CNI International News

ကိယက်ဗ်၊ ဖေဖော်ဝါရီ ၂၆

ရုရှားတပ်ဖွဲ့များသည် ဖေဖော်ဝါရီ ၂၆ ရက်(ယနေ့) မြို့တော်ကိယက်ဗ် အပါအဝင် ယူကရိန်းမြို့များကို ကျူးကျော်မှု တတိယ နေ့အဖြစ် အမြောက်များနှင့် ခရုဇ်ဒုံးကျည်များ အသုံးပြုပစ်ခတ်ခဲ့ပြီး အရှေ့တောင်ပိုင်းရှိ မယ်လီတိုပေါလ်မြို့အား သိမ်းပိုက် နိုင်ခဲ့ကြောင်း ရုရှားအင်တာဖက်စ် သတင်းဌာနက ထုတ်လွှင့်သည်ဟု ရိုက်တာက ရေးသားထားသည်။

သို့သော် ယူကရိန်း အစိုးရအရာရှိများက မယ်လီတိုပေါလ်မြို့ အခြေအနေကို ချက်ချင်း မှတ်ချက်ပေးခြင်း မရှိပေ။ ဗြိတိန် စစ်ဘက်ရေးရာဝန်ကြီး ဂျိမ်းစ်ဟက်ပေးက အဆိုပါသတင်းအပေါ် သံသယရှိကြောင်း၊ လူပေါင်း ၁၅၀,၀၀၀ ခန့် နေထိုင်သည့် မြို့သည် ယူကရိန်းလက်ထဲတွင်သာ ရှိနေသေးကြောင်း ပြောကြားခဲ့သည်။

"ရုရှားရဲ့ တစ်နေ့တာ ရည်မှန်းချက် တစ်ခုအနေနဲ့ပဲ ဖြစ်မှာပါ။ ပြီးတော့ ရုရှားက သိမ်းယူထားပြီဆိုတဲ့ မယ်လီတိုပေါလ်ဆီ ကတောင် ဘာမှ သက်သေအထောက်အထား ထွက်မလာသေးဘူးလေ။ ဒီတော့ မြို့အားလုံးက ယူကရိန်းလက်ထဲမှာပဲ ရှိနေ တုန်းပဲ"ဟု ၎င်းက ဘီဘီစီရေဒီယိုသို့ ပြောကြားခဲ့သည်။

ရုရှားတပ်ဖွဲ့များသည် ယူကရိန်းတပ်ဖွဲ့ဝင်များ မျှော်လင့်ထားသည်ထက် ပိုမိုပြင်းထန်သော ခုခံမှုများနှင့် ရင်ဆိုင်ခဲ့ရပြီး ၎င်းတို့ ၏ ကျူးကျော်မှု စတင်ခဲ့သည့် ဖေဖော်ဝါရီ ၂၄ ရက်နောက်ပိုင်း ထိုးစစ်အခြေအနေ သိသိသာသာ နှေးကွေးသွားသည်ဟု အနောက်အုပ်စုထောက်လှမ်းရေး သတင်းရင်းမြစ်များက ပြောသည်။

မြို့ကြီးပေါ်က ယူကရိန်းနိုင်ငံအလံလွှင့်ထူထား(GETTY IMAGES)

အကယ်၍ ရုရှားကာကွယ်ရေးဝန်ကြီးဌာနကို ကိုးကားဖော်ပြသည့် အင်တာဖက်စ် သတင်းသည် မယ်လီတိုပေါလ်မြို့နှင့် ပတ်သက်ပြီး အတည်ပြုနိုင်ပါက ၎င်းသည် ရုရှားတို့ ပထမဆုံး သိမ်းပိုက်နိုင်သော လူဦးရေများပြားသည့် မြို့ကြီးဖြစ်လာမည် ဟု ရိုက်တာသတင်းက ဆက်လက် ရေးသားသည်။

ကလေးသုံးဦး အပါအဝင် ယူကရိန်းနိုင်ငံသား ၁၉၈ ဦးထက်မနည်း သေဆုံးပြီး ယခုအချိန်အထိ လူ ၁,၁၁၅ ဦး ဒဏ်ရာ ရရှိခဲ့ ကြောင်း အင်တာဖက်စ်က ယူကရိန်းကျန်းမာရေးဝန်ကြီးဌာနကို ကိုးကား၍ သတင်းဖော်ပြခဲ့သည်။ ထိုကိန်းဂဏန်းများသည် အရပ်သားဦးရေ မည်မျှပါဝင်ကြောင်း ရှင်းရှင်းလင်းလင်း မသိရသေးပေ။

ကိယက်ဗ်မြို့တော်ဝန် ဗီတာလီကလစ်ချ်ကိုက “မြို့တော်အတွင်း ညတွင်းတိုက်ပွဲများ ဖြစ်ပွားခဲ့ရာ ကလေးငယ်နှစ်ဦး အပါ အဝင် လူ ၃၅ ဦး ဒဏ်ရာရရှိခဲ့ကြောင်း” ပြောကြားခဲ့သည်။

လောလောဆယ်တွင် ကိယက်ဗ်မြို့၌ ရုရှားစစ်တပ် အခိုင်အမာ တပ်ချနိုင်ခြင်း မရှိသော်လည်း အပျက်အစီး များပြားကြောင်း ၎င်းက ထပ်လောင်း ပြောကြားခဲ့သည်။

ယခုအခါ မြို့တွင်း နေထိုင်သူများအတွက် ဘေးလွတ်ရာ အမိုးအကာအောက် ရောက်ရှိရေး လုပ်ဆောင်နေပြီး ရထားပြေးဆွဲမှု ရပ်တန့်သွားပြီဖြစ်ကြောင်း ၎င်းက ရှင်းပြသည်။

ကိယက်ဗ်မြို့လယ်တွင် စိုးရိမ်ထိတ်လန့်မှုများ ရှိနေပြီး လက်နက်ကိုင် ယူကရိန်းစစ်သားများ ချီတက်ခြင်း၊ အမျိုးသမီးတစ်စု လမ်းတလျှောက် ပြေးလွှားနေခြင်းများကို တွေ့လိုက်ရကြောင်း ရိုက်တာသတင်းထောက်များက သတင်းပေးပို့ထားသည်။

မြို့တွင်းတိုက်ပွဲထဲက ယူကရိန်းစစ်သား(GETTY IMAGES) 

ဖေဖော်ဝါရီ ၂၆ ရက် အစောပိုင်းတွင် လူနေအိမ် အဆောက်အအုံ တစ်ခုနှင့် လေဆိပ်အနီးရှိ ဧရိယာကို ဒုံးကျည်များ ထိမှန် ခဲ့ကြောင်း မျက်မြင်သက်သေတစ်ဦးက ရိုက်တာသို့ ပြောကြားခဲ့သည်။

“ကျနော်တို့ လက်နက်ချမှာ မဟုတ်ပါဘူး၊ ကျနော်တို့ နိုင်ငံကိုကာကွယ်မှာပါ”ဟု သမ္မတ ဇာလန်းစကီးက ၎င်း၏ ကိယက်ဗ် သမ္မတရုံး အပြင်ဘက်၌ ဗွီဒီယိုမက်ဆေ့ချ်တစ်ခု ရိုက်ကူးပြီး ထုတ်လွှင့်ခဲ့သည်။

ဇာလန်းစကီးသည် ကရင်မလင်ဘက်မှ ကမ်းလှမ်းသော အပစ်အခတ်ရပ်စဲရေးနှင့် ငြိမ်းချမ်းရေး ဆွေးနွေးပွဲအတွက် အဆင်သင့်ဖြစ်နေပြီဟု အစောပိုင်းက အချက်ပြခဲ့သော်လည်း သံတမန် အဆက်အသွယ်များ၊ နှစ်ဘက်ညှိနှိုင်းမှုများ ယခုအချိန်အထိ မတွေ့ရသေးပေ။

တစ်ချိန်တည်းမှာပင် ပိုလန်၊ ဟန်ဂေရီ၊ စလိုဗက်ကီးယားနှင့် ရိုမေးနီးယားတို့၏ နယ်စပ်များသို့ ယူကရိန်းနိုင်ငံသား သောင်းနှင့် ချီ၍ တိမ်းရှောင် ထွက်ပြေးလာခဲ့ကြသည်။

ကိယက်ဗ်မြို့တော်၏ အရှေ့မြောက်ဘက် ကီလိုမီတာ ၁၅၀ (၉၃ မိုင်) ခန့်အကွာရှိ ချာနီဟစ်မြို့၏ မြို့တော်ဝန်က “လမ်းပေါ် က တိုက်ပွဲအတွက် ကြိုတင်ပြင်ဆင်ထားဖို့ လိုပါတယ်။ ကျနော် ပြောနေတာတွေကို သဘောပေါက်တဲ့သူတွေက ဓာတ်ဆီဗုံး တွေ ပြင်ဆင်ကြ”ဟု တိုက်တွန်းခဲ့သည်။
ယူကရိန်း အရှေ့မြောက်ပိုင်းရှိ ဆူမီမြို့တွင်လည်း ဖေဖော်ဝါရီ ၂၆ ရက်၊ နံနက်ပိုင်းက တိုက်ပွဲများ ဖြစ်ပွားနေပြီး ဒေသခံ ပြည်သူများ အိမ်ထဲမှာပဲနေကြဖို့ စည်ပင်သာယာအုပ်ချုပ်ရေးအဖွဲ့က နှိုးဆော်ထားသည်။

Source: Reuters