CNI News
၂၀၂၄ ခုနှစ်၊ မေလ ၁၄
ထိုင်းအလုပ်သမားဝန်ကြီးဌာနအနေဖြင့် တိုးတက်ပြောင်းလဲလာသည့် စီးပွားရေးပတ်ဝန်းကျင်အား တုံ့ပြန်သော အားဖြင့် အလုပ်သမားများအား အကာအကွယ်ပေးရေး ဥပဒေကြမ်းကို အဆိုတင်သွင်းရန် စီစဉ်နေကြောင်း ထိုင်းသတင်းများတွင် ဖော်ပြထားသည်။
ထိုင်းရှိ ရွှေ့ပြောင်းလုပ်သားများအတွက် အခြေခံလူမှုဖူလုံရေးခံစားခွင့်များ ခိုင်မာသည့် ဥပဒေနှင့် အကာအကွယ် ပြုမှု၊ ပံ့ပိုးမှုများက ပို၍အကျိုးရှိကြောင်း၊ သို့သော်လက်ရှိတွင် လုပ်ခလစာ တိုးမြှင့်ပေးရေးကိုသာ အဓိက လုပ်ဆောင်နေသည်ကို တွေ့ရကြောင်း ပညာရေးနှင့်ဖွံ့ဖြိုးတိုးတက်ရေးဖောင်ဒေးရှင်း(FED) မှ အလုပ်သမား တာဝန်ခံ ဦးမင်းဦးက CNI သတင်းဌာနသို့ ပြောသည်။
“လစာတိုးရေး၊ မတိုးရေးကိစ္စ၊ နောက်လူမှုဖူလုံရေးအကျိုးခံစားခွင့်ကိစ္စ။ လူမှုဖူလုံရေးအကျိုးခံစားခွင့်နဲ့ ပတ်သက် တဲ့ဟာက အထူးသဖြင့် သူက ကျန်ခဲ့တဲ့လကဆို အိမ်ဖော်လုပ်သားတွေနဲ့ ပတ်သက်ပြီး အလုပ်ရှင်တွေကို ထပ်မံ သတိပေးတဲ့ဟာမျိုး ထုတ်ပြန်လိုက်တာ။ အဓိကကတော့ အလုပ်ချိန်က ၈ နာရီထက်ကျော်ပြီး မခိုင်းဖို့၊ ကိုယ်ဝန် ဆောင်အလုပ်သမားတွေကို ခိုင်းတယ်ဆိုရင် အချိန်ညဉ့်နက်မခိုင်းဖို့တို့၊ အကျိုးခံစားခွင့်ဆိုင်ရာမှာဆိုရင် မီးဖွားခွင့် တွေပါ ပေးဖို့၊ ခွင့်ရော လစာရောကိစ္စတွေပေါ့။ အဲဒါမျိုးတွေကို အဓိက လုပ်တာတွေ့ရတယ်။ လက်ရှိမှာတော့ ဒီဟာနဲ့ပတ်သက်ပြီး ပြင်ဆင်တဲ့ဟာက တွေ့ရသလောက် လစာတိုးပေးဖို့ ကိစ္စတစ်ခုကို လုပ်နေတာ ရှိတယ်။ အောက်တိုဘာလမှာ ဒီဥစ္စာကို အတည်ပြုပေးရမှာပေါ့။ အဲဒါကို ပေးသင့်၊ မပေးသင့် မဲ သုတေသန လုပ်တယ်ပေါ့။ ရာခိုင်နှုန်း ၄၀ ကျော်က ၄၀၀ ဘတ်ကို တစ်နိုင်ငံလုံး ပေးဖို့ သဘောတူတယ်လို့ သိရတယ်။ နောက်တစ်ခုက ကျန်တဲ့ရာခိုင်နှုန်းတွေကကြတော့ ကျွမ်းကျင်မှုအလိုက်ပေးဖို့တို့၊ ၁၆၊ ၁၇ ရာခိုင်နှုန်းလောက် ကကြတော့ သဘောသိပ်မတူဘူးပေါ့” ဟု ၎င်းက ပြောသည်။
အထည်ချုပ်စက်ရုံလုပ်ငန်းခွင်တစ်ခု
ထိုင်းတစ်နိုင်ငံလုံး၏ တစ်ရက်အခြေခံအနိမ့်ဆုံးလုပ်ခလစာအား ဘတ် ၄၀၀ အဖြစ်တိုးမြှင့်ရေး ထိုင်းအစိုးရအဖွဲ့မှ လုပ်ဆောင်နေခြင်းဖြစ်သော်လည်း အချို့သော လုပ်ငန်းရှင်များမှာ သဘောမတူကြောင်း၊ ပြန်လည်စဉ်းစားသင့် ကြောင်း ဝေဖန်ပြောဆိုမှုများရှိနေသည်။
သို့သော် သုတေသနပြုချက်အရ သဘောတူသည့် ရာခိုင်နှုန်းမှာ များပြားနေသဖြင့် တစ်နိုင်ငံလုံး၏ အနိမ့်ဆုံး လုပ်ခလစာအား ဘတ် ၄၀၀ အဖြစ် သေချာပေါက် တိုးမြှင့်နိုင်ဖွယ်ရှိကြောင်းလည်း ပညာရေးနှင့် ဖွံ့ဖြိုး တိုးတက်ရေးဖောင်ဒေးရှင်း(FED) မှ အလုပ်သမားတာဝန်ခံ ဦးမင်းဦးက သုံးသပ်သည်။
ထိုင်းအလုပ်သမားဝန်ကြီးဌာနမှ အဆိုတင်သွင်းရန် စီစဉ်နေသည့် ဥပဒေမူကြမ်းတွင် အလုပ်သမားများ၏ တိကျရှင်းလင်းသော အဓိပ္ပါယ်ဖွင့်ဆိုချက်၊ ကျွမ်းကျင်မှု ဖွံ့ဖြိုးတိုးတက်ရေးနှင့် အသိအမှတ်ပြုခြင်း မြှင့်တင်ရေး အပြင် အကာအကွယ်ပေးရေး ရန်ပုံငွေများ ထူထောင်ပေးမည် ဖြစ်ကြောင်း ဝန်ကြီးက ပြောဆိုထားသည်။
ဆောက်လုပ်ရေးလုပ်ငန်းခွင်တစ်ခုမှ ပြန်လာသော ရွှေ့ပြောင်းလုပ်သားများ
ထိုင်းအလုပ်သမားဝန်ကြီးဌာန၏ ဥပဒေမူကြမ်းတွင် ရွှေ့ပြောင်းလုပ်သားများအပေါ် အလုပ်အကိုင် ကန့်သတ် ထားမှုအား ဖြေလျှော့ပေးမည့် အချက်ပါရန် မျှော်လင့်ကြောင်း Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။
“အဓိကကတော့ သူတို့သတ်မှတ်ထားတဲ့ ဥပဒေတွေကို ပြန်လည်သုံးသပ်တယ်။ သုံးသပ်ပြီးတော့ ဒီဥပဒေတွေကို ပြုပြင်တဲ့အခါမှာကြရင် ကော်မတီတစ်ရပ်ဖွဲ့တယ်။ ကော်မတီတစ်ရပ်ဖွဲ့ပြီးတော့ ဒေသအလိုက် စာရင်းကောက် တာတွေရှိတယ်။ စာရင်းကောက်တဲ့အခါကြရင် ဒေသမှာရှိတဲ့ အစိုးရမဟုတ်တဲ့အစုအဖွဲ့တွေနဲ့ ပူးပေါင်း လုပ်ဆောင်တာတွေ ရှိတယ်။ ပူးပေါင်းလုပ်ဆောင်ပြီးတော့ သူတို့တင်ပြလာတဲ့အချက်ပေါ်မှာ အခြေခံပြီးမှ ဒီဥပဒေက ပြင်သင့်မပြင်သင့်ဆိုတာ ပြန်လည်အကြောင်းကြားမယ့်ပုံစံမျိုးဖြစ်တယ်ပေါ့။ ဒါပေမယ့် ဘယ်လိုပုံစံမျိုး ဖြစ်လာမလဲဆိုတာတော့ မသိဘူးပေါ့။ အဓိကကတော့ ဒီဥပဒေကို ပြင်တဲ့အခါမှာကြတော့ ကျနော်တို့အနေနဲ့ လည်း ပူးပေါင်းလုပ်ဆောင်မှုတွေရှိတယ်။ အဓိက ကျနော်တို့ တောင်းဆိုခဲ့တဲ့ဟာတွေဆိုရင် ရွှေ့ပြောင်း အလုပ်သမားတွေဆိုရင် အလုပ်လုပ်လို့မရတဲ့ အမျိုးအစားတွေ ရှိတာပေါ့။ ဆံပင်ညှပ်ဆိုင်ဖွင့်လို့ မရတဲ့ဟာတွေ၊ ဈေးရောင်းလို့မရတဲ့ ကိစ္စတွေ အဲဒီမှာ တချို့အရာတွေကို ခွင့်ပြုပေးဖို့အတွက် တောင်းဆိုထားတာတွေ ရှိတယ်” ဟု ၎င်းက ပြောသည်။
အလုပ်သမားများအတွက် အခွင့်အလမ်းသစ်များရှာဖွေရန် လုပ်ငန်းအဖွဲ့တစ်ဖွဲ့ကို ဖွဲ့စည်းခဲ့ကြောင်း၊ လယ်သမားများ၊ လမ်းဘေးဈေးသည်များ၊ ကန်ထရိုက်ခွဲလုပ်သားများ၊ တက္ကစီယာဉ်မောင်းများနှင့် ပို့ဆောင်ရေး ဝန်ဆောင်မှုပေးသူများအပါအဝင် လူသန်းပေါင်း ၂၀ ခန့်သည် တရားမ၀င်အလုပ်သမားများအဖြစ် လုပ်ကိုင်နေ ကြကြောင်းလည်း ၎င်း၏ ပြောဆိုမှုအား ကိုးကားပြီး ထိုင်းသတင်းများတွင် ဖော်ပြထားသည်။
