CNI International News
မနီလာ၊အောက်တိုဘာ ၆
လာမည့် နိုဝင်ဘာလတွင် ကျင်းပမည့် အရှေ့တောင်အာရှနိုင်ငံများအသင်း (အာဆီယံ) အစည်းအဝေးတွင် မြန်မာ နိုင်ငံ အကျပ်အတည်းအတွက် မြန်မာ့တပ်မတော် ကိုယ်စားလှယ်ကို စားပွဲဝိုင်းပေါ်ခေါ်ဖို့ ချဉ်းကပ်မှုအသစ် တစ်ခုအား အဆိုပြုသွားမည်ဟု ဖိလစ်ပိုင်သမ္မတ မားကို့စ်ဂျူနီယာက ပြောကြားခဲ့ကြောင်း Channel News Asia က ရေးသားဖော်ပြထားသည်။
ဖိလစ်ပိုင်သမ္မတ မားကို့စ်ဂျူနီယာသည် မနီလာမြို့မှာ နိုင်ငံခြားသတင်းထောက်များနှင့် အောက်တိုဘာ ၅ ရက် တွင် တွေ့ဆုံစဉ် ပြောကြားခဲ့ခြင်း ဖြစ်သည်။
တပ်မတော်က အာဏာရယူပြီးနောက် ပြည်တွင်းဆူပူအုံကြွမှုများ ဖြစ်ပွားခဲ့ပြီး ယမန်နှစ် ဧပြီလတွင် အာဆီယံနှင့် သဘောတူခဲ့သည့် ငြိမ်းချမ်းရေးအစီအစဉ် အချက် ၅ ချက် အကောင်အထည်ဖော်ဖို့ ပျက်ကွက်ခဲ့သည့် နစက အစိုးရကို ဒေသတွင်း ထိပ်သီး အစည်းအဝေးများ တက်ရောက်ခြင်းမှ တားမြစ်ခဲ့သည်။
၂၀၂၁ ခုနှစ်၊ ဧပြီ ၂၄ ရက်က ကျင်းပသည့် အာဆီယံ အစည်းအဝေးကိုတွေ့ရစဉ်
အာဆီယံ၏ ပုံမှန်မဟုတ်သော တင်းမာသည့် ရပ်တည်ချက်ကြောင့် မြန်မာ ဗိုလ်ချုပ်ကြီးများသည် အာဆီယံ အစီအစဉ်ကို လိုက်နာရန် ရည်ရွယ်ထားကြောင်း ပြောကြားခဲ့သော်လည်း အကြမ်းဖက်သမားဟု ၎င်းတို့ခေါ်ဝေါ် သည့် ဒီမိုကရေစီတော်လှန်ရေး လှုပ်ရှားသူများနှင့် တွေ့ဆုံဆွေးနွေးရန် တောင်းဆိုချက်ကိုမူ လက်မခံကြောင်း ငြင်းဆိုခဲ့ကြသည်။
“အနည်းဆုံးတော့ တပ်မတော် ကိုယ်စားလှယ်တွေကို စားပွဲဝိုင်းပေါ်ထိုင်ဖို့ ခိုင်မာတဲ့ အဆိုပြုချက်တချို့ တင်ပြဖို့ အချိန်တန်ပြီ။ ဒါကြောင့် ဒါတွေကို ကျနော်တို့ စပြီး ဆွေးနွေးနိုင်ပါတယ်” ဟု မားကို့စ်က ပြောကြားခဲ့သည်။
လက်ရှိ အာဆီယံဥက္ကဋ္ဌ ကမ္ဘောဒီးယားနိုင်ငံသည် လာမည့် အာဆီယံခေါင်းဆောင်များ ထိပ်သီး အစည်းအဝေးများ တွင် မြန်မာကိုယ်စားပြု တက်ရောက်ရန် နိုင်ငံရေးမှ မဟုတ်သည့် ပုဂ္ဂိုလ်တစ်ဦးကို အမည်စာရင်း တင်သွင်းရန် နစကထံ တောင်းဆိုထားကြောင်း ရိုက်တာသတင်းဌာနကို အတည်ပြုခဲ့သည်။
“နစကက ထိပ်သီးအစည်းအဝေးကို ဘယ်သူ့ကိုမှ မစေလွှတ်ဘူးလို့ ငြင်းဆိုထားပါတယ်” ဟု ကမ္ဘောဒီးယား နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူ ချမ်ဆောင်နရီ (Chum Sounry) က ပြောသည်။
Source: Reuters, Channel News Asia
