CNI International News
ဘာလင်၊ အောက်တိုဘာ ၇
ရုရှားပါဝင်ပတ်သက်မှုဖြင့်သာ ဥရောပ၏ ထာဝရငြိမ်းချမ်းရေး ရနိုင်ကြောင်း ဂျာမနီဝန်ကြီးချုပ်(အဓိပတိ)ဟောင်း အိန်ဂျလာမာကယ်က အောက်တိုဘာ ၆ ရက်တွင် ပြောကြားခဲ့သည်။
၂၀၀၅ ခုနှစ်မှ ၂၀၂၁ ခုနှစ်အထိ ဝန်ကြီးချုပ်တာဝန် ယူခဲ့ဖူးသူ မာကယ်သည် မြူးနစ်မြို့၌ ဆူးဒက်ဆက်ဇိုင်ထို (Suddeutsche Zeitung) အမည်ရှိ ဂျာမန်တောင်ပိုင်းသတင်းစာ၏ ၇၇ နှစ်မြောက် နှစ်ပတ်လည် အခမ်းအနား မိန့်ခွန်း၌ အထက်ပါအတိုင်း ပြောကြားခဲ့ခြင်းဖြစ်သည်။
ရုရှား၏ အကူအညီဖြင့် ထာဝရငြိမ်းချမ်းရေး ရရှိသည်အထိ စစ်အေးတိုက်ပွဲ ဖြစ်ပွားနေဦးမည်ဟု ၎င်းက ဆက်လက် ပြောကြားခဲ့ကြောင်း DPA သတင်းအရ သိရသည်။
ဂျာမနီဝန်ကြီးချုပ်(အဓိပတိ)ဟောင်း အိန်ဂျလာမာကယ်နဲ့ ပူတင်ကိုတွေ့ရစဉ် (GETTY IMAGES)
ယူကရိန်းတွင် ဖြစ်ပွားခဲ့သော ပဋိပက္ခများသည် အချိုးအကွေ့ တစ်ခုဖြစ်ကြောင်း၊ ရုရှားသမ္မတ ဗလာဒီမာပူတင် ၏ ပြောကြားချက်များကို အလေးအနက်ထားရန် လိုအပ်ကြောင်း မာကယ်က သတိပေးခဲ့သည်။
“သူတို့အနှောင့်အယှက်ဖြစ်စေဖို့ အစကတည်းက ခွဲခြားတာထက် သူတို့စကားလုံးတွေကို အလေးအနက်ထားဖို့ အားလုံးကို အကြံပြုချင်ပါတယ်” ဟု ၎င်းက တိုက်တွန်းခဲ့သည်။
ပြီးခဲ့သည့် ဖေဖော်ဝါရီလတွင် ယူကရိန်းသို့ ရုရှား စတင်ကျူးကျော်ခဲ့ပြီးနောက် အမေရိကန် ဦးဆောင်သော အနောက်အုပ်စုက ရုရှားကို ဥရောပမြေပေါ်တွင် အထီးကျန် ဖြစ်စေရန်အတွက် ဒဏ်ခတ်ပိတ်ဆို့မှု အများအပြား ချမှတ်ခဲ့ခြင်း၊ ယူကရိန်းသို့ စစ်လက်နက်နှင့်ငွေကြေး အဆက်မပြတ်ပေးပို့ခြင်းတို့ လုပ်ဆောင်ခဲ့ကြသည်။
Source: တာ့စ်သတင်းဌာန
