CNI Sport News

၂၀၂၂ ခုနှစ်၊ မေလ ၁

ယူကရိန်းတင်းနစ်မယ် မာတာကာစကျု့ဟာ ရုရှားရဲ့ ကျူးကျော်မှုတွေကြောင့် အခုအချိန်မှာ သူမဘဝအတွက် ရည်စူးထားတဲ့ အားကစားကိုတောင် အာရုံစိုက်ဖို့ ခက်ခဲနေတယ်လို့ ပြောလိုက်ပါတယ်။

ကိယက်ဗ်မှာ မွေးဖွားခဲ့တဲ့ ၁၉ နှစ်အရွယ်ရှိ မာတာကာစကျု့ဟာ ဒီလိုဖြစ်ရပ်တွေကြောင့် စိတ်ပိုင်းဆိုင်ရာ မတည်ငြိမ်မှုတွေနဲ့ နာကျင်မှုတွေ ရှိနေတာပါ။

“အခုအချိန်မှာ မဖော်ပြနိုင်လောက်တဲ့ အရာတစ်ခုကို ပြောပြချင်ပါတယ်။ ဘာကြောင့်လဲဆိုရင် တင်းနစ်ကစားသမားတစ်ဦးရဲ့ မိဘက သေဆုံးသွားလို့ပါ။ တင်းနစ်ကစားသမားတစ်ဦးရဲ့ အိမ်ကလည်း လုံးဝကို ပျက်ဆီးသွားပြီလို့” မာတာကာစကျု့က CNN Sport ကို ပြောခဲ့တာ ဖြစ်ပါတယ်။
သူမရဲ့ စိတ်ပိုင်းဆိုင်ရာ ကျန်းမာရေးကိုလည်း ထိခိုက်ခဲ့တာပါ။

မာတာကာစကျု့က “ပထမပတ် ဒါမှမဟုတ် နှစ်ပတ်လောက် က အလွန်ခက်ခဲခဲ့ပါတယ်။ ကျမကိုယ် ကျမ အနည်းငယ် လမ်းပြဖို့ ကြိုးစားနေပါတယ်။ ကျမရောက်တဲ့ နေရာကို ကြည့်ဖို့ လည်း ကြိုးစားနေပါတယ်။ ကိုယ့်ကိုယ်ကို ခံစားပြီး အဖြေရှာ ဖို့လည်း ကြိုးစားနေပါတယ်။ ယူကရိန်းတင်းနစ်မယ်ဟာ သူမရဲ့ ခံစားချက်တွေကို စီမံခန့်ခွဲဖို့ ကြိုးစားခြင်းရဲ့ အရေးကြီးပုံကို သိတာကြောင့် စိတ်ပညာရှင်တစ်ဦးနဲ့ အလုပ်လုပ်နေတယ်”လို့လည်း ပြောခဲ့တာပါ။

မာတာကာစကျု့ကိုတွေ့ရစဉ်(Sports)

“လွန်ခဲ့တဲ့ ရက်သတ္တပတ် (၂)ပတ်လောက်က စတင်ခဲ့တာပါ။ ဒါက ကျမကို အများကြီး အထောက်အကူ ဖြစ်စေပါတယ်။ ဒါပေမယ့် တစ်ခါတစ်ရံမှာ ရောက်လာတဲ့ အတွေးတွေက ကြောက်စရာကောင်းတဲ့ အတိုင်းအတာအထိကို ရောက်ရှိသွားခဲ့ပါ တယ်။ ကျမ ဘာအတွက် အသက်ရှင်နေတာလဲဆိုတာတွေပါ ဖြစ်လာတယ်”လို့ ပြောခဲ့တာ ဖြစ်ပါတယ်။

သူမရဲ့ ရည်ရွယ်ချက်က ယူကရိန်းစစ်ပွဲအကြောင်းကို လူတွေကို ပညာပေးဖို့ ကြိုးစားနေတာ ဖြစ်တယ်လို့လည်း ထပ်မံ ပြောခဲ့ ပါတယ်။
မာတာကာစကျု့က “လူတိုင်းကတော့ ဒီလိုလုပ်နေကြတာပါပဲ။ ဒါပေမယ့် ကျမရဲ့ တစ်ခုတည်းသော ရည်မှန်းချက်က ဒီအချိန် မှာ ထိခိုက်နစ်နာတဲ့ သူတစ်ဦးလို ခံစားနေဖို့ မဟုတ်ပါဘူး။ ထိခိုက်နစ်နာတဲ့ သူမဟုတ်ဘူးဆိုတဲ့ အတွေးအခေါ်ကို ပြောင်း လိုက်တာနဲ့ ဒါက ကျမအတွက် အလှည့်အပြောင်းပါပဲ။ ကျမဟာ တင်းနစ် ကစားသမား ဖြစ်နေတုန်းပါပဲ။ ပြိုင်ပွဲတွေ ယှဉ်ပြိုင် ချင်ပြီး ဒဏ်ရာတွေမလိုချင်ပါဘူး။ဒီအချိန်မှာတော့ တင်းနစ်မကစားနိုင်သလို ဘာမှလည်းလုပ်လို့မရပါဘူး”လို့ ပြောခဲ့တာ ဖြစ်ပါတယ်။

မာတာကာစကျု့ဟာ လက်ရှိ အမျိုးသမီးတစ်ဦးချင်း ကမ္ဘာ့အဆင့် ၅၅ နေရာမှာ ရပ်တည်နေတာဖြစ်ပြီး နှစ်ယောက်တွဲမှာ တော့ ကမ္ဘာ့အဆင့် ၇၄ နေရာမှာ ရပ်တည်နေတာ ဖြစ်ပါတယ်။

Source: Edition

CNI Sport News

၂၀၂၂ ခုနှစ်၊ မေလ ၁

ပရီးမီးယားလိဂ် ကလပ်အသင်း (၄)သင်းဟာ နွေရာသီ အပြောင်းအရွှေ့မှာ ဒိုင်ဘားလားကို ခေါ်ယူဖို့အတွက် ကစားသမားရဲ့ အေးဂျင့်ဖြစ်သူနဲ့ ဆက်သွယ်မှုတွေ ပြုလုပ်ခဲ့ကြတယ်လို့ ဒေးလီးမေးလ်က ဖော်ပြလိုက်ပါတယ်။

ဒိုင်ဘားလားနဲ့ ဂျူဗင်တပ်စ်အသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး စာချုပ်သစ် အတွက် ညှိနှိုင်းမှုတွေကလည်း ပျက်ပြယ်သွားခဲ့တာပါ။ အဲ့ဒါကြောင့် အာဂျင်တီးနား တိုက်စစ်မှူးဟာ အခုရာသီအကုန်မှာ အသင်းက ထွက်ခွာတော့မှာ ဖြစ်ပါတယ်။
အသက် ၂၈ နှစ်အရွယ်သာ ရှိသေးပြီး အလွတ်နဲ့ရမယ့် ဒိုင်ဘားလားလို ကစားသမားကို ခေါ်ယူဖို့ ကလပ်အသင်းတွေရဲ့ စိတ်ဝင်စားမှုဟာ သိသိသာသာ မြင့်တက်လာခဲ့တာပါ။

ESPN က မန်ချက်စတာယူနိုက်တက်၊ အာဆင်နယ်နဲ့ နယူးကာဆယ် အသင်းတို့ဟာ ဒိုင်ဘားလားနဲ့ ပတ်သက်ပြီး စုံးစမ်း မေးမြန်းမှုတွေ ပြုလုပ်ထားတယ်လို့ ဖော်ပြခဲ့ပါတယ်။

စပါးအသင်းကတော့ ကစားသမားရဲ့ ကိုယ်စားလှယ်တွေနဲ့ ဆွေးနွေးမှုတွေ ပြုလုပ်နေတာ ကြာပြီလို့ သိရပါတယ်။ အီတလီနဲ့ စပိန်မှာရှိတဲ့ ကလပ်အသင်းတွေကလည်း ဂျူဗင်တပ်စ် တိုက်စစ်မှူးကို ခေါ်ယူဖို့ စိတ်ဝင်စားမှုရှိကြောင်း ပြသခဲ့ပေမယ့် ဘယ် အသင်းကမှ ထပ်တိုးဆွေးနွေးမှုတွေ မပြုလုပ်ရသေးတာပါ။

မန်ချက်စတာယူနိုက်တက် အသင်းဟာ ၂၀၁၉ က ဒိုင်ဘားလားကို လူကာကူနဲ့ အလဲအလှယ်လုပ်ဖို့ နီးစပ်ခဲ့ပေမယ့် အာဂျင်တီးနား ကစားသမားတောင်းဆိုတဲ့ လစာကို ပေးဖို့ ဆန္ဒမရှိတာကြောင့် အပြောင်းအရွှေ့ မဖြစ်မြောက်ခဲ့တာ ဖြစ်ပါတယ်။

ဒိုင်ဘားလားကိုတွေ့ရစဉ်(Sports Mole)

နည်းပြသစ် ဖြစ်လာမယ့် အဲရစ်တန်ဟတ်ကတော့ ဒိုင်ဘားလားကို ခေါ်ယူဖို့ စိတ်ပိုင်း ဖြတ်ထားတာကြောင့် မန်ချက်စတာ ကလပ်ဟာ ပြန်လည် လှုပ်ရှားလာခဲ့တာပါ။ စပါးအသင်းကလည်း လွန်ခဲ့တဲ့ ၃ နှစ်က ဒိုင်ဘားလားကို ခေါ်ယူဖို့ နီးစပ်ခဲ့တာ ဖြစ်ပါတယ်။

စပါးအသင်းဟာ ပေါင် ၆၅ သန်းနဲ့ ခေါ်ယူဖို့ ဂျူဗင်တပ်စ် အသင်းနဲ့ သဘောတူညီခဲ့ပေမယ့် မန်ချက်စတာယူနိုက်တက် အသင်းလိုပဲ ဘဏ္ဍာရေး အကြောင်းပြချက်ကြောင့် မခေါ်ယူနိုင်ခဲ့တာပါ။ စပါးအသင်းကို ဘောလုံးဒါရိုက်တာအဖြစ် တာဝန် ယူခဲ့တဲ့ ပါရာတီချီက ဂျူဗင်တပ်စ် အသင်းမှာ ၁၁ နှစ်ကြာ အလုပ်လုပ်ခဲ့တာကြောင့် ဒိုင်ဘားလားနဲ့ ရင်းနှီးမှုရှိနေတာ ဖြစ်ပါ တယ်။

အူဘာမီယန်း ထွက်ခွာပြီးကတည်းက မဖြည့်တင်းရသေးတဲ့ တိုက်စစ်နေရာအတွက် အာဆင်နယ် အသင်းဟာ ဒိုင်ဘားလား ကို ခေါ်ယူဖို့ ပစ်မှတ်ထားခဲ့တာပါ။

ဆော်ဒီ ကျောထောက် နောက်ခံနဲ့ ငွေကြေး အများအပြား အသုံးပြုဖို့ ပြင်ဆင်ထားတဲ့ နယူးကာဆယ် အသင်းကလည်း ဒိုင်ဘားလားကို ခေါ်ယူဖို့ မျက်စိကြနေတာ ဖြစ်ပါတယ်။ ၂၀၁၅ က ပါလာမို အသင်းကနေ ရောက်ရှိလာတဲ့ ဒိုင်ဘားလားဟာ ဂျူဗင်တပ်စ် အသင်းအတွက် ဒီရာသီမှာ ၃၄ ပွဲ ကစားထားပြီး ၁၄ ဂိုး သွင်းယူထားတာ ဖြစ်ပါတယ်။

Source: Daily Mail

CNI News

၂၀၂၂ ခုနှစ်၊ ဧပြီ ၂၉

(၃၁) ကြိမ်မြောက် အရှေ့တောင်အာရှအားကစားပြိုင်ပွဲ(ဆီးဂိမ်း)ကို ဝင်ရောက်ယှဉ်ပြိုင်ကြမည့် မြန်မာ ကိုယ်စားပြု အားကစားသမားများ အနေဖြင့် ရွှေတံဆိပ်ဆုရယူနိုင်ပါက သိန်း ၃၀၀ ဆုချီးမြှင့်မည်ဖြစ်ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ယနေ့ (ဧပြီ ၂၉ ရက်) ကျင်းပသည့် (၃၁) ကြိမ်မြောက် အရှေ့တောင်အာရှအားကစားပြိုင်ပွဲသို့ ဝင်ရောက်ယှဉ်ပြိုင်းမည့် မြန်မာ အားကစားအဖွဲ့များအား အောင်နိုင်ရေး အလံအပ်နှင်းခြင်း အခမ်းအနားမှာ အထက်ပါအတိုင်း ၎င်းက ပြောကြားခဲ့ခြင်း ဖြစ်သည်။

နစကဥက္ကဋ္ဌက “နိုင်ငံတော်အနေဖြင့် ဆုရအားကစားသမားများအတွက် ရွှေတစ်ဦးချင်း ငွေကျပ်သိန်း ၃၀၀၊ ငွေတစ်ဦးချင်း ငွေ ကျပ်သိန်း ၂၀၀၊ ကြေးတစ်ဦးချင်း ငွေကျပ်သိန်း ၁၀၀၊ ရွှေအသင်းလိုက် တစ်ဦးချင်း ငွေကျပ်သိန်း ၁၀၀၊ ငွေအသင်းလိုက် တစ်ဦးချင်း ငွေကျပ်သိန်း ၇၀ ၊ ကြေးအသင်းလိုက် တစ်ဦးချင်း ငွေကျပ် ၃၅ သိန်း၊ နည်းပြများအတွက် ရွှေတံဆိပ် ဆုရ အားကစားနည်းမှ နည်းပြတစ်ဦးလျှင် ငွေကျပ်သိန်း ၁၀၀၊ ငွေတံဆိပ်ဆုရ အားကစားနည်းမှ နည်းပြ တစ်ဦးလျှင် ငွေကျပ် သိန်း ၅၀၊ ကြေးတံဆိပ်ဆုရအားကစားနည်းမှ နည်းပြတစ်ဦးလျှင် ငွေကျပ်သိန်း ၃၀ တို့အား ချီးမြှင့် သွားမည်” ဟု ပြောသည်။

ထို့ပြင် အုပ်ချုပ်မှုအဖွဲ့များအတွက် ရွှေတံဆိပ်ဆုရအားကစားနည်းမှ အုပ်ချုပ်မှုအဖွဲ့တစ်ဖွဲ့လျှင် ငွေကျပ်သိန်း ၁၀၀၊ ငွေတံ ဆိပ်ဆုရ အားကစားနည်းမှ အုပ်ချုပ်မှုအဖွဲ့တစ်ဖွဲ့လျှင် ငွေကျပ်သိန်း ၅၀၊ ကြေးတံဆိပ်ဆုရ အားကစားနည်းမှ အုပ်ချုပ်မှု အဖွဲ့တစ်ဖွဲ့လျှင် ငွေကျပ်သိန်း ၃၀ တို့အား ပေးအပ်ချီးမြှင့်မည်ဟု ၎င်းက ပြောသည်။

နစကဥက္ကဋ္ဌက “ပြိုင်ပွဲတွင် အောင်နိုင်ရေးနှင့် အမိနိုင်ငံတော်၏ ဂုဏ်ကိုမြှင့်တင်ရေး တာဝန်ကြီးကို နိုင်ငံတော်က ပေးအပ်လိုက်ပြီး ဖြစ်သည့်အတွက် မြန်မာ့အားကစားအဖွဲ့ဝင်များ အားလုံး နိုင်ငံချစ်စိတ်၊ မျိုးချစ်စိတ်ကို အရင်းတည်ပြီး ဇွဲ၊ လုံ့လ၊ ဝီရိယစိုက်ထုတ်ကာ အစွမ်းကုန်ကြိုးပမ်းသွားကြရန် တိုက်တွန်းလိုပါတယ်”ဟု ပြောသည်။

(၃၁)ကြိမ်မြောက် ဆီးဂိမ်းပြိုင်ပွဲကို ဗီယက်နမ်နိုင်ငံက အိမ်ရှင်အဖြစ် ၂၀၂၂ ခုနှစ်၊ မေလ ၁၂ ရက်မှ ၂၃ ရက်အထိ ကျင်းပ သွားမည် ဖြစ်ပြီး မြန်မာနိုင်ငံက ဆီးဂိမ်းပြိုင်ပွဲတွင် အားကစားနည်း ၂၀ ၌ မြန်မာကိုယ်စားပြု အားကစားသမား ၂၉၃ ဦး ဝင်ရောက် ယှဉ်ပြိုင်မည်ဖြစ်သည်။