CNI News
၂၀၂၃ ခုနှစ်၊ မေ ၄
စစ်ကိုင်းတိုင်းဒေသကြီး အထက်ပိုင်း ဟုမ္မလင်းမြို့နယ်၊ မြင်သာကျေးရွာအနီးတွင် ဟုမ္မလင်း ပြည်သူ့ကာကွယ်ရေး တပ် (HPDF)နှင့် ဟုမ္မလင်းဒေသအတွင်း လှုပ်ရှားနေသော PDF ပူးပေါင်းတပ်နှင့် မြန်မာ့တပ်မတော်တို့အကြား ယနေ့ (မေလ ၄ ရက်) နံနက် ၁၀ နာရီခန့်က စတင် တိုက်ပွဲဖြစ်ပွားခဲ့ကြောင်း သိရသည်။
HPDF မှ မြင်သာကျေးရွာ အတွင်းသို့ ဝင်ရောက် စီးနင်းခဲ့ပြီးနောက် ယနေ့ ညနေ ၄ နာရီအထိ တပ်မတော်က လေယာဉ်ဖြင့် ပစ်ခတ်နေဆဲဖြစ်ကြောင်း ဒေသခံတစ်ဦးက CNI သတင်းဌာနကို ပြောသည်။
HPDF တပ်ဖွဲ့၀င်များကိုတွေ့ရစဉ်
၎င်းက “ဒေသခံတွေ ပိတ်မိနေတာ၊ လေယာဉ်နဲ့ ဗုံးကြဲတာ အိမ်နောက်ဖေး ၄ လုံးလောက်ကျတာ၊ ခုထိ ကြဲနေတုန်း၊ မြင်သာတစ်ရွာလုံး PDF ဝင်စီးနေတာ” ဟု ပြောသည်။
ပြီးခဲ့သည့် ဧပြီ ၂၈ ရက်မှ စတင်ပြီး ဟုမ္မလင်းမြို့နယ်အတွင်း တိုက်ပွဲများ ဖြစ်ပွားနေကာ လက်ရှိအချိန်အထိ စစ်ရေးအရှိန် မြင့်နေဆဲဖြစ်ကြောင်း မြန်မာ့တပ်မတော်နှင့် တခြား လက်နက်ကိုင်အဖွဲ့များ တပ်ထိုင်သော နေရာများ၊ လုံခြုံရေး ကင်းထိုးသော နေရာများမှ ဝေးဝေးရှောင်ဖို့ HPDF မှ ယနေ့ မေလ ၄ ရက်နေ့မှာ ထုတ်ပြန် ခဲ့သည်။
လက်ရှိတွင် ဟုမ္မလင်းမြို့နယ်အတွင်း ဖုန်းလိုင်းများ ဖြတ်တောက်နေကြောင်း သိရသည်။
မြန်မာ့တပ်မတော်နှင့် ဟုမ္မလင်းပြည်သူ့ကာကွယ်ရေးတပ် (HPDF) ပူးပေါင်းတပ်တို့အကြား ဟုမ္မလင်းမြို့နယ် အတွင်း၌ မကြာခဏ တိုက်ပွဲများ ဖြစ်ပွားလေ့ရှိသည်။
