CNI International News

ဆိုးလ်၊ နိုဝင်ဘာ ၂၃

ယူကရိန်းစစ်ပွဲတွင် ရုရှားကို ကူညီပေးရန် မြောက်ကိုရီးယားက စစ်သားများ စေလွှတ်နေမှုကို တုန့်ပြန်ကူညီသည့် အနေဖြင့် ရုရှားက မြောက်ကိုရီးယားကို လေကြောင်းကာကွယ်ရေး ဒုံးကျည်များ ထောက်ပံ့ခဲ့ကြောင်း တောင်ကိုရီးယားအရာရှိတစ်ဦးက ပြောကြားခဲ့ကြောင်း အေပီမှ ဖော်ပြခဲ့သည်။

မြောက်ကိုရီးယားသည် အောက်တိုဘာလအတွင်းက ရုရှားကို စစ်သား ၁၀,၀၀၀ ကျော် ပို့ဆောင်ခဲ့ကာ ထိုစစ်သား များထဲမှ အချို့သည် ရှေ့တန်းစစ်မြေပြင်တွင် စတင်ပါဝင်တိုက်ခိုက် နေပြီဖြစ်ကြောင်း အမေရိကန်၊ တောင်ကိုရီးယားနှင့် ယူကရိန်းတို့က ပြောကြားခဲ့သည်။

ယူကရိန်းစစ်ပွဲတွင် မြောက်ကိုရီးယား စစ်သားများ ပါဝင်လာမှုသည် စစ်မီးကို ပိုမိုတောက်လောင် လာစေနိုင် ကြောင်းနှင့် ရုရှားက မြောက်ကိုရီးယား၏ စစ်ကူအတွက် အပြန်အလှန်အနေဖြင့် ဒုံးကျည်များ ထောက်ပံ့ပေး ခြင်းဖြစ်နိုင်ကြောင်းက ကျွမ်းကျင်သူများက ပြောကြားခဲ့သည်။

အမျိုးသားလုံခြုံရေး အကြံပေးပုဂ္ဂိုလ် ရှင်းဝန်ဆစ်ကို တွေ့ရစဉ်

ရုရှား၏ ဆန်းပြားသည့် လက်နက်နည်းပညာသည် မြောက်ကိုရီးယား၏ နျူကလီးယား သယ်ဆောင်နိုင်သည့် ဒုံးကျည်များ၏ စွမ်းဆောင်ရည်ကို ပိုမိုမြင့်တက်စေနိုင်ကြောင်း တောင်ကိုရီးယားနှင့် အမေရိကန်တို့က သတိပေး ခဲ့သည်။

တောင်ကိုရီးယားသမ္မတ ယွန်းဆော့ရွဲ ( Yoon Suk Yeol) ၏ အမျိုးသားလုံခြုံရေး အကြံပေးပုဂ္ဂိုလ် ရှင်းဝန်ဆစ် (Shin Wonsik) ကမူ ရုရှားသည် မြောက်ကိုရီးယားနိုင်ငံ ပြုံယမ်းမြို့တော်၏ လေကြောင်းကာကွယ်ရေး ကွန်ရက် ကို ပိုမိုခိုင်မာစေရန်အတွက် ဒုံးကျည်များနှင့် အခြား စစ်လက်နက်ပစ္စည်းများ ထောက်ပံ့ပေးခဲ့သည်ကို တောင်ကိုရီးယားက တွေ့ရှိခဲ့ကြောင်း ပြောကြားခဲ့သည်။

သို့သော် ရုရှားက မြောက်ကိုရီးယားကို မည်သည့် ဒုံးကျည် အမျိုးအစားများ ပေးခဲ့သည်ဆိုခြင်းကိုမူ ရှင်းက အသေးစိတ် ပြောကြားခဲ့ခြင်းမရှိပေ။

ရုရှားသည် မြောက်ကိုရီးယားကို မြေပြင်မှ ဝေဟင်ပစ် S-400 တာဝေးပစ် ဒုံးကျည်များ၊ လောင်ချာများနှင့် မြေပြင် အခြေစိုက် ရေဒါစနစ်များ ပေးပို့ခဲ့ခြင်းဖြစ်နိုင်ကြောင်း တောင်ကိုရီးယားရှိ ကိုရီးယားကာကွယ်ရေးကွန်ရက်မှ ကျွမ်းကျင်သူ လီအီလ်ဝူး (Lee Illwoo) က ပြောကြားခဲ့သည်။

မြောက်ကိုရီးယား ခေါင်းဆောင် ကင်မ်ဂျုံအန်ကို တွေ့ရစဉ်

မြောက်ကိုရီးယားသည် မြေပြင်မှ ဝေဟစ်ပစ် တာတိုပစ် ဒုံးကျည်များကိုလည်း ကိုယ်တိုင် ထုတ်လုပ်နိုင်စွမ်း ရှိသည်ဟုလည်း ၎င်းက ပြောသည်။

S-400 ဒုံးကျည် အမျိုးအစားသည် ကီလိုမီတာ ၄၀၀ (မိုင် ၂၅၀) အကွာအဝေးအထိ ပစ်ခတ်ရောက်ရှိနိုင်ပြီး ရုရှား၏ ခေတ်အမီဆုံး လေယာဉ်ပစ် လက်နက်များထဲတွင် တစ်ခု အပါအဝင်အဖြစ် သတ်မှတ်ခံထားရသည်။

သို့သော် ထိုလေကြောင်းကာကွယ်ရေး ဒုံးကျည်စနစ်သည် ပြုံယမ်းမြို့တော်၏ လေကြောင်းကာကွယ်ရေးကို သိသိ သာသာ တိုးတက်စေမည် ဟုတ်/မဟုတ် လီက မေးခွန်းထုတ်ခဲ့ပြီး ယူကရိန်းစစ်ပွဲအတွင်း ယူကရိန်း၏ ဒရုန်း တိုက်ခိုက်မှုများကို ထိုလေကြောင်းကာကွယ်ရေးစနစ်က ထိထိရောက်ရာက် ကာကွယ်နိုင်ခဲ့ခြင်း မရှိကြောင်း လီက ပြောကြားခဲ့သည်။

Source: အေပီ