ရေးသားသူ/ဆောင်းပါးရှင်- Boonwara Sumano

CNI News

၂၀၂၁ ခုနှစ်၊ဇူလိုင် ၃၀

ယခုဖြစ်ပွားနေဆဲ ကူးစက်ရောဂါသည် မူလကပင် ချို့တဲ့အားနည်းနေသော လူဦးရေကို အဆိုးဝါးဆုံး ထိခိုက်စေခဲ့သည်။ ထိုင်းနိုင်ငံရှိ လူ့အဖွဲ့အစည်းအတွင်း ပြည်ပမှရောက်ရှိလာသော ရွှေ့ပြောင်းလုပ်သား အုပ်စုသည် အထိခိုက်လွယ်ဆုံး အုပ်စု တစ်စုဖြစ်သော်လည်း ၎င်းတို့မိသားစု အပါအဝင် ရွှေ့ပြောင်းလုပ်သားများအရေးကို ထိုင်းအစိုးရက သိပ်ဂရုမစိုက်ပေ။

ထိုင်းစီးပွားရေးကို ၎င်းရွှေ့ပြောင်းလုပ်သားများက တစ်လျှောက်လုံး အထောက်အကူ ပေးခဲ့သော်လည်း ယခု ကိုဗစ် -၁၉ ကာလအတွင်း ရွှေ့ပြောင်းလုပ်သားများကို ထိုင်းအစိုးရအနေဖြင့် ထောက်ပံ့ရန် ရှင်းလင်းတိကျသော မူဝါဒနှင့်အကူအညီမှာ အနည်းသာရှိသည်။ ယင်းအကျပ်အတည်းကို ကျွန်ုပ်တို့ အလေးအနက်ထားလိုသည်ဆိုလျှင် ပြောင်းလဲသင့်သည့် အကြောင်း ချင်းရာ တချို့ကို သည်နေရာမှာ ချပြလိုပါသည်။

ယခုဆောင်းပါးတွင် ကိုဗစ်-၁၉ မပြီးဆုံးမီအထိ ရွှေ့ပြောင်းလုပ်သားများအပေါ် စီမံခန့်ခွဲမှု၌ အောက်ပါ အပြောင်းအလဲ ၃ ခု ချပြမည်ဖြစ်ပါသည်။

ပထမဦးစွာ ထိုင်းအစိုးရအနေဖြင့် ရွှေ့ပြောင်းလုပ်သားများအကြား ကိုဗစ်-၁၉ ဆေးစစ်မှုကို အင်တိုက်အားတိုက် ပြန် လည်စတင်ရန် လိုသည်။ ပြည်ပမှလာသည့် အလုပ်သမားများ အုပ်ချုပ်ရေးရုံး၏အဆိုအရ ၂၀၂၁ ခုနှစ်၊ ဇွန်လအထိ ထိုင်းနိုင်ငံတွင် ရွှေ့ပြောင်းလုပ်သား ၂,၁၆၂,၈၆၃ ဦးရှိသည်။ ၂၀၂၁ ခုနှစ်၊ မေလအကုန်ပိုင်းတွင်း ရွှေ့ပြောင်းလုပ်သား ၃၃၉,၃၃၁ ဦးသာ ကိုဗစ်-၁၉ ဆေးစစ်ခံခဲ့ရပြီး ယင်းအရေအတွက်မှာ ထိုင်းနိုင်ငံရောက် ရွှေ့ပြောင်းလုပ်သား စုစုပေါင်း၏ ၁၅ ရာခိုင်နှုန်းသာ ရှိကြောင်း တွေ့ရသည်။

ဆောက်လုပ်ရေးလုပ်ငန်းကဲ့သို့ ရွှေ့ပြောင်းလုပ်သား အသိုင်းအဝိုင်း အများအပြားတွင် ယခင်နှင့်ယခု ဖြစ်ပွားမှုနှုန်းကို သုံးသပ်ကြည့်ခြင်းအားဖြင့် ကိုဗစ်-၁၉ ဆေးစစ်ပေးမှု အရေအတွက်မှာ ၎င်းတို့ကြား ပိုတိုးလာမည်ဟု မျှော်လင့်ရပါသည်။

နောက်ထပ် အကြံပြုလိုသည်မှာ ကိုဗစ် ဆေးစစ်ရာတွင် အားနည်းချက်များ ရှိနေခြင်းဖြစ်သည်။ ထိုင်းနိုင်ငံရောက် ရွှေ့ပြောင်းလုပ်သား အများစုသည် လက်လုပ်လက်စား သဘောသဘာဝရှိ၍ Work from home လုပ်နိုင်သည့် အလေ့ အကျင့်မျိုး ပြုပြင်ရန်ဖြစ်သည်။

ဆိုလိုသည်မှာ ရွှေ့ပြောင်းလုပ်သားများက အခြားသူများနှင့် ထိတွေ့ဆက်ဆံရလေလေ ရောဂါကူးစက်နှုန်း မြင့်လာ လေလေပင် ဖြစ်သည်။ ထို့အတွက် ၎င်းတို့ကို အိမ်မှထိုင်၍ စေခိုင်းခြင်း (Work from Home) အလေ့အကျင့်က အကောင်း ဆုံး ဖြစ်သည်။ ဇူလိုင် ၂၂ ရက်အထိ ရွှေ့ပြောင်းလုပ်သား ၇၂,၇၆၃ ဦးကို Covid positive လူနာများအဖြစ် ပိုးတွေ့ခဲ့ရသည်။ ထိုအရေအတွက်သည် စစ်တမ်းကောက်ယူမှု စုစုပေါင်း၏ ၄၃ ရာခိုင်နှုန်းမျှပင် ရှိနေသည်။

သို့သော် ထိုင်းအစိုးက ယခုဇူလိုင် ၅ ရက်က ယင်းသို့အင်တိုက်အားတိုက် ဆေးစစ်ပေးခြင်းကို ရပ်တန့်လိုက်ရာ ရွှေ့ပြောင်း လုပ်သားများအကြား ကူးစက်နှုန်း ပိုမြင့်လာမည်ဟု မှန်းဆရသည်။ အကယ်၍ အခမဲ့ ဆေးစစ် စမ်းသပ်မှုမရဘဲ ၎င်းတို့ လုပ်ငန်းခွင်ထဲတွင် ဆက်အလုပ်လုပ် နေဦးမည်ဆိုပါက ရောဂါကူးစက်မှု များပြားနေဦးမည်သာ ဖြစ်သည်။
ဒုတိယအကြံပြုလိုသည်မှာ ရွှေ့ပြောင်းလုပ်သားများကို ကာကွယ်ဆေး အခမဲ့ထိုးပေးရန်ဖြစ်သည်။ ထိုင်းကာကွယ်ဆေး ထိုးပေးရေးနှင့်ရောဂါထိန်းချုပ်မှုဌာန၏ အဆိုအရ ဇူလိုင် ၁၉ ရက်အထိ ကိုဗစ်-၁၉ ကာကွယ်ဆေးထိုးပြီးသူ နိုင်ငံခြားသား ဦးရေမှာ ၁၇၀,၀၀၇ ရှိကြောင်း သိရသည်။ ၎င်းပမာဏသည် ထိုင်းနိုင်ငံရောက် နိုင်ငံခြားသား စုစုပေါင်းဦးရေ၏ ၃ ဒသမ ၄၇ ရာခိုင်နှုန်းသာ ရှိသည်။ နိုင်ငံခြားသားများအနက် ၄၂ ရာခိုင်နှုန်းမှာ မြန်မာနိုင်ငံမှဖြစ်ပြီး တရုတ် ၁၉ ရာခိုင်နှုန်း၊ ကမ္ဘောဒီးယား ၇ ရာခိုင်နှုန်းနှင့် လာအို ၅ ဒသမ ၇ ရာခိုင်နှုန်း အသီးသီးဖြစ်ကြသည်။

အဆိုပါ ကိန်းဂဏန်းများသည် နိုင်ငံခြားသား၏ အလုပ်အကိုင် အခြေအနေကို မဖော်ပြသော်လည်း တချို့ ရွှေ့ပြောင်း လုပ်သား တချို့မှာ ကူးစက်တတ်သော ဗိုင်းရပ်စ်ကို ကာကွယ်သည့် ဆေးတစ်မျိုးမျိုး ထိုးနှံပြီး ဖြစ်သည်ဟု ယူဆ၍ရသည်။ သို့သော် ယင်းသို့ထိုးနှံပြီးသည့်နှုန်းမှာ အလွန်နိမ့်ကျသောကြောင့် ကျွန်ုပ်တို့ ထိုင်းစီးပွားရေး ပြန်လည်တည့်မတ်ရန် ရွှေ့ပြောင်း လုပ်သားများထံမှ အထောက်အကူရရန် အချိန်နှင့်တပြေးညီ ကိုယ်ခံအား ရရှိရေးအတွက် မဖြစ်နိုင်သေးပေ။

ထို့ကြောင့် ယင်းအခြေအနေ ပြောင်းလဲနိုင်ရန် ရွှေ့ပြောင်းလုပ်သားများကိုပါ ကာကွယ်ဆေးထိုးပေးမည့် အစီအစဉ် အမြန်ဆုံး စတင်ရပါမည်။ ထိုင်းကျန်းမာရေးဝန်ကြီးဌာနနှင့် ထိုင်းကြက်ခြေနီအသင်းတို့အကြား ပြည်သူ့ကျန်းမာရေး စေတနာ့ဝန်ထမ်း ဆိုင်ရာ နားလည်မှုစာချွန်လွှာ (MOU) ကို ပြီးခဲ့သည့် ဇွန်လ ၂၂ ရက်က လက်မှတ်ရေးထိုးခဲ့ပြီးဖြစ်သည်။

ယင်းနားလည်မှု စာချွန်လွှာတွင် စက်ရုံ၊ ဆောက်လုပ်ရေးနှင့် တခြားလုပ်ငန်းများတွင် ဝင်ရောက်လုပ်ကိုင်နေသော လုပ်သား များ ကျန်းမာရေးကိစ္စကိုလည်း ထည့်သွင်းထားသည်။ ပြည်သူ့ကျန်းမာရေး ဝန်ထမ်းများအပြင် စေတနာ့ဝန်ထမ်း (ပရဟတိ) များမှ တဆင့် ရွှေ့ပြောင်းလုပ်သားများကို ကာကွယ်ဆေး ထိုးပေးသည့် အလေ့အကျင့် ပြောင်းလဲပေးခြင်းသည် လွန်စွာ ကောင်းမွန်သော နည်းလမ်းတစ်ခုဖြစ်သည်။ အဆိုပါ စေတနာ့ဝန်ထမ်းများကို ပိုမိုစုဆောင်းပြီး ကာကွယ်ဆေး ထိုးပေးသည့် အစီအစဉ်ကို ခရိုင်ကျန်းမာရေးဌာနကဲ့သို့ ဒေသန္တရအဖွဲ့အစည်းများတွင် ခေါ်ယူ၍ လေ့ကျင့်သင်ကြားပေးနိုင်သည်။

တတိယအချက်အနေဖြင့် အကြံပြုလိုသည်မှာ ရွှေ့ပြောင်းလုပ်သားများကို အရေးပေါ် အကူအညီများ ပေးရေးဖြစ်သည်။ စီးပွားရေးလုပ်ငန်း အများအပြားကို ယာယီပိတ်ထားရန် အမိန့်ကြောင့် ထိခိုက်နစ်နာခဲ့ရသည့် ရွှေ့ပြောင်းလုပ်သားဒုနှင့်ဒေး ရှိနေသည့်အပြင် ၎င်းတို့အတွက် ရေနှင့်သန့်ရှင်းရေး ပစ္စည်းများ၊ ဆေးဝါး၊ အစာအာဟာရစသည့် အခြေခံလိုအပ်ချက်များ လက်လှမ်းမမီသေးဘဲ ရှိနေသည်။

ဤကပ်ရောဂါသည် ဖြစ်ပွားနေစဉ်အတွင်း ကျန်းမာရေး ထိန်းသိမ်းစောင့်ရှောက်ပေးရန် လွန်စွာအရေးကြီးလှပါသည်။ ဆေးရုံများတွင် ၎င်းတို့ စွမ်းဆောင်နိုင်ရည် အပြည့်အဝရှိ၍ နောက်ထပ်မည်သူ့ကိုမှ ထပ်မကူးစေရန် အစီအမံများရှိပြီး ဖြစ်သော်လည်း လက်ရှိအနေအထားတွင် မြို့ရွာရပ်ကွက်အတွင်းရှိ ရွှေ့ပြောင်းလုပ်သားများအပေါ် အရပ်ဘက် လူမှု အဖွဲ့အစည်းများက ပံ့ပိုးပေးနေလင့်ကစား ထိုင်းအစိုးရအနေဖြင့် ပံ့ပိုးမှု များများစားစား မတွေ့ရပေ။

ထိုင်းအစိုးရသည် ရွှေ့ပြောင်းလုပ်သားအရေးကို ကိုင်တွယ်ရာတွင် မည်သည့်နေရာတွင် နေထိုင်သည်၊ မည်သည့် အလုပ် အကိုင်လုပ်သည်၊ ဝင်ငွေမည်မျှ၊ မည်သည့်ကဏ္ဍ ထည့်သွင်းရမည် စသည့် သတင်းအချက်အလက်များကို ထည့်သွင်း စဉ်းစား နေသောကြောင့် လွန်စွာ စိတ်ရှုပ်ထွေးစရာ ဖြစ်နေရသည်။ ထိုအချက်အလက်များသည် ၎င်းတို့ ထိုင်းတွင် အလုပ်လုပ်ကိုင်ခွင့် (ပါမစ်)လျှောက်လွှာထဲ အပြည့်အစုံ ရေးပြီးသားဖြစ်၍ သက်တမ်းကို တစ်နှစ်တစ်ကြိမ် (သို့မဟုတ်) နှစ်နှစ်တစ်ကြိမ် တိုးနိုင် သည်။ ရွှေ့ပြောင်း လုပ်သားများကို အလွယ်တကူ ပံ့ပိုးနိုင်ရေးမှာ လတ်တလော အရေးကြီးနေသည်။

ရွှေ့ပြောင်းလုပ်သားများသည် ထိုင်းစီးပွားရေး တိုးတက်ရန် အမြဲတမ်းလိုလို အရေးကြီးပါသည်။ ထိုင်းနိုင်ငံတွင် အသက်ရှည် သူ များပြားလာပြီး အိုမင်းမစွမ်း ဦးရေတိုးလာရန် အသွင်ပြောင်းနေသည်ဖြစ်ရာ ရေရှည်တွင် ယခုဝင်ရောက် လုပ်ကိုင်နေ သော ရွှေ့ပြောင်းလုပ်သားများ၏ လုပ်အားအပေါ် ထိုင်းစီးပွားရေး တည်မှီနေလိမ့်ဦးမည်ဖြစ်သည်။
ထိုရွှေ့ပြောင်းလုပ်သား ကောင်းစွာ ဂရုတစိုက် ထားရှိခြင်းက ရောဂါထိန်းချုပ်ရေးနှင့် စီးပွားရေး ပြန်လည်နာလန်ထူနိုင်ဖို့ အရေးကြီးသည့် အစိတ်အပိုင်း အထောက်အကူ ပြုမည်ဖြစ်ပါကြောင်း။

(မူရင်းဆောင်းပါးရှင် Boonwara Sumano သည် Ph.D ဒေါက်တာဘွဲ့ရတစ်ဦးဖြစ်ပြီး ထိုင်းဖွံ့ဖြိုးမှုသုတေသနဌာနမှ အကြီးတန်းသုတေသီအဖြစ် လုပ်ကိုင်နေသည်။ ၎င်း၏အတွေးအမြင်ဆောင်းပါးကို ဘန်ကောက်ပို့စ်ဝက်ဘ်ဆိုက်တွင် ဖော်ပြထားရာ CNI က ဆီလျော်အောင် ဘာသာပြန်ဆို ဖော်ပြပါသည်)

Source: Bangkok Post
#ရွှေ့ပြောင်းလုပ်သား
#ရွှေ့ပြောင်းအလုပ်သမား
#ထိုင်း
#ထိုင်းစီးပွားရေး
#Thai
#Myanamr
#covid19
#နည်းဗျူဟာ
#PublicHealth
#WFH
#workfromhome
#CNImyanmar
#cninews
#ChannelNewsIndependent
https://www.bangkokpost.com/opinion/opinion/2155931/new-tactics-to-help-migrant-workers