CNI News
၂၀၂၅ ခုနှစ်၊ မတ်လ ၃၁
မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ လှုပ်ခတ်သွားသည် ငလျင်ဒဏ်ကြောင့် ထိခိုက်သေဆုံး မှုများ အပါအဝင် အဆောက်အအုံများ၊ လမ်းတံတားများ ပြိုကျပျက်စီးမှုနှင့်ပတ်သက်၍ နစက အနေဖြင့် ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများကို မည်ကဲ့သို့သော် အစီအစဉ်ဖြင့် ဆောင်ရွက် သွားမလဲ ပြည်သူလူထုက သိချင်နေကြသည်။
ငလျင်သင့် ပြည်သူများ ကယ်ဆယ်ရေးနှင့် ပြန်လည်ထူထောင်ရေးကို အပိုင်း ၃ ပိုင်းခွဲ၍ ဆောင်ရွက်မည်ဟု နစကဥက္ကဋ္ဌက ပြောသည်။
၂၀၂၅ ခုနှစ်၊ မတ်လ ၃၀ ရက်က ငလျင်ဘေးဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများ အမြန် ဆုံးဆောင်ရွက်သွားနိုင်ရေး အထူးအစည်းအဝေး တစ်ရပ် ပြုလုပ်စဉ် ၎င်းက ပြောကြားခဲ့ခြင်း ဖြစ်သည်။
ငလျင်ဘေးဒဏ်ကြောင့် ထိခိုက်ပျက်စီးခဲ့ရမှုများကို ပြန်လည်ထူထောင် ရေးလုပ်ငန်းများဆောင်ရွက်ရာ၌ ပြိုကျ ပျက်စီးသွားသော အဆောက်အဦများနှင့် အပျက် အစီးများအားရှင်းလင်းဖယ်ထုတ်ခြင်းအပိုင်း၊ ပြိုကျပျက်စီးနေဆဲ အဆောက်အဦများအား ဘေးအန္တရာယ်မဖြစ်စေရေး စနစ်တကျရှင်းလင်းဖယ်ရှားခြင်းအပိုင်း၊ ပြန်လည်တည် ဆောက်ခြင်းအပိုင်းဟူ၍ အပိုင်း ၃ ပိုင်းဖြင့် ဆောင်ရွက်သွားရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် က ပြောသည်။
ငလျင် ဘေးဒဏ်ကြောင့် ထိခိုက်ပျက်စီးဆုံးရှုံးခဲ့ရသည့် လမ်းတံတားများ၊ နိုင်ငံပိုင် အဆောက် အဦများ ပြန်လည် တည်ဆောက်ရေးနှင့် ပြန်လည်ထူထောင်ရေးလုပ်ငန်းများကို မိမိတို့ အနေဖြင့် အင်တိုက်အားတိုက် ဆက်လက် ဆောင်ရွက်သွားရမည်ဖြစ်ပြီး ငွေကြေးအင်အား၊ လူအင်အား၊ ယာဉ်ယန္တရားအင်အားများစွာကို သုံးစွဲဆောင်ရွက် သွားရမည်ဖြစ်ကြောင်း၊ ပုဂ္ဂလိကတည်ဆောက်ရေးလုပ်ငန်းများကိုလည်း ထောက်ပံ့ပေးရန်လိုအပ်မည်ဖြစ်၍ နိုင်ငံတကာမှ အကူအညီများ တောင်းခံရာတွင် ပြန်လည်တည်ဆောက်ရေးအတွက် လိုအပ်သည့် ဆောက်လုပ်ရေး သုံးပစ္စည်းများကိုလည်း ထည့်သွင်းတောင်းခံသွားရန်လိုကြောင်း ၎င်းက ပြောသည်။
ထို့ပြင် အဆောက်အဦ အာမခံလုပ်ငန်းများတွင် အာမခံထားရှိမှုများကိုလည်း စနစ်တကျစိစစ်၍ အာမခံငွေကြေး များ ရရှိရေးအတွက်လည်း ဆောင်ရွက်ပေးသွားရန်လိုကြောင်း နစကဥက္ကဋ္ဌက ပြောသည်။
ဆက်သွယ်ရေးလမ်းကြောင်းများ အမြန်ဆုံး ယခင်အခြေအနေအတိုင်း ပြန်လည်သွားလာနိုင်ရေး ဆောင်ရွက်ရ မည်ဖြစ်ကြောင်း၊ စစ်ကိုင်း-မန္တလေးလမ်းဟောင်းပေါ်ရှိ စစ်ကိုင်းတံတား(အင်းဝ) ရထားလမ်းကူးတံတား ပြိုကျ ပျက်စီးနေမှုအား အမြန်ဆုံး ပြန်လည်ဆောင်ရွက်သွားရန်လိုပြီး ရေလမ်းကြောင်းအမြန်ပြန်ပွင့်အောင် ဆောင်ရွက် ပေးသွားရမည်ဟု နစကဥက္ကဋ္ဌက ပြောသည်။
ထို့နောက် ကူညီကယ်ဆယ်ရေးလုပ်ငန်းများကို ပိုမို ထိရောက်စွာ ဆောင်ရွက်နိုင်ရေးအတွက် ထိခိုက်ပျက်စီးမှုများ ဖြစ်ပေါ်ခဲ့ရသည့် လေယာဉ် ပြေးလမ်းများကိုလည်း အမြန်ဆုံးပြန်လည်ပြုပြင် ဖွင့်လှစ်ပေးသွားရန်လိုကြောင်း၊ ယိုယွင်း ပျက်စီးမှုများ ဖြစ်ပေါ်ခဲ့ရသည့် လမ်းတံတားများကို ဆောက်လုပ်ရေး ဝန်ကြီးဌာနနှင့် စစ်အင်ဂျင်နီယာ ညွှန်ကြားရေးမှူးရုံးတို့ ပူးပေါင်း၍ အမြန်ဆုံးပြန်လည် ကောင်းမွန်အောင် ဆောင်ရွက်ပေးရန်လိုကြောင်း၊ ကူညီ ကယ်ဆယ်ရေးလုပ်ငန်းများ ဆောင်ရွက်ရာတွင် လိုအပ်သည့် တန်ချိန်များစွာကို မတင်နိုင်သည့် ကရိန်းကားများကို လည်း ငလျင်ဘေးဒဏ်သင့် ဒေသများသို့ အမြန်ဆုံးစေလွှတ်ဆောင်ရွက်သွားစေရန်လိုကြောင်း ၎င်းက ပြောသည်။
မန္တလေးမြို့တွင်းရှိ ဘုန်းတော်ကြီးကျောင်းများတွင် အဆောက်အဦနေရာ အနည်းငယ်အတွင်း သံဃာတော်များ အများအပြား သီတင်းသုံးနေထိုင်လျက်ရှိသဖြင့် သံဃာတော်များအားလုံး၏ ဆွမ်းကွမ်းနှင့် ဝေရာ ဝစ္စကိစ္စရပ်များ အားလုံး အဆင်ပြေစေရေး သင့်လျော်သည့်စီမံမှုများဆောင်ရွက်ပေးသွား ရန်လိုကြောင်း ဗိုလ်ချုပ်မှူးကြီး မင်းအောင်လှိုင်က ပြောသည်။
ယခုဖြစ်ပေါ်ခဲ့သည့် ငလျင်ဘေးဒဏ်ကြောင့်ထိခိုက်ပျက်စီးခဲ့ရမှုများကို သင်ခန်းစာယူ၍ လမ်းတံတားနှင့် အဆောက်အဦများ ဆောက်လုပ်ရာတွင် သဘာဝဘေးအန္တရာယ် ခံနိုင်ရည်စံနှုန်းများကို စနစ်တကျ တွက်ချက် ဆောက်လုပ်စေရေး စစ်ဆေးကြပ်မတ်ဆောင် ရွက်သွားရန်လိုကြောင်း၊ ယခုလှုပ်ခတ်ခဲ့သည့် ငလျင်ဆိုင်ရာ အချက်အလက်နှင့် ဖြစ်ပေါ်မှုများကိုလည်း စနစ်တကျ မှတ်တမ်းပြုစုထားရှိရန်နှင့် ထုတ်ပြန်မှုများ ဆောင်ရွက်ပေး သွားရန်လိုကြောင်း နစကဥက္ကဋ္ဌက ပြောသည်။
ကူညီကယ်ဆယ်ရေးနှင့် ထောက်ပံ့ရေးပစ္စည်းများ ပေးအပ်ရာတွင် ငလျင် ဘေးဒဏ်သင့်ခဲ့ရသူများ အားလုံး၊ ရသင့်ရထိုက်သူများ အားလုံးရရှိစေရေး စနစ်တကျ စာရင်းပြုစုဆောင်ရွက်သွားရန်လိုသည်ဟု နစကဥက္ကဋ္ဌက ပြောသည်။
ထို့နောက် စားရေး၊ သောက်ရေး အဆင်ပြေအောင် ဆောင်ရွက် ပေးသွားရန်လိုကြောင်း၊ စာရင်းများ မထပ်စေ ရေးနှင့် ကျန်နေခဲ့ရသူများ မရှိစေရေး မျှမျှတတဖြစ်စေရေး တာဝန်ရှိသူများအားလုံးက ကြပ်ကြပ်မတ်မတ်ဖြင့် စနစ်တကျ စာရင်းကောက်ယူ ပြုစုဆောင်ရွက်သွားရန်လိုကြောင်း၊ မိမိတို့အနေဖြင့် ပြန်လည် ထူထောင် ရေး ဆိုင်ရာကိစ္စရပ်များကို များစွာဆောင်ရွက် သွားရမည်ဖြစ်ပြီး ဦးစားပေး အဆင့်အလိုက် အမြန်ဆုံးဆောင်ရွက် ပေးသွားရန်လိုကြောင်း ၎င်းက ပြောသည်။
