CNI News
၂၀၂၃ ခုနှစ်၊ မေလ ၂၃

၂၀၂၃-၂၀၂၄ ပညာသင်နှစ် အခြေခံပညာကျောင်းများ၌ ကျောင်းအပ်နှံမှုများကို ယနေ့ (မေလ ၂၃ ရက်) တွင် စတင် လက်ခံရာ ကျောင်းသား/သူ စုစုပေါင်း ၁၃၄၃၀၃၇ ဦး(၁၃ သိန်းကျော်)လာရောက် ကျောင်းအပ်နှံခဲ့ ကြောင်း ပညာရေးဝန်ကြီးဌာနက ထုတ်ပြန်ခဲ့သည်။

တိုင်းဒေသကြီးနှင့် ပြည်နယ်အသီးသီးတွင် ကျောင်းအပ် လက်ခံခြင်းကို ယနေ့ (မေလ ၂၃ ရက်)မှ မေလ ၃၁ ရက်နေ့အထိ သတ်မှတ်ထားကြောင်း၊ ၂၀၂၃-၂၀၂၄ ပညာသင်နှစ်အတွက် အခြေခံပညာဦးစီးဌာနအောက်ရှိ အထက်တန်းအဆင့်၊ အလယ်တန်းအဆင့်နှင့် မူလတန်းအဆင့် ကျောင်းများကို ဇွန်လ ၁ ရက်တွင် စတင် ဖွင့်လှစ်မည်ဖြစ်သည်။

ကျောင်းလာအပ်သည် ကျောင်းသား/သူများအတွက် စာရေးကိရိယာများနှင့် ကျောင်းသုံးစာအုပ်များကို ပညာရေးဝန်ကြီးဌာနက အခမဲ့ ထောက်ပံ့ပေးခဲ့သည်။

CNI News

၂၀၂၃ ခုနှစ်၊ မေလ ၁၁

ပုဂ္ဂလိက ကိုယ်ပိုင်ကျောင်းအချို့သည် အစိုးရ၏ ညွှန်ကြားချက် မရသေးဘဲ ဖွင့်လှစ်သင်ကြားမှုများရှိခဲ့ရာ ကနေ လက်ရှိမှာတော့ ပြန်လည်၍ ယာယီပိတ်ထားရကြောင်း ကိုယ်ပိုင်ကျောင်းများတွင် ကျောင်းအပ်နှံထားရှိသည့် ကျောင်းသားမိဘများနှင့် သင်ကြားပေးနေသောဆရာများ အသိုင်းအဝန်းမှ CNI သတင်းဌာနသို့ ပြောသည်။

ကိုယ်ပိုင်ကျောင်းများ အနေဖြင့် အစိုးရ၏ ညွှန်ကြားချက်ဖြင့်သာ ဖွင့်လှစ်ခြင်းက အကောင်းဆုံးပဲဟု ကိုယ်ပိုင် ကျောင်းတစ်ခုတွင် သင်ကြားပို့ချ ပေးနေသော ဆရာ တစ်ဦးက ပြောသည်။

၎င်းက “အခုနေကတော့ ပညာရေးဝန်ကြီးဌာနရဲ့ တရားဝင် ခွင့်ပြုချက်၊ မှတ်ပုံတင် လိုင်စင်ကို ရယူထားတာ ဖြစ် လို့ ညွှန်ကြားချက်များနဲ့အညီ ဖွင့်တာပဲ ကောင်းပါတယ်။ အခု ဒါဖွင့်ပြီး ပြန်ပိတ်သွားတယ်လို့ ဘာတို့ ကြားတာ တော့ ဒါသူ့ အကြောင်းအမျိုးမျိုးတော့ ရှိမှာပေါ့လေ။ ‌နွေရာသီမှာ တချို့ကတော့ ဘက်စုံဖွံ့ ဖြိုးမှု သင်တန်းလေး တွေ ဖွင့်ထားတာမျိုးတွေ ရှိတာပေါ့။ ဥပမာဆိုလို့ ရှိရင် မေလ ၂၃ ရက်နေ့မှာ ကျောင်းစတင် လက်ခံပြီးတော့ ဇွန်လ ၁ ရက်နေ့ မှာ ဖွင့်ပါရန်ဆိုတဲ့ ညွှန်ကြားချက် လိုမျိုးတွေ့ရတဲ့ အခါကျတော့ ဒီပညာရေး ဝန်ကြီးဌာနရဲ့ ညွှန်ကြားချက် အတိုင်းနဲ့ မညီဘဲ သင်ကြားတာ ကောင်းပါတယ်။ မိဘတွေဘက်ကလည်း ကိုယ့်ရဲ့ သား၊ သမီး တွေကိုတော့ စောစောစီးစီး ကျောင်းပို့နိုင်ရင် ကောင်းတယ်ဆိုတဲ့ အတွေးမျိုးထက် သူ့ကလေးတွေရဲ့ သင်ကြား သင်ယူနိုင်မယ့် အနေအထားကို ချိန်ဆက်ပြီး သတ်မှတ်တဲ့ ကာလလေးအတိုင်းဘဲ သင်ကြားစေတာမျိုးပေါ့ ။ ဒါလေးက ပိုကောင်း တယ်။ ကျောင်းတွေ အနေနဲ့ကလည်း စည်းမျဥ်းစည်းကမ်းနဲ့အညီ ဖွင့်လှစ်တာပဲ ကောင်းပါ တယ်။ ဖွင့်ပြီးတော့ ပြန် ပိတ်ရတာမျိုးတွေ ဒါမျိုးတွေ မဖြစ်ရအောင်တော့ ညွှန်ကြားချက်များနဲ့အညီ လုပ်ကိုင်တာ အကောင်းဆုံးပါလို့ပဲ ပြောချင်ပါတယ် “ ဟု ပြောသည်။

ပုဂ္ဂလိကျောင်း တစ်ကျောင်းမှ စာသင်ကြားရေး ပုံစံကို တွေ့ရစဉ်

ပုဂ္ဂလိက ကိုယ်ပိုင်ကျောင်း အချို့အနေဖြင့် ယခု ၂၀၂၃- ၂၄ ပညာသင်နှစ်အတွက် ကျောင်းအပ်လက်ခံမှုကို ဧပြီလ ဆန်းပိုင်းကတည်းက စောစီးစွာ လက်ခံခဲ့ပြီး မေလ ၁ ရက်နေ့တွင် စတင်ဖွင့်လှစ် သင်ကြားမှုများရှိနေခြင်းဖြစ် ကြောင်း သိရသည်။

ထိုသို့ ဖွင့်လှစ် သင်ကြားမှုမှာ ကိုယ်ပိုင်ကျောင်း ဥပဒေနှင့် မညီညွတ်ကြောင်း၊ စိတ်အ‌နှောင့်အယှက် အနည်းငယ် ဖြစ်ရကြောင်း တက္ကသိုလ်ဝင်တန်းတက်ရောက်ရန် ကိုယ်ပိုင်းကျောင်း တစ်ခု၌ အပ်နှံထားသည့် မြောက်ဥက္ကလာပ မြို့နယ်မှ ကျောင်းသားမိဘတစ်ဦးဖြစ်သူ ဒေါ်အေးအောင်က  ပြောသည်။

ဒေါ်အေးအောင်က “ကလေးကတော့ နည်းနည်းတော့ စိတ်ပျက်သွားတာပေါ့နော်။ သူက ကျောင်းမှာ သုံးရက်ဆို တော့ ပျော်နေပြီလေ ၊ ပြီးတော့ သူက သင်တဲ့အခါလည်း သူက နည်းနည်း လောဘကြီးတယ်လေ အစောကြီး တက်ရတော့ စာပို ရတယ်ထင်တာပေါ့။ ဒါပေမယ့် အခု ရုတ်တရက်ကြီး ပိတ်သွားတဲ့ အခါကျတော့ ကလေးက နည်းနည်း ဘယ်လို ပြောရမလဲ စိတ်တော့ နည်းနည်း ရှုပ်သွားတာပေါ့” ဟု ပြောသည်။

ပညာရေးဝန်ကြီးဌာနသည် ဖွင့်လှစ်ထားဆဲ ကိုယ်ပိုင်ကျောင်းများကို အရည်အသွေး၊ သင်ကြားရေးပိုင်း ဆိုင်ရာ စသည်တို့ကို သတ်မှတ်ချက်များနှင့် ညီညွတ်မှု ရှိ၊ မရှိ တစ်နှစ်လျှင် အနည်းဆုံး ပျှမ်းမျှ နှစ်ကြိမ် ပုံမှန် စစ်ဆေးမှု များ လုပ်လေ့ရှိကြောင်း သိရသည်။

ကိုယ်ပိုင်အထက်တန်းကျောင်း တစ်ခုကိုတွေ့ရစဉ်

ထို့နောက် ထပ်မံဖွင့်လှစ်ရန် တင်ပြထားသော ကိုယ်ပိုင်ကျောင်းအသစ် လိုင်စင်များကိုလည်း သေချာစိစစ် ခွင့်ပြု ပေးနေ‌ကြောင်း ၎င်းတို့၏ ဝက်ဘ်ဆိုက်တွင် ဖော်ြပထားသည်။

ကိုယ်ပိုင်ကျောင်းများတွင် အပ်နှံမည်ဆိုပါက နေစရိတ်၊ စားစရိတ်၊ သင်ကြားရေးစရိတ် အလုံးစုံအတွက် တစ်နှစ် ကုန်ကျစရိတ်မှာ ပျှမ်းမျှ ကျပ်သိန်း ၈၀ မှ ၁၀၀ အကြားရှိနေ‌ကြောင်း ကျောင်းသားမိဘများက ‌ပြောသည်။

သို့သော် ကိုယ်ပိုင်ကျောင်း တစ်ကျောင်းနှင့် တစ်ကျောင်း သတ်မှတ် ကုန်ကျစရိတ်များတော့ အားလုံး တူညီနိုင် မည် မဟုတ်ကြောင်းလည်း ကျောင်းသားမိဘများက ပြောသည်။

လက်ရှိကာလတွင် ကျောင်းသားမိဘများ အနေဖြင့် အစိုးရ ကျောင်းများထက် ကိုယ်ပိုင်ကျောင်းများကို ပိုမို ရွေးချယ်လာကြောင်း သိရသည်။

မြန်မာတစ်နိုင်ငံလုံးတွင် ကိုယ်ပိုင်ကျောင်း အရေအတွက် ၁၂၀၀ ကျော် ရှိကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၂၁

၂၀၂၀ တက္ကသိုလ်ဝင်စာမေးပွဲ အောင်မြင်သူများအတွက် တက္ကသိုလ်ပထမနှစ်(ပထမနှစ်ဝက်)နေ့ကို ယနေ့ (နိုဝင်ဘာ ၂၁ ရက်)တွင် ဖွင့်လှစ်ခဲ့ကြောင်း သိရသည်။

ထို့နောက် ရန်ကုန်တက္ကသိုလ်နှင့် ရန်ကုန်နိုင်ငံခြားဘာသာတက္ကသိုလ်တွင် ကျောင်းလာတက်ကြသူများကို ယနေ့ (နိုဝင်ဘာ ၂၁ ရက်)၌ တွေ့ရသည်။

၂၀၂၂ ခုနှစ်၊ နိုဝင်ဘာ ၂၁ ရက်တွင် ရန်ကုန်တက္ကသိုလ်သို့ လာရောက်တက်နေသော ကျောင်းသား/သူ များကို တွေ့ရစဉ်

တက္ကသိုလ်ပထမနှစ် တက်ရောက်မည့်သူများ ကျောင်းအပ်နှံရေးအတွက် ယခုလ (နိုဝင်ဘာလ)ကုန်အထိ လက်ခံပေးသွားမည်ဖြစ်ကြောင်း၊ ၂၀၂၂ တက္ကသိုလ်ဝင်စာမေးပွဲ အောင်မြင်သူများအနက် ၇၅ ရာခိုင်နှုန်း ကျောင်းအပ်ထားကြောင်း ပညာရေးဝန်ကြီးဌာနမှ သိရသည်။

၂၀၂၀ တက္ကသိုလ်ဝင်စာမေးပွဲ အောင်မြင်သူများအတွက် တက္ကသိုလ်ပထမနှစ်(ပထမနှစ်ဝက်)၏ တက္ကသိုလ် နှစ်ဝက် စာမေးပွဲများကို ၂၀၂၃ ခုနှစ်၊ မတ်လ ၉ ရက်နေ့တွင် ကျင်းပသွားမည်ဟုလည်း နစက၏ ပညာရေးဝန် ကြီးဌာနက ထုတ်ပြန်ထားသည်။

CNI News

၂၀၂၂ ခုနှစ်၊ စက်တင်ဘာ ၂၇

အိန္ဒိယနိုင်ငံ အရှေ့မြောက်ပိုင်း မီဇိုရမ်ပြည်နယ်ရှိ မီဇိုရမ်တက္ကသိုလ်(MZU)တွင် နိုင်ငံခြားသား ကျောင်းသူ၊ ကျောင်းသားများအတွက် မြန်မာဘာသာကို အောက်တိုဘာလတွင် စတင်သင်ကြားမည်ဖြစ်ကြောင်း ချင်းရေးရာ အဖွဲ့ချုပ်(ICA)မှ ဒေါက်တာမယ်ရီက CNI သတင်းဌာနသို့ ပြောသည်။

အဆိုပါ မီဇိုရမ်တက္ကသိုလ်တွင် မြန်မာအက္ခရာ ၊ ဝေါဟာရ ၊ သဒ္ဒါဖွဲ့စည်းပုံ ၊ စကားပြောနှင့် စကားပြေ အရေး အသားတို့အား လေ့ကျင့်သင်ကြား ပေးသွားမည်ဖြစ်ကြောင်း သိရသည်။

ထိုသို့ သင်ကြားခြင်းသည် ချင်းရေးရာအဖွဲ့ချုပ်(ICA)နှင့် မီဇိုရမ်တက္ကသိုလ်(MZU)တို့၏ ပူးပေါင်း ဆောင်ရွက်မှုဖြင့် ပထမဆုံး စတင်သင်ကြားမည်ဖြစ်ကြောင်း၊ ဘာသာရပ် သင်ကြားပေးမည့် ဆရာမမှာ ဒေါက်တာအဲလစ် ဖြစ် ကြောင်း ICA မှ ဒေါက်တာမယ်ရီက CNI သတင်းဌာနသို့ ပြောသည်။

မီဇိုရမ်ပြည်နယ်အတွင်းက မြန်မာ ဒုက္ခသည်များကိုတွေ့ရစဉ် (GETTY IMAGES)

၎င်းက “ကျမတို့ ICA ကနေပဲ MIZORAM University ကို Propose လုပ်တာပေါ့။ ကျမတို့ မြန်မာ ဘက်က research center ပုံစံမျိုးကို MIZORAM University မှာ ဖွင့်ချင်တယ်ပေါ့။ ဒီတက္ကသိုလ်ဘက်ကနေ ညီမ တို့ကို ကမ်းလှမ်းတာကျတော့ မြန်မာဘာသာစကားကို တက္ကသိုလ်မှာ သင်ကြားပေးနိုင်မလားပေါ့။ သူတို့ဒီမှာ တခြား သော ဘာသာစကား language တွေကိုလည်း သင်နေတာ ရှိတယ်ပေါ့။ သင်ပေးနိုင်မလားဆိုတော့ ကျမတို့က သင်ပေးနိုင်တယ်ပေါ့။ အဲဒါကနေ ကျမတို့ မြန်မာစာ သင်တန်းကို ဖွင့်ဖြစ်သွားတဲ့ သဘောပါ။ ကျောင်းသားတွေ ထဲမှာ မြန်မာနိုင်ငံသား ရှိလားဆိုတာတော့ ကျမမသိဘူး။ ဒါပေမယ့် အဓိကက ဒီမြန်မာဘာသာစကား ဖွင့်တယ် ဆို တာက Foreigner တွေအတွက် ရည်ရွယ်ထားတာ။ Foreigner ဆိုတဲ့အထဲမှာ အိန္ဒိယနိုင်ငံသားတွေပေါ့နော်။ သူတို့အတွက်က သီးသန့်ဖွင့်လိုက်တဲ့ သဘောပါ” ဟု ပြောသည်။
ထိုမီဇိုရမ်တက္ကသိုလ်သည် မီဇိုရမ်ပြည်နယ် အစိုးရမှ ဖွင့်လှစ်ထားသော တက္ကသိုလ်တစ်ခုဖြစ်ပြီး မြန်မာဘာသာ အား တာဝန်ခံ၍ သင်ကြားပေးမည့် ဆရာမ ဒေါက်တာအဲလစ်သည် မြန်မာစာဘာသာရပ်ဖြင့် Ph.D ဘွဲ့ ရရှိထား သူဖြစ်ကြောင်း သိရသည်။

ထို မြန်မာဘာသာစကားအား သင်ကြားရန်အတွက် Semester နှစ်ခု သတ်မှတ်ထားကာ သင်ကြားမည့်ကာလမှာ ၁၀ လ ကြာမြင့်မည်ဖြစ်ကြောင်း သင်ကြားပေးမည့် ဆရာမ ဒေါက်တာအဲလစ်က CNI သတင်းဌာနသို့ ပြောသည်။

၎င်းက “Diploma courses ပဲပေါ့ရှင့်။ Diploma courses တစ်ခု ၅ လ၊ ၅ လ ပေါ့၊ first semester ၅ လ။ second semester ၅ လပေါ့။ အပြောပေါ့နော်။ အရေးနဲ့ အဆင်ပြေမယ်ဆိုလည်း နည်းနည်းထည့်မယ်။ သင်ယူတဲ့လူ အခြေအနေပေါ် ကြည့်ပြီးတော့ပေါ့။ ဌာနအနေနဲ့ မဟုတ်တော့လေ။ အခုမှ စပြီးတော့မှ ဒီတက္ကသိုလ်နဲ့ ချိတ်ဆက် ပြီးတော့ လုပ်တာဆိုတော့ ကျမကို အလုပ်ခန့် လိုက်တယ်ပေါ့။ အဲဒီတော့ တစ်ယောက်ပဲရှိမယ်။ နောက်တက် မယ့် ဦးရေလည်း မသိရသေးဘူးပေါ့နော်။ အဲဒီကျောင်းမှာတက်တဲ့ ကျောင်းသူ/ကျောင်းသားတွေကို အဓိက ရည်ရွယ်တယ်ပေါ့။ ဒါပေမယ့် အပြင်ကနေ တက်မယ်ဆိုရင်လည်း ရတယ်။ Partner Ship လုပ်ထားတဲ့ အဖွဲ့လေး ရှိတယ်။ သူတို့ရဲ့ သင်ရိုးလေးကို ယူပြီးတော့မှ သင်ပေးဖို့ အဲဒီလိုလေးတွေ လုပ်ထားတယ်။ သီးသန့်ကြတော့ သူက မေဂျာအနေနဲ့လည်း မရှိထားတဲ့ အခါမှာလေ ဘယ်လိုစပြီး သင်ရမလဲဆိုတာ နည်းနည်းလေး အခက်တွေ့တာနဲ့ လေ။ အဲဒါ MLT လို့ခေါ်တယ်ရှင့် သူတို့ရဲ့ စာအုပ်ကို သုံးဖို့ လုပ်ထားတယ်” ဟု ပြောသည်။

သင်တန်းကြေးအဖြစ် အိန္ဒိယရူပီး ၁၀၀၀ (မြန်မာငွေ ၃၅၀၀၀ ကျပ်) သတ်မှတ်ထားကြောင်း၊ သင်တန်းတစ်ခုလုံး အတွက် သင်ကြားရေး ထောက်ကူပစ္စည်းများဖြစ်သော ဖတ်စာအုပ်အပြင် အခြားအရာများအတွက် ကုန်ကျစရိတ် ရူပီး ၁၂၀၀ (မြန်မာငွေ ၄၂၀၀၀ ကျပ်) ကျသင့်မည်ဖြစ်ကြောင်း သိရသည်။

ဒီမိုကရေစီအရေးတောင်းဆိုကြသူများ (ဖရွန်းတီးယားမြန်မာ)

အဆိုပါ မီဇိုရမ်တက္ကသိုလ်တွင် တခြားနိုင်ငံမှ ဘာသာစကားများလည်း သင်ပေးနေလျက်ရှိပြီး ယခုကဲ့သို့ မြန်မာ ဘာသာ စကားအား သင်ကြားခွင့်ရသဖြင့် ဂုဏ်ယူကြောင်း ICA မှ ဒေါက်တာမယ်ရီက CNI သတင်းဌာနသို့ ပြော သည်။

၎င်းက “ကိုယ့်မြန်မာနိုင်ငံရဲ့ official language တစ်ခုကို တခြားနိုင်ငံတစ်ခုမှာ ဒီလိုမျိုး ဖွင့်လှစ်နိုင်တယ်ဆိုတာ အရမ်းကို ဂုဏ်ယူစရာကောင်းတဲ့ ကိစ္စရပ်ပေါ့။ ပြီးတော့မှ နောက်ပိုင်းကျတော့လည်း အိမ်နီးနားချင်းဆိုတော့ စီးပွားရေးပိုင်းမှာ ဆက်သွယ်မှုတွေလည်း ရှိနေတယ်ပေါ့။ အဲဒီတော့ ကျမတို့ နိုင်ငံတစ်ခုနဲ့ တစ်ခု ပိုပြီးတော့မှ နားလည်စေချင်တယ်။ ဒီ language က အရေးကြီးတယ်။ ခြုံပြီးပြောရရင် ဒါဟာ ဂုဏ်ယူစရာကောင်းတဲ့ ဖြစ်ရပ် ပါ”ဟု ပြောသည်။

မီဇိုရမ်ပြည်နယ်သည် မြန်မာနိုင်ငံနှင့် နယ်စပ်ချင်း မိုင် ၃၀၀ ကျော် ထိစပ်နေသော ပြည်နယ်ဖြစ်ပြီး မြန်မာ့တပ် မတော်က ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် နိုင်ငံတော်အား အရေးပေါ် အခြေအနေ ကြေညာခဲ့ပြီးနောက် မြန်မာနိုင်ငံက လွှတ်တော်အမတ်များ အပါအဝင် ဒုက္ခသည် ငါးသောင်းခန့် ခိုလှုံနေကြောင်း ဒေသတွင်း သတင်း ဌာနများနှင့် မြန်မာနိုင်ငံဘက်က အရပ်ဘက်အဖွဲ့အစည်းများထံမှ သိရသည်။

ထို့နောက် မြန်မာဒုက္ခသည် သုံးသောင်းကျော်သည် ပြီးခဲ့သည့် မေလကုန်ပိုင်းက ပြည်နယ်အစိုးရမှ ထုတ်ပေးသည့် နေထိုင်ခွင့် အသိအမှတ်ပြု မှတ်ပုံတင်များ ရရှိထားကြောင်း သိရသည်။

CNI News

၂၀၂၂ ခုနှစ်၊ ဩဂုတ် ၂၀

ရှမ်းပြည်နယ်မြောက်ပိုင်းရှိ မြို့နယ် ၉ မြို့နယ်တွင် ဖွင့်လှစ်ထားသည့် တအာင်းအမျိုးသား ကိုယ်ပိုင်ကျောင်းများ တွင် ဆရာ/ဆရာမ လုံလောက်မှု မရှိကြောင်း ပလောင်ပြည်လွတ်မြောက်ရေးတပ်ဦး (PSLF/TNLA) မှ ပြောရေးဆို ခွင့်ရှိသူ ဗိုလ်မှူး မိုင်းအိုက်ကျော် က CNI သတင်းဌာနသို့ ပြောသည်။

တအာင်းကိုယ်ပိုင်ကျောင်းများကို ပြီးခဲ့သည့် ၂၀၂၂ ခုနှစ်၊ ဇွန်လ ပထမအပတ်၌ စတင်၍ တအာင်းအမျိုးသား ပညာရေးကော်မတီ (TNEC)က ဦးဆောင် ဖွင့်လှစ်ခဲ့သည်။

TNEC က တအာင်းအမျိုးသားကိုယ်ပိုင်ကျောင်းဖွင့်လှစ် (TNEC)

ဗိုလ်မှူး မိုင်းအိုက်ကျော်က “TNEC ပေါ့နော်၊ တအာင်းအမျိုးသား ပညာရေးကော်မတီက ဦးဆောင်ပြီးတော့ ဖွင့်ခဲ့ တယ်၊ ကျနော်တို့ မြင်တွေ့နေတာကတော့ အောက်ခြေမှာတော့ ဆရာ/ဆရာမ လုံလောက်မှု မရှိတဲ့ဟာလည်း တွေ့ရတယ်။ တချို့ စာရေးကိရိယာပိုင်း ပြည့်ပြည့်စုံစုံ မရှိဘူး။ လိုအပ်ချက်ရှိတယ်။ ဒီကျောင်းသူ/ကျောင်းသား တွေ ပညာမသင်ရတာ ၂ နှစ်လောက် ရှိပြီပေါ့နော်၊ ဒါကြောင့် ဒီဟာကို အရပ်ဖက် အဖွဲ့အစည်းရယ်၊ သံဃာတော် အဖွဲ့အစည်းရယ်၊ သူတို့ ပေါင်းပြီးတော့ ကျောင်းဖွင့်လှစ် နိုင်အောင်ပေါ့နော် စခဲ့တယ်။ ဒီနှစ်မှ စတာဆိုတော့ အဆင်မပြေမှုတော့ ရှိနေတာတော့ တွေ့ရတယ်” ဟု ပြောသည်။

တအာင်းကိုယ်ပိုင်ကျောင်း ဖွင့်လှစ်ရခြင်း၏ ရည်ရွယ်ချက်မှာ ၂၀၂၀ ခုနှစ်မှ စတင်ကာ အခြေခံပညာကျောင်းများ ပိတ်ထားရ သည့်အတွက် ဖွင့်လှစ်ခြင်းဖြစ်ကြောင်း၊ ကျောင်းဖွင့်လှစ်သည့်အခါ တအာင်းစာပေအပြင် အခြား ဘာသာရပ်များ၊ အခြား လူမျိုးစုများ၏ ကျေးရွာများတွင် ၎င်းတို့၏ စာပေများကို သင်ကြားသွားမည်ဟု သိရသည်။

CNI News

၂၀၂၂ ခုနှစ်၊ ဇူလိုင် ၁၆

Kaung For You Education(K4U) ကျောင်းအုပ်ကြီးအဖြစ် တာဝန်ယူထားသူ ကိုကောင်းသိုက်စိုး အပါအဝင် သုံးဦးကို ဖမ်းမိ ထားသည်ဟု နစက-က ယနေ့ (ဇူလိုင် ၁၆ ရက်)တွင် သတင်း ထုတ်ပြန်သွားခဲ့သည်။

၂၀၂၂ ခုနှစ်၊ ဇူလိုင် ၁၃ ရက်နေ့က ကိုကောင်းသိုက်စိုး(မြစ်သားမြို့နယ်၊ CDM၊ လက်ထောက်မြို့နယ် ပညာရေးမှူး)၊ ကိုဝင်း ဗိုလ် (ခ) ဘိုဘို (CDM၊ မူလတန်းပြ)၊ သန့်စင်ထိုက် (CDM၊ မူလတန်းပြ)တို့အား ရှမ်းပြည်နယ်(တောင်ပိုင်း)၊ အောင်ပန်းမြို့နယ်၊ လှည်းရိုးရပ်ကွက်ရှိ နေအိမ် တစ်အိမ်မှာ ဖမ်းဆီး ရမိခဲ့ခြင်း ဖြစ်ကြောင်း သိရသည်။

K4U ကျောင်းသည် အမျိုးသားညီညွတ်ရေးအစိုးရ(NUG)၏ ညွှန်ကြားမှုဖြင့် ဖွင့်လှစ်ထားခြင်းဖြစ်ပြီး တရားမဝင် ပညာသင် ကြားမှု အစီအစဉ်အား Online စနစ်ဖြင့် သင်ကြားနိုင်ရန် စီစဉ်ဆောင်ရွက်နေကြောင်း နစက-က ထုတ်ပြန်ခဲ့သည်။

NUG ၏ ပညာရေးဝန်ကြီးဌာန ဒုဝန်ကြီး ဂျာထွယ်ပန်က စာသင်ကြားပေးနေသည့် ဆရာ/မများကို ဖမ်းဆီးခြင်းက လွတ်လပ် စွာ ပညာသင်ကြားခွင့်ကို ချိုးဖောက်ခြင်းဖြစ်ပြီး လူမဆန်မှုများပဲ ဖြစ်သည်ဟု သူ၏ ဖေ့စ်ဘွတ်ခ် လူမှုကွန်ရက် စာမျက်နှာ ပေါ်ကနေ ရေးသား ပြောဆိုခဲ့သည်။

NUG ၏ ဒုဝန်ကြီး ဂျာထွယ်ပန်က “ Kaung 4 U ကျောင်းမှာ ဖြစ်ပျက်ခဲ့တဲ့ကိစ္စတွေကို ပညာရေးဝန်ကြီးဌာနက စုံစမ်း စစ် ဆေး နေစဉ်အတွင်းမှာပဲ မနေ့က ဆရာ ကောင်းသိုက်စိုး အဖမ်းခံရတယ်ဆိုတဲ့ သတင်းနဲ့အတူ ဆရာ/မ တချို့ပါ အဖမ်းခံခဲ့ရ ပါတယ်။ Kaung 4 U အနေနဲ့ စီမံခန့်ခွဲမှု လိုအပ်ချက်တွေ ရှိခဲ့ပြီး ကျောင်းအုပ်ချုပ်ရေးအဖွဲ့ အနေနဲ့ တာဝန်ရှိ ကြောင်း ခံယူပြီး ဖြစ်ပါတယ်။ ဒီအဖြစ်အပျက်အပေါ် အခွင့်ကောင်းယူပြီး စာသင်ကြားပေးနေတဲ့ ဆရာ/မ တွေကို ဖမ်းဆီးတာက လွတ်လပ်စွာ ပညာသင်ကြားခွင့်ကို ချိုးဖောက်တာဖြစ်ပြီး ယုတ်မာ လူမဆန်မှုတွေပဲ ဖြစ်ပါတယ်”ဟု သူ၏ ဖေ့စ်ဘွတ်ခ် လူမှုကွန်ရက် စာမျက်နှာပေါ်မှာ ပြောထားသည်။

ကိုကောင်းသိုက်စိုး၏ ထွက်ဆိုချက်အရ Kaung For You Federal Private School Team အား ၂၀၂၂ ခုနှစ်၊ ဧပြီလ (ပထမ ပတ်)တွင် Online မှတဆင့် အဖွဲ့ဝင် ၁၂ ဦးဖြင့် စတင် ဖွဲ့စည်းခဲ့ပြီး ၂၀၂၂ ခုနှစ်၊ ဇူလိုင် ၁၃ ရက်တွင် စတင် သင်ကြား ပို့ချနိုင် ရေး စီစဉ် ဆောင်ရွက်ထားကြောင်း၊ ထိုသို့ သင်ကြား ပို့ချနိုင်ရန်အတွက် CDM ပြုလုပ်ထားသူ ဆရာ/ဆရာမ ၄၀၀ ဦးခန့်အား ခန့်အပ်နိုင်ရန် စီစဉ်ဆောင်ရွက်ခဲ့ကြောင်း သိရသည်ဟု နစက-က ထုတ်ပြန်သွားသည်။

ထို့နောက် ကျောင်း တက်ရောက်မည့် ကျောင်းသား/သူများကိုလည်း ဇွန်လ ၁ ရက်မှစတင်၍ Online မှတဆင့် ကျောင်းအပ် လက်ခံခဲ့ပြီး Online အခြေပြု စာသင်ကြားမှုအတွက် Zoom Application၊ Facebook၊ Signal၊ Gmail၊ Messenger တို့တွင် Group များဖွဲ့၍ ဆက်သွယ် အသုံးပြုထားကြောင်း တွေ့ရှိရသည်ဟု နစကဘက်က ပြောသည်။

ထိုသို့ Online မှတဆင့် စာသင်ကြားမည့် CDM ကျောင်း ဆရာ/ဆရာမများအတွက် လစာငွေအား ကျောင်းအပ်နှံသူ ကျောင်းသား/သူများ၏ မိဘများထံမှ တစ်လလျှင် တစ်ဦးအနည်းဆုံး တစ်သောင်း(၁၀၀၀၀) ကျပ် ကောက်ခံကြောင်း သိရသည်။

K4U ကျောင်းအုပ်အဖြစ် တာဝန်ယူထားသူ ကိုကောင်းသိုက်စိုးမှာ မြစ်သားမြို့မရဲစခန်းက ပုဒ်မ ၅၀၅ (က)ဖြင့် အမှုဖွင့်ခံ ထားရသူဖြစ်ကြောင်း နစက-က ဆိုသည်။

CNI News

၂၀၂၂ ခုနှစ်၊ ဇူလိုင် ၆

ကျောင်းစာသင်ခန်းအတွင်း ကျောင်းဆရာမတချို့ ကခုန်ပြီး Tik Tok ဆော့‌နေသည့် ဗီဒီယိုများ အွန်လိုင်း စာမျက်နှာပေါ်များသို့ တင်နေခြင်းသည် ကျောင်းသူ၊ ကျောင်းသားများကို အထင်အမြင်လွဲစေနိုင်သည့်အတွက် ရှောင်ရှားသင့်ကြောင်း ကျောင်းသားမိဘများ၊ ဆရာ/ဆရာမများနှင့် တတ်သိပညာရှင်များက သုံးသပ်ပြောဆို သည်။

လက်ရှိကာလသည် ကျောင်းသူ ကျောင်းသားများ ဘေးကင်းလုံခြုံစွာ ပညာသင်ကြားနိုင်ရန် လိုအပ်သည့်ကာလ ဖြစ်သည့်အတွက် ကျောင်းဆရာ၊ ဆရာမများအနေဖြင့် ယင်းကိစ္စကို အရေးပေးရန်လိုအပ်သည်ဟု ရန်ကုန် စောင့်ကြည့်အဖွဲ့တည်ထောင်သူ ဒေါက်တာညိုညိုသင်းက CNI သတင်းဌာနသို့ ပြောသည်။

“ဆရာမတွေက စာသင်ချိန်အတွင်းမှာကို သူတို့ရဲ့ ပညာသင်ကြားရေးကို အထောက်အကူပြုတယ်ဆိုလို့ရှိရင်တော့ ဒါတွေက လုပ်လို့ရပါတယ်။ သူတို့ရဲ့ ပညာသင်ကြားရေးကို အထောက်အကူ မပြုတဲ့ဟာ ကျောင်းသားတွေ အထင်အမြင် လွဲစေမယ့် ကိစ္စတွေဆိုရင်တော့ ဒီလိုမျိုး လုပ်ရပ်တွေကို ရှောင်ရှားသင့်တယ်ပေါ့နော်။ အခုဟာက ကျောင်းသားတွေ ဘေးကင်းစွာ ပညာသင်ကြားရေးကို ဦးတည်ပြီးတော့ တစ်နိုင်ငံလုံးပေါ့နော် လိုလားနေတဲ့ အချိန်မှာ ဆရာမတွေအနေနဲ့က ကျောင်းသားတွေ လုံလုံခြုံခြုံနဲ့ ကောင်းကောင်းမွန်မွန် အရည်အသွေးရှိတဲ့ ပညာသင်ကြားနိုင်ရေးဘက်မှာ ဦးစားပေးပြီးတော့ အာရုံစိုက်ထားသင့်တယ်လို့ အန်တီကတော့ မြင်ပါတယ်” ဟု ပြောသည်။

ဆရာ၊ ဆရာမများသည် ကျောင်းသူ၊ ကျောင်းသားများ၏ စံပြပုဂ္ဂိုလ်များဖြစ်သည့်အတွက် ကျောင်းစာသင်ခန်း အတွင်း ကျောင်းဝတ်စုံဖြင့် ကခုန်ပြီး Tik Tok ဆော့ခြင်းသည် ကျောင်းသူ၊ ကျောင်းသားများကို အထင်မြင် လွဲစေနိုင်သည့်အပြင် တခြားသော ဆရာမများ၏ ပုံရိပ်ကိုလည်း ထိခိုက်စေနိုင်ကြောင်း၊ ကျောင်းသားမိဘများ၏ ဆရာ၊ ဆရာမတွေအပေါ် ထားရှိသည့် ယုံကြည်ချက်များလည်း လျော့ကျသွားစေနိုင်ကြောင်း ကျောင်းဆရာ၊ ဆရာမများက သုံးသပ်ကြသည်။

ဆရာ၊ ဆရာမများအနေဖြင့် သင်ရိုးနှင့်သက်ဆိုင်သည့် လုပ်ဆောင်မှုများကို ကျောင်းသူ၊ ကျောင်းသားများနှင့်အတူ ပူးပေါင်းလုပ်ဆောင်သင့်ကြောင်း ယခု Tik Tok ဆော့သည့်လုပ်ရပ်ကို လက်မခံနိုင်ကြောင်း ကျောင်းဆရာမတစ်ဦး ဖြစ်သူ ဒေါ်မြင့်မြင့်မွန်(အမည်လွှဲ)က CNI သို့ ပြောသည်။

“Tik Tok ဆော့တယ်ဆိုတာ ကိုယ့်အိမ်မှာကိုယ် အိမ်မှာ အချိန်အများကြီးရတယ်။ ကိုယ့်အိမ်မှာ ကိုယ် လုပ်ချင်တာလုပ်။ ယူနီဖောင်းနဲ့ စာသင်ခန်းထဲမှာ လုပ်တာကိုတော့ ဆရာမတို့က ကန့်ကွက်တယ်။ ဘာဖြစ်လို့လဲ ဆိုတော့ ဆရာမဆိုတာက ကလေးတွေရဲ့ ဦးဆောင်လမ်းပြ လုပ်ကြရတာလေ။ အတန်းထဲမှာ စာသင်နေတယ်။ ကလေးတွေနဲ့ သင်ယူမှုမှာ ပူးပေါင်းလုပ်တယ်ဆိုရင်တော့ ဆရာမတို့က လက်ခံတယ်။ ဘာလို့လဲဆိုတော့ အခုသင်ရိုးက ကလေးတွေနဲ့အတူတူ ပူးပေါင်းလုပ်တာ အားကစားလုပ်တာတို့၊ ဒီပြင်ဟာတွေလုပ်တာဆိုရင် ဆရာမတို့က လက်ခံတယ်။ အခု Tik Tok လုပ်နေတာကြီးကို ဆရာမတို့က မကြိုက်ဘူး” ဟု ၎င်းက ပြောသည်။

လက်ရှိ လူမှုကွန်ယက် စာမျက်နှာပေါ်တွင် တွေ့ရှိနေရသည့် Tik Tok ဆော့ထားသည့် ဆရာမ ဗီဒီယိုဖိုင်များတွင် အသက်ငယ်ရွယ်သည့် ဆရာမများကိုသာ အများဆုံးတွေ့နေရကြောင်း သူက ပြောသည်။

ယင်းသို့ ကျောင်းဝတ်စုံပြည့်ဖြင့် စာသင်ခန်းအတွင်း Tik Tok ဆော့နေသည့် ဆရာမများသည် ဆရာမအစစ်များ ဖြစ်နေခြင်းကြောင့် ယင်းအပေါ် ပညာရေးဝန်ကြီးဌာနအနေဖြင့်လည်း တားမြစ်သင့်ကြောင်း ဆရာမ ဒေါ်မြင့်မြင့်မွန်(အမည်လွှဲ)က ဆက်ပြောသည်။

“ကိုယ့်ရဲ့ ပညာရေးဌာနကနေပြီးတော့ ပြောရမယ်လေ။ ဒီလိုမျိုး ကိုယ့်ရဲ့ ယူနီဖောင်းဝတ်ပြီး Tik Tok ဆော့ တင်တာမျိုးတော့ မလုပ်သင့်ဘူးလို့ ထင်တာပဲ ဆရာမတော့။ တကယ်လို့ ကိုယ့်ကျောင်းကနေပြီးတော့ ဆရာမ တို့ဆို ကျောင်းအုပ်ကြီးကို ပြောပြရမယ်။

ကျောင်းအုပ်ကနေပြီးတဆင့် အထက်အထက် လူကြီးတွေက တားမြစ် ဖို့တော့ ကောင်းတာပေါ့။ ဒီလိုမျိုးကြီး လုပ်နေတာကိုတော့ မကြိုက်ဘူးလေ” ဟု CNI သတင်းဌာနသို့ ပြောသည်။

CNI News

၂၀၂၂ ခုနှစ်၊ ဇွန်လ ၁၆

ရခိုင်ပြည်နယ်ရှိ ကျောင်းသား၊ ကျောင်းသူများအနေဖြင့် ပညာသင်ကြားရေးတွင် ကျောင်းသုံးစာရေး ကိရိယာများ လုံလောက်စွာ မရရှိခြင်း၊ ဆရာ၊ ဆရာမ လုံလောက်မှုမရှိခြင်း၊ ကျောင်းဆောင်များ ယိုယွင်း ပျက်ဆီးခြင်း၊ သွားလာရ ခက်ခဲခြင်း စသည့် အခက်အခဲများ ကြုံတွေ့နေရကြောင်း ရခိုင်ပြည်နယ် ဒေသခံများထံမှ သိရသည်။

ရခိုင်ပြည်နယ်အတွင်း တိုက်ပွဲဖြစ်ပွားသည့် ဒေသများတွင် အခြေခံပညာရေး‌ကျောင်းဆောင်များ ယိုယွင်း ပျက်စီးမှုနှင့် တခြားသော လိုအပ်ချက်များ ဖြစ်ပေါ်နေသည့်အပြင် တစ်ပြည်နယ်လုံးရှိ အခြေခံပညာရေး ကျောင်းများတွင်ပါ ဖြစ်ပေါ်နေသည်ဟု ရခိုင်အမျိုးသားကွန်ရက်မှ ဥက္ကဋ္ဌ ဦးတင်ထူးအောင်က CNI သတင်းဌာနသို့ ပြောသည်။

“ရခိုင်တစ်ပြည်နယ်လုံးမှာတော့ စစ်ဖြစ်တဲ့ဒေသမှာတော့ ပိုပြီးတော့ အထိနာတာပေါ့။ ဒါကတော့ ဘယ်လိုမှ ငြင်းချက်ထုတ်လို့ မရတဲ့အချက်ပါပဲ။ ဒါပေမယ့် ရခိုင်တစ်ပြည်နယ်လုံးမှာရှိတဲ့ မူလတန်း ကျောင်းနဲ့ မူလွန်ကျောင်းတွေ အများကြီးပါ ပျက်စီးနေမှုတွေ၊ ကျောင်းသုံးစာအုပ်တွေ၊ စာရေးကိရိယာ မလုံလောက်မှုတွေ၊ ဆရာ၊ ဆရာမတွေ မရှိဘူး၊ လုံလောက်မှု မရှိဘူး။ ဒါက ကျနော်တို့ ရခိုင်ပြည်နယ် တစ်ခုလုံးမှာ ကြုံတွေ့နေရတဲ့ အခက်အခဲတွေပေါ့နော် ပညာရေးနဲ့ပတ်သက်လာရင်၊ အခြေခံပညာရေးနဲ့ ပတ်သက်လာရင်” ဟု ပြောသည်။

မြောက်ဦးမြို့နယ်ရှိ တိမ်ညိုတိုက်ပွဲရှောင်စခန်းတွင် စခန်းအတွင်း ယာယီကျောင်းဆောင် တည်ဆောက် ၍ သူငယ်တန်းမှ စတုတ္ထတန်းထိ စာသင်ကြားမှု ပြုလုပ်နေသော်လည်း အစိုးရမှ ဆရာ၊ ဆရာမ ၄ ဦးသာ ပေးထားသည့်အတွက် လုံလောက်မှုမရှိကြောင်း တိမ်ညိုတိုက်ပွဲရှောင်စခန်းမှ သတင်းနှင့် ပြန်ကြားရေး တာဝန်ခံ ဦးစိုးနိုင်က CNI သတင်းဌာနသို့ ပြောသည်။

“ပုံမှန် ကျနော်တို့ တက်နေတယ်။ ဒါပေမယ့် ဆရာ၊ ဆရာမအပိုင်းပဲ နည်းနည်း အခုလာကြည့်တော့ ကျနော်တို့ဆီမှာ အတန်း ၅ တန်းရှိတယ်၊ ဆရာ ၄ ယောက်ပဲ ရောက်တယ်။ အဲတော့ တစ်ယောက် ကတော့ ဘာပဲဖြစ်ဖြစ် လိုအပ်ချက်ရှိနေတယ်။ ပြီးရင် စာရေးခုံတို့၊ စာအုပ်စာတမ်းတွေပေါ့၊ အဲဒါတွေ တော့ လိုအပ်ချက်တွေ ရှိတယ်။ အဲတော့ ကျနော်တို့က အစိုးရဖြစ်ဖြစ်၊ NGO ဖြစ်ဖြစ် ကျနော်တို့ တင်ပြပေးမယ် အဲလိုတော့ ကျနော်ပြောထားတာ ရှိတယ်” ဟု ပြောသည်။

ကုန်ပြင်ကျေးရွာမှ တိုက်ပွဲရှောင် အမျိုးသမီးနှင့် ကလေးငယ်များကို တွေ့ရစဉ်(ဓါတ်ပုံ-CNI)

တိမ်ညိုတိုက်ပွဲရှောင်အတွင်းရှိ ယာယီကျောင်းဆောင်တွင် ကျောင်းသား၊ ကျောင်းသူ ဦးရေ ၁၅၀ ကျော် ရှိပြီး အစိုးရမှ ချပေးထားသည့် ဆရာ၊ ဆရာမ ၄ ဦးနှင့် ပရဟိတအနေဖြင့် ဝင်ရောက်သင်ကြားပေးနေ သည့် ဆရာမတစ်ဦးရှိပြီး စာရေးခုံ အလုံး ၄၀ ကျော် လိုအပ်ချက်ရှိနေကြောင်း သိရသည်။

ဒါ့အပြင် မြောက်ဦးမြို့နယ်တွင် တိုက်ပွဲရှောင်စခန်း ၁၀ ခုနီးပါးရှိပြီး တိုက်ပွဲရှောင်စခန်းအတွင်း ယာယီ ကျောင်းဆောင်ရှိသည်မှာ တိမ်ညိုတိုက်ပွဲရှောင်စခန်းတစ်ခုသာ ရှိကြောင်း၊ ကျန်တိုက်ပွဲရှောင်စခန်းမှ ကျောင်းသား၊ ကျောင်းသူများအနေဖြင့် နီးစပ်ရာကျောင်းများတွင် သွားရောက်သင်ကြားနေရခြင်း ကြောင့် အခက်အခဲရှိနေသည်ဟု သိရသည်။

ရခိုင်ပြည်နယ်တွင် ကျောင်းဆောင်များ မိုးယိုနေခြင်း၊ စာရေးကိရိယာများ လုံလောက်မှု မရှိခြင်း၊ ဆရာ၊ ဆရာမ လုံလောက်မှု မရှိခြင်းနှင့် လမ်းပန်းဆက်သွယ်ရေး အခက်အခဲ ရှိနေခြင်းများသည် ကျောက်ဖြူ၊ မြောက်ဦး၊ မင်းပြား၊ အမ်း၊ မောင်တော စသည့် မြို့နယ်များတွင် ပိုမိုဖြစ်ပေါ်နေကြောင်း ဒေသခံများ၏ ပြောဆိုချက်အရ သိရသည်။

ယခုလို အခြေခံပညာသင်ကြားရေးတွင် ကြုံတွေ့နေရသည့် အခက်အခဲများကို လက်ရှိ တာဝန်ယူထားသည့် ရခိုင်ပြည်နယ်အစိုးရအနေဖြင့် ဖြေရှင်းပေးရန် လိုအပ်ကြောင်းနှင့် ပြုပြင်ပြောင်းလဲသင့်ကြောင်း ရခိုင် အမျိုးသား ကွန်ရက် ဥက္ကဋ္ဌ ဦးတင်ထူးအောင်က ပြောသည်။

“ပညာ‌ရေးစနစ်နဲ့ ပတ်သက်ပြီးတော့ အခြေခံအဆောက်အအုံတွေဖြစ်တဲ့ ကျောင်းတို့၊ စာရေးကိရိယာတို့၊ နောက်ပြီးတော့ ကျောင်းကိုသွားတဲ့ လမ်းပန်းဆက်သွယ်ရေးတို့၊ နောက်ပြီးတော့ မြစ်ချောင်းကူးရတဲ့ နေ ရာဆို အသက်အန္တရာယ်ရှိတော့ အသက်အန္တရာယ်ကို အာမခံချက်ကအစပေါ့ လမ်းပန်းခရီးနဲ့ ပတ်သက် ပြီး ကလေးတွေ ဘဝလုံခြုံရေးအတွက်ပေါ့။ ဒါတွေနဲ့ ပတ်သက်ပြီး စီမံဆောင်ရွက်ထားတာ မရှိဘူး။ အဲတော့ ကလေးတွေ ပညာရေးအတွက်ပေါ့နော် အခက်အခဲ အများကြီး ရှိနေတယ်။ စိန်ခေါ်မှုတွေ အများကြီး ရှိနေတယ်။ အဲဒီ အခက်အခဲနဲ့ စိန်ခေါ်မှုတွေကို အများကြီး ကျော်လွှားဖြတ်သန်းနိုင်ဖို့အတွက် လက်ရှိ တာဝန်ရှိသူတွေမှာ တာဝန်ရှိတယ်လို့ ကျနော့်အနေနဲ့ အဓိက ပြောချင်တယ်။ ဒါတွေကို ပြုပြင် တည်ဆောက်နိုင်ရင်တော့ လက်ရှိအခြေအနေမှာ ပုံမှန်အတိုင်းအတာ တစ်ရပ်အထိ ငြိမ်းချမ်းမယ်။ ဒါပေမယ့် စစ်မက်ဖြစ်ပွားတဲ့ အခြေအနေ မရှိဘူးဆိုရင်တော့ စကစရဲ့ လုပ်ဆောင်ချက်နဲ့လုပ်ဆောင်မှုတွေပေါ်မှာ မူတည်တယ်လို့ ပြောချင်တယ်။ အဲဒါကြောင့် ပညာရေးစနစ်နဲ့ ပတ်သက်ပြီးတော့ ရခိုင်မှာ အခုချိန်မှာ တည်ဆောက်လို့ရရင်တော့ လက်ရှိ တာဝန်ရှိသူတွေအနေနဲ့ အမြန်ဆုံးတည်ဆောက် ပြုပြင်ပြောင်းလဲသင့်တယ်လို့ မြင်တယ်” ဟု CNI သို့ ပြောသည်။

ရခိုင်ပြည်နယ်တွင် ယခုနှစ် စာသင်နှစ်အတွင်း အခြေခံပညာစာသင်ကျောင်းပေါင်း ၃ ထောင်ကျော်၊ ဘုန်းတော်ကြီးသင်ပညာရေးကျောင်း ၈ဝ နှင့် ကိုယ်ပိုင်အထက်တန်းကျောင်း ၅ဝ ကို ဇွန်လ ၂ ရက်မှ စတင်ကာ ဖွင့်လှစ်သင်ကြားပေးနေခြင်းဖြစ်သည်။

CNI News

၂၀၂၂ ခုနှစ်၊ ဇွန်လ ၉

မြန်မာ့နိုင်ငံရေး အကျပ်အတည်းဖြစ်ကာ လက်နက်ကိုင်ပဋိပက္ခများ ကြီးထွားလာသည့် ကာလအတွင်း ပညာရေးဝန်ထမ်း ဆရာ/ဆရာမများ တိုက်ခိုက်ခံရခြင်းကြောင့် ဆရာ/ဆရာမ ၄၀ ဦးသေဆုံးပြီး ၁၁ ဦးပျောက်ဆုံးနေကာ ၁၄ ဦး ဒဏ်ရာရရှိ ကြောင်း နစက-က ယနေ့ (ဇွန်လ ၉ ရက်) ထုတ်ပြန်ခဲ့သည်။

အဆိုပါ သေဆုံး၊ ဒဏ်ရာရ၊ ပျောက်ဆုံး စာရင်းသည် ၂၀၂၁ ခုနှစ်၊ ဖေဖော်ဝါရီ ၁ ရက်မှ ၂၀၂၂ ခုနှစ်၊ မေလ ၂၇ ရက် အတွင်း ဖြစ်သည်။

စစ်ကိုင်းတိုင်းဒေသကြီးတွင် ဆရာ/ဆရာမ ၁၈ ဦး အသတ်ခံရပြီး ၄ ဦး ဒဏ်ရာရကာ ၁၁ ဦး ပျောက်ဆုံးနေကြောင်း၊ ပဲခူးတိုင်းဒေသကြီးတွင် ဆရာ/ဆရာမ ၁ ဦး အသတ်ခံရပြီး ၄ ဦး ဒဏ်ရာရကြောင်း၊ မကွေးတိုင်းဒေသကြီးတွင် ဆရာ/ဆရာမ ၁၁ ဦး အသတ်ခံရပြီး ၄ ဦး ဒဏ်ရာရကြောင်း၊ မန္တလေးတိုင်းဒေသကြီးတွင် ဆရာ/ဆရာမ ၇ ဦး အသတ်ခံရ ကြောင်း၊ ရန်ကုန်တိုင်းဒေသကြီးတွင် ဆရာ/ဆရာမ ၂ ဦး အသတ်ခံရပြီး ၂ ဦးဒဏ်ရာရကြောင်း၊ မွန်ပြည်နယ်တွင် ဆရာ/ဆရာမ ၁ ဦး အသတ်ခံရကြောင်း နစက-က ထုတ်ပြန်ခဲ့သည်။

ထို့နောက် နေပြည်တော်ကောင်စီနယ်မြေ၊ တနင်္သာရီတိုင်းဒေသကြီး၊ ဧရာဝတီတိုင်းဒေသကြီး၊ ကချင်ပြည်နယ်၊ ကယား ပြည်နယ်၊ ကရင်ပြည်နယ်၊ ချင်းပြည်နယ်၊ ရခိုင်ပြည်နယ်၊ ရှမ်းပြည်နယ် စသည့် ဒေသများတွင် ဆရာ/ဆရာမများ တိုက်ခိုက်ခံရခြင်း မရှိကြောင်း သိရသည်။

လက်ရှိ မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှ စတင်ကာ မြန်မာနိုင်ငံတဝှမ်း လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်လာနေသလို ပညာရေးဝန်ထမ်းများလည်း တိုက်ခိုက်မှုများ ခံနေကြရသည်။