CNI Sport Article
၂၀၂၃ ခုနှစ်၊ စက်တင်ဘာ ၂၉
ဥရောပဘောလုံးအဖွဲ့ချုပ်(UEFA) ဟာ ပြီးခဲ့တဲ့ရက်ပိုင်းက ရုရှား ယူ-၁၇ အသင်းတွေကို ဥရောပပြိုင်ပွဲတွေမှာ ဝင်ရောက်ယှဉ်ပြိုင်ဖို့ ခွင့်ပြုကြောင်း အတည်ပြု ကြေညာခဲ့လို့ အားလုံးက အံ့အားသင့်ခဲ့ကြပါတယ်။
UEFA ဟာ ယူကရိန်းကို ဝင်ရောက် ကျူးကျော်တိုက်ခိုက်ခဲ့တဲ့ ၂၀၂၂ ခုနှစ်၊ ဖေဖော်ဝါရီလက စတင်ပြီး ရုရှားနဲ့ ပတ်သက်တဲ့ ကလပ်အသင်း၊ နိုင်ငံအသင်းတွေကို သူတို့လက်အောက်မှာ ကျင်းပမယ့် ပြိုင်ပွဲတွေမှာ ဝင်ရောက် ယှဉ်ပြိုင်ခွင့် ဆိုင်းငံ့ခဲ့တာပါ။
ဒါပေမယ့် အရွယ်ရောက်ပြီးသား လူတွေရဲ့ လုပ်ရပ်ကြောင့် ကလေးတွေကို အပြစ်မပေးသင့်ဘူးဆိုပြီး ဥရောပ ယူ-၁၇ ပြိုင်ပွဲတွေမှာ ရုရှား ယူ-၁၇ အသင်းတွေကို ယှဉ်ပြိုင်ခွင့်ပေးဖို့ UEFA က ဆုံးဖြတ်ချက်ချခဲ့တာ ဖြစ်ပါတယ်။
ဥရောပဘောလုံးအဖွဲ့ချုပ်က ကလေးတွေရဲ့ အနာဂတ် တောက်ပဖို့အတွက် သူတို့ဘက်က ပြိုင်ပွဲ ပြန်လည် ယှဉ်ပြိုင်ခွင့် ပေးခဲ့တာလို့ ပြောခဲ့တာမှာ ယူကရိန်းနဲ့ ထိပ်တိုက်တွေ့ဆုံဖို့ ဖြစ်လာခဲ့တာပါ။
ယူကရိန်းအသင်း ပရိသတ်တွေက စစ်ပွဲရပ်ဖို့ တောင်းဆိုနေကြစဉ်
ယူကရိန်းဘောလုံးအဖွဲ့ချုပ်ကတော့ UEFA အနေနဲ့ သူတို့ရဲ့ ဆုံးဖြတ်ချက်ကို ပြန်လည် သုံးသပ်ဖို့နဲ့ ဒီလိုမှ မဟုတ် ရင် ရုရှားအသင်းတွေ ပါဝင်တဲ့ ပြိုင်ပွဲတွေမှာ သူတို့ဘက်က ပါဝင်သွားမှာ မဟုတ်ဘဲ သပိတ်မှောက်သွားမယ်လို့ ပြတ်ပြတ်သားသား ပြောခဲ့ပါတယ်။
ဒါ့အပြင် အခြားနိုင်ငံတွေကိုလည်း ရုရှားအသင်းတွေနဲ့ မကစားဖို့ တိုက်တွန်းမှုတွေ ပြုလုပ်သွားမယ်လို့ ပြောခဲ့ပြီး UEFA ရဲ့ ဆုံးဖြတ်ချက်တွေကို ယူကရိန်းဘောလုံးအဖွဲ့ချုပ်က ပြင်းပြင်းထန်ထန် ရှုတ်ချခဲ့တာ ဖြစ်ပါတယ်။
UEFA ဟာ ဒီဆုံးဖြတ်ချက် မချခင်က ရုရှားနဲ့ ပတ်သက်ပြီး ချန်ပီယံလိဂ်အိမ်ရှင်အဖြစ် ကျင်းပခွင့်နဲ့ ဥရောပ စူပါဖလား အိမ်ရှင်အဖြစ် ကျင်းပခွင့်တွေကို ရုပ်သိမ်းကာ ပြင်းထန်တဲ့ တုံ့ပြန်မှုတွေ ပြသခဲ့ပြီး ယူကရိန်းဘက်မှာ ရှိနေကြောင်း ပြသခဲ့တာပါ။
ဒါပေမယ့် ရုရှား ယူ-၁၇ အသင်းတွေကို ပြိုင်ပွဲပြန်လည် ယှဉ်ပြိုင်ခွင့် ပေးခဲ့တာမှာတော့ ယူကရိန်းနဲ့ UEFA ကြား သဘောထား တင်းမာမှုတွေ ဖြစ်လာနိုင်စရာရှိနေပြီး ထိပ်တိုက်တွေ့ဆုံမှုတွေတောင် ဖြစ်လာနိုင်ပါတယ်။
UEFA ကို တွေ့ရစဉ်
ယူကရိန်းဘောလုံးအဖွဲ့ချုပ်ဟာ အခြား ဥရောပ ဘောလုံးအဖွဲ့ချုပ်တွေ အားလုံးကို ရုရှားအသင်းနဲ့ မကစားဖို့ စာရေးသားပေးပို့ပြီး တောင်းဆိုမှု ပြုလုပ်ခဲ့တာ ဖြစ်ပါတယ်။
အဲ့ဒါကြောင့်လည်း အင်္ဂလန်ဘောလုံးအဖွဲ့ချုပ်နဲ့ ပိုလန်ဘောလုံးအဖွဲ့ချုပ်တွေကလည်း UEFA ရဲ့ဆုံးဖြတ်ချက်ကို ကန့်ကွက်ပြီး ယူကရိန်းနဲ့ တစ်သားတည်းရှိကြောင်း ပြသခဲ့တာပါ။
အင်္ဂလန်နဲ့ ပိုလန်ဘောလုံးအဖွဲ့ချုပ်တို့ဟာ ရုရှားအသင်းနဲ့ သူတို့ ကစားသွားမှာ မဟုတ်ဘူးလို့ ကြေညာချက် ထုတ်ပြန်ခဲ့တာ ဖြစ်ပါတယ်။
အင်္ဂလန်နဲ့ ပိုလန် ဘောလုံးအဖွဲ့ချုပ်တို့အပြင် နောက်ထပ် ဘောလုံးအဖွဲ့ချုပ်တွေကလည်း ရုရှားနဲ့ ပတ်သက်တဲ့ UEFA ရဲ့ ဆုံးဖြတ်ချက်ကို ကန့်ကွက်သွားဖို့ ရှိနေတာပါ။
ဒီလိုကန့်ကွက်တဲ့ နိုင်ငံတွေများလာရင် UEFA အနေနဲ့ သူတို့ရဲ့ ဆုံးဖြတ်ချက်ကို ပြန်ပြောင်းဖို့ သုံးသပ်မှုတွေ ရှိလာနိုင်တာ ဖြစ်ပါတယ်။
ယူကရိန်းစစ်ပွဲကို တွေ့ရစဉ်
ယူကရိန်းဟာ ရုရှားနိုင်ငံက အားကစားအသင်းအဖွဲ့တွေကို နိုင်ငံတကာ အားကစားပြိုင်ပွဲတွေကနေ ပိတ်ပင်ဖို့ အကြိမ်ကြိမ် တောင်းဆိုထားသလို ရုရှားနဲ့ ဘယ်လာရုစ်နိုင်ငံက အားကစားသမားတွေ ပါဝင်ရင် ၂၀၂၄ ပဲရစ် အိုလံပစ်ပြိုင်ပွဲကို သပိတ်မှောက်မယ်လို့ ခြိမ်းခြောက်မှုတွေ ပြုလုပ်ထားတာပါ။
လက်ရှိအချိန်မှာ တင်းနစ် အပါအဝင် အချို့ အားကစားနည်းတွေဟာ ရုရှားအားကစားသမားတွေကို နိုင်ငံ ကိုယ်စားပြု မဟုတ်ဘဲ ကြားနေအဖြစ် ပြိုင်ပွဲကို ပြန်လည်ယှဉ်ပြိုင်ခွင့် ပြုထားတာ ဖြစ်ပါတယ်။
ရုရှားနဲ့ ယူကရိန်း အားကစားသမားတွေ ပြိုင်ဘက်အဖြစ် တွေ့ဆုံခဲ့တဲ့ ဒီလို အားကစားနည်းတွေမှာ တစ်ဦးနဲ့ တစ်ဦး လက်ဆွဲနှုတ်ဆက်ခြင်း မရှိကြသလို ပြိုင်ဆိုင်မှုကလည်း ပြင်းထန်ခဲ့တာကို မြင်တွေ့ခဲ့ရတာပါ။
အခုအချိန်မှာတော့ UEFA အနေနဲ့ ယူကရိန်းရဲ့ ပြန်လည်သုံးသပ်မှုကို လက်ခံပြီး ရုရှား ယူ-၁၇ အသင်းတွေကို ပြိုင်ပွဲဝင်ခွင့် ပြန်ပိတ်ပင်မလား ယူကရိန်းကို ဆန့်ကျင်ပြီး သူတို့ရဲ့ ဆုံးဖြတ်ချက်အတိုင်း သွားမလားဆိုတာ စိတ်ဝင်စားဖို့ ကောင်းနေတာ ဖြစ်လို့ ဘာတွေဆက်ဖြစ်လာမလဲ ဆိုတာကိုတော့ ဆက်လက် စောင့်ကြည့်ရပါ တော့မယ်။
