CNI News

၂၀၂၃ ခုနှစ်၊ ဩဂုတ် ၃

မြန်မာနိုင်ငံတွင် အကြောင်းအမျိုးမျိုးကြောင့် အသက်မပြည့်မှီ လုပ်ငန်းခွင် ဝင်နေကြရသည့် ကလေးများအတွက် နစကအနေဖြင့် ကောင်းမွန်သော ပညာရေးစနစ်တစ်ခုကို ဖော်ဆောင်ပေးသင့်ကြောင်း လူ့အခွင့်အရေး လုပ် ဆောင်ပေးသူများက ပြောသည်။

ဆင်းရဲချို့တဲ့သော ကလေးငယ်များနှင့် ငွေကြေး မတတ်နိုင်ဘဲ လမ်းဘေးမှာ တောင်းရမ်းစားသောက် ခြင်းနှင့် ဈေးရောင်းနေကြရသည့် ကလေးငယ်များအတွက် လက်လှမ်းမှီသော ပညာရေးစနစ်တစ်ခုကို ဖော်ဆောင်ပေး သင့်ကြောင်း တအောင်းလူ့အခွင့်အရေးဆိုင်ရာကွန်ရက် အတွင်းရေးမှူး လွေးချီဆငါးက CNI သတင်းဌာနသို့ ပြောသည်။

လွေးချီဆငါးက “အဲ့လိုမျိုး ကလေးတွေ အတွက်ကတော့ ကျမတို့ကတော့ ကလေးတွေ လက်လှမ်းမှီနိုင်တဲ့ ပညာရေးစနစ် တစ်ခုတော့ လမ်းဖွင့်သင့်တယ်လို့ မြင်တယ်။ တစ်ချို့ဆိုရင်တော့ ကိုယ်ထူကိုယ်ထ ကျောင်းဖွင့် လှစ်တာတွေ ရှိသလို တစ်ချို့တွေကျတော့ ဘ.က ကျောင်း ဘုန်းကြီးကျောင်းတွေ ဖွင့်လှစ်တာတွေ ရှိတယ်။ ဒါပေမယ့် ကလေးတိုင်းက လက်လှမ်းမမှီတာ တွေ့နေရတယ်။ အဲ့လိုမျိုး ခုနကပြောနေတဲ့ အလုပ်သမားရုံမှာ ရောက်တဲ့ ကလေးတွေ လမ်းပေါ်မှာ ဈေးရောင်းနေတဲ့ ကလေးတွေဆိုရင်လည်း အဲ့လိုမျိုးပညာရေး စနစ်တွေကို ဖန်တီးပေးနိုင်တယ် ဆိုလို့ရှိရင်တော့ သူတို့လည်း လက်လှမ်းမှီ နိုင်မယ်လို့ ထင်တယ်။ ဘ.က ကျောင်းပဲဖြစ်ဖြစ် ကိုယ်ထူကိုယ်ထ ပရဟိတကျောင်းတွေ ပုံစံမျိုး လုပ်မယ်ဆိုရင်တော့ လက်လှမ်းမှီနိုင်မယ်လို့ ထင်တယ်။ ကလေး တွေက တော်တော်များများ ပညာရေးတစ်ခုတည်း မဟုတ်ဘူးပေါ့နော်။ တခြားကလေးတွေမှာ ရသင့်ရထိုက်တဲ့ တော်တော်များများ မြန်မာပြည်မှာဆိုလို့ရှိရင် ဆုံးရှုံးနေတဲ့ အပိုင်းတွေရော အများကြီး တွေ့နေရတယ်။ တစ် ဒေသနဲ့ တစ်ဒေသ ဆုံးရှုံးမှု နည်းနည်းချင်း ကွာပေမယ့်လည်း ပြန်ချုံငုံ သုံးသပ်ကြည့်မယ်ဆိုရင်တော့ အကုန်လုံး မြန်မာတစ်နိုင်ငံလုံး နီးပါးက တူညီနေတာတွေ တွေ့နေရတယ်ဆိုတော့ ကလေးက ပညာသင်နေရမယ့် အရွယ်မှာ မသင်ရတဲ့ အပိုင်းတွေ အများကြီး တွေ့နေရတယ်ဆိုတော့ တတ်နိုင်တဲ့ဘက်ကနေ နီးစပ်ရာ ပရဟိတကျောင်း ဖြစ် ဖြစ် ဘ.က ကျောင်းပဲဖြစ်ဖြစ် ကလေးတွေကို ပညာရေးစနစ် လက်လှမ်းမှီနိုင်ဖို့အတွက် ဆောင်ရွက်ပေးနိုင်ရင် တော့ ပိုကောင်းနိုင်တယ်လို့ ပြောချင်ပါတယ်”ဟု ပြောသည်။

ပညာသင်ကြားနေသော ကလေးငယ်များကိုတွေ့ရစဉ်

မြန်မာနိုင်ငံထဲတွင် တောင်းရမ်းစားသောက်ပြီး ဝင်ငွေရှာသည့် ကလေးများမှာ ယခင်ကထက် နှစ်ဆလောက် တိုးလာပြီး စီးပွားရေး ကျပ်တည်းမှုကြောင့် ပိုမိုများပြားလာကြောင်း ကလေးများအတွက် ကိုယ်ထူကိုယ်ထ စနစ်ဖြင့် ပရဟိတပညာသင်ကြားပေးနေသည့် ရေချမ်းစင်ပရဟိတအဖွဲ့ တည်ထောင်သူ ကိုဖြိုးက CNI သတင်း ဌာနသို့ ပြောသည်။

၎င်းက “အဓိကက တိုင်းပြည်စီးပွားရေး နိမ့်ကျလာတယ်။ တခြား အကြောင်းအရင်းတွေလည်း အများကြီးရှိမှာ ပေါ့။ ဘာပဲဖြစ်ဖြစ်ပါ အဓိက ဒီလိုကလေးတွေ ရှိတယ်။ ပညာသင်ကြားခွင့် ဆုံးရှုံးနေတဲ့ ကလေးတွေ ရှိတယ်ဆိုရင် ကျနော်တို့ အနေနဲ့ ဒါက ကိုယ့်ကိုယ်ကို ဂုဏ်ယူတယ်ပေါ့ ဒီကလေးတွေ အတွက်ကို ဂုဏ်ယူသင့်တယ်ဆိုတဲ့ စိတ် ခံစားချက်နဲ့ ကျနော်တို့မှာ တာဝန်ရှိတယ် လူ့အဖွဲ့အစည်းမှာ တာဝန်ရှိတယ်ဆိုတဲ့ ခံယူချက်နဲ့ ဒီရေချမ်းစင်ကို စလုပ်ခဲ့တာပါ။ အစက ကျနော်စိတ်ပူတာက သူတို့က စာသင်ရမယ်ဆိုရင် လန့်ပြီးတော့ ကျနော်တို့ဆီကို မလာ တော့မှာ စာသင်ရမှာ ကြောက်တာကို ကျနော်တို့က စိုးရိမ်တာ ဒါပေမယ့် စာသင်တဲ့ အခါကျတော့ တကယ်တမ်း ကလေးတွေက ဒီပညာရေးကို တော်တော်လေးကို စာသင်ချင်ကြတာကို တွေ့ရတယ်။ တော်တော်လေး စာတတ် ချင်ကြတယ်။ ကျနော်တို့ စာလာသင်မှာကို သူတို့စောင့်နေကြတယ်။ အရင်တုန်းကဆိုရင် ၄-၅ ယောက်လောက်နဲ့ စခဲ့တာလေ ကျနော်တို့ လမ်းဘေး စာသင်ဝိုင်းက အခုကျတော့ အရမ်းစာသင်ချင်တဲ့ ကလေး ဦးရေက များပြီး တော့ အခုဆို ကလေးဦးရေ အယောက် ၁၅၀ ကျော် ၁၈၀ လောက် ဖြစ်နေတဲ့ အခြေအနေပေါ့”ဟု ပြောသည်။

နိုင်ငံ၏စီးပွားရေး ကျပ်တည်းမှုနှင့် မိဘ၏ ခိုင်းစေမှု၊ အလုပ်ရှင်များ၏ ခိုင်းစေမှုများကြောင့် အခွင့်အရေး ဆုံးရှုံး နေရခြင်းဖြစ်ပြီး အစိုးရအနေဖြင့် ပြည်သူများ၏ စီးပွားရေးဖူလုံမှုမှာ အစိုးရတွင် တာဝန်ရှိကြောင်း ရခိုင့် လူ့အခွင့်အရေး ကာကွယ်မြှင့်တင်ရေးအဖွဲ့ ဒါရိုက်တာ ဦးမြတ်ထွန်းက CNI သတင်းဌာနသို့ ပြောသည်။

ဦးမြတ်ထွန်းက “အဓိကတော့ မိဘနဲ့ဆိုင်ပါတယ်။ ဘာဖြစ်လို့လဲဆိုတော့ ကလေးတွေကို အုပ်ထိန်းတဲ့ သူတွေက မိဘပေါ့။ မိဘက တောင်းရမ်းခိုင်းတယ်ဆိုတော့ ဒါကတော့ ကလေးသူငယ် ဥပဒေကို ချိုးဖောက်ရာ ကျနေတယ်။ ဒါကတော့ CRC(Convention on the rights of the Child) ဥပဒေမှာလည်းပါတယ်။ မိဘရော အလုပ်ခိုင်းတဲ့ သူတွေရော တစ်ချို့ အလုပ်ရှင်တွေဆိုရင် အသက်မပြည့်သေးတဲ့ သူကို အလုပ်ခိုင်းတာတွေ ဘာတွေရှိတယ်။ နောက်တစ်ခါ စစ်မှုထမ်းတာတို့ ဘာတို့ရှိ တယ်။ ဒါကတော့ CRC ဥပဒေနဲ့ သက်ဆိုင်တယ်။ အဓိက ကလေးတွေ တောင်းရမ်းစားသောက်တဲ့ဟာနဲ့ ပတ်သက်လို့ မိဘနဲ့အများကြီး သက်ဆိုင်တယ်။ ကလေးတွေက အမှန်တော့ ဒီလိုမဖြစ်ရအောင်ဆိုတာ လူမှုဝန် ထမ်း အဖွဲ့တွေရှိတယ်။ အဲ့ဒီ လူမှုဝန်ထမ်း အဖွဲ့တွေက ဒီလိုမဖြစ်ဖို့အတွက် ကလေးတွေကို အကျင့်စာရိတ္တ ကောင်းဖို့အတွက် ဒီကလေးတွေရဲ့ လမ်းမှန်ကို ရောက်ဖို့အတွက် အစိုးရ အနေနဲ့ လုပ်ဆောင်ပေးသင့်တယ်လို့ ပြောချင်တယ်။ အုပ်ချုပ်တဲ့အစိုးရပေါ်မှာလည်း မူတည်တယ်။ အခုက တိုင်းပြည် ဖရိုဖရဲဖြစ်နေတယ်။ ကုန်ဈေးနှုန်းကြီးတယ်။ ဆန်ဈေးနှုန်းလည်း ကြီးတယ်။ အကုန်လုံး အစစအရာရာ ဈေးကြီးတဲ့ အခါကျတော့ မိဘတွေကလည်း တစ်နေ့လုပ်မှ တစ်နေ့ စားရတာဆိုလို့ရှိရင်တော့ ဒီစားဝတ် နေရေးတွေက အဆင်မပြေဘူး။ သားသမီးတွေကို တောင်းရမ်းခိုင်းတယ်။ ရှာခိုင်းတယ်။ အဲ့လိုပုံစံမျိုး လုပ်ရတာပေါ့။ အဓိက ပြောမယ်ဆိုလို့ရှိရင် အစိုးရနဲ့လည်း သက်ဆိုင်တယ်။ ပြည်သူတွေရဲ့ စားဝတ်နေရေး အဆင်ပြေဖို့ အစိုးရမှာ တာဝန်ရှိတယ်။ ဒီဟာကိုလည်း အစိုးရက ဖြေရှင်းပေးစေချင်တယ်လို့ ပြောချင်တယ်”ဟု ပြောသည်။

ပညာသင်ကြားနေသော ကလေးငယ်များကိုတွေ့ရစဉ်

ရန်ကုန်တိုင်းဒေသကြီးတွင် လိုင်းကားပေါ်များနှင့် လမ်းမပေါ်များ၌ တောင်းရမ်း စားသောက်သည့် ကလေးများကို တွေ့ရသလို လက်လီ/လက်က္ကား ရောင်းသည့် ဈေးကြီးများတွင် ဈေးရောင်းနေရသည့် အသက်မပြည့်သေးသော ကလေးများကို တွေ့ရသည်။

ထို့ပြင် လမ်းမပေါ်များတွင် ပန်းရောင်းနေသည့် ကလေးငယ်များ၊ ရေသန့်များ ရောင်းချသည့် ကလေးများ၊ အမှိုက် ကောက်နေသည့် ကလေးများကို လှိုင်သာယာမြို့နယ်၊ ရွှေပြည်သာမြို့နယ်၊ ကမာရွတ်မြို့နယ်၊ ဒလမြို့နယ်တို့တွင် အများဆုံး တွေ့ရကြောင်း ပရဟိတလုပ်သူများက ပြောသည်။

အဆိုပါ ကလေးငယ်များသည် ငွေကြေး မတတ်နိုင်သောကြောင့် ပညာသင်ကြားရေး အခွင့်အရေးများ ဆုံးရှုံးနေ ကြောင်း၊ ထိုကလေးများအတွက် လက်လှမ်းမှီနိုင်သည့် ပညာရေးစနစ်တစ်ခုကို ဖော်ဆောင်ပေးသင့်ကြောင်း လူ့အခွင့်အရေး လုပ်ပေးသူများက ပြောသည်။

မြန်မာနိုင်ငံအတွင်း အလုပ်လုပ်ကိုင်နေတဲ့ ကလေးငယ် ၁ သန်းကျော်ရှိကြောင်း၊ ထိုအထဲမှာ အသက် ၅ နှစ်နဲ့ ၁၇ နှစ်အကြား အရွယ်များဖြစ်ကြောင်း ILO က ထောက်ပြထားသည်။

လက်ရှိ မြန်မာနိုင်ငံမှာ ဖြစ်ပွားနေသည့် လူမှုရေး၊ စီးပွားရေး၊ နိုင်ငံရေး၊ ပညာရေး၊ အကျပ်အတည်းများကြောင့် လည်း မိသားစုများ အနေဖြင့် ကလေးအလုပ်သမားများကို အားကိုးအားထား ပြုရသည့် အခြေအနေ ဆိုက်ရောက် နေကြောင်း ILO ၏ ကြေညာချက်မှာ ဖေါ်ပြထားပါတယ်။

CNI News

၂၀၂၃ ခုနှစ်၊ ဇူလိုင် ၁၅

မြန်မာနိုင်ငံတွင် လက်နက်ကိုင်ပဋိပက္ခများ ပြင်းထန်နေသည့် အချိန်ကာလအတွင်း တိုက်ပွဲများကြောင့် တိုက်ပွဲရှောင်နေသည့် ကလေးများအတွက် ပညာရေးထိခိုက်မှုများ ရှိနေဆဲဖြစ်ကြောင်း တိုက်ပွဲရှောင်အရေး ကူညီလှုပ်ရှားသူများက ပြောသည်။

လက်ရှိတွင် မတည်ငြိမ်မှုများရှိနေဆဲဖြစ်သည့် ကယားပြည်နယ်ထဲက တိုက်ပွဲရှောင်ကလေးများမှာ စိတ်ချ လုံခြုံရသည့် အခြေအနေမရှိခြင်းကြောင့် ပညာသင်ယူမှုမှာလည်း နှောင့်နှေးနေကြောင်း ကယားပြည်နယ် လူ့အခွင့်အရေးဒါရိုက်တာ ကိုဗညားက CNI သတင်းဌာနသို့ ပြောသည်။

ရခိုင်တိုက်ပွဲရှောင် ကလေးများ ပညာသင်ကြားနေစဉ်

ကိုဗညားက “အခုနောက်ပိုင်း ကျောင်းတွေကို ဗုံးကြဲခံရတာတွေ ပိုများလာတာပေါ့နော်။ ကျောင်းနဲ့ အနီးအနား ပတ်ဝန်းကျင်ရွာတွေကို ဗုံးကြဲခံရတာတွေ များလာတော့ ကျနော်တို့ ဘာတွေ့လဲဆိုတော့ ကျောင်းတွေ တော်တော်များများ ပိတ်လိုက်ရတာ တွေ့တယ်။ ကျနော်တို့က ကလေးတွေရဲ့ ပညာရေးအတွက်ဆိုရင် မိဘတွေ အနေ နဲ့  စိုးရိမ်မှုရှိတယ်။ စခန်းထဲမှာဆိုလည်း စခန်းထဲက ကျောင်းတွေကို ပစ်မှတ်ထားပြီး ဗုံးကြဲတာတွေက ရှိလာတယ်လို့ ပြောလို့ရတယ်ပေါ့နော်။ အဲကြောင့်မို့ ကျောင်းသားမိဘတွေကလည်း ကျောင်းပို့ဖို့အတွက် ကလေးတွေ စိုးရိမ်မှုရှိတဲ့အပြင် ကျနော်တို့ စာရေးကိရိယာတွေ၊ ကျောင်း ဆရာ/ဆရာမတွေအတွက် စတိုင်ပင်လေးတွေ ပေးနိုင်ဖို့ အခက်ခဲရှိတယ်။ ပေးနိုင်ဖို့အတွက်လည်း အခက်ခဲတွေ ရှိတယ်။ ပညာရေးနဲ့ပတ်သက်လာရင် စိုးရိမ် ချက်တွေကတော့ တဖြည်းဖြည်း မြင့်တက်လာတယ်”ဟု ပြောသည်။

စာသင်ကျောင်းများကဲ့သို့ အများပြည်သူပိုင် နေရာများမှာ တစ်ဖက် တိုင်းရင်းသား လက်နက်ကိုင် အဖွဲ့အစည်း (EAOs)များက တိုက်ပွဲဖော်ဆောင်ခြင်းကြောင့် ဘေးထွက်ဆိုးကျိုးများ ဖြစ်လာရခြင်းဖြစ်ကြောင်း သေနင်္ဂမဟာ ဗျူဟာ လေ့လာရေးအဖွဲ့ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

ဦးသိန်းထွန်းဦးက “အရင်တုန်းထဲက ကျနော်တို့က ရွာကိစ္စနဲ့ပတ်သက်ပြီး ဒီလက်နက်ကိုင် အဖွဲ့အစည်းက ဆေးရုံ ပဲဖြစ်ဖြစ်၊ စာသင်ကျောင်းပဲဖြစ်ဖြစ်၊ ဘုန်းကြီးကျောင်းပဲဖြစ်ဖြစ် အဲဒီနေရာမှာ နေရာဝင်ယူပြီးတော့ တပ်ကို သွား ပစ်တဲ့ အခါမျိုးကျတော့ စစ်မြေပြင်ရဲ့ ထိတွေ့တိုက်ခတ်မှု စည်းမျဥ်းစည်းကမ်းအရ ပြန်ပစ်မှာဘဲ အဲလိုအခါမျိုးဆို လို့ရှိရင် ထိခိုက်တဲ့ ဆုံးရှုံးမှုက ဖြစ်လာလိမ့်မယ်။ အဓိကအရေးကြီးတာက အဲဒါမျိုးနဲ့ လွတ်ကင်းတဲ့ နေရာတွေမှာ တိုက်ပွဲဖြစ်ရင်တော့ ပြောစရာမရှိဘူး။ ဒါပေမယ့် ခုနကပြောသလို အဲဒီစာသင်ကျောင်းမှာ ခံတပ်အနေနဲ့ထား တယ်။ ဆေးရုံမှာ ခံတပ်အနေနဲ့ ထားတယ်။ ဘုန်းကြီးကျောင်းမှာ ခံတပ်အနေနဲ့ ထားတယ်ဆိုရင် တကယ့် သုံးစွဲရ မယ့် အများပြည်သူပိုင် ပစ္စည်းတွေ၊ အဆောက်အဦတွေ ဒီလိုနေရာမျိုးတွေမှာ သွားသုံးနေတယ် ဆိုလို့ရှိရင်တော့ ရှောင်လွှဲလို့ ရမှာ မဟုတ်ဘူး။ အဲဒါကတော့ ပြောရရင်တော့ ဒီလက်နက်ကိုင်ပဋိပက္ခရဲ့ ဘေးထွက်ဆိုးကျိူးတွေလို့ပဲ သုံးသပ်ရပါလိမ့်မယ်”ဟု ပြောသည်။

တိုက်ပွဲရှောင် ဒေသတစ်ခုဖြစ်သည့် စစ်ကိုင်းတိုင်းဒေသကြီးရှိ ကျေးရွာတချို့မှာ အရပ်ဖက် အဖွဲ့အစည်းတချို့၏ ကူညီမှုဖြင့် တိုက်ပွဲရှောင် ကလေးများ၏ ပညာရေး အခက်အခဲမရှိကြောင်း အမည်မဖော်လိုသည့် တိုက်ပွဲရှောင်ရွာ သူ တစ်ဦးက CNI သတင်းဌာနသို့ ပြောသည်။

KIO ထိန်းချုပ်နယ်မြေက ဂျန်ယန်တိုက်ပွဲရှောင်စခန်းက စာသင်ကျောင်းကိုတွေ့ရစဉ်

၎င်းက “ခုလောလောဆယ်တော့ ဆယ်ရွာမှာဘဲ ကိုယ့်အစီအစဥ်နဲ့ ကိုယ် ဖွင့်ထားတဲ့ ကျောင်းတွေမှာ ကလေးတွေ လိုက်နေတာလေ။ ခုလောလောဆယ် ကျောင်းကတော့ ရွာကလည်း ဝိုင်းပြီးတော့ သင်ပေးကြတယ်လေ။ ရွာက CDM ဆရာမတွေရော၊ Volenteer တွေရော ရွာက အောင်ထားတဲ့ ကလေးလေးတွေရော အကုန်လုံး ဝိုင်းပြီးတော့ သင်ပေးနေကြတယ်”ဟု ပြောသည်။

ထို့အပြင် တိုက်ပွဲယာယီ ရပ်စဲထားသည့် ရခိုင်ပြည်နယ်က တိုက်ပွဲရှောင် ကလေးများမှာ ကူညီထောက်ပံ့မှုများ နည်းခြင်းကြောင့် အခက်အခဲဖြစ်နေကြကြောင်း ကျောက်တော်မြို့နယ် တောင်မင်းကုလားတိုက်ပွဲရှောင်စခန်းမှ မအေးခိုင်က CNI သတင်းဌာနသို့ ပြောသည်။

မအေးခိုင်က “ထောက်ပံ့မှုပြုလုပ်တာက စာအုပ်တစ်ခုပဲရှိတယ်။ ကျောင်းစိမ်းတွေကတော့ မပေးသေးဘူး။ ကလေးတွေ ပညာမတတ်မှာကိုလည်း စိုးရတယ်။ ခုတောင်မှ ညတစ်ကြိမ်ပဲ တက်ရတာဆိုလို့ရှိရင် မနက်ပိုင်း တစ်ကြိမ် ညတစ်ကြိမ် မတက်ရတဲ့အချိန်မှာ သူတို့အတွက်ကတော့ ကျူရှင်လည်း မထားနိုင်ဘူးလေ။ အရင် တုန်းကဆိုရင် ဒီမှာ မူကြိုကျောင်းတွေရှိတယ်။ ကျောင်းတွေရှိလို့ရှိရင် အစ်မတို့က ဆယ်တန်းအောင်တဲ့၊ ကျတဲ့ သူတွေကို ကလေးတွေကို ဒီလိုမျိုး ပိုက်ဆံစုပြီးရင် ငှားနိုင်လို့ သင်တာရှိတယ်။ အခုက အဆောင်လည်း မရှိဘူး လေ။ စခန်းထဲမှာ သူတို့ကျောင်းတက်ဖို့ အဆောင်လည်း မလုပ်နိုင်ဘူး။ လေနဲ့ပါသွားပြီ။ အဲချိန်မှာ အစ်မတို့ စခန်းထဲက လူတွေကတော့ ၆ နှစ်၊ ၇ နှစ် ကျောင်းမတက်ရသေးဘူး။ အဲလိုမျိူးရှိတယ်။ မြို့မှာဆိုရင် (အသက်)၃ နှစ်၊ (အသက်) ၄ နှစ် မူကြိုတက်နေရပြီ။ ခုအစ်မတို့က (အသက်)၇ နှစ်ရှိနေပြီ ကျောင်းမထားရသေးဘူး။ ကျောင်း မထားရတာတွေ အများကြီးရှိ နေတယ်”ဟု ပြောသည်။

မြန်မာနိုင်ငံတွင် လက်နက်ကိုင်ပဋိပက္ခများကြောင့် ပြည်တွင်း နေရပ်စွန့်ခွာ ထွက်ပြေးတိမ်းရှောင် နေရသည့် တိုက်ပွဲရှောင်ဦးရေမှာ ၂၀၂၀ ပြည့်နှစ်၊ ဇန်နဝါရီလမှ ၂၀၂၂ ခုနှစ်၊ မတ်လ ၂၀ ရက်အထိ စုစုပေါင်း ၁,၂၄၉,၇၈၉ ဦး(၁ သန်းကျော်) အထိ ရှိနေပြီဖြစ်ကြောင်း မြန်မာ့မဟာဗျူဟာနှင့်မူဝါဒလေ့လာရေး အင်စတီကျူ(ISP-Myanmar)၏ ထုတ်ပြန်ချက်များအရ သိရသည်။

CNI News

၂၀၂၃ ခုနှစ်၊ ဇူလိုင် ၁

ပြီးခဲ့သည့် ၂၀၂၂ - ၂၀၂၃ ပညာသစ်နှစ်တွင် စနစ်ဟောင်း တက္ကသိုလ်ဝင်တန်း ဖြေဆိုထားပြီး ကျရှုံးခဲ့သည့် ကျောင်းသား/ကျောင်းသူများအနေဖြင့် ယခု ၂၀၂၃-၂၀၂၄ ပညာသင်နှစ်တွင် အခြေခံပညာအစိုးရအထက်တန်း ကျောင်းတွင် ကျောင်းတက်ခွင့်မရဘဲ အပြင်ဖြေအနေဖြင့် ဖြေဆိုကြရမည်ဟု ပညာရေးဝန်ကြီးဌာနက ပြောသည်။

စနစ်ဟောင်း တက္ကသိုလ်ဝင်တန်း ကျရှုံးထားသည့် ကျောင်းသား/ကျောင်းသူများသည် အပြင်ကျူရှင် တက်ရောက် ရာတွင် စနစ်သစ်၏ ၁၁ တန်းနှင့် ၁၂ တန်း ကျောင်းစာများကိုလည်း သင်ကြားရန် လိုအပ်ကြောင်း ရှမ်းပြည်နယ် မြောက်ပိုင်းမှ ပညာရေးမှူးတစ်ဦးက CNI သတင်းဌာနသို့ ပြောသည်။

၎င်းက “တရားဝင်စာတော့ မထွက်ဘူး။ တက်ခွင့်တော့ မရှိဘူးပေါ့။ သူ့ဟာသူ အပြင်မှာပဲ ကျူရှင်တက်။ အဲလို တက်ပြီးမှပဲ နောက်ဆုံး ပြင်ပဖြေ အနေနဲ့ရမယ်။ အဲဒီလိုပဲ ပြောတာ။ ကျူရှင်ဆိုတာကတော့ သူတို့က Grade 10 က ပြန်တက်ရမှာပေါ့။ Grade 10, 11, 12 အထိပေါ့နော်။ အဲဒီလို တက်ရမယ်။ ၃ တန်းအတွက်ကို တက်ရမှာ။ အဲဒီ လို တက်မှပဲ ဖြေလို့ရမှာလေ။ သူတို့ပြင်ပ အနေနဲ့ အဲဒီလို မတက်ရင် သူတို့က တဆင့်တဆင့် ကျော်လို့မရဘူး လေ။ စနစ်သစ်ပဲ ဖြေရမှာလေ။ Grade 12 ပဲ ဖြေရမှာလေ” ဟု ပြောသည်။ 

စနစ်ဟောင်း သင်ရိုးညွှန်းတန်းဖြင့် တက္ကသိုလ်ဝင်တန်း စာမေးပွဲ စစ်ဆေးခြင်းကို ၂၀၂၂ - ၂၀၂၃ ပညာသင်နှစ်သည် နောက်ဆုံး ဖြစ်သည်ဟု ပညာရေးဝန်ကြီးဌာနက ထုတ်ပြန်ထားသည်။

အထက်တန်း ကျောင်းသူ/သားများကိုတွေ့ရစဉ်

ပြီးခဲ့သည့်နှစ်များတွင် တက္ကသိုလ်ဝင်တန်း ကျရှုံးထားသူများကို တစ်နှစ် ကျောင်းတက်ခွင့် ပေးထားပြီး၊ နောက် တစ်နှစ် ထပ်မံကျရှုံးမှာသာ အပြင်ဖြေအနေဖြင့် ဖြေကြရကြောင်း သိရသည်။

လက်ရှိတွင် ကျောင်းတက်ခွင့်နှင့် ပတ်သက်ပြီး တရားဝင် စာထုတ်ပြန်လာခြင်း မရှိသေးကြောင်း၊ ကျောင်းသား/ ကျောင်းသူများအနေဖြင့် ကျူရှင်ကိုပဲ အားကိုးမှသာ အဆင်ပြေနိုင်မည် ဖြစ်ကြောင်း ချင်းပြည်နယ်၊ ဆမီးမြို့နယ်မှ ဒေသခံ ဦးအောင်ဒင်က CNI သတင်းဌာနသို့ ပြောသည်။

၎င်းက “ကျောင်းပြန်တက်ခွင့်တော့ မသေချာဘူးနော့်။ ကျနော် သတင်းမကြားမိဘူး။ ကျနော်တို့ ကြားတာတော့ ၁၂ တန်းပဲ ပြန်ဖြေရမယ်လို့ ပြောတယ်၊ အခု ၁၀ တန်းကျတဲ့ သူတွေလေ ဖြေချင်တယ်ဆိုရင်။ ကျူရှင်ပဲ အားကိုး ကြမယ်နဲ့တူတယ်။ ကျောင်းမှာ သီးသန့် ပြန်တက်တာတော့ မရှိလောက်ဘူး။ ကျောင်းမှာထက် ကျူရှင်မှာက ပိုပြီး တော့ လိုက်နိုင်မယ် ထင်တာပဲ” ဟု ပြောသည်။

စနစ်ဟောင်း တက္ကသိုလ်ဝင်တန်း၏ သင်ရိုးညွှန်းတမ်းနှင့် စနစ်သစ်၏ သင်ရိုးညွှန်းတမ်းများသည် အနည်းငယ် ကွာခြားမှုရှိကြောင်း၊ ထို့နောက် စနစ်ဟောင်း၏ သင်ရိုးညွှန်းတမ်းများကို အခြေခံရှိထားမှသာ အဆင်ပြေမည် ဖြစ်သည်ဟု သိရသည်။

မြန်မာနိုင်ငံတွင် ၂၀၂၃ ခုနှစ် တက္ကသိုလ်ဝင်စာမေးပွဲ ဖြေဆိုသူဦးရေ ၁၆၁,၈၅၀ ဦးရှိခဲ့ပြီး အောင်မြင်သူဦးရေ ၁၀၉,၈၅၁ ဦးရှိခဲ့သည်။ အောင်ချက်ရာခိုင်နှုန်း အနေဖြင့်မူ ၆၇ ဒသမ ၈၇ ရာခိုင်နှုန်း ဖြစ်သည်။

CNI News

၂၀၂၃ ခုနှစ်၊ ဇွန်လ ၁၂

ရခိုင်ပြည်နယ်တွင် မေလ ၁၄ ရက်နေ့က တိုက်ခတ်ခဲ့သည့် မိုခါမုန်တိုင်းကြောင့် စာသင်ကျောင်း အများအပြား ပျက်စီးခဲ့ရသော် လည်း ကျောင်းသားများ အမိုးအကာမရှိဘဲ ကျောင်းတက်နေရခြင်းမှာ မဟုတ်မှန်ကြောင်း ရခိုင်ပြည်နယ်ကောင်စီက CNI  သတင်းဌာနသို့ ပြောသည်။

တစ်နိုင်လုံးရှိ စာသင်ကျောင်းများကို ပြီးခဲ့သည့် ဇွန်လ ၂ ရက်နေ့က ပြန်ဖွင့်ပေးခဲ့ပြီး ရခိုင်ပြည်နယ်တွင် ပျက်စီးသွားသည့် ကျောင်းအဆောက်အအုံများကို ပြည်နယ်အစိုးရက ပြန်လည်ပြုပြင်ပေးနေသည့်အတွက် အမိုးအကာမရှိဘဲ ကျောင်းတက် နေရခြင်းမှာ အမှန်မဟုတ်ဟု ရခိုင်ပြည်နယ်၏ ပြောရေးဆိုခွင့်ရှိသူ ပြည်နယ်ဥပဒေချုပ် ဦးလှသိန်းက ပြောသည်။

ဦးလှသိန်းက "ထီးတွေဆောင်းပြီးကျောင်းမှာစာသင်တာ တကယ့်ဖြစ်ရပ်မဟုတ်ဘူး။ ရခိုင်ပြည်နယ်ထဲက အနေအထားတွေက အမျိုးမျိုးရှိတယ်။ ကျောင်းတွေကတော့ ပျက်စီးတာတော့ပျက်စီးတယ်။ပျက်တဲ့ထဲမှာ ဓာတ်ပုံတွေသွားရိုက်ကြတယ်။ ရိုက်ပြီးတော့ ပေါက်ကရဖြန့်နေကြတာ တစ်ပုံကြီး။ အဲဒါတွေက လုပ်ကြံတဲ့သတင်းတွေလေ။ ဘယ်ပညာရေးဌာနက အဲ့လိုကျောင်းထဲမှာ ထီးဆောင်းပြီး စာသင်ခိုင်းမလဲ" ဟု ပြောသည်။

ပြည်နယ်အစိုးရဘက်က စာသင်ကျောင်းများအား ပြုပြင်ပေးနေကြောင်း ပြောထားသောလည်း အချို့သော မြို့နယ်ကျေးရွာ အများစုရှိ ‌စာသင်ကျောင်းများမှာ ပြန်လည်မပြုပြင်ရသေးသောကြောင့် သားသမီးပညာရေးအတွက် ထိခိုက်နစ်နာမှုများရှိကြောင်း ကျောင်းသားမိဘများက CNI  သို့ ပြောသည်။

ရခိုင်ပြည်နယ်တွင် မိုခါမုန်တိုင်းကြောင့် ပျက်စီးသွားသည့် ကျောင်းအဆောက်အအုံတစ်ခုကို တွေ့ရစဉ်

ကျောက်တော်မြို့နယ် တောင်မင်းကုလားစစ်ရှောင်စခန်းမှ ကျောင်းသားမိဘတစ်ဦးဖြစ်သူ မအေးခိုင်က "ကျောင်းတွေက အကုန်လုံးပျက်စီးသွားတာ။ မပြုပြင်ရသေးဘူး။ ကလေးတွေ ကျောင်းတွေလည်း ကျောင်းမတက်ရသေးဘူး။ စားဝတ်နေရေး လည်းအဆင်‌မပြေဘူး။ ကျောင်းဝတ်စုံတွေ စာအုပ်တွေလည်း ထောက်ပံ့တာမျိုးမရှိသေးဘူး။ ငွေကြေးလည်း အဆင်မပြေတော့ သားသမီးငါးယောက်ရှိရင် နှစ်ယောက်ပဲ ပညာသင်ပေးနိုင်တယ်။ ကလေးတွေကို ကျောင်းထားမယ့်ကိစ္စကို မိဘတစ်ယောက်အနေနဲ့ စိတ်ပူမိတယ်။ ပညာရေးစရိတ်တွေကလည်း စျေးကြီးတော့ ကျောင်းတောင်မထားချင်တဲ့စိတ် ဖြစ်မိတယ်” ဟု ပြောသည်။

၎င်းအပြင် ခေါင်မိုးမလုံသည့် ကျောင်းဆောင်အောက်တွင် ပညာသင်နေကြရသောကြောင့် ကလေးများအတွက် ကျန်းမာရေး ထိခိုက်နိုင်ကြောင်း ရသေ့တောင်မြို့နယ် ကျောက်တန်းချေကျေးရွာမှ မမချေက ‌ပြောသည်။

"ခေါင်မိုးလန်သွားတဲ့ စာသင်ကျောင်းတွေမှာ တာလပတ်ချာနဲ့သင်တာမျိုးရှိတယ်။ မိုးရွာရင် မိုးမလုံတော့ ကလေးတွေ နေမကောင်းဖြစ်နိုင်တယ်။ စာသင်ချိန်ကိုလည်း အချိန်ပြည့်မသင်ရဘူး။ နှစ်ချိန်ခွဲသင်ရတာပေါ့နော်" ဟု သူက ပြောသည်။

ရခိုင်မှာ မိုခါမုန်တိုင်းတိုက်ခတ်မှုကြောင့် စာသင်ကျောင်း ၁၅၃၈ ကျောင်းပျက်စီးခဲ့ပြီး ပြန်လည်ပြုပြင်ပြီးသည့် ကျောင်း ၃၇၅ ကျောင်း၊ ပြုပြင်နေဆဲကျောင်း ၉၉၀ ကျောင်းနှင့် မပြင်ရသေးသည့်ကျောင်း ၁၇၃ ကျောင်းရှိနေသေးကြောင်း ပြည်နယ်ကောင်စီ က ပြောသည်။

CNI News
၂၀၂၃ ခုနှစ်၊ ဇွန်လ ၅

၂၀၂၃ ခုနှစ်၊ တက္ကသိုလ်ဝင်စာမေးပွဲ အောင်စာရင်းများကို ဇွန်လ ၉ ရက်နေ့ (သောကြာနေ့) နံနက် ၆ နာရီတွင် ထုတ်ပြန်ပေးသွားမည်ဖြစ်ကြောင်း ပညာရေးဝန်ကြီးဌာန၊ မြန်မာနိုင်ငံစာစစ်ဦးစီးဌာနက ထုတ်ပြန်ကြေညာခဲ့ သည်။

အဆိုပါ အောင်စာရင်းများကို သက်ဆိုင်ရာ မြို့နယ်အသီးသီးရှိ စာစစ်ဌာန ကျောင်းများတွင် တစ်ချိန်တည်း ကပ်ထားမည်ဖြစ်သလို မြန်မာနိုင်ငံစာစစ်ဦးစီးဌာန Website ဖြစ်သော www.myanmarexam.org တွင် ဝင်ရောက်ကြည့်ရှုနိုင်ရန် စီစဉ်ထားမည်ဟုလည်း ဆိုသည်။

မြန်မာနိုင်ငံစာစစ်ဦးစီးဌာနက “တက္ကသိုလ်ဝင်စာမေးပွဲ အောင်စာရင်းများကို Website မှ အသိပေးထုတ်ပြန် ကြေညာသည့်အပြင် ဝေးလံသော ဒေသများရှိ စာစစ်ဌာနများနှင့် အင်တာနက် အဆက် အသွယ် ကောင်းစွာ မရရှိသော စာစစ်ဌာနများ၏ အောင်စာရင်းများကို မြန်မာ့အသံ ရေဒီယို အစီအစဉ်မှလည်း အောင်စာရင်း ထွက် သည့် နေ့တွင် ကြေညာပေးပါမည်”ဟု ပြောသည်။

အောင်စာရင်းနှင့် ပတ်သက်၍ မရှင်းလင်းသည်များ ရှိလာပါက မြန်မာနိုင်ငံစာစစ်ဦးစီးဌာန၊ ဖုန်းနံပါတ် ၀၁-၆၅၃၅၀၉ နှင့် ၀၁-၆၅၃၄၆၇ တို့ထံသို့ အောင်စာရင်း ထုတ်ပြန်ကြေညာမည့် ဇွန်လ ၉ ရက်နေ့တွင် ဆက်သွယ် မေးမြန်းစုံစမ်းနိုင်ကြောင်း ပညာရေးဝန်ကြီးဌာနက ထုတ်ပြန်ခဲ့သည်။

CNI News

၂၀၂၃ ခုနှစ်၊ ဇွန်လ ၂

၂၀၂၃-၂၀၂၄ ပညာသစ်နှစ်တွင် မြန်မာနိုင်ငံတဝန်းရှိ ကျောင်းများ၌ ကျောင်းသား/သူ ၆ သန်းကျော် (၆၂၂၉၃၃၇ ဦး) ပညာသင်ကြားလျက်ရှိကြောင်း ပညာရေးဝန်ကြီးဌာနက ထုတ်ပြန်ခဲ့သည်။

ကျောင်းသား/သူများ ကျောင်းအပ်လက်ခံခြင်းကို မေလ ၃၀ ရက်မှ ၃၁ ရက်နေ့အထိ ဆောင်ရွက်ခဲ့ပြီးနောက် ဇွန်လ ၁ ရက်နေ့တွင် ၂၀၂၃-၂၀၂၄ ပညာသစ်နှစ်ကို စတင် ဖွင့်လှစ် သင်ကြားပေးလျက်ရှိသည်။

ပြည်ထောင်စုနယ်မြေ၊ နေပြည်တော်တွင် အခြေခံပညာ အထက်တန်း၊ အလယ်တန်း၊ မူလတန်းကျောင်း စုစုပေါင်း ၇၅၇ ကျောင်း၊ ဘုန်းတော်ကြီးသင်ကျောင်း စုစုပေါင်း ၂၈ ကျောင်း၊ ကိုယ်ပိုင်ကျောင်း အထက်တန်း၊ အလယ်တန်း၊ မူလတန်းကျောင်း စုစုပေါင်း ၁၄ ကျောင်း ဖွင့်လှစ်ခဲ့သည်။

ထို့ကြောင့် နေပြည်တော်ကောင်စီနယ်မြေတွင် ကျောင်းအားလုံးပေါင်း ၇၉၉ ကျောင်းဖွင့်လှစ်ခဲ့ပြီး ကျောင်းသား/ သူ စုစုပေါင်း ၂၁၇၀၄၂ ဦး တက်ရောက် ပညာသင်ကြားလျက်ရှိသည်။

ဆရာ/ဆရာမများ၊ ကျောင်းသား/သူများ၊ ကျောင်းသားမိဘများ ယာဉ်အန္တရာယ်နှင့် ဘေးအန္တရာယ် ကင်းရှင်းစေ ရေးအတွက်လည်း လုံခြုံရေးတပ်ဖွဲ့များ၊ မြို့နယ်အုပ်ချုပ်ရေးအဖွဲ့၊ ရပ်ရွာအခြေပြု ပြည်သူလူထုလုံခြုံရေးအဖွဲ့များ ပူးပေါင်း၍ ဆောင်ရွက်ပေးလျက်ရှိကြောင်း ပညာရေးဝန်ကြီးဌာနက ထုတ်ပြန်ခဲ့သည်။

CNI News

၂၀၂၃ ခုနှစ်၊ ဇွန်လ ၁

မိုခါမုန်တိုင်းဒဏ် ခံစားခဲ့ရသော ရခိုင်ပြည်နယ်၊ ဘူးသီးတောင်မြို့နယ်ရှိ ကျောင်းများတွင် ၂၀၂၃-၂၀၂၄ ပညာသင် နှစ် ကျောင်းဖွင့်ချိန် ဇွန်လ ၁ ရက်နေ့က ကျောင်းသား/သူများကို ယခုလို တွေ့မြင်ရသည်။

ယခု တွေ့မြင်ရသော ကျောင်းသား/သူများသည် ဘူးသီးတောင်မြို့နယ်၊ အ.ထ.က (၁)၊ အ.ထ.က (၂)၊ အ.ထ.က(ခွဲ) အ.လ.က(၃) ကျောင်းများ၌ ပညာသင်ကြားနေကြသူများ ဖြစ်သည်။

CNI News

၂၀၂၃ ခုနှစ်၊ မေလ ၂၆

မြန်မာ့ပညာရေးကဏ္ဍတွင် ပုဂ္ဂလိက ကိုယ်ပိုင်ကျောင်းများစွာ ရှိလာသော်လည်း ထိုကျောင်းများ၏ ဖြည့်ဆည်းမှု နှင့် အရည်အသွေးပိုင်း စိစစ်ကြီးကြပ်မှု၊ ဆရာ/ဆရာမများ၏ အရည်အသွေး ပိုင်းဆိုင်ရာ အသိအမှတ် ပြုမှုများ အတွက် third party တစ်ရပ် ပေါ်ထွက်လာရန် လိုအပ်နေကြောင်း ကိုယ်ပိုင်ကျောင်း အသိုင်းအဝိုင်းမှ ဆရာ တစ်ဦးဖြစ်သူ ဦးနေမျိုးဦးက CNI သတင်းဌာနသို့ ပြောသည်။

၎င်းက “ပညာရေးနဲ့ ပတ်သက်တဲ့ အသိအမှတ်ပြုခြင်းဆိုင်ရာ third party မျိုးတွေ ဖွဲ့တော့မယ်ဆိုရင် အစိုးရဘက် က ကျွမ်းကျင်ပညာရှင်တွေ၊ ပြင်ပက ပညာရေးနဲ့ ပတ်သက်လို့ ကျွမ်းကျင်တဲ့ ပညာရှင်တွေ၊ ကိုယ်ပိုင်ကျောင်းတွေ၊ ပုဂ္ဂလိကကျောင်းတွေ တည်ထောင်ထားတဲ့ အခါမှာ အဲဒီအလွှာကနေ ကိုယ်စားပြု တဲ့ ကိုယ်စားလှယ်တွေ၊ နောက် ပညာရေးမှာ ထည်ထည်ဝင်ဝင် ကိုယ်တိုင်ကိုယ်ကျ ပါဝင်ကြရတဲ့ ဆရာ၊ ဆရာမများ ရှိတဲ့အလွှာက ကိုယ်စားလှယ် တွေ၊ ကျောင်းသားကျောင်းသူနဲ့ ကျောင်းသား မိဘများဘက်က လည်း ကိုယ်စားပြုတဲ့သူ စသည်ဖြင့် အဲလိုမျိုး ပုဂ္ဂိုလ်တွေ ဖွဲ့စည်းပြီးတော့မှ third party တစ်ရပ်ကို တည်ထောင်လိုက်လို့ရှိရင် ပညာရေးအတွက် အင်မတန်မှ ကောင်းမွန်တဲ့ အဖွဲ့အစည်းတစ်ရပ် ဖြစ်လာ မယ်။ အဲလို third party မျိုး ပညာရေးမှာ ရှိဖို့သင့်ပါတယ်”ဟု ပြော သည်။

အချို့ ကိုယ်ပိုင်ကျောင်းများသည် အရည်အသွေးမီ၊ စံချိန်မှီအောင် တည်ဆောက်ထားသည့်အပြင် အသိပညာရှင်၊ အတတ်ပညာရှင်များကို ဖိတ်ကြား၍ ဆရာ၊ ဆရာမများ၏ သင်ကြားရေးပိုင်းဆိုင်ရာ ကိုယ်ရည်ကိုယ်သွေး၊ ကျောင်း စီမံခန့်ခွဲမှု အရည်အသွေးများကို မြှင့်တင်မှုများ ရှိနေကြောင်း သိရသည်။

 ပုဂ္ဂလိက ကျောင်းများနဲ့ပတ်သက်တဲ့ နစက၏ ထုတ်ပြန်ချက်ကိုတွေ့ရစဉ်

သို့ရာတွင် အချို့ကိုယ်ပိုင်ကျောင်းများ အနေဖြင့် ၎င်းတို့ တက်နိုင်သည့် ရင်းနှီးမြှုပ်နှံမှုကိုသာ သုံးစွဲတည်ထောင် ထားခြင်းဖြစ်၍ ကျောင်းရပ်တည်မှုအတွက် ပြဿနာမရှိသော်လည်း ဖြည့်ဆည်းမှုနှင့် အရည်အသွေး ပိုင်း အားနည်းနေသည်ကို တွေ့ရကြောင်း ပုဂ္ဂလိကကျောင်းများတွင် သင်ကြားပေးနေသည့် ဆရာအသိုင်းအဝိုင်းမှ သိရသည်။

ပုဂ္ဂလိက ကိုယ်ပိုင်ကျောင်းများကို ပညာရေး၀န်ကြီးဌာနမှ စိစစ်လက်ခံကာ ဖွင့်ခွင့်ပေးခြင်း ဖြစ်ပြီး၊ အရည်အ သွေး၊ သင်ကြားရေးပိုင်းဆိုင်ရာများကို သတ်မှတ်ချက်များနှင့် ညီညွတ်မှု ရှိ၊ မရှိ စစ်ဆေးခြင်းကိုမူ တစ်နှစ်လျှင် ပျှမ်းမျှ နှစ်ကြိမ်သာ ဆောင်ရွက်ကြောင်း ပညာရေးဝန်ကြီးဌာန၏ ဖော်ပြချက်အရ သိရသည်။

ထို့ကြောင့် ကိုယ်ပိုင်ကျောင်းများကဏ္ဍ အမှန်တကယ် ဖွံ့ဖြိုးရန်အတွက် အစိုးရလုပ်ဆောင်ချက် တစ်ခုတည်းနှင့် မလုံလောက်ဘဲ third party ကဲ့သို့ အဖွဲ့အစည်းတစ်ရပ်မှ ဝိုင်းဝန်းထိန်းကျောင်းပေးမှသာ အရည်အသွေးပိုင်း ဆိုင်ရာ တိုးတက်မှု ရှိလာမည် ဖြစ်သည်။

ကျောင်းသား/သူများကို တွေ့ရစဉ်

ကျောင်းဆရာ ဦးနေမျိုးဦးက “ third party အားကောင်းလာပြီ ဆိုရင် ကျောင်းတွေရဲ့ အရည်အသွေး အကဲဖြတ်မှု တွေ၊ အဆင့်အတန်း သတ်မှတ်မှုတွေ ဆရာ/ဆရာမများရဲ့ အရည်အသွေးပိုင်းဆိုင်ရာ အသိအမှတ်ပြုမှုတွေ၊ သင်ရိုးညွှန်းတမ်းပိုင်းဆိုင်ရာ အဆင့်အတန်း သတ်မှတ်မှုနဲ့ အကဲဖြတ်မှုတွေ၊ သူ့ရဲ့ အရည်အသွေး စိစစ်မှုတွေ စသည်ဖြင့်ပေါ့ ဒါတွေကို ပိုပြီးအားကောင်းပြီး ဆောင်ရွက်လာနိုင်လိမ့်မယ်။ အဲဒီအခါမှာ လုပ်ငန်းတွေ အနေနဲ့ လည်း ပိုပြီး တိုးတက်လာနိုင်လိမ့်မယ်။ အဲတော့ third party တစ်ရပ်သာ ခိုင်ခိုင်မာမာ ပေါ်လာခဲ့ရင်တော့ ပညာ ရေး အနေနဲ့ အင်မတန်မှ တိုးတက်ဖွံ့ဖြိုးလာမယ့် အနေအထားကိုတော့ ရောက်ရှိလာမှာ”ဟု ပြောသည်။

မြန်မာတစ်နိုင်ငံလုံးတွင် ကိုယ်ပိုင်ကျောင်း အ‌ရေအတွက် ၁၂၀၀ ကျော် ရှိနေပြီး၊ ကျောင်းသားမိဘများ အနေဖြင့် အစိုးရကျောင်းများထက် ကိုယ်ပိုင်ကျောင်းများကို ပိုမိုရွေးချယ်လာကြကြောင်း ကိုယ်ပိုင်ကျောင်း အသိုင်းအဝိုင်းမှ သိရသည်။