CNI International News
တီဟီရန်၊ ဇန်နဝါရီ ၂၂
အမေရိကန်အနေဖြင့် အီရန်နိုင်ငံအပေါ် တိုက်ခိုက်မှုများ ထပ်မံပြုလုပ်လာလျှင် အီရန်သည် ရှိသမျှအင်အား အကုန်ဖြင့် ပြန်လည် တိုက်ခိုက် သွားမည်ဖြစ်ကြောင်း အီရန်နိုင်ငံခြားရေးဝန်ကြီး အဘတ်စ် အာရက်ချီ (Abbas Araghchi)က အမေရိကန်ကို သတိပေးခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။
အမေရိကန်သမ္မတ ဒေါ်နယ်ထရမ့် (Donald Trump) က အီရန်အပေါ် ခြိမ်းခြောက်မှုများ ပြုလုပ်ခဲ့ပြီးနောက် တစ်ရက်အကြာတွင် အာရက်ချီ၏ သတိပေးချက် ထွက်ပေါ်လာခြင်းဖြစ်သည်။
“တကယ်လို့ နောက်တစ်ကြိမ် တိုက်ခိုက်ခံရမယ်ဆိုရင် ကျနော်တို့ရဲ့ အင်အားတောင့်တင်းတဲ့ လက်နက်ကိုင် တပ်ဖွဲ့တွေဟာ ရှိသမျှအင်အား အကုန်နဲ့ ပြန်လည်တိုက်ခိုက်ဖို့ ဝန်လေးနေမှာ မဟုတ်ပါဘူး” ဟု အာရက်ချီက လူမှုမီဒီယာတွင် ရေးသားခဲ့သည်။
ထိုသတိပေးချက်သည် ပြီးခဲ့သည့်နှစ် ဇွန်လအတွင်း အစ္စရေးက အီရန်အပေါ် ဆင်နွှဲခဲ့သည့် ၁၂ ရက်ကြာ စစ်ပွဲကို ရည်ညွှန်း ပြောဆိုခြင်းဖြစ်သည်။
ယခုပြောကြားချက်သည် ခြိမ်းခြောက်မှု မဟုတ်ဘဲ မိမိအနေဖြင့် ပွင့်ပွင့်လင်းလင်း အသိပေးရန် လိုအပ်သည်ဟု ယူဆထားသည့် ပကတိ အခြေအနေသာဖြစ်ကြောင်း၊ မိမိသည် သံတမန်တစ်ဦးဖြစ်သလို စစ်မှုထမ်းဟောင်း တစ်ဦးလည်း ဖြစ်သဖြင့် စစ်ပွဲကို စက်ဆုပ်ရွံရှာကြောင်း အာရက်ချီက ချေပပြောဆိုခဲ့သည်။
“အင်အားအပြည့်နဲ့ ထိပ်တိုက်ရင်ဆိုင်မှုမျိုး ထပ်ဖြစ်လာခဲ့ရင် ဒေသတစ်ခုလုံးကို ကူးစက်သွားနိုင်တဲ့ ပြင်းထန်တဲ့ စစ်ပွဲဖြစ်လာမှာဖြစ်ပြီး ကမ္ဘာတစ်ဝန်းမှာရှိတဲ့ သာမန်ပြည်သူတွေကိုလည်း သက်ရောက်မှု ရှိလာပါလိမ့်မယ်”ဟု အာရက်ချီက ရေးသာခဲ့သည်။
အီရန် ဒရုန်းတွေကိုတွေ့ရစဉ်
ပြီးခဲ့သည့် သီတင်းပတ်က အီရန်နိုင်ငံသည် အမေရိကန်၏ တိုက်ခိုက်မှုများ ဖြစ်လာနိုင်သည့်အတွက် ၎င်း၏ လေပိုင်နက်ကို ပိတ်ခဲ့သည်။
အရှေ့အလယ်ပိုင်းနိုင်ငံများမှ သံတမန်များ၊ အထူးသဖြင့် ပင်လယ်ကွေ့ အာရပ်နိုင်ငံများမှ သံတမန်များကလည်း အီရန်ကို မတိုက်ခိုက်ရန် အမေရိကန်သမ္မတ ထရမ့်ကို ဝိုင်းဝန်းဖျောင်းဖျခဲ့ကြသည်။
သင်္ဘောများကို ခြေရာခံသည့် အချက်အလက်များအရ ပြီးခဲ့သည့် ရက်ပိုင်းအတွင်းက တောင်တရုတ်ပင်လယ်တွင် ရှိနေခဲ့သည့် အမေရိကန် လေယာဉ်တင်သင်္ဘော USS Abraham Lincoln သည် ဇန်နဝါရီ ၂၀ ရက်၌ တောင် တရုတ် ပင်လယ်နှင့် အိန္ဒိယသမုဒ္ဒရာကို ဆက်သွယ်ထားသော မလက္ကာရေလက်ကြားကို ဖြတ်သန်းမောင်းနှင် ခဲ့သည်ကို တွေ့ရှိရသည်။
ထိုလေယာဉ်တင်သင်္ဘော ဦးဆောင်သည့် စစ်ဆင်ရေးအဖွဲ့သည် အရှေ့အလယ်ပိုင်းသို့ ဦးတည်နေခြင်းဖြစ်သည်ဟု အမေရိကန် ကာကွယ်ရေးအရာရှိများက တရားဝင် ထုတ်ဖော်ပြောဆိုခြင်း မရှိသော်လည်း လက်ရှိ အိန္ဒိယသမုဒ္ဒရာ အတွင်း ရောက်ရှိနေသော တည်နေရာအရ အရှေ့အလယ်ပိုင်းဒေသသို့ ရောက်ရှိရန် ရက်ပိုင်းသာ လိုတော့သည့် အနေအထားတွင် ရှိနေကြောင်း သိရသည်။
Source: အယ်လ်ဂျာဇီးယား
