဉ်မှာ ပါဝင်ခဲ့တယ် လို့ le Parisien က ဖော်ပြခဲ့တာကြောင့် ချန်ပီယံလိဂ်ပွဲစဉ်အမှီ ပြန်ကောင်းလာပြီး ဘိုင်ယန်မြူးနစ်နဲ့ပွဲမှာ ပါဝင် နိုင်ဖွယ် ရှိတယ်လို့ သိရပါတယ်။
ဒီရာသီမှာ ချန်ပီယံလိဂ်ဖလား ရယူနိုင်ဖို့ ပစ်မှတ်ထားနေတဲ့ ပီအက်စ်ဂျီ အသင်းအတွက်တော့ ဒီပွဲဟာ အရေးကြီး တဲ့ ပွဲစဉ်လည်း ဖြစ်ပါတယ်။
ဘိုင်ယန်မြူးနစ်နဲ့ ပီအက်စ်ဂျီ အသင်းတို့ဟာ ၂၀၂၀ ချန်ပီယံလိဂ် ဗိုလ်လုပွဲက တွေ့ဆုံခဲ့ဖူးပြီး အဲ့ဒီတုန်းက ဘိုင်ယန်မြူးနစ်က ၁ ဂိုး- ဂိုးမရှိနဲ့ အနိုင်ရခဲ့ကာ အနိုင်ဂိုးကို ကိုးမန်းက သွင်းယူခဲ့တာပါ။
ပီအက်စ်ဂျီအသင်းဟာ ပြီးခဲ့တဲ့ ရက်သတ္တပတ်မှာ ရလဒ်တွေ ဆိုးရွားနေပြီး ဘတ်ပီ ပြန်လည် ပါဝင်နိုင်မယ်ဆိုရင် အသင်းအတွက် အားတက်စရာ ဖြစ်လာနိုင်ပါတယ်။
ဘတ်ပီနဲ့မက်ဆီကိုတွေ့ရစဉ်
ပီအက်စ်ဂျီအသင်းဟာ ဘတ်ပီ မပါဝင်တဲ့ နောက်ဆုံး ၃ ပွဲမှာ ၂ ပွဲအထိ အရေးနိမ့်ခဲ့ပြီး ပြင်သစ်ဖလားကနေ ထွက်ခွာခဲ့ရသလို လီဂူးဝမ်းပြိုင်ပွဲမှာလည်း အမှတ်ကွာဟမှုတွေ နည်းပါးလာခဲ့တာပါ။
လက်ရှိ ချန်ပီယံအသင်းဟာ နောက်ဆုံး ကစားခဲ့တဲ့ပွဲမှာ မိုနာကိုအသင်းကို ၃ ဂိုး- ၁ ဂိုးနဲ့ အရေးနိမ့်ပြီးနောက် လီဂူးဝမ်း အမှတ်ပေးဇယားကို ဆက်လက် ဦးဆောင်နေပေမယ့် ဒုတိယနေရာက မာဆေးလ်အသင်းနဲ့ ၅ မှတ်သာ ကွာဟတော့တာ ဖြစ်ပါတယ်။
ဒါ့အပြင် ဘတ်ပီဟာ ပြင်သစ် လီဂူးဝမ်းပြိုင်ပွဲရဲ့ ဂိုးသွင်း အများဆုံး ကစားသမားနေရာကို ဘာလိုဂန်ထံ လွှဲပြောင်း ပေးခဲ့ရတာပါ။
အာဆင်နယ်ကနေ အငှားလာရောက် ကစားနေတဲ့ ဘာလိုဂန်ဟာ ရိမ်းစ်အသင်းအတွက် လိဂ်ပွဲ ၂၂ ပွဲမှာ ၁၅ ဂိုး သွင်းယူထားပြီး ဘတ်ပီထက် ၂ ဂိုး အသာရသွားတာ ဖြစ်ပါတယ်။ ဘိုင်ယန်မြူးနစ်နဲ့ ကစားမယ့် ချန်ပီယံလိဂ် ပွဲစဉ်ကို ဘတ်ပီနဲ့အတူ မက်ဆီလည်း ပြန်လည် ပါဝင်လာနိုင်ပါတယ်။
မက်ဆီဟာ ပီအက်စ်ဂျီအသင်းက မာဆေးလ်အသင်းကို အရေးနိမ့်ခဲ့တဲ့ ပြင်သစ်ဖလားပွဲစဉ်မှာ ရခဲ့တဲ့ ဒဏ်ရာ ကြောင့် မိုနာကိုအသင်းနဲ့ပွဲမှာ မပါဝင်နိုင်ခဲ့ပါဘူး။ ပီအက်စ်ဂျီ အသင်းကတော့ ကြယ်ပွင့်ကစားသမား ၂ ဦးစလုံးကို ဘိုင်ယန်မြူးနစ်နဲ့ပွဲမှာ ပါဝင်ဖို့ မျှော်လင့်နေတာ ဖြစ်ပါတယ်။
Source: Daily Mail
