CNI News
၂၀၂၅ ခုနှစ်၊ ဧပြီ ၁၄

ယခုနှစ် မြန်မာနှစ်သစ်ကူး သင်္ကြန်ရေကစားပွဲတော်ကို အဆို-အက-အခုန်နှင့် အပျော်အပါးများ မပါသည့် အေးသင်္ကြန်ကို ဧပြီ ၁၃ ရက်မှ ၁၇ ရက်ထိ နေပြည်တော်မှာ ကျင်းပလျက်ရှိသည်။

အဆိုပါ အေသင်္ကြန်ကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ဇနီး ဒေါ်ကြူကြူလှတို့ အပါအဝင် နစက အဖွဲ့ဝင်များနှင့် စစ်ဘက်ဆိုင်ရာ အရာရှိကြီးများလည်း တက်ရောက်ခဲ့သည်။

နေပြည်တော်မှာ ကျင်းပနေသည့် အေးသင်္ကြန်တွင် ပုဂံခေတ်၊ အင်းဝခေတ်၊ ပျူခေတ်၊ ကုန်းဘောင်ခေတ်၊ ရတနာ ပုံခေတ် စသည့် ခေတ်များကို သရုပ်ဖော် တင်ဆက်မှုများ တင်ဆက်ခဲ့သည်။

မူလက မြန်မာနှစ်သစ်ကူး အတာသင်္ကြန်ပွဲတော်ကို စည်စည်ကားကား ကျင်းပရန် ပြင်ဆင်ထားသော်လည်း ၂၀၂၅ ခုနှစ်၊ မတ်လ ၂၈ ရက်က မြန်မာနိုင်ငံမှာ ငလျင်လှုပ်ခတ်ခဲ့မှုကြောင့် လူပေါင်း ထောင်ချီ အသက်ဆုံးရှုံးခဲ့သလို လူပေါင်းထောင်ချီ ထိခိုက်ဒဏ်ရာများ ရရှိခဲ့သည်။

ထို့ပြင် လူနေအိမ်များ၊ ဘာသာရေး အဆောက်အအုံများ၊ ဟိုတယ်များ၊ အစိုးရရုံးများ၊ ဝန်ထမ်းအိမ်ယာများ၊ လမ်းတံတားများ၊ ဆက်သွယ်ရေးကွန်ရက်များ၊ အင်တာနက်လိုင်းများ၊ စာသင်ကျောင်းများ၊ ဆေးရုံများ ပြိုကျ ပျက်စီးခဲ့သည်။

ထို့ကြောင့် သင်္ကြန်ကို အေးသင်္ကြန်အဖြစ် ကျင်းပရန် နစက-က ပြောင်းလဲ စီစဉ်ခဲ့ခြင်း ဖြစ်သည်။