CNI News

၂၀၂၄ ခုနှစ်၊ နိုဝင်ဘာ ၂၈

အမျိုးသားညီညွတ်ရေးအစိုးရ (NUG) အနေဖြင့် ပြည်ပရောက် အစိုးရအဖွဲ့ဝင်များအားလုံး ပြည်တွင်းသို့ ပြန်လာစု ကြရန် ယာယီသမ္မတ ဒူဝါလရှီးလ၏ ပြောဆိုမှုသည် အမေရိကန်၌ ထရမ့်၏ မူဝါဒ အပြောင်းအလဲများကြောင့် ဖြစ်နိုင်သည်ဟု နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

ထိုသို့ ပြည်တွင်း(မြန်မာနိုင်ငံ) ပြန်လာခိုင်းခြင်းသည် နယ်စပ်ဒေသ အနီးအနားသို့ ပြောခြင်းဖြစ်နိုင်ပြီး ထရမ့်၏ ပြည်ဝင်ခွင့် အပါအဝင် မူဝါဒ အပြောင်းအလဲများ ရှိနိုင်သည့်အတွက် ထိုသို့ စဉ်းစားလာကြခြင်း ဖြစ်နိုင်ကြောင်း ၎င်းက ပြောသည်။

ဦးသန်းစိုးနိုင်က “ပြည်တွင်းပြန်လာဖို့ဆိုတာ စစ်ကောင်စီ လက်အောက်ကို ပြန်လာဖို့ပြောတာ မဟုတ်ပါဘူး။ နယ်နိမိတ် အနီးအနား ပတ်ဝန်းကျင်ကို ပြန်လာဖို့ပေါ့။ ဘာကြောင့်လဲဆိုတော့ ထရမ့်ရဲ့ ပြည်ဝင်ခွင့်တွေ၊ နေရာ ရွှေ့ပြောင်း အခြေချတဲ့ မူဝါဒတွေနဲ့ ပတ်သက်ပြီး အပြောင်းအလဲတွေ ရှိနိုင်တဲ့အတွက် အဲဒီလို စဉ်းစားလာကြ တာလို့ ယူဆပါတယ်။ အဲဒီအပြောင်းအလဲကတော့ လွယ်ကူမှုကတော့ မရှိနိုင်ဘူးပေ့ါလေ။ အရင်အစိုးရတွေ လက်ထက်တုန်းက ဝါရှင်တန်မှာ NUG အစိုးရကို တရားဝင် ရုံးဖွင့်ခွင့်ပြုထားတဲ့ကိစ္စတွေ ထိခိုက်လာနိုင်တာပေါ့ လေ။ တရားဝင် ပေးပါတော့မလားဆိုတာ စဉ်းစားစရာ ဖြစ်လာတယ်။ အဲဒီလို တရားဝင် မပေးတော့ဘူးဆိုရင် NUG အရှိန်အဝါကတော့ ထိခိုက်လာနိုင်တာပေါ့။ အမေရိကန်က အဲဒီလို လုပ်လာပြီဆိုရင် ဥရောပမှာရှိတဲ့ NUG ကို ထောက်ခံတဲ့ အစိုးရတွေ အနေနဲ့လည်း NUG ကို အသိအမှတ်ပြုရေးနဲ့ ပတ်သက်တဲ့ အလားအလာကတော့ မှေးမှိန်ကျဆင်းလာလိမ့်မယ်လို ခန့်မှန်းလိုရပါတယ်” ဟု CNI သတင်းဌာနသို့ ပြောသည်။

ဒူဝါလရှီးလကို တွေ့ရစဉ်

NUG အစိုးရအဖွဲ့ဝင်များအနေဖြင့် နယ်စပ်ဒေသများသို့ ပြန်လည် ဝင်ရောက်လာမည် ဆိုပါကလည်း လွယ်ကူမည့် ကိစ္စမဟုတ်ကြောင်း နိုင်ငံရေးလေ့လာသုံးသပ်သူ ၎င်းက သုံးသပ်သည်။

နိုဝင်ဘာ ၂၆ ရက်နေ့က အွန်လိုင်းတွင် ပြုလုပ်သည့် NUG အစိုးရအဖွဲ့ အစည်းအဝေး အဖွင့်မိန့်ခွန်းတွင် ယာယီ သမ္မတ ဒူဝါလရှီးလမှ NUG အနေဖြင့် အဝေးရောက်အစိုးရအဖြစ် ဆက်ရှိ၍မရတော့ဘဲ လက်တွေ့ကျကျ မြေပြင် မှာ အင်အားတည်ဆောက်ရမည်ဖြစ်ကြောင်း ပြောကြားခဲ့ခြင်းဖြစ်သည်။

ထို့အပြင် နိုင်ငံတကာ အသိုင်းအဝိုင်းအတွက် အချိန်ယူသင့်သလောက် ယူပြီးပြီဖြစ်သည့်အတွက် အစိုးရအဖွဲ့ဝင် များအားလုံး ပြည်တွင်းမှာ လာစုကြရန် ၎င်းက တိုက်တွန်းခဲ့သည်။

ထရမ့်သည် အမေရိကန်သမ္မတအဖြစ် ခန့်အပ်မခံရသေးသဖြင့် ထိုသို့ ပြည်တွင်း ပြန်ခေါ်ခြင်းသည် အမေရိကန် မူဝါဒနှင့် တိုက်ရိုက်သက်ဆိုင်မှု မရှိနိုင်ကြောင်း၊ NUG အနေဖြင့်လည်း သဘောတရားနှင့် လက်တွေ့ ထပ်တူကျ မည်ဆိုပါက ကောင်းမွန်ကြောင်း နိုင်ငံရေးလေ့လာသုံးသပ်သူ တရားလွှတ်တော်ရှေ့နေ ဦးကြီးမြင့်က CNI သတင်း ဌာနသို့ ပြောသည်။

NUG အဖွဲ့ဝင်များကို တွေ့ရစဉ်

၎င်းက “NUG ရယ် KNU ရယ်၊ ကယားရယ်၊ ချင်းရယ်၊ ကရင်ရယ် ထုတ်ထားတဲ့ အချက် ၈ ချက်ရှိတယ်။ တစ်က စစ်ကောင်စီက ၂၀၀၈ အခြေခံဥပဒေကို သူတို့ လက်မခံဘူး။ နောက် စစ်တပ်က စစ်တန်းလျားကို ပြန်ရမယ်။ အဲဒါပဲ အဓိကက အဲဒီ ၂ ချက်ပဲ။ အဲဒီ ၂ ချက်ကို စစ်ကောင်စီကလည်း ဘယ်လိုမှ လက်ခံမှာမဟုတ်ဘူး။ အဲဒီတော့ တွေ့ဆုံဆွေးနွေးရေးဆိုတာ ဘယ်လိုမှ ဖြစ်လာနိုင်စရာ အကြောင်းမရှိဘူးလို့မြင်တယ်။ စစ်ကောင်စီကလည်း သူ့ အလုပ်ကို သူလုပ်တာပဲ။ တရုတ်က သူ့ကို လုံးဝ ပတ်ထားလိုက်ပြီ။ အသုံးချဖို့ ပတ်တာနော်။ သူ့စီးပွားရေးအတွက် ပတ်တာ။ သူ့စီးပွားရေးက အရမ်းတွေ ကြပ်လာပြီ။ သူ့အကျိုးစီးပွားအတွက် သူက ပတ်ထားတာ။ ကျန်တဲ့လူတွေ က ဘာလုပ်မလဲ ဆိုတဲ့အခါ အဲဒီနှစ်ယောက် ပတ်ထားတဲ့ အခြေအနေတွေကို ကြည့်ပြီးတော့ ဗျူဟာကို ချကျရ မယ်ပေါ့” ဟု ပြောသည်။

တရုတ်သည် တော်လှန်ရေးအဖွဲ့များနှင့် နစကအပေါ်တွင် သြဇာလွှမ်းမိုးမှုများ ကြီးကြီးမားမား ရှိနေကြောင်း၊ ၎င်းအား လျစ်လျူရှု၍မရကြောင်း၊ ထိုအခြေအနေမှ ဘေးထွက်ဆိုးကျိုး မဖြစ်အောင် စဉ်းစားရန်လိုကြောင်း NUG ၏ ယာယီသမ္မတ ဒူဝါလရှီးလက ပြောသည်။

ထို့အပြင် တရုတ်၏ ဖိအားများကို လျစ်လျူရှု၍မရဘဲ ၎င်းအခြေအနေကနေ ဘေးထွက်ဆိုးကျိုး မဖြစ်အောင် စဥ်းစားဖို့လိုအပ်သလို ယခင်ကလို လုပ်ရိုးလုပ်စဥ်အတိုင်း လုပ်ဆောင်၍ မရတော့ဘဲ ဖောက်ထွက်စဥ်းစားကာ လက်တွေ့ကျကျ စဥ်းစားဆောင်ရွက်ဖို့ လိုအပ်သည်ဟု ၎င်းက ပြောကြားခဲ့သည်။