CNI International News

တိုင်ပေ၊ အောက်တိုဘာ ၆

ထိုင်ဝမ်သည် မိမိကာကွယ်ရေးအတွက် တစ်ပါးသူများကို အားကိုးနေမည် မဟုတ်ကြောင်း သမ္မတ ဆိုင်အင်ဝမ်က အောက်တိုဘာ ၆ ရက်တွင် ပြောကြားခဲ့သည်ဟု ရိုက်တာသတင်းတစ်ပုဒ်၌ တွေ့ရသည်။

မိမိတို့ အချုပ်အခြာအာဏာကို တရုတ် ထိပါးလာသည်ဟု ထိုင်ဝမ်က မှတ်ယူနေသလို ဒီမိုကရေစီ နည်းကျ အုပ်ချုပ်နေသော ကျွန်းလုံခြုံရေးအတွက် အမေရိကန်၏ ကတိကဝတ်ကိုတော့ ကြိုဆိုနေခဲ့သည်။

ဝါရှင်တန်တွင် ကျင်းပသည့် ဖိုရမ်တစ်ခုတွင် အမေရိကန်သမ္မတ ဂျိုးဘိုင်ဒန်က တရုတ်ဘက်မှ ရှားရှားပါးပါး တိုက်ခိုက်လာသည့်အခါ ထိုင်ဝမ်ဘက်မှ ၎င်းတို့ ခုခံကာကွယ်ပေးမည်ဟု ပြီးခဲ့သည့် စက်တင်ဘာလတွင် ကတိ ပြုခဲ့ပြီးနောက် ယခုကဲ့သို့ ဆိုင်အင်ဝမ်၏ သဘောထား မှတ်ချက် ထွက်ပေါ်လာခဲ့သည်။

အမေရိကန် သမ္မတ ဘိုင်ဒန်ကိုတွေ့ရစဉ်(AP)

ဝါရှင်တန်အခြေစိုက် ဂလိုဘယ်ထိုင်ဝမ်သိပ္ပံမှ ပညာရှင်အဖွဲ့နှင့် တွေ့ဆုံစဉ် ပြောကြားခဲ့သည့် မိန့်ခွန်း၌ ဆိုင်အင်ဝမ်က “မကြာသေးမီက အမေရိကန် စစ်လက်နက်များ ရောင်းချပေးခဲ့မှုနှင့် ထိုင်ဝမ်လုံခြုံရေးအတွက် ကတိကဝတ်တို့အတွက် ဘိုင်ဒန်အစိုးရနှင့် အမေရိကန်ကွန်ဂရက်(လွှတ်တော်)တို့ကို ကျေးဇူးတင်ရှိကြောင်း” ထည့်သွင်း ပြောကြားခဲ့သည်။

“ဒါပေမယ့် ကျမတို့ဟာ ကိုယ့်ကိုယ်ကို ကာကွယ်ဖို့ တစ်ပါးသူတွေအပေါ် မှီခိုအားကိုးနေမှာ မဟုတ်ဘူး” ဟု ဆိုင်အင်ဝမ်က ပြောကြားခဲ့သည်။

“ဒါကြောင့် ထိုင်ဝမ်ဟာ ကျမတို့လုံခြုံရေးကို ကာကွယ်ဖို့နဲ့ ဒီမိုကရေစီစံနှုန်းတွေအတိုင်း ထိန်းသိမ်းသွားဖို့ အပြည့် အဝ ကတိပြုထားတယ်ဆိုတာ ဒီနေရာမှာ ထပ်လောင်း ပြောကြားလိုပါတယ်။ ကျမတို့က လက်ရှိရင်ဆိုင်နေရတဲ့ ခြိမ်းခြောက်မှု အပြောင်းအလဲတွေနဲ့ လိုက်လျောညီထွေဖြစ်အောင် လုပ်ဆောင်နေပါတယ်” ဟု ၎င်းက ရှင်းပြ ခဲ့သည်။

ဘိုင်ဒန်၏ ကတိကဝတ်သည် အမေရိကန်မူဝါဒ ပြောင်းလဲမှုကို ဆိုလိုခြင်း မဟုတ်ကြောင်း အိမ်ဖြူတော်က ပြော ကြားခဲ့သော်လည်း ထိုင်ဝမ် လွတ်လပ်ရေးနှင့်ပတ်သက်၍ အမေရိကန်၏ ရပ်တည်ချက်ကို ရည်ရွယ်ချက်ရှိရှိဖြင့် အသေးစိတ် ထုတ်မပြောခြင်း ဖြစ်နိုင်ဖွယ်ရှိသည်ဟု ဝေဖန်သုံးသပ်သူများအကြား ငြင်းခုံနေကြသည်။

ထိုင်ဝမ်ကျွန်းပတ်လည် တရုတ်စစ်ရေးလေ့ကျင့် (BBC)

ထိုင်ဝမ်ကို ၎င်း၏ပိုင်နက် နယ်မြေအဖြစ် မှတ်ယူထားသော တရုတ်သည် ပြီးခဲ့သည့် ဩဂုတ်လ၌ အမေရိကန် အောက်လွှတ်တော်ဥက္ကဋ္ဌ နန်စီပလိုစီ၏ ခရီးစဉ်နောက်ပိုင်း ဒေါသတကြီးဖြင့် စစ်ရေးလေ့ကျင့်မှုများ ပြုလုပ်ခဲ့ သည်။

နောက်ပိုင်းတွင် ထိုင်ဝမ်ကျွန်းတဝိုက် တရုတ်စစ်တပ်၏ လှုပ်ရှားမှုများမှာ အတိုင်းအတာတစ်ခုအထိ လျော့ကျ သွားခဲ့သော်လည်း တရုတ်စစ်လေယာဉ်များက ထိုင်ဝမ်ရေလက်ကြား အလယ်မျဉ်းအထိ ပုံမှန်ပျံသန်းလျက်ရှိ သည်။

အဆိုပါမျဉ်းကို ဖြတ်သန်း၍ တရုတ်တိုက်လေယာဉ် ၈ စီး ဝင်ရောက်ပျံဝဲခဲ့ကြောင်း ထိုင်ဝမ်က အောက်တိုဘာ ၅ ရက်တွင် သတင်းထုတ်ပြန်ခဲ့သည်။

တရုတ်စစ်ဆင်ရေး လှုပ်ရှားမှုများသည် ထိုင်ဝမ်၏ အချုပ်အခြာအာဏာကို ထိပါးပြီး အင်ဒို-ပစိဖိတ်ဒေသတွင်း ငြိမ်းချမ်းရေးနှင့်တည်ငြိမ်ရေးကို ခြိမ်းခြောက်နေကြောင်း သမ္မတ ဆိုင်အင်ဝမ်က ပြောကြားခဲ့သည်။

“နိုင်ငံတစ်နိုင်ငံ (သို့မဟုတ်) ဒေသတစ်ခုအပေါ် ခြိမ်းခြောက်နေတဲ့ သမိုင်းကြောင်းယှဉ်ပြီး လက်ရှိဖြစ်ရပ်တွေကို ကျမတို့ နားလည်ပါတယ်” ဟု ၎င်းက ဆက်လက် ပြောကြားခဲ့သည်။

Source: Reuters